Je, Ninaweza Kupata Faraja Katika Biblia?
Jibu la Biblia
Ndiyo. (Waroma 15:4) Chunguza mistari ya Biblia ambayo imewafariji watu wengi wanaokabiliana na hali ngumu na kushuka moyo.
Katika makala hii
Matatizo
Zaburi 23:4: “Hata nikitembea katika bonde lenye kivuli kizito, siogopi madhara yoyote, kwa maana wewe uko pamoja nami.”
Maana: Unaposali kwa Mungu na kutegemea mwongozo wa Neno lake, Biblia, unaweza kukabiliana na matatizo kwa ujasiri.
Wafilipi 4:13: “Kwa mambo yote nina nguvu kupitia yule anayenipa nguvu.”
Maana: Mungu anaweza kukupa nguvu za kukabiliana na tatizo lolote.
Kifo cha mpendwa
Mhubiri 9:10: “Hakuna kazi wala mipango wala ujuzi wala hekima Kaburini.”
Maana: Wale ambao wamekufa hawateseki na hawawezi kutudhuru. Hawajui lolote.
Matendo 24:15: “Kutakuwa na ufufuo.”
Maana: Mungu anaweza kuwafufua wapendwa wetu.
Kuhisi hatia kupita kiasi
Zaburi 86:5: “Kwa maana wewe, Ee Yehova,a ni mwema na uko tayari kusamehe; una upendo mwingi mshikamanifu kwa wote wanaokuitia.”
Maana: Mungu huwasamehe wale ambao wanajutia makosa yao ya zamani na kuazimia kutoyarudia.
Zaburi 103:12: “Kama mashariki ilivyo mbali sana na magharibi, ndivyo alivyoweka dhambi zetu mbali sana na sisi.”
Maana: Mungu anaposamehe anaweka makosa yetu mbali sana na sisi. Hatukumbushi makosa hayo tena na tena ili kutulaumu au kutuadhibu.
Huzuni
Zaburi 31:7: “Umeona dhiki yangu; unajua mateso makali yaliyo ndani yangu.”
Maana: Mungu anajua vizuri mateso yote unayokabili. Anaelewa hisia zako za ndani kabisa—hata wengine wanaposhindwa kukuelewa.
Zaburi 34:18: “Yehova yuko karibu na wale waliovunjika moyo; huwaokoa waliopondeka roho.”
Maana: Mungu anaahidi kukutegemeza unapokuwa na huzuni. Anaweza kukupa nguvu za kukabiliana na huzuni.
Ugonjwa
Zaburi 41:3: “Yehova atamtegemeza kwenye kitanda chake cha ugonjwa.”
Maana: Mungu anaweza kukusaidia kukabiliana na ugonjwa kwa kukupatia amani ya akili, nguvu, uvumilivu, na hekima ya kufanya maamuzi yenye busara.
Isaya 33:24: “Hakuna mkaaji atakayesema: ‘Mimi ni mgonjwa.’”
Maana: Mungu anaahidi kwamba wakati utafika ambapo wanadamu wote watakuwa na afya njema.
Mkazo na mahangaiko
Zaburi 94:19: “Mahangaiko yaliponilemea, ulinifariji na kunibembeleza.”
Maana: Tukimtegemea Mungu wakati ambapo tuna mkazo, atatusaidia tuwe watulivu.
1 Petro 5:7: “[Tupeni] mahangaiko yenu yote juu yake, kwa sababu yeye anawajali ninyi.”
Maana: Mungu anatujali tunapoteseka. Anatualika tumwambie matatizo yetu kupitia sala.
Vita
Zaburi 46:9: “Anakomesha vita katika dunia yote.”
Maana: Hivi karibuni Ufalme wa Mungu utakomesha vita duniani kote.
Zaburi 37:11, 29: “Wapole wataimiliki dunia, nao watafurahia kwelikweli wingi wa amani. . . . Waadilifu wataimiliki dunia, nao wataishi humo milele.”
Maana: Watu wema watafurahia amani duniani milele.
Wasiwasi kuhusu wakati ujao
Yeremia 29:11: “‘Ninajua vizuri mawazo ninayofikiria kuwaelekea ninyi,’ asema Yehova, ‘mawazo ya amani, wala si ya msiba, ili niwape ninyi wakati ujao na tumaini.’”
Maana: Mungu anawahakikishia watu wake kwamba hivi karibuni watafurahia maisha mazuri sana.
Ufunuo 21:4: “Atafuta kila chozi kutoka katika macho yao, na kifo hakitakuwapo tena, wala maombolezo wala kilio wala maumivu hayatakuwapo tena. Mambo ya zamani yamepitilia mbali.”
Maana: Mungu anaahidi kukomesha mambo yote mabaya unayoona yakitukia leo.
a Yehova ni jina la kibinafsi la Mungu. (Zaburi 83:18) Ona makala “Yehova Ni Nani?”