Jinsi Drama Habari Njema Kulingana na Yesu Inavyotayarishwa

Mwaka huu, jambo moja ambalo Mashahidi wa Yehova wamekuwa wakitazamia kwa hamu ni kutolewa kwa Drama ya 1 ya mfululizo wenye kichwa Habari Njema Kulingana na Yesu. Mamilioni tayari wametazama drama hiyo. Na hiyo ndiyo drama ya kwanza tu kati ya 18! Ndugu na dada wanafanya kazi gani ili kutayarisha mfululizo huo wa video, na wewe umefanya nini ili kuunga mkono jitihada hizo?

Kuwatunza Waigizaji na Wafanyakazi

Kwenye ofisi ya tawi ya Australasia, ambako sehemu kubwa ya mfululizo wa drama Habari Njema unatayarishiwa, kunakuwa na watu 50 hadi 80 wakati ambapo kila igizo linarekodiwa.a Ndugu na dada huandaa mlo wa mchana, jioni, na vitafunio vingine kwa ajili ya waigizaji na wafanyakazi. Ndugu na dada hao hupanga mapema sana ni milo gani itakayoandaliwa. Esther anayefanya kazi katika Idara ya Chakula anasema hivi: “Tunanunua vyakula kutoka kwa wahudumu mbalimbali ili tupate vyakula bora na kwa bei nafuu. Pia tunabadili mara nyingi chakula tunachopika ili tusitupe chochote.” Kila siku tunatumia dola nne hivi kwa ajili ya chakula cha mtu mmoja.

Mbali na chakula, waigizaji na wafanyakazi wanahitaji pia kulindwa. Kulindwa dhidi ya nini? Nchini Australia, ni kawaida kuwa na jua kali sana, lakini kuna kiwango kikubwa cha mionzi hatari inayotokezwa na mwanga wa jua. Ili kuwalinda watu wote kadiri iwezekanavyo kutokana na jua na pia kuwasaidia wasichoke kwa sababu ya joto, ndugu na dada wanaofanya kazi kwa bidii husimamisha mahema na maeneo mengine ya kuwasaidia watu kujipoza, na wanahakikisha kuna maji, miavuli, na mafuta ya kujikinga na miale ya jua. Kevin, anayefanya kazi katika Idara ya Sauti na Video anaeleza hivi: “Wengi kati ya ndugu na dada wanaofanya kazi hiyo ni wajitoleaji wanaoishi nje. Wanafanya kazi hizo na nyingine nyingi kwa unyenyekevu na kwa shangwe. Hatungeweza kutimiza mradi huo bila msaada wao.”

Kurekodi Nje ya Ofisi ya Tawi

Baadhi ya maigizo hayawezi kuonekana vizuri yanaporekodiwa kwenye ofisi ya tawi au hata ndani ya studio. Kwa sababu hiyo, kazi hiyo ya kurekodi hufanyiwa kwenye maeneo ya mbali. Ili kurekodi maigizo ya kale ya Biblia mahali ambapo hakuna nyaya za umeme, barabara zilizo na lami, na nyumba za kisasa, mara nyingi waigizaji na wafanyakazi husafiri kwenda maeneo ya mbali. Kwa hiyo, mavazi yao, vifaa vya kuigiza, na vifaa vya kurekodia vinahitaji kupakiwa, kusafirishwa, na hatimaye kuhifadhiwa kwa njia nzuri vinapofikishwa kwenye eneo la kurekodia. Kabla ya kuanza kurekodi, wasaidizi wa wasimamizi huhakikisha kwamba jenereta, maji safi ya kunywa, na vyoo vinapatikana. Waigizaji na wafanyakazi hukaa katika nyumba za Mashahidi wakarimu wa eneo hilo, katika magari yaliyo kama nyumba, au katika hoteli.

Kurekodi nje ya ofisi ya tawi kunagharimu sana, kunachukua muda mwingi, na kunachosha sana. Kwa hiyo, mwaka wa 2023, Baraza Linaloongoza liliidhinisha kwamba ukuta wa video unaogharimu dola milioni 2.5 (za Marekani) ununuliwe. Teknolojia hiyo inatumia skrini za video zenye ubora wa hali ya juu zinazopatanishwa na mwangaza ili kufanya ionekane kana kwamba video imerekodiwa nje. Kwa sababu hiyo, mara nyingi tunaepuka kutumia pesa nyingi ili kurekodia video nje. Darren, mshiriki wa Halmashauri ya Tawi ya Australasia anasema hivi: “Kurekodi kwa kutumia ukuta huo wa video kunapunguza uchovu na kuwaruhusu wafanyakazi kurudia maigizo fulani mara nyingi. Kwa mfano, ikiwa tungerekodia nje, tungekuwa na dakika chache tu za kurekodi jua linapotua. Lakini kwa kutumia ukuta huo wa video, tunaweza kurudia igizo la jua kutua hadi tunapopata rekodi inayofaa kabisa.”

“Sikuhisi Kama Nimejidhabihu”

Mamia ya waigizaji na wafanyakazi wengine wengi wanahitajika kwa ajili ya kila drama ya mfululizo wa Habari Njema. Wanahisije kuhusu jitihada ambazo ndugu na dada wanafanya kwa ajili yao?

Amber, ambaye alisafiri kilomita 700 kutoka nyumbani huko Melbourne ili kushiriki katika mradi huo aliandika hivi: “Tangu nilipowasili kwenye uwanja wa ndege, akina ndugu hapo Betheli walinitunza vizuri sana. Wanabetheli wengi walinikaribisha kupata mlo au kunywa chai pamoja nao. Tulipokuwa tukirekodi, kila mtu alinifanya nijihisi nimestarehe na kwamba ninapendwa. Nilipata baraka nyingi katika safari hiyo. Sikuhisi kama nimejidhabihu kwa njia yoyote!”

Derek anafanya kazi pamoja na kikundi kinachotokeza video. Anasema hivi: “Idara nyingi zimetusaidia tangu mradi huu ulipoanza. Ninafurahi kushirikiana na ndugu na dada ambao wamedhabihu wakati, mali, na nguvu zao kwa ajili ya mradi huu. Wanatia moyo, wako tayari kufanya chochote, na wana fadhili. Kwa kweli Yehova anawabariki wao na sisi pia. Ninasadiki kwamba anapendezwa sana, si tu na matokeo ya kazi tunayofanya, bali pia na jinsi tunavyofanya kazi hiyo.”

Asante sana kwa msaada ambao umetoa ili kusaidia kutokezwa kwa mfululizo huu wa video kupitia kwa michango yako, kutia ndani michango unayotoa kupitia donate.jw.org.