Uwe Mwenye Kiasi Inapohusu Mambo Usiyoyajua

1. Yehova ametupatia uwezo gani, na kwa nini?

YEHOVA alituumba tukiwa na uwezo wa kufikiri, kujifunza, kuelewa, na kuonyesha hekima. Kwa nini alituumba hivyo? Anataka “[tupate] ujuzi kumhusu Mungu” na tumtumikie kwa nguvu zetu za kufikiri.—Met. 2:​1-5; Rom. 12:1.

2. (a) Tuna mipaka gani? (Ayubu 37:​23, 24) (Tazama pia picha.) (b) Tunanufaikaje tunapokuwa wenye kiasi na kutambua mipaka yetu?

² Ingawa tuna uwezo wa kujifunza, uwezo wetu una mipaka, kuna mambo mengi ambayo hatujui. (Soma Ayubu 37:​23, 24.) Fikiria mfano wa Ayubu. Yehova alimuuliza mfululizo wa maswali ambayo yalifunua mambo mengi ambayo alikuwa hajui. Hilo lilimnyenyekeza na kumsaidia kurekebisha njia yake ya kufikiri. (Ayu. 42:​3-6) Sisi pia hunufaika tunapokuwa wenye kiasi na kutambua kwamba hatujui kila kitu. Sifa hiyo ya kiasi inatuchochea kuwa na uhakika kwamba Yehova atatufunulia kile hasa tunachohitaji kujua ili kufanya maamuzi kwa hekima.—Met. 2:6.

3. Tutazungumzia nini katika makala hii?

³ Katika makala hii, tutazungumzia baadhi ya mambo ambayo hatujui na changamoto ambazo huenda tukakabili kwa sababu ya kutojua mambo hayo. Pia, tutachunguza kwa nini ni vema hatujui mambo fulani. Kuchunguza mambo hayo kutatusaidia kuwa na uhakika zaidi kwamba Yehova, “Yule ambaye ni mkamilifu katika ujuzi,” anatuambia mambo tunayohitaji hasa kujua.—Ayu. 37:16.

HATUJUI MWISHO UTAKUJA LINI

4. Kulingana na Mathayo 24:​36, ni jambo gani moja ambalo hatujui?

⁴ Soma Mathayo 24:36. Hatujui mwisho wa mfumo huu wa mambo utakuja lini. Hata Yesu alipokuwa duniani hakujua “siku hiyo na saa hiyo.”a Baadaye, aliwaambia mitume kwamba Yehova, ambaye ni Mtunza-Wakati Mkuu, hutunza wakati wa matukio fulani yaliyo “katika mamlaka yake mwenyewe.” (Mdo. 1:​6, 7) Yehova ameratibu wakati wa kuleta mwisho wa mfumo huu, lakini hatuwezi kujua kihususa siku hiyo itakuwa lini.

5. Kwa kuwa hatujui mwisho utakuja lini, huenda tukahisije?

⁵ Kulingana na maneno ya Yesu, hatujui tutahitaji kusubiri kwa muda gani hadi mwisho utakapofika. Matokeo ni kwamba huenda tukakosa subira au kuvunjika moyo, hasa ikiwa tumekuwa tukiisubiri siku ya Yehova kwa muda fulani. Au huenda ikawa vigumu kwetu kuvumilia dhihaka kutoka kwa watu wa familia au watu wengine. (2 Pet. 3:​3, 4) Tunaweza kuhisi kwamba ikiwa tungejua siku hususa ambayo mwisho utakuja, tungekuwa na subira zaidi na tungeweza kuvumilia dhihaka kwa urahisi zaidi.

6. Kwa nini ni jambo zuri kwamba hatujui mwisho utakuja lini?

⁶ Kwa kutofunua tarehe ya siku ya mwisho, Yehova anatupatia fursa ya kuonyesha kwamba tunamtumikia kwa sababu tunampenda na kumtumaini. Hatumtumikii Yehova hadi tarehe fulani hususa, kana kwamba imani yetu ni ya muda fulani tu. Badala ya kukazia tu fikira “siku ya Yehova” itakuja lini, tunafanya vema kukazia fikira siku hiyo itatimiza nini. Tunapofanya hivyo, tutaendelea kumkaribia zaidi Yehova na kufanya yote tunayoweza ili kumfurahisha.—2 Pet. 3:​11, 12.

7. Tunajua nini?

⁷ Ni vema tukazie fikira kile tunachojua, yaani, siku za mwisho zilianza mwaka wa 1914. Yehova ametupatia unabii ambao hautusaidii tu kuujua mwaka huo, bali unaeleza kihususa kuhusu hali ambazo zimekuwapo tangu mwaka huo. Matokeo ni kwamba tunasadiki kuwa “ile siku kuu ya Yehova iko karibu.” (Sef. 1:14) Pia, tunajua kazi ambayo Yehova anataka tufanye, yaani, kuwaambia watu wengi kadiri iwezekanavyo kuhusu “habari njema ya Ufalme.” (Mt. 24:14) Ujumbe huo unatangazwa katika nchi 240 hivi na katika zaidi ya lugha 1,000. Hatuhitaji kujua “siku hiyo na saa hiyo” ili tushiriki kwa bidii katika kazi hiyo muhimu.

HATUJUI JINSI AMBAVYO HUENDA YEHOVA AKATENDA

8. Maneno “kazi ya Mungu wa kweli” yanarejelea nini? (Mhubiri 11:5)

⁸ Si sikuzote sisi hujua “kazi ya Mungu wa kweli.” (Soma Mhubiri 11:5.) Maneno “kazi ya Mungu wa kweli” yanarejelea mambo ambayo Yehova anasababisha yawe au mambo ambayo anaruhusu yatukie ili kutimiza mapenzi yake. Hatuwezi kujua kwa uhakika kwa nini huenda Yehova akaruhusu jambo fulani litukie au kihususa jinsi atakavyotenda kwa niaba yetu. (Zab. 37:5) Biblia inalinganisha kutojua “kazi ya Mungu wa kweli” na kutojua jinsi mtoto anavyokua tumboni mwa mama yake. Hata wanasayansi hawaelewi kikamili jinsi mtoto anavyokua ndani ya mama yake. Vivyo hivyo, hatujui kikamili jinsi ambavyo Yehova atatenda.

9. Kwa kuwa hatujui jinsi ambavyo Yehova atatenda, huenda tukaanza kuwa na maoni gani?

⁹ Kutojua jinsi ambavyo Yehova atatenda kwa niaba yetu kunaweza kutufanya tusite kuchukua hatua fulani. Huenda tukasita kujidhabihu ili kupanua huduma yetu, kwa mfano, inapohusu kurahisisha maisha yetu, au kuhamia eneo lenye uhitaji mkubwa wa wahubiri wa Ufalme. Au huenda tukajiuliza kama tuna kibali cha Mungu, ikiwa hatujafikia malengo yetu ya kitheokrasi, ikiwa hatuoni matokeo ya kipekee ya bidii yetu katika huduma, au ikiwa tunapata changamoto nyingi katika mradi fulani wa kitheokrasi.

10. Kutojua jinsi ambavyo Yehova atatenda kunatusaidia kusitawisha sifa gani muhimu?

¹⁰ Kutojua jinsi ambavyo Yehova atatenda, kunatusaidia kusitawisha sifa muhimu kama vile, unyenyekevu na kiasi. Kunatusaidia kutambua kwamba mawazo na njia za Yehova ziko juu kuliko zetu. (Isa. 55:​8, 9) Pia, tunajifunza kumtumaini Yehova kikamili zaidi, na kumtegemea yeye ili tufanikiwe. Tunapopata matokeo mazuri katika huduma au katika mradi wa kitheokrasi, kwa kufaa tunampa yeye sifa. (Zab. 127:1; 1 Kor. 3:7) Ikiwa mambo hayataenda kama tulivyotarajia, tunahitaji kukumbuka kwamba bado Yehova anaongoza mambo. (Isa. 26:12) Sisi tunafanya sehemu yetu, na kuendelea kuwa na uhakika kwamba Yehova atafanya sehemu yake. Tunasadiki kwamba atatupatia mwongozo tunaohitaji, hata ikiwa si kwa njia ileile ya kimuujiza ambayo alifanya pindi fulani wakati uliopita.—Mdo. 16:​6-10.

11. Tunajua mambo gani muhimu?

¹¹ Tunajua kwamba sikuzote Yehova ni mwenye upendo, haki, na hekima. Tunajua anathamini sana mambo yote tunayomfanyia na tunayofanya kwa ajili ya waabudu wenzetu. Na tunajua kwamba sikuzote Yehova atawathawabisha wale walio washikamanifu kwake.—Ebr. 11:6.

HATUJUI MAMBO YATAKAYOTUKIA KESHO

12. Kulingana na Yakobo 4:​13, 14, hatujui nini?

¹² Soma Yakobo 4:​13, 14. Ukweli ni kwamba hatujui jinsi maisha yetu yatakavyokuwa kesho. Katika mfumo huu wa mambo, “wakati na matukio yasiyotarajiwa” hutupata sote. (Mhu. 9:11) Matokeo ni kwamba hatuwezi kujua ikiwa mipango yetu itafanikiwa au ikiwa tutakuwa hai ili kuitimiza.

13. Kutojua maisha yetu yatakuwaje kunaweza kutuathiri kwa njia gani

¹³ Kutojua maisha yatakuwaje kunaweza kuwa changamoto iliyo ngumu kushughulika nayo. Jinsi gani? Tunaweza kuwa na wasiwasi kuhusu mambo yatakayotukia, na hilo linaweza kufanya tupoteze shangwe yetu. Majanga yanayotokea ghafla na matukio yasiyotazamiwa yanaweza kusababisha huzuni na mahangaiko. Na matarajio yetu yasipotimia huenda tukakata tamaa na kuvunjika moyo.—Met. 13:12.

14. Furaha yetu ya kudumu inategemea nini? (Tazama pia picha.)

¹⁴ Tunapovumilia changamoto licha ya hali yoyote inayotukia maishani mwetu, tunathibitisha kwamba tunamtumikia Baba yetu wa mbinguni, si kwa kuchochewa na ubinafsi, bali kwa sababu tunampenda. Masimulizi ya Biblia yanaonyesha hatupaswi kutarajia kwamba Yehova atatulinda dhidi ya hali ngumu zote maishani, na yanaonyesha kwamba hajapanga kimbele mambo yanayotukia maishani mwetu. Anajua kwamba tunaweza kuwa na furaha hata kama hatujui kila kitu kitakachotokea wakati ujao. Furaha yetu inategemea kutafuta mwongozo wake na kumtii. (Yer. 10:23) Tunapomtegemea yeye tunapofanya maamuzi, ni kana kwamba tunasema: “Yehova akipenda, tutaishi na kufanya hili au lile.”—Yak. 4:15.

15. Tunajua nini kuhusu wakati ujao?

¹⁵ Ingawa hatujui kila siku mpya itakuwaje, tunajua kwamba Yehova ametuahidi uzima wa milele—iwe ni mbinguni au duniani. Tunajua kwamba hawezi kusema uwongo na kwamba hakuna jambo lolote linaloweza kumzuia kutimiza ahadi zake zote. (Tito 1:2) Yeye pekee ndiye anayeweza “[kutabiri] matokeo, na tangu zamani za kale mambo ambayo bado hayajafanywa.” Hilo lilikuwa kweli kuhusu matukio yaliyopita, na litakuwa kweli kuhusu matukio ya wakati ujao. (Isa. 46:10) Kwa hakika, tunajua kwamba hakuna jambo linaloweza kumzuia Yehova kutupenda. (Rom. 8:​35-39) Atatupatia hekima, faraja, na nguvu tunazohitaji ili kuvumilia jambo lolote litakalotupata. Tunaweza kuwa na uhakika kwamba Yehova atatusaidia na kutubariki.—Yer. 17:​7, 8.

HATUWEZI KUELEWA KIKAMILI JINSI YEHOVA ANAVYOTUJUA VIZURI

16. Kulingana na Zaburi 139:​1-6, Yehova ana ujuzi gani ambao hatuwezi kuuelewa kikamili?

¹⁶ Soma Zaburi 139:​1-6. Muumba wetu anajua jinsi tulivyoumbwa na mambo yaliyochangia ukuzi wetu wa kimwili, kihisia, na kiakili. Anapendezwa nasi sikuzote. Anajua mambo tunayosema na tunayokusudia kusema, mambo tunayofanya na kwa nini tunayafanya. Kama Mfalme Daudi alivyotambua, Yehova anatukazia uangalifu na kutujali, na kamwe hatuko mbali naye. Ni jambo lenye kustaajabisha kwamba Bwana Mwenye Enzi Kuu ya ulimwengu wote, Mweza-Yote na Muumba wa mbingu na dunia, anatukazia uangalifu kwa njia hiyo! Daudi alisema hivi: “Ujuzi huo ni wa ajabu sana kwangu. Umezidi kabisa uelewaji wangu.”—Zab. 139:​6, maelezo ya chini.

17. Kwa nini huenda ikawa vigumu kukubali kwamba Yehova anatujua vizuri?

¹⁷ Kwa sababu ya malezi yetu, utamaduni, au mambo tuliyoamini zamani, huenda ikawa vigumu kwetu kumwona Yehova kuwa Baba mwenye upendo ambaye anapendezwa nasi. Au huenda tukahisi kwamba makosa tuliyofanya wakati uliopita yalikuwa mabaya sana hivi kwamba Yehova asingetaka kamwe kutujua na kwamba yuko mbali nasi. Nyakati fulani hata Daudi alihisi hivyo. (Zab. 38:​18, 21) Au mtu ambaye kwa unyoofu anajitahidi kubadili njia yake ya maisha na kuishi kulingana na viwango vya Mungu huenda akajiuliza, ‘Ikiwa kwa kweli Mungu ananijua vizuri, kwa nini anatarajia nikatae mwenendo wa maisha au mwelekeo ambao ninahisi ni asili yangu?’

18. Tunanufaikaje kwa kukubali kwamba Yehova anatujua vizuri kuliko tunavyojijua wenyewe? (Tazama pia picha.)

¹⁸ Tunaweza kujifunza kukubali kwamba Yehova anatujua vizuri kuliko tunavyojijua wenyewe na kwamba anaweza kuona sifa zetu nzuri ambazo sisi hatuzioni. Ingawa anaona udhaifu wetu mbalimbali na kuelewa kwa nini tunahisi na kutenda kwa njia fulani, anajua kwamba tunaweza kubadilika na kwa upendo anatusaidia. (Rom. 7:15) Tunapotambua kwamba Yehova anaona aina ya mtu ambaye tunaweza kuwa, tutapata uhakika na nguvu tunazohitaji ili kumtumikia kwa uaminifu na kufanya hivyo kwa shangwe.

19. Tunajua mambo gani hakika kumhusu Yehova?

¹⁹ Tunajua kwamba Yehova ni upendo. Hatuna shaka yoyote kuhusu hilo. (1 Yoh. 4:8) Tunajua kwamba viwango vyake vya uadilifu vinaonyesha upendo wake kutuelekea na kwamba sikuzote anataka tufanikiwe maishani. Tunajua kwamba Yehova anataka tupate uzima wa milele. Aliandaa fidia ili hilo liwezekane. Zawadi ya fidia inatuhakikishia kwamba tunaweza kufanikiwa licha ya udhaifu wetu mbalimbali. (Rom. 7:​24, 25) Na tunajua kwamba “Mungu ni mkuu kuliko mioyo yetu naye anajua mambo yote.” (1 Yoh. 3:​19, 20) Yehova anaona mambo yote kutuhusu, na ana uhakika kwamba tunaweza kufaulu kufanya mapenzi yake.

20. Ni nini kitakachotusaidia kuepuka mahangaiko yasiyo ya lazima?

²⁰ Yehova ametuambia kila kitu ambacho kwa kweli tunahitaji kujua. Tunapoonyesha sifa ya kiasi na kukubali ukweli huo, tunaepuka mahangaiko yasiyo ya lazima kuhusu mambo ambayo hatuwezi kudhibiti na kukazia fikira mambo yaliyo muhimu zaidi. Kwa kufanya hivyo, tunaonyesha kwamba tunamtumaini kikamili Yehova, “Yule ambaye ni mkamilifu katika ujuzi.” (Ayu. 36:4) Ingawa kwa sasa hatuelewi kikamili baadhi ya mambo, tunatarajia kwa hamu kujifunza milele mambo mapya kutoka kwa na kumhusu Mungu wetu Mkuu.—Mhu. 3:11.