Kwa Nini Mashahidi wa Yehova Wanawahubiria Tena na Tena Watu Wanaosema “Mimi Sipendezwi”?

Kwa kuwa wanachochewa na upendo kwa Mungu na jirani, Mashahidi wa Yehova wanafurahi kushiriki ujumbe wa Biblia na watu wote, kutia ndani wale ambao wanasema “mimi sipendezwi.” (Mathayo 22:37-​39) Upendo wetu kwa Mungu unatusukuma kutii amri ya Mwana wake ya “kutoa ushahidi kamili.” (Matendo 10:42; 1 Yohana 5:3) Ili kufanya hivyo, tunaendelea kuhubiri ujumbe wa Mungu tena na tena, kama walivyofanya manabii wa Mungu wa zamani. (Yeremia 25:4) Kwa sababu tunawapenda jirani zetu, tunajitahidi kushiriki na wote “habari njema ya Ufalme,” ujumbe unaookoa uhai. Tunashiriki ujumbe huo pia na wale ambao mwanzoni hawakupendezwa nao.​—Mathayo 24:14.

Tunaporudi, mara nyingi tunawapata watu wanaopendezwa. Fikiria sababu hizi tatu:

• Watu huhama.

• Wengine katika nyumba hiyo hupendezwa na ujumbe wetu.

• Watu hubadilika. Hali za ulimwengu au hali za kibinafsi huwafanya wengine ‘watambue uhitaji wao wa kiroho’ na kupendezwa na ujumbe wa Biblia. (Mathayo 5:3) Hata wale wanaopinga wanaweza kubadili maoni yao, kama mtume Paulo.​—1 Timotheo 1:13.

Hata hivyo, hatuwalazimishi watu wakubali ujumbe wetu. (1 Petro 3:15) Tunaamini kwamba kila mtu lazima afanye uamuzi wake mwenyewe inapohusu masuala ya ibada.​—Kumbukumbu la Torati 30:19, 20.