Biblia Inasema Nini Kuhusu Misiba ya Asili?

Jibu la Biblia

Mungu hasababishi misiba ya asili inayotokea leo, lakini anawajali watu wanaoathiriwa na misiba hiyo. Ufalme wa Mungu utakomesha mambo yote yanayotufanya tuteseke, kutia ndani misiba ya asili. Kwa sasa, Mungu anaandaa faraja kwa wale walioathiriwa na misiba ya asili.​—2 Wakorintho 1:3.

• Kwa nini tunaweza kuwa na uhakika kwamba misiba ya asili si adhabu kutoka kwa Mungu?

• Je, misiba ya asili ni ishara ya nyakati?

• Mungu anawasaidiaje waathiriwa wa misiba ya asili?

• Je, Biblia inaweza kutusaidia kujitayarisha kwa ajili ya misiba ya asili?

• Mistari ya Biblia inayoweza kuwafariji waathiriwa wa misiba ya asili

Kwa nini tunaweza kuwa na uhakika kwamba misiba ya asili si adhabu kutoka kwa Mungu?

Misiba ya asili inatofautiana na jinsi Mungu anavyotumia nguvu za asili kama inavyotajwa katika Biblia.

• Misiba ya asili huua na kuwajeruhi watu bila kuchagua. Tofauti na hilo, Mungu alipotumia nguvu za asili kutekeleza hukumu kama ilivyorekodiwa katika Biblia, alihakikisha kwamba ni waovu tu walioangamizwa. Kwa mfano, Mungu alipoharibu majiji ya kale ya Sodoma na Gomora, alihakikisha kwamba Loti na binti zake waliokoka. (Mwanzo 19:29, 30) Mungu alisoma mioyo ya watu wa wakati huo na kuwaharibu wale tu ambao aliwaona kuwa waovu.​—Mwanzo 18:23-32; 1 Samweli 16:7.

• Mara nyingi misiba ya asili hutokea bila kutoa onyo. Kwa upande mwingine, Mungu aliwaonya waovu kabla ya kutumia nguvu za asili dhidi yao. Watu waliotii maonyo hayo walipata nafasi ya kuponyoka.​—Mwanzo 7:​1-5; Mathayo 24:38, 39.

• Kwa kadiri fulani, wanadamu wamechangia kutokea kwa misiba ya asili. Jinsi gani? Kwa kuharibu mazingira na kujenga katika maeneo ambako matetemeko ya ardhi, mafuriko, na hali mbaya sana ya hewa hutokea kwa ukawaida. (Ufunuo 11:18) Mungu hapaswi kulaumiwa kwa sababu ya makosa ya wanadamu.​—Methali 19:3.

Je, misiba ya asili ni ishara ya nyakati?

Ndiyo, unabii wa Biblia unaonyesha kwamba kungekuwa na misiba wakati wa “umalizio wa mfumo wa mambo,” au katika “siku za mwisho.” (Mathayo 24:3; 2 Timotheo 3:1) Kwa mfano, kuhusu wakati wetu, Yesu alisema hivi: “Kutakuwa na upungufu wa chakula na matetemeko ya ardhi sehemu mbalimbali.” (Mathayo 24:7) Hivi karibuni, Mungu atakomesha mambo yote yanayosababisha maumivu na kuteseka, kutia ndani misiba ya asili.​—Ufunuo 21:3, 4.

Mungu anawasaidiaje waathiriwa wa misiba ya asili?

• Mungu huwafariji waathiriwa kwa kutumia Neno lake, Biblia. Biblia inatuhakikishia kwamba Mungu anatujali na kwamba anahuzunika tunapoteseka. (Isaya 63:9; 1 Petro 5:6, 7) Pia, anafunua ahadi yake ya wakati ambapo misiba ya asili haitakuwepo tena.​—Ona “Mistari ya Biblia inayoweza kuwafariji waathiriwa wa misiba ya asili.”

• Mungu huwasaidia waathiriwa kupitia waabudu wake. Mungu huwatumia waabudu wake duniani kuiga mfano uliowekwa na Yesu. Ilitabiriwa kwamba Yesu angewafariji “waliovunjika moyo” na “wote wanaoomboleza.” (Isaya 61:1, 2) Waabudu wa Mungu wanajitahidi kufanya vivyo hivyo.​—Yohana 13:15.

  Pia, Mungu hutumia waabudu wake kuandaa msaada unaofaa kwa waathiriwa wa misiba ya asili.​—Matendo 11:28-30; Wagalatia 6:10.

Je, Biblia inaweza kutusaidia kujitayarisha kwa ajili ya misiba?

Ndiyo. Ingawa Biblia haikuandikwa iwe mwongozo wa kujitayarisha ajili ya misiba, ina kanuni zinazoweza kutusaidia. Kwa mfano:

• Panga mapema kwa ajili ya misiba inayoweza kutokea. Biblia inasema: “Mtu mwerevu huona hatari na kujificha.” (Methali 22:3) Ni jambo la hekima kutayarisha mapema kile tutakachofanya hali ya dharura inapotokea. Huenda matayarisho kama hayo yakahusisha kupanga mkoba wa dharura ambao umeandaliwa tayari na kupanga pamoja na familia mahali pa kukutana ikiwa msiba utatokea.

• Uhai ni muhimu kuliko mali. Biblia inasema: “Hatukuleta chochote ulimwenguni, wala hatuwezi kuondoka na chochote.” (1 Timotheo 6:7, 8) Tunahitaji kuwa tayari kuacha nyumba na mali zetu ili kuokoka msiba. Tunapaswa kukumbuka kwamba uhai wetu ni muhimu zaidi kuliko vitu vyovyote vya kimwili.​—Mathayo 6:25.