Maswali Kutoka Kwa Wasomaji

● Mtu anawezaje kuwa na hakika kwamba “wakati na nyakati na nusu ya wakati” katika Ufunuo 12:14 hesabu yake ni nyakati tatu na nusu ya wakati?

Andiko hilo linasomwa hivi: “Mwanamke yule akapewa mabawa mawili ya tai yule mkubwa, ili aruke, aende zake nyikani hata mahali pake, alishwapo kwa wakati na nyakati na nusu ya wakati, mbali na nyoka huyo.”​—Ufu. 12:14.

Ni jambo la faida kuwa na hakika ya urefu wa wakati unaotajwa hapo. Kwa sababu gani? Kwa sababu habari hii inamsaidia mtu jue urefu wa “nyakati saba” katika unabii wa Danieli wa mti mkubwa uliokatwa, pamoja na mtajo wa Yesu juu ya “nyakati zilizowekwa za mataifa.”​—Dan. 4:16, 23-25; Luka 21:24, NW.

Kigiriki cha asili katika Ufunuo 12:14 kinasomwa hivi, “wakati uliowekwa na nyakati zilizowekwa na nusu ya wakati uliowekwa.” Sasa, usemi wa kati, “nyakati” unamaanisha nini? Ikiwa ni mbili, basi jumla ingekuwa tano na nusu au kumi na moja (11) na nusu. Mtu anajuaje alivyomaanisha Yohana?

Karne zilizotangulia kuandikwa kwa Ufunuo, lugha ya Kigiriki ilitumia namna iliyokuwa na maana mbili, namna ya sarufu iliyoonyesha mbili ya vitu viwili. Walakini, namna hiyo iliyokuwa na maana mbili haitumiwi katika Maandiko ya Kigiriki, au Agano Jipya; ni namna ya umoja na wingi tu imetumiwa. Namna ya wingi inapotumiwa hesabu kamili ingetumiwa kuonyesha hesabu kamili ya kitu, kama vile “vichwa saba.”​—Ufu. 12:3.

Wanachuo wa Kigiriki wanafahamu kwamba Biblia inapotumia namna ya wingi bila hesabu kamili, ni lazima ieleweke kwamba inamaanisha wingi ulio chini kabisa, yaani, mbili. Mwanadini Mjeremani John Albert Bengel alitoa maelezo juu ya andiko hili hivi: “[Namna ya] wingi, ‘kairous,’ nyakati, inaonyesha nyakati mbili. Hesabu ya wingi inapaswa ichukuliwe kwa uhalisi sana.”

Kwa hiyo, Ufunuo 12:14 linamaanisha nyakati tatu na nusu. Kwa kulinganisha hii na siku 1,260 zinazotajwa katika mstari wa 6 (pamoja na Ufunuo 11:2, 3), mwanafunzi wa Biblia anaweza kuona kwamba “nyakati saba” katika Danieli sura ya nne zina siku 2,520.