SURA YA 8
Ninaweza Kupata Marafiki Wazuri Jinsi Gani?
“Ninapokuwa na hasira, ninahitaji mtu wa kumweleza ninavyohisi. Ninapokuwa na huzuni, ninahitaji mtu wa kunifariji. Ninapokuwa na furaha, ninahitaji kuwa na mtu ambaye tunaweza kufurahi pamoja. Kwangu, marafiki ni wa maana.”—Brittany.
IMESEMWA kwamba watoto wanahitaji mtu wa kucheza nao, lakini vijana wanahitaji marafiki. Kuna tofauti gani?
Mtu wa kucheza naye ni mtu wa kuwa naye tu.
Rafiki ni mtu mwenye viwango sawa na vyako.
Biblia inasema kwamba “rafiki wa kweli anapenda nyakati zote, naye ni ndugu aliyezaliwa kwa ajili ya wakati wa taabu.” (Methali 17:17) Andiko hilo linafafanua urafiki wa karibu zaidi kuliko urafiki kati yako na watoto wengine mliokuwa mkicheza pamoja nao!
Ukweli wa mambo: Unapozidi kuwa mtu mzima, unahitaji marafiki ambao
1. Wana sifa zenye kuvutia
2. Wanaishi kupatana na viwango vinavyofaa
3. Wana uvutano mzuri kwako
Swali: Unaweza kupata jinsi gani marafiki wa aina hiyo? Acheni tuchunguze matakwa hayo matatu, moja baada ya lingine.
Takwa la 1—Sifa Zenye Kuvutia
Unachopaswa kujua. Si kila mtu anayedai kuwa rafiki ni rafiki wa kweli. Biblia hata inasema kwamba “kuna rafiki wanaoelekea kuvunjana vipande-vipande.” (Methali 18:24) Huenda maneno hayo yakaonekana kuwa ni kutia chumvi. Lakini fikiria: Kuna mtu aliyewahi kujifanya “rafiki” kwa sababu za kichoyo? Umewahi kuwa na “rafiki” aliyekusengenya au kueneza porojo za uwongo kukuhusu? Hali kama hizo zinaweza kukufanya usimwamini mtu yeyote.a Sikuzote kumbuka kwamba sifa za marafiki ni za maana zaidi kuliko wingi wa marafiki!
Unachoweza kufanya. Chagua marafiki walio na sifa zinazostahili kuigwa.
“Kila mtu anasema mambo mazuri kumhusu rafiki yangu Fiona. Ningependa watu waseme mambo mema kunihusu pia. Ningependa kuwa na sifa kama zake. Hayo ndiyo mambo yanayonipendeza.”—Yvette, mwenye umri wa miaka 17.
Jaribu hili.
1. Soma Wagalatia 5:22, 23.
2. Jiulize, ‘Marafiki wangu wana sifa za “matunda ya roho”?’
3. Andika hapa chini majina ya marafiki wako wa karibu. Kando ya kila jina, andika sifa inayomfafanua vizuri rafiki huyo.
Jina
․․․․․
Sifa
․․․․․
Dokezo: Ikiwa ni sifa mbaya tu zinazokujia akilini, huenda basi huu ndio wakati wa kuwatafuta marafiki wazuri!
Takwa la 2—Viwango Vizuri
Unachopaswa kujua. Ikiwa hangaiko lako kubwa ni kuwa tu na marafiki, yaelekea utachagua marafiki wabaya. Biblia inasema: “Anayeshirikiana na wajinga atapatwa na mabaya.” (Methali 13:20) “Wajinga” wanaozungumziwa hapa si wale wanaoanguka mitihani au ambao si werevu. Badala yake, ni wale wanaopuuza mashauri yanayofaa na kufuata mwenendo uliopotoka kiadili. Hao ndio marafiki unaopaswa kuepuka!
Unachoweza kufanya. Badala ya kuwa rafiki ya kila mtu, chagua. (Zaburi 26:4) Haimaanishi uwe na chuki. Badala yake tumia uwezo wako wa kufikiri ili ‘kuona tofauti kati ya mwadilifu na mwovu, kati ya mtu anayemtumikia Mungu na mtu ambaye hajamtumikia.’—Malaki 3:18.
“Ninawashukuru wazazi wangu kwa kunisaidia kupata marafiki—watu wa umri wangu ambao wanaishi kupatana na kanuni za Biblia.”—Christopher, mwenye umri wa miaka 13.
Jibu maswali yafuatayo:
Ninapokuwa na marafiki wangu, mimi huwa na hofu kwamba watajaribu kunilazimisha nifanye jambo ninalojua ni kosa?
□ Ndiyo
□ Hapana
Je, ninasitasita kuwatambulisha marafiki wangu kwa wazazi wangu, nikiogopa kwamba huenda wazazi wangu wakaona kuwa hawafai?
□ Ndiyo
□ Hapana
Dokezo: Ikiwa umejibu ndiyo kwa maswali yaliyo juu, tafuta marafiki walio na viwango vizuri zaidi—wale ambao ni mfano mzuri, wanaoishi kupatana na kanuni za Kikristo.
Takwa la 3—Uvutano Mzuri
Unachopaswa kujua. Biblia inasema: “Ushirika na watu wabaya huharibu tabia njema.” (1 Wakorintho 15:33, Neno—Biblia Takatifu) Kijana anayeitwa Lauren anasema: “Wanafunzi wenzangu wangenikubali ikiwa ningefanya vile walivyotaka. Nilikuwa mpweke, kwa hiyo nikaamua kuwa kama wao ili nikubaliwe.” Lauren aligundua kwamba ukibadili viwango vyako ili tu ukubaliwe na wengine, hakuna tofauti kati yako na visanamu vinavyotumiwa katika mchezo wa chesi, marafiki wako wanakutumia jinsi wanavyotaka. Huko ni kujishusha mno!
Unachoweza kufanya. Kata uhusiano na watu wanaosisitiza ubadili viwango na kuwa jinsi wao wanavyotaka uwe. Ukifanya hivyo, huenda ukajikuta na marafiki wachache; hata hivyo, utakuwa mwenye furaha zaidi na hilo litakuwezesha kupata marafiki wazuri zaidi, watakaokuwa na uvutano mzuri kwako.—Waroma 12:2.
“Rafiki yangu wa karibu, Clint, hufanya maamuzi mazuri na anawajali wengine, na kwa hiyo amenitia moyo sana.”—Jason, mwenye umri wa miaka 21.
Jiulize maswali yafuatayo:
Je, mimi hubadili njia yangu ya kuvaa, kuzungumza, au kutenda kwa njia isiyofaa ili tu niwapendeze marafiki wangu?
□ Ndiyo
□ Hapana
Je, mimi huenda sehemu zinazotiliwa shaka kiadili ambazo singeenda ikiwa si kwa sababu ya marafiki wangu?
□ Ndiyo
□ Hapana
Dokezo: Ikiwa umejibu ndiyo kwa maswali yaliyo katika ukurasa wa 62, omba mashauri kutoka kwa wazazi wako au mtu mwingine mkomavu. Ikiwa wewe ni Shahidi wa Yehova, unaweza kumfikia mzee Mkristo na kumweleza kwamba ungependa kusaidiwa kuchagua marafiki wenye uvutano mzuri.
PATA HABARI ZAIDI KATIKA BUKU LA 2, SURA YA 9
Je, rafiki yako au labda moyo wako unakusukuma ufanye mambo mabaya? Pata kujua jinsi unavyoweza kupinga hali hiyo!
[Maelezo ya Chini]
a Ni kweli kwamba kila mtu hukosea. (Waroma 3:23) Kwa hiyo, rafiki anapokukosea lakini anaonyesha kwamba amejuta kikweli, kumbuka kwamba “upendo hufunika dhambi nyingi.”—1 Petro 4:8.
ANDIKO MUHIMU
“Yuko rafiki anayeshikamana na mtu kwa ukaribu zaidi kuliko ndugu.”—Methali 18:24.
PENDEKEZO
Ukiishi kulingana na viwango vya uadilifu, yaelekea wengine wanaojitahidi kufanya hivyo watakutafuta. Nao watakuwa marafiki wako wakubwa!
JE, WAJUA . . . ?
Mungu hana ubaguzi, hata hivyo, yeye huwachagua kwa uangalifu wale anaowakubali wawe ‘wageni katika hema lake.’—Zaburi 15:1-5.
HATUA ZA KUCHUKUA!
Ili kupata marafiki wazuri, nita ․․․․․
Baadhi ya watu wenye umri mkubwa kuliko wangu ambao ningependa kuwafahamu vizuri zaidi ni akina ․․․․․
Mambo ambayo ningependa kuuliza mzazi (wazazi) wangu kuhusu habari hii ni ․․․․․
UNA MAONO GANI?
● Ni sifa gani ambazo ungependa rafiki yako awe nazo, na kwa nini?
● Ni sifa gani unazohitaji kusitawisha ili uwe rafiki mzuri?
[Blabu katika ukurasa wa 60]
“Wazazi wangu waliponikataza kushirikiana na marafiki fulani, nilijiambia kwamba hao tu ndio ninaotaka kushirikiana nao. Hata hivyo, shauri la wazazi wangu lilikuwa zuri na nilipolifikiria kwa uzito, nilitambua kwamba kuna marafiki wengi wazuri zaidi.”—Cole
[Sanduku katika ukurasa wa 61]
Jaribu Mapendekezo Haya
Zungumza na wazazi wako kuhusu marafiki. Waulize walikuwa na marafiki wa aina gani walipokuwa na umri kama wako. Wanajuta kwa sababu ya marafiki waliokuwa nao? Ikiwa wanajuta, ni kwa nini? Waulize jinsi unavyoweza kuepuka baadhi ya matatizo waliyopata.
Watambulishe marafiki wako kwa wazazi wako. Ikiwa unasita-sita kufanya hivyo, jiulize, ‘Ni kwa nini?’ Kuna jambo fulani kuhusu marafiki wako ambalo unajua wazazi wako hawatapenda? Ikiwa ndivyo, huenda ukahitaji kuchagua marafiki wako kwa uangalifu zaidi.
Kuwa msikilizaji mzuri. Pendezwa na hali njema na mahangaiko ya marafiki wako.—Wafilipi 2:4.
Uwe mwenye kusamehe. Usitazamie ukamilifu. “Sisi sote hujikwaa mara nyingi.”—Yakobo 3:2.
Mpe rafiki yako nafasi. Hakuna haja ya kumng’ang’ania nyakati zote. Marafiki wa kweli watapatikana unapowahitaji.—Mhubiri 4:9, 10.
[Picha katika ukurasa wa 63]
Ukibadili viwango vyako ili tu ukubaliwe na wengine, hakuna tofauti kati yako na visanamu vinavyotumiwa katika mchezo wa chesi, marafiki wako wanakutumia jinsi wanavyotaka