Anton Petrus/Moment via Getty Images
ENDELEA KUKESHA!
Je, Hivi Karibuni Kutakuwa na Vita vya Ulimwengu?—Biblia Inasema Nini?
Katika miaka 30 ambayo imepita, watu wengi wamehisi kwamba uhusiano kati ya nchi mbalimbali ulikuwa imara na hata ulikuwa ukiboreshwa. Hata hivyo, matukio ya karibuni yanaonyesha kwamba huenda maoni hayo hayakuwa sahihi.
“Hofu yatanda kwamba vita vya Gaza vitaathiri nchi nyingine huku Israel na Hesbollah wakipigana kwenye mpaka wa Lebanon.”—Shirika la Habari la Reuters, Januari 6, 2024.
“Vikundi vinavyodhibitiwa na Iran vinashambulia kutoka maeneo mbalimbali, na Iran imeanza tena kutokeza silaha za nyuklia. Iran inatokeza tisho jipya kuelekea nchi za Magharibi—na pindi hii Urusi na China zinaiunga mkono.”—The New York Times, Januari 7, 2024.
“Mashambulizi ya Urusi yanaendelea kusababisha uharibifu nchini Ukrainia.”—Habari za UN, Januari 11, 2024.
“Uchumi wa China unazidi kuimarika na nguvu zake za kijeshi zinaongezeka, wakati huohuo hisi ya uzalendo ya Taiwan inazidi kuongezeka, na wakati huohuo uhusiano kati ya China na Marekani unazidi kuzorota. Mazingira hayo yanaashiria mzozo unaweza kulipuka wakati wowote.”—Jarida The Japan Times, Januari 9, 2024.
Je, Biblia inasema lolote kuhusu hali tete ambayo tunaona leo kati ya mataifa? Je, hali hiyo itaongoza kwenye vita vya ulimwengu?
Biblia ilitabiri matukio ya sasa
Biblia haikutabiri vita vyovyote hususa ambavyo tunaona leo. Hata hivyo, ilitabiri kutakuwa na vita ambavyo vingetambulisha wakati wetu na ambavyo ‘vingeondoa amani duniani.’—Ufunuo 6:4.
Kitabu cha Danieli kilitabiri kwamba katika “wakati wa mwisho,” serikali kuu za ulimwengu zingehusika katika ‘msukumano,’ au mapambano ya kupata udhibiti. Mapambano hayo yangetia ndani kuonyesha nguvu zao kubwa za kijeshi na kutumia “hazina” kubwa, yaani, uwezo wa kifedha.—Danieli 11:40, 42, 43.
Vita vinavyokuja
Biblia inatabiri kwamba hali za ulimwengu zitakuwa mbaya zaidi kabla ya kuwa nzuri. Yesu alitabiri kwamba “kutakuwa na dhiki kuu ambayo haijawahi kutokea tangu mwanzo wa ulimwengu” (Mathayo 24:21) Hiyo “dhiki kuu” itaongoza kwenye vita vinavyoitwa Har-Magedoni, ambavyo vinafafanuliwa kuwa “vita vya siku kuu ya Mungu Mweza-Yote.”—Ufunuo 16:14, 16.
Hata hivyo, Har-Magedoni itawaokoa wanadamu, si kuwaangamiza. Mungu atatumia vita hivyo kutokeza mwisho wa utawala wa wanadamu, ambao umesababisha vita vingi vilivyoleta uharibifu. Ili kujifunza jinsi Har-Magedoni itakavyotokeza amani ya kudumu, soma makala zifuatazo: