SOMO LA 57
Ukitenda Dhambi Nzito Unapaswa Kufanya Nini?
Ingawa unampenda sana Yehova na unajitahidi kuepuka kufanya jambo lolote ambalo litamuumiza, pindi nyingine utafanya makosa. Hata hivyo, kuna dhambi ambazo ni nzito kuliko dhambi nyingine. (1 Wakorintho 6:9, 10) Ukitenda dhambi nzito, kumbuka kwamba bado Yehova anakupenda; yuko tayari kukusamehe na kukusaidia.
1. Tunapaswa kufanya nini ili kupata msamaha wa Yehova?
Wale wanaompenda Yehova, huhuzunika sana wanapotambua kwamba wamefanya dhambi nzito. Lakini wanapata faraja kupitia ahadi hii ambayo Yehova amewapa watu wake: “Ingawa dhambi zenu ni kama rangi nyekundu, zitafanywa kuwa nyeupe kama theluji.” (Isaya 1:18) Ikiwa tutatubu kikweli, Yehova atatusamehe kabisa. Tunatubu jinsi gani? Tunahuzunika sana kwa sababu ya dhambi tuliyofanya, tunaacha kufanya makosa, na kumsihi Yehova atusamehe. Kisha, tunajitahidi kubadili mawazo yasiyofaa au tabia zilizotuongoza kwenye dhambi, na kujitahidi kuishi kulingana na viwango safi vya Yehova.—Soma Isaya 55:6, 7.
2. Yehova anawatumiaje wazee kutusaidia tunapofanya dhambi?
Tunapotenda dhambi nzito, Yehova anatuambia ‘tuwaite wazee wa kutaniko.’ (Soma Yakobo 5:14, 15.) Wanaume hao waliowekwa rasmi wanampenda Yehova na kondoo wake. Wamezoezwa jinsi ya kutusaidia kurekebisha uhusiano wetu na Yehova.—Wagalatia 6:1.
Wazee wanatusaidiaje tunapotenda dhambi nzito? Wazee wawili au watatu wataturekebisha kwa kutumia Maandiko. Pia, watatupatia madokezo na ushauri unaofaa ili kutusaidia kuepuka kutenda dhambi tena. Mtu aliyetenda dhambi nzito anapokosa kutubu, wazee watamwondoa kutanikoni ili asiwaathiri wengine kutanikoni.
CHIMBA ZAIDI
Jifunze mengi ili uelewe na kuthamini jinsi Yehova anavyotusaidia ikiwa tutatenda dhambi nzito.
3. Kuungama dhambi zetu hutusaidia kurekebisha uhusiano wetu na Yehova
Tunapotenda dhambi yoyote ile tunamuumiza Yehova, hivyo tunapaswa kuungama kwake. Soma Zaburi 32:1-5, kisha mzungumzie swali hili:
Kwa nini ni vizuri tuungame dhambi zetu kwa Yehova badala ya kujaribu kuzificha?
Baada ya kuungama dhambi zetu kwa Yehova, tutapata kitulizo kwa kutafuta msaada kwa wazee. Onyesha VIDEO, kisha mzungumzie swali linalofuata.
Katika video hiyo, wazee walimsaidiaje Canon amrudie Yehova?
Tunapaswa kuzungumza na wazee waziwazi na kwa unyoofu kwa sababu wanataka kutusaidia. Soma Yakobo 5:16, kisha mzungumzie swali hili:
Kwa nini ni rahisi kwa wazee kutusaidia tunapokuwa wanyoofu?
Ungama dhambi zako, uwe mnyoofu kwa wazee wa kutaniko, na ukubali msaada wenye upendo kutoka kwa Yehova
4. Yehova anawaonyesha rehema watenda dhambi
Mtu ambaye ametenda dhambi nzito akikataa kufuata viwango vya Yehova, ataondolewa kutanikoni na hatutashirikiana naye. Soma 1 Wakorintho 5:6, 11, na kisha mzungumzie swali hili:
Kama vile chachu inavyochachisha donge lote la mkate, kushirikiana na mtenda dhambi asiyetubu kunawezaje kuathiri kutaniko?
Wakiiga rehema ya Yehova kuelekea wanadamu watenda dhambi, wazee huwatafuta na kuwasaidia wale walioondolewa kutanikoni. Ingawa nidhamu waliyopokea ilikuwa na maumivu, iliwasaidia kutambua uzito wa makosa yao na wengi wamerudi kutanikoni.—Zaburi 141:5.
Yehova anaonyeshaje kwamba ni mwenye usawaziko, rehema, na upendo kupitia jinsi anavyoshughulika na watenda dhambi?
5. Yehova hutusamehe tunapotubu
Yesu alitumia mfano unaotusaidia kuelewa jinsi Yehova anavyohisi mtu anapotubu. Soma Luka 15:1-7, kisha mzungumzie swali hili:
Simulizi hili linakufundisha nini kumhusu Yehova?
Soma Ezekieli 33:11, kisha mzungumzie swali hili:
Tunawezaje kuonyesha kwamba tumetubu kikweli?
Kama mchungaji, Yehova anawajali sana kondoo wake
WATU FULANI HUSEMA: “Ninaogopa kuwaambia wazee nimefanya dhambi kwa sababu wataniondoa kutanikoni.”
Unaweza kumwambia nini mtu anayehisi hivyo?
MUHTASARI
Tunapotenda dhambi nzito, Yehova atatusamehe ikiwa tutatubu kikweli na kuazimia kuacha dhambi.
Ungejibuje?
Kwa nini ni vizuri tuungame dhambi zetu kwa Yehova?
Tunapaswa kufanya nini ili tusamehewe dhambi zetu?
Kwa nini tunapaswa kutafuta msaada wa wazee tunapotenda dhambi nzito?
CHUNGUZA ZAIDI
Ona jinsi mwanamume fulani alivyojionea rehema ya Yehova kama inavyofafanuliwa kwenye Isaya 1:18.
Wazee huwasaidiaje wale wanaotenda dhambi nzito?
“Jinsi ya Kuwaonyesha Watenda Dhambi Upendo na Rehema” (Mnara wa Mlinzi, Agosti 2024)
Ona jinsi watenda dhambi wasiotubu wanavyoonyeshwa upendo na rehema.
“Wazee Wanawezaje Kuwasaidia Wale Wanaoondolewa Kutanikoni?” (Mnara wa Mlinzi, Agosti 2024)
Katika simulizi “Nilihitaji Kumrudia Yehova,” jifunze kwa nini mwanamume aliyekuwa ameacha kweli anahisi kwamba Yehova alimvuta arudi.