Sanduku Dogo Linalowasilisha Chakula cha Kiroho

Leo, Mashahidi wa Yehova wanapokea chakula cha kiroho kwa njia ya kielektroni kuliko wakati mwingine wowote. Lakini katika sehemu fulani ulimwenguni, ndugu zetu hawawezi kugharimia malipo ya huduma za Intaneti. Wengine wanaishi katika maeneo ambako Intaneti inakatika mara nyingi, mtandao unafanya kazi polepole, au ambako hakuna Intaneti kabisa.

Hata hivyo, sasa ndugu na dada zetu wengi wanaweza kupakua machapisho ya kielektroni bila hata kuunganishwa kwenye Intaneti! Hilo linawezekanaje?

JW Box ni upakizi mdogo ambao unaandaliwa kwa ajili ya makutaniko yaliyo katika maeneo ambako hakuna Intaneti. Upakizi huo unatia ndani kifaa cha kusambaza mawimbi ya mtandao kinachonunuliwa kutoka kwa kampuni fulani, programu zilizotayarishwa na Idara ya Kompyuta ya Betheli, na machapisho ya kielektroni na video zinazopatikana kwenye jw.org. Gharama ya kila kisanduku ni dola 75 hivi za Marekani.

Kwenye Jumba la Ufalme, ndugu na dada huunganisha vifaa vyao kwenye JW Box bila kutumia nyaya kisha wanapakua machapisho na video. Hata wale walio na vifaa vya zamani au vya bei ya chini wanaweza kuunganishwa. Lakini ikiwa kutaniko halina Intaneti, linawezaje kusasisha JW Box? Mara kwa mara ofisi ya tawi hutuma vifaa vya USB, vinavyogharimu dola 4 hivi za Marekani. Vifaa hivyo huwa na habari mpya kutoka kwenye jw.org inayoweza kupakiwa kwenye JW Box.

JW Box imewasaidiaje ndugu zetu? Nathan Adruandra, baba anayeishi katika Jamhuri ya Kidemokrasia ya Congo anaeleza hivi: “Nilijaribu kwa muda mrefu sana kupakua drama ya ‘Ee Yehova, . . . Nimekutegemea Wewe’ na ya Mkumbuke Mke wa Loti. Lakini hakuna wakati ambapo nilifaulu, na hilo lilinivunja moyo. Sasa ninaweza kupakua video hizo kwenye simu yangu, na hilo linatusaidia sana sisi wazazi kuwafundisha vizuri zaidi watoto wetu.”

Ndugu nchini Nigeria anayesaidia makutaniko kufunga hizo JW Box anasema hivi: “Akina ndugu wanaona JW Box kuwa zawadi ya pekee kutoka kwa Yehova. Wanafurahi sana kwamba sasa wanaweza kupakua kwa urahisi machapisho na video kutoka kwenye Sanduku la Vifaa vya Kufundishia.”

Zaidi ya JW Box 1,700 zimetumwa kwa ndugu zetu barani Afrika, Oceania, na Amerika Kusini na mipango inafanywa ya kuzituma kwa makutaniko mengine mengi. Gharama za mpango huo zinashughulikiwaje? Kupitia michango inayotolewa kwa ajili ya kazi ya ulimwenguni pote, na michango mingi inakusanywa kupitia donate.jw.org. Asante sana kwa ukarimu wako.