GEORGIA
Niliona kwa Macho Yangu Mwenyewe Kile Ambacho Biblia Inasema!
Pepo Devidze
ALIZALIWA 1976
ALIBATIZWA 1993
HISTORIA FUPI Alilelewa katika Kanisa Othodoksi la Georgia na alishikamana sana na desturi zake. Baada ya kujifunza kweli ya Biblia, alitumikia Betheli pamoja na mume wake. Sasa wanatumikia wakiwa mapainia wa pekee.
NILISIKIA kuhusu Mashahidi kwa mara ya kwanza nilipokuwa mwanafunzi wa chuo jijini Kutaisi. Jirani yangu aliniambia kwamba Mashahidi hawatumii sanamu katika ibada yao na hawaamini kwamba Yesu ni Mungu Mweza-Yote. Mambo hayo yalipingana na mambo niliyoamini na kuyapenda nikiwa Mkristo Mwothodoksi.
Niliporudi katika mji wa nyumbani wa Tsageri, katika kiangazi cha mwaka 1992, niligundua kwamba Mashahidi wa Yehova walikuwa huko pia. Mama yangu alikuwa amesikia mambo mengi mazuri kuhusu Mashahidi wa Yehova. Kwa sababu bado nilikuwa na maoni yasiyofaa kuwahusu, aliniambia, “Nenda ujionee mwenyewe mambo wanayofundisha.”
Mapainia wawili, Ndugu Pavle na Ndugu Paata, walitembelea kwa ukawaida familia moja katika ujirani wetu. Majirani wengi walichukua nafasi hiyo kuwasikiliza na kuwauliza maswali. Kwa hiyo, niliamua kuhudhuria mazungumzo hayo. Kila mara nilipouliza swali, ndugu hao walifungua Biblia na kuniomba nisome. Jambo hilo lilinigusa moyo sana, kwa kuwa niliona kwa macho yangu mwenyewe kile ambacho Biblia inasema!
Muda mfupi baadaye, nilijiunga na kikundi ambacho kilikuwa kikijifunza Biblia na ndugu hao. Katika majira ya kiangazi mwaka uliofuata, kumi kati yetu tulibatizwa. Baadaye, mama yangu pia akawa Shahidi wa Yehova.
Ninapokumbuka pindi hizo, ninashukuru sana kwamba ndugu hao walijibu maswali yangu yote kwa kuniruhusu nisome majibu kwenye Biblia. Hilo lilinisaidia kufikia mkataa unaofaa mambo niliyoamini yalipokosolewa. Ninapokumbuka jinsi kusoma majibu kwenye Biblia kulivyonisaidia, ninatumia njia hiyohiyo kuwasaidia wengine wathamini kweli.