Jinsi Vita na Ukatili Vitakavyoisha

MUNGU ATAONDOA SERIKALI ZA WANADAMU

Mungu ataondoa serikali za wanadamu kupitia kile ambacho Biblia inakiita vita vya Har–​Magedoni.a (Ufunuo 16:16) Wakati huo, “wafalme wa dunia nzima inayokaliwa” watakusanywa pamoja kwa ajili ya “vita vya siku kuu ya Mungu Mweza-Yote.” (Ufunuo 16:14) Har–​Magedoni ni vita ya Mungu itakayokomesha vita vyote.

Mungu ataziondoa serikali za wanadamu na kusimamisha Ufalme au serikali yake, ambayo itatawala kutoka mbinguni na serikali hiyo haitaharibiwa kamwe. (Danieli 2:44) Mungu amemchagua Mwana wake, Yesu Kristo, awe Mfalme. (Isaya 9:​6, 7; Mathayo 28:18) Serikali hiyo ni Ufalmeb ambao Yesu aliwafundisha wanafunzi wake wasali kuuhusu. (Mathayo 6:​9, 10) Wanadamu wote wataunganishwa chini ya serikali ya ulimwenguni pote, Yesu akiwa Mtawala.

Tofauti na watawala wa kibinadamu, Yesu hatatumia mamlaka yake ili kujifaidi. Kwa kuwa yeye hutenda haki na hana ubaguzi, hakuna atakayehitaji kuogopa kwamba atatendewa isivyo haki au kupuuzwa kwa sababu ya rangi, taifa, au utamaduni wake. (Isaya 11:​3, 4) Na watu hawatahitaji tena kupigania haki zao. Kwa nini? Kwa sababu Yesu atashughulikia mahitaji ya kila mtu. “Atamwokoa maskini anayelilia msaada, pia mtu wa hali ya chini na yeyote ambaye hana msaidizi. . . . Atawaokoa kutoka katika ukandamizaji na ukatili.”—Zaburi 72:​12-14.

Ufalme wa Mungu utaondoa duniani silaha zote zinazoua. (Mika 4:3) Pia, utawaondoa wanadamu waovu ambao wanakataa kuacha vita na kuvuruga amani ya wengine. (Zaburi 37:​9, 10) Kila mwanamume, mwanamke, na mtoto watahisi wakiwa salama mahali popote watakapokuwa duniani.—Ezekieli 34:28.

Ufalme wa Mungu utakapotawala watu watafurahia maisha bora. Utaondoa matatizo yote yanayosababisha watu wapigane kama vile umaskini, njaa, na ukosefu wa makao. Kila mtu atakuwa na chakula kingi chenye lishe na atafurahia kuwa na mahali bora pa kuishi.—Zaburi 72:16; Isaya 65:​21-23.

Chini ya Ufalme wa Mungu, madhara yote yanayosababishwa na vita yataondolewa. Hilo linatia ndani maumivu yote ya kimwili, kiakili, na kihisia yanayowapata watu kwa sababu ya mambo mabaya yanayotokea wakati wa vita. Hata wale waliokufa watafufuliwa ili waishi tena duniani. (Isaya 25:8; 26:19; 35:​5, 6) Familia zitaungana tena na kumbukumbu zenye kuumiza za vita zitakuwa sehemu ya “mambo ya zamani [yaliyopitilia] mbali.”—Ufunuo 21:4.

MUNGU ATAONDOA DHAMBI

Ufalme wa Mungu utakapotawala dunia, watu wote watamwabudu Mungu wa pekee wa kweli, Yehovac, “Mungu wa upendo na amani.” (2 Wakorintho 13:11) Watu watajifunza jinsi ya kuishi pamoja kwa amani. (Isaya 2:​3, 4; 11:9) Wale wote wanaotumia mambo wanayojifunza watawekwa huru, kutokana na matokeo ya dhambi.—Waroma 8:​20, 21.

MUNGU ATAMWONDOA SHETANI NA ROHO WAKE WAOVU

Ufalme wa Mungu utawaharibu waanzilishi wa vita, Shetani na roho wake waovu. (Ufunuo 20:​1-3, 10) Bila ya uvutano wao mwovu, “amani itakuwa nyingi.”—Zaburi 72:7.

Unaweza kuwa na uhakika kwamba ahadi ya Mungu ya kukomesha vita itatimia. Ana uwezo na anatamani sana kuondoa vita.

• Mungu ana hekima na nguvu zinazohitajika ili kukomesha vita na ukatili. (Ayubu 9:4) Hakuna jambo lolote ambalo hawezi kutimiza.—Ayubu 42:2.

• Mungu huchukia kuona watu wakiteseka. (Isaya 63:9) Pia, “humchukia mtu yeyote anayependa ukatili.”—Zaburi 11:5.

• Sikuzote Mungu hutimiza ahadi zake; na hawezi kamwe kusema uwongo.—Isaya 55:​10, 11; Tito 1:2.