Utayarishaji wa Kimbele Huleta Shangwe
1 Kushiriki huduma ya shambani hutuletea shangwe nyingi. (Zab. 89:15, 16) Bila shaka, utayarishaji ndio ufunguo muhimu wa kuweza kuona shangwe hiyo kikamili. Tunapotayarisha vizuri, twatimiza mengi, na tunapotimiza mengi, shangwe yetu inakuwa nyingi.
2 Tumia Vyombo Vinavyoandaliwa: Anza utayarishaji wako kwa kusoma na kuchanganua habari katika Huduma ya Ufalme Yetu. Mara nyingi hiyo huandaa utoaji mbalimbali uliofikiriwa vizuri unaokusudiwa kukusaidia utoe ujumbe wa Ufalme kwa urahisi na kwa matokeo. Utapata vielelezo vya jinsi ya kushinda vipingamizi vya kawaida. Mambo hususa yanayohusu jinsi ya kufanya ziara ya kurudia yenye matokeo yanatolewa, kwa lengo la kuanzisha funzo la Biblia. Una uhuru wa kuyabadilisha madokezo hayo hadi iwe rahisi kuyatumia. Pamoja na hayo, una kitabu Kutoa Sababu, ambacho kina utangulizi mbalimbali na pia maitikio kwa vizuia-mazungumzo, hivyo kikikusaidia uwe mwenye matokeo zaidi katika hali nyingi unazokutana nazo.
3 Chunguza kichapo utakachotoa, nawe uteue jambo moja au mawili yenye kutokeza na yenye kupendeza unayoweza kumwonyesha mwenye nyumba. Habari yenye kuamsha fikira uliyosikia au kusoma huenda ikakufungulia njia ya kuanzisha mazungumzo. Fikiria kimbele juu ya vipingamizi vya kawaida ambavyo huenda ukakabili, na uwe na mambo machache akilini kuhusu unavyoweza kuvishughulikia. Kisha tumia dakika chache ujizoeze utakayosema mlangoni.
4 Hudhuria Kila Mkutano wa Utumishi: Sikiliza kwa makini kwenye Mkutano wa Utumishi wakati madokezo katika Huduma ya Ufalme Yetu yanapozungumziwa, kupitiwa, na kutolewa maonyesho. Andika mambo unayohisi yanaweza kutumiwa katika utoaji wako. Kumbuka baadhi ya hali za kawaida ambazo umekabili katika huduma, nawe ufikirie njia ambazo waweza kutoa ushahidi kwa matokeo zaidi. Zungumzia mambo haya na wahubiri wengine kabla na baada ya mkutano.
5 Waweza kuwa na uhakika kwamba ikiwa ‘umetayarishwa kwa kila kazi njema,’ utathawabishwa kwa shangwe kuu na kufanikiwa katika kusaidia wengine wapate njia ya uhai.—2 Tim. 2:21.