Vijana Huuliza . . .

Ninaweza kuepukaje Ponografia?

“Mvulana mmoja shuleni kwetu alikuwa amebandika picha ya msichana aliye uchi kwenye mlango wa kabati lake. Kabati hilo lilikuwa karibu na langu.”—Robert.a

“Nilikuwa nikifanya utafiti kwenye Intaneti kwa ajili ya ripoti ya shule nilipopata kituo cha ponografia.”—Annette.

WAZAZI wako walipokuwa na umri kama wako, mtu aliyetaka kutazama ponografia alihitaji kuitafuta sana. Siku hizi ni kana kwamba ponografia inakutafuta. Kama vile Robert, aliyenukuliwa hapo juu, huenda umejikuta ukitazama ponografia ya mwanafunzi mwenzako. Au kama Annette, huenda ukaipata bila kukusudia kwenye Intaneti. Msichana mmoja mwenye umri wa miaka 19 anasema, “Nyakati nyingine ninapitia-pitia Intaneti tu au kununua vitu kwenye Intaneti au hata kuchunguza tu habari za akaunti yangu ya benki kisha ghafula ponografia inajitokeza!”b

Hilo si jambo la kushangaza. Katika uchunguzi mmoja, asilimia 90 ya vijana walio kati ya umri wa miaka 8 na 16 walisema kwamba walipata ponografia kwenye Intaneti bila kukusudia, mara nyingi walipokuwa wakifanya kazi za shuleni! Ukweli ni kwamba, kukiwa na mamilioni ya vituo vya Intaneti vilivyo na mamia ya mamilioni ya sehemu zenye habari za wazi kuhusu ngono, ponografia inapatikana kwa urahisi sana. Inaweza pia kupatikana kupitia simu ya mkononi. Denise mwenye umri wa miaka 16 anasema, “Shuleni kwetu ni jambo la kujisifu. Jumatatu mazungumzo huwa kuhusu, ‘Una picha gani kwenye simu yako ulizotoa kwenye Intaneti mwishoni mwa juma?’”

Kwa kuwa unajua watu wengi sana wanatazama ponografia, huenda ukajiuliza, ‘Je, ponografia ina madhara?’ Sababu kadhaa zinaonyesha kwamba jibu ni ndiyo. Fikiria sababu tatu tu:

◼ Ponografia huwashushia heshima wale wanaoitayarisha na wale wanaoitazama.—1 Wathesalonike 4:3-5.

◼ Kupendezwa na ponografia ni kama kuiga mapendezi ya ngono yasiyo ya asili ambayo roho waovu wa siku za Noa walikuwa nayo.—Mwanzo 6:2; Yuda 6, 7.

◼ Mara nyingi kutazama ponografia huwa hatua ya kwanza inayomwongoza mtu kufanya dhambi zinazohusu ngono.—Yakobo 1:14, 15.

Ponografia huwaathiri vibaya wale wanaonaswa nayo. Fikiria mifano miwili tu:

“Niliona ponografia kwa mara ya kwanza nilipokuwa mdogo, na imekuwa vigumu sana kuachana nayo. Miaka mingi sana imepita, lakini picha hizo zimebaki katika kumbukumbu langu. Ni kana kwamba mawazo hayo huwa tu katika akili, na hakuna wakati dhamiri inakuwa safi. Ponografia inakufanya usijiheshimu na inaweza kukufanya ujihisi mchafu na mtu asiyefaa. Nyakati zote unakuwa na mzigo wa siri ambao lazima ubebe.”—Erica.

“Nilikuwa mraibu wa ponografia kwa miaka 10, na sasa miaka 14 imepita tangu nilipoacha kuitazama. Lakini hata sasa, lazima nipambane kila siku. Ingawa tamaa imepungua sana, bado ipo. Udadisi bado upo. Picha bado zimo akilini. Ninajuta kwa nini nilianza kufanya jambo hilo. Mwanzoni ilionekana kama haina madhara. Lakini sasa ninaelewa ukweli wa mambo. Ponografia inadhuru, ni potovu, na inawashushia heshima watu wote wanaohusika. Hata wale wanaoitetea waseme nini, hakuna kitu chochote kizuri kuhusu ponografia.”—Jeff.

Fanya Uchunguzi

Unaweza kuepukaje kupata ponografia hata bila kukusudia? Kwanza chunguza hali.

Unakutana na ponografia mara nyingi kadiri gani bila kukusudia?

□ Sikutani nayo □ Mara kwa mara

□ Kila juma □ Kila siku

Mara nyingi hilo hutukia wapi?

□ Intaneti □ Shuleni

□ TV □ Mahali pengine

Je, kuna njia hususa unayopata mambo hayo?

Fikiria mifano ifuatayo:

Je, wanafunzi wenzako wanaweza kukutumia ponografia kupitia barua-pepe au simu ya mkononi? Kujua jambo hilo kunaweza kukusaidia ufute ujumbe kama huo bila hata kuufungua.

Unapotumia Intaneti, je, habari hujitokeza tu unapoandika maneno fulani ili kutafuta habari fulani? Kujua jambo hilo kunaweza kukusaidia kuandika habari hususa zaidi unapotafuta mambo.

Hapa chini, andika hali zozote ambazo zilikufanya upate ponografia.

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

Ukifikiria mambo ambayo umeandika hapo juu, unaweza kufanya nini ili kupunguza nyakati ambazo unapata ponografia bila kukusudia? (Andika mawazo yako hapa.)

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

Wewe hufanya nini unapopata ponografia?

□ Mimi hugeuka mara moja.

□ Udadisi hunifanya niitazame kidogo.

□ Mimi huendelea kuitazama na hata kutafuta nyingi zaidi.

Ikiwa umetia alama kwenye sehemu ya pili au ya tatu, unaweza kujiwekea azimio gani?

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

Kuacha Zoea Hilo

Baada ya muda, wengine ambao hupata ponografia bila kukusudia husitawisha zoea la kuitazama. Kuacha zoea hilo si rahisi. Jeff, aliyenukuliwa awali anasema: “Kabla ya kujifunza Biblia, nilikuwa nimetumia sana karibu dawa zote za kulevya. Lakini kati ya uraibu wote niliokuwa nao, kutazama ponografia ulikuwa ni uraibu mgumu zaidi kuuacha.”

Ikiwa una zoea la kutazama ponografia, usikate tamaa. Unaweza kupata msaada. Jinsi gani?

◼ Elewa ponografia ni nini. Ni mbinu ya kishetani ya kushushia heshima kitu ambacho Yehova aliumba ili kiheshimike. Kuelewa ponografia kwa njia hiyo kutakusaidia ‘kuchukia yaliyo mabaya.’—Zaburi 97:10.

◼ Fikiria madhara. Ponografia huharibu ndoa. Inawashushia heshima wanawake na wanaume. Inamshushia heshima mtu anayeitazama. Kwa sababu nzuri Biblia inasema: “Mtu mwerevu ni yule ambaye ameona msiba na kujificha.” (Methali 22:3) Andika hapa chini mfano mmoja wa msiba unaoweza kukupata ukiwa na zoea la kutazama ponografia.

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

◼ Jiwekee azimio. “Nimejiwekea ahadi nzito sitamtazama msichana kwa tamaa,” akasema mwanamume mwaminifu Ayubu. (Ayubu 31:1, Today’s English Version) Zifuatazo ni ‘ahadi nzito’ ambazo unaweza kujiwekea:

□ Sitatumia Intaneti nikiwa peke yangu katika chumba.

□ Nitafunga mara moja kituo chochote kinachoonyesha ponografia.

□ Nikirudia tena zoea hilo nitazungumza na rafiki mkomavu.

Je, unaweza kufikiria azimio moja au mawili ambayo yanaweza yakakusaidia kushinda tatizo la kutazama ponografia? Tafadhali yaandike hapa chini.

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

◼ Sali kuhusu jambo hilo. Mtunga-zaburi alisali hivi kwa Yehova: “Uyafanye macho yangu yapite ili yasione jambo lisilofaa.” (Zaburi 119:37) Kwa kweli, inaweza kuwa vigumu kujizuia usitazame kitu kinachovutia mwili wenye dhambi. Lakini Yehova Mungu anakutaka ufaulu, naye atakupa “nguvu zinazopita zile za kawaida” ili uweze kufanya kilicho sawa!—2 Wakorintho 4:7.

◼ Zungumza na mtu mwingine. Je, umeaibika? Labda! Lakini fikiria jinsi utakavyopumzika ukiuweka chini mzigo huo. Mtu unayezungumza naye anaweza kuwa kama “ndugu aliyezaliwa kwa ajili ya wakati wa taabu.” (Methali 17:17) Mara nyingi kuchagua mtu ambaye unaweza kuzungumza naye ni hatua muhimu ya kuacha zoea hilo!

Ikiwa una zoea la kutazama ponografia, andika jina la mtu mkomavu ambaye unahisi unaweza kumweleza kuhusu jambo hilo.

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

Uwe na hakika kwamba unaweza kufaulu kukabiliana na ponografia. Kwa kweli, kila mara unapoepuka kuitazama, umepata ushindi mkubwa. Mweleze Yehova kuhusu ushindi huo, na umshukuru kwa ajili ya nguvu ambazo amekupa. Sikuzote kumbuka kwamba kwa kuepuka mtego wa ponografia, unaufanya moyo wa Yehova ushangilie!—Methali 27:11.

[Maelezo ya Chini]

MAMBO YA KUFIKIRIA

◼ Ponografia inashushaje heshima ya kitu ambacho kina heshima?

◼ Ni mambo gani unayoweza kufanya ili kujilinda dhidi ya ponografia?

◼ Unaweza kumsaidiaje ndugu au dada yako aliye na tatizo la ponografia?

[Picha katika ukurasa wa 12, 13]

Je, wanafunzi wenzako wanaweza kukutumia habari chafu kupitia simu ya mkononi?