Ongeza Shangwe Yako ya Kuhubiri
1 Je, wewe huwa na shangwe ya kuhubiri habari njema? Tusipokuwa waangalifu, ulimwengu mbovu unaotuzunguka waweza kutufanya tuone haya kuhubiri, hiyo ikitufanya tupoteze shangwe yetu. Pia kuhubiri katika eneo lisilo na matokeo kwaweza kutuvunja moyo. Twaweza kuchukua hatua gani zinazofaa ili tuongeze shangwe yetu ya kuhubiri?
2 Uwe na Mtazamo Unaofaa: Kudumisha mtazamo unaofaa husaidia sana. Njia moja ya kufanya hivyo ni kwa kutafakari pendeleo letu la pekee la kuwa “wafanyakazi wenzi wa Mungu.” (1 Kor. 3:9) Pia Yesu yu pamoja nasi katika kazi hii. (Mt. 28:20) Naye hutumia jeshi la malaika kututegemeza. (Mt. 13:41, 49) Basi, twaweza kuwa na hakika kwamba jitihada zetu zinaelekezwa na Mungu. (Ufu. 14:6, 7) Kwa hiyo, hata wanadamu fulani waioneje, kazi yetu inafurahiwa sana mbinguni!
3 Jitayarishe Vizuri: Kujitayarisha vizuri huongeza shangwe yetu. Kujitayarisha kwenda katika huduma hakuhitaji mambo mengi. Itachukua dakika chache tu kuchunguza jambo la kusema kutoka kwenye magazeti ya karibuni au toleo la vichapo la mwezi huo. Chagua utoaji kutoka katika sehemu “Mambo ya Kusema Kuhusu Magazeti,” katika Huduma Yetu ya Ufalme. Angalia “Madokezo ya Utoaji wa Utumishi wa Shambani,” katika nyongeza ya Januari 2002, au tafuta utangulizi wenye matokeo katika kitabu Kutoa Sababu. Ikiwa unazuiwa na kipingamizi ambacho wenye nyumba hutokeza mara nyingi, tayarisha jibu litakalopatana na maelezo yao na uelekeze fikira kwenye habari itakayoamsha kupendezwa. Kitabu Kutoa Sababu husaidia sana kwa upande huu. Tukitumia vichapo hivi tutakuwa na uhakika tunaohitaji ili kuhubiri kwa shangwe.
4 Sali kwa Bidii: Sala ni muhimu ili tudumishe shangwe yetu. Kwa kuwa tunafanya kazi ya Yehova, twahitaji kumwomba sana roho yake, na shangwe ni mojawapo ya matunda ya roho yake. (Gal. 5:22) Yehova atatupatia nguvu ya kuendelea kuhubiri. (Flp. 4:13) Kusali kuhusu huduma yetu kwaweza kutusaidia tuone mambo ifaavyo tunapokabili mambo yasiyopendeza. (Mdo. 13:52; 1 Pet. 4:13, 14) Tukiogopa, sala yaweza kutusaidia tuendelee kwa ujasiri na tukiwa wenye shangwe.—Mdo. 4:31.
5 Tafuta Fursa: Bila shaka, huduma yetu huleta shangwe tunapoweza kupata watu na kuwahubiria. Huenda ukapata matokeo zaidi ukirekebisha ratiba yako ili kwenda nyumba hadi nyumba saa tofauti, labda alasiri au jioni. Kila mara wewe hukutana na watu unapotembea barabarani, unapokwenda dukani, unapokuwa ndani ya basi, au unapotembea katika bustani. Kwa nini usitayarishe jinsi utakavyoanza mazungumzo mafupi na kuchukua hatua ya kuwaendea wale ambao wanaonekana kuwa wenye urafiki? Au huenda ikawa wewe huenda kazini au shuleni, ambapo wewe huzungumza kwa ukawaida na watu wengine. Unaweza kupata nafasi ya kutoa ushahidi kwa kuanzisha tu habari ya Kimaandiko ambayo inachochea upendezi. Madokezo mazuri yanapatikana katika ukurasa wa kwanza wa nyongeza ya Huduma Yetu ya Ufalme ya Januari 2002. Jambo lolote kati ya hayo laweza kuongeza sana shangwe yako ya kuhubiri.
6 Kwa kuwa shangwe hutusaidia kuvumilia, ni muhimu kama nini tuidumishe! Kwa kufanya hivyo, tutapokea thawabu kubwa wakati kazi hii ambayo haitarudiwa tena kamwe, itakapokamilika. Taraja hilo laweza kuongeza shangwe yetu ya kuhubiri.—Mt. 25:21.