Inavunja Moyo na Kuharibu Imani

“MIILI ilitapakaa kila mahali nasi hatungeweza kutambua mahali nyumba yetu ilipokuwa,” akasema mwanamume fulani huko Sri Lanka baada ya tsunami kuharibu kijiji chao mnamo Desemba 2004. Katika makala moja kuhusu misiba, mhariri wa mambo ya kidini alisema kwamba nyakati nyingine yeye hujikuta akisali kwa hasira.

Watu wengi huona misiba ya asili kuwa ni adhabu kutoka kwa Mungu. Mwandishi mmoja alifafanua tufani moja kuwa “ngumi ya Mungu.” Nchini Marekani, viongozi fulani wa kidini walifafanua matukio kama ya Tufani Katrina kuwa “hasira ya Mungu” dhidi ya “majiji yaliyojaa dhambi.” Huko Sri Lanka, Wabudha wanaoshikilia sana imani waliwalaumu Wakristo kwa sababu ya tsunami, na hivyo kuongeza mgawanyiko wa kidini. Naye Mhindu mmoja mwenye cheo fulani hekaluni alisema kwamba mungu aitwaye Shiva alikuwa amekasirika kwa sababu watu hawakuwa wakiishi kwa njia inayofaa. Kiongozi wa dini ya Wabudha nchini Marekani alisema hivi kuhusu misiba ya asili: “Hatujui kwa nini mambo hayo hufanyika. Hata hatujui kwa nini tuko hapa.”

Unapoona picha za nyumba zilizoharibiwa, watu waliokufa, na watu walio na huzuni, je, nyakati nyingine wewe hujiuliza, ‘Kwa nini Mungu anaruhusu kuteseka kwingi hivyo?’ Au je, unafikiri ‘Mungu ana sababu nyingi za kuruhusu mambo kama hayo yatendeke lakini hajafunua sababu hizo’? Makala zinazofuata zitachunguza habari hiyo. Pia zitazungumzia hatua fulani ambazo watu wanaweza kuchukua ili kupunguza hatari ya kujeruhiwa na kufa wakati ambapo msiba wa asili unatokea.

[Picha katika ukurasa wa 3]

Viongozi wengi wa kidini hawajui kwa nini Mungu huruhusu misiba ya asili

Je, Mungu Anapaswa Kulaumiwa?

“MUNGU ni upendo,” Biblia inasema. (1 Yohana 4:8) Pia, yeye ni mwenye haki na huruma. “Yeye Mwamba, kazi zake ni kamilifu, kwa maana njia zake zote ni haki. Mungu wa uaminifu, ambaye hana ukosefu wowote wa haki; yeye ni mwadilifu na mnyoofu.”—Kumbukumbu la Torati 32:4.

Kwa kuwa yeye ni Muumba, Yehova Mungu ana uwezo wa kuona mapema vitu vyote vinavyoweza kusababisha madhara, naye ana nguvu za kuingilia mambo. Kwa kufikiria mambo hayo na sifa za Mungu katika Biblia, inaeleweka kwamba wengi huuliza, “Kwa nini Mungu huruhusu misiba ya asili itukie?”a Mamilioni ya watu ambao wameuliza swali hilo wamegundua kwamba Mungu mwenyewe anatoa jibu linalopatana na akili katika Neno lake lililoandikwa. (2 Timotheo 3:16) Tafadhali fikiria mambo yafuatayo.

Walikataa Upendo wa Mungu

Biblia inatuambia kwamba Mungu aliwapa wazazi wetu wa kwanza kila kitu walichohitaji ili waishi kwa furaha na usalama. Isitoshe, kadiri ambavyo wao na watoto wao wangeendelea kutii amri ya Mungu ya ‘kuzaa na kuwa wengi, waijaze dunia,’ familia ya wanadamu ingeweza kutazamia kwamba Mungu angeendelea kuwatunza.—Mwanzo 1:28.

Hata hivyo, kwa kusikitisha Adamu na Hawa walimwasi kimakusudi Muumba wao kwa kutomtii na kuchagua kutomtegemea. (Mwanzo 1:28; 3:1-6) Kwa wazi wanadamu wengi wamefuata kielelezo chao. (Mwanzo 6:5, 6, 11, 12) Kwa ufupi, wanadamu wamechagua kujiongoza na kuimiliki dunia bila kuongozwa na Mungu. Kwa kuwa yeye ni Mungu mwenye upendo ambaye anaheshimu hiari ya watu wake, Yehova hawalazimishi wanadamu wajitiishe chini ya enzi yake kuu, hata ikiwa kuikaidi kunaweza kuwaletea madhara.b

Hata hivyo, Yehova hakuiacha familia ya wanadamu. Hadi leo “yeye hulichomoza jua lake juu ya watu waovu na wema na hunyesha mvua juu ya watu waadilifu na wasio waadilifu.” (Mathayo 5:45) Kwa kuongezea, Mungu alimpa mwanadamu uwezo wa kujifunza kuhusu dunia na mizunguko yake, na kwa kadiri fulani ujuzi huo umewasaidia wanadamu kutabiri hali mbaya sana ya hewa na hatari nyingine, kama vile milipuko ya volkano.

Pia, wanadamu wamegundua ni sehemu gani za dunia ambazo hukabiliwa zaidi na matetemeko mabaya ya nchi au hali mbaya sana ya hewa. Katika nchi fulani ujuzi huo umesaidia kuokoa uhai kwa kuwaelimisha watu na vilevile umefanya mbinu bora zaidi za ujenzi na mifumo ya kutoa maonyo iweze kugunduliwa. Hata hivyo, idadi ya misiba ya asili inayoripotiwa kila mwaka imekuwa ikiongezeka. Kuna sababu nyingi zenye kutatanisha zinazofanya mambo hayo yatukie.

Kuishi Katika Maeneo Hatari

Uharibifu wa msiba hautegemei hasa nguvu za asili ni kubwa kadiri gani. Mara nyingi msiba hutokea kwa sababu ya watu wengi sana kuwa katika eneo lililoathiriwa. Kulingana na ripoti iliyochapishwa na Benki ya Dunia, katika zaidi ya nchi 160, zaidi ya robo ya watu huishi katika maeneo yenye hatari zaidi ya kufa kutokana na misiba ya asili. “Kwa sababu ya watu wengi zaidi kuwa mahali [penye hatari], tukio la asili linaweza kugeuka kuwa msiba,” anasema mwanasayansi Klaus Jacob wa Chuo Kikuu cha Columbia nchini Marekani.

Mambo mengine yanayofanya hali iwe mbaya ni watu kuhamia katika majiji haraka na bila mpango, ukataji wa miti, na kufunika kwa saruji sehemu kubwa ya ardhi ambayo kwa kawaida ingefyonza maji. Mambo hayo mawili yaliyotajwa mwisho yanaweza kusababisha maporomoko ya matope na mafuriko makubwa.

Shughuli za wanadamu zinaweza pia kufanya matetemeko ya nchi kuwa misiba mikubwa, kwani si nguvu za tetemeko zinazosababisha vifo na majeraha mengi bali ni majengo yanayoanguka. Haishangazi kwamba wataalamu wa kuchunguza matetemeko ya nchi husema: “Matetemeko ya nchi hayawaui watu. Majengo ndiyo yanayowaua watu.”

Idadi ya vifo huongezeka kwa sababu serikali haitimizi majukumu yake. Katika nchi moja ya Amerika Kusini, matetemeko ya nchi yameharibu mji mkuu mara tatu katika miaka 400 iliyopita. Na tangu tetemeko la mwisho, mnamo 1967, idadi ya watu imeongezeka kuwa milioni tano. “Lakini huenda hakuna sheria za ujenzi ambazo zinaweza kuwalinda watu au hakuna anayehakikisha zinafuatwa,” linasema gazeti New Scientist.

Maneno hayo ya mwisho yanaeleza hali iliyotokea katika jiji la New Orleans, Louisiana, Marekani, lililojengwa katika eneo la chini ambako mafuriko yanaweza kutokea. Licha ya kuwapo kwa mabomba ya kuzuia maji na pampu, msiba ambao wengi walikuwa wakihofia mwishowe ulitokea mnamo 2005 Tufani Katrina ilipopiga. “Maonyo ya muda mrefu” yalipuuzwa au “hayakuchukuliwa kwa uzito,” inasema ripoti moja katika gazeti USA Today.

Itikio kama hilo limeonekana kuhusu kuongezeka kwa kiwango cha joto, ambako wanasayansi wengi wanaamini kutaongeza misiba mingi inayohusiana na hali ya hewa na kuinua kiwango cha maji baharini. Kwa wazi, tunapaswa kufikiria mambo ya kisiasa, ya kijamii, na ya kiuchumi, ambayo hayakuanzishwa na Mungu. Mambo hayo yaliyoanzishwa na wanadamu yanatukumbusha ukweli wa maneno ya Biblia kwamba mwanadamu hana uwezo wa “kuongoza hatua yake.” (Yeremia 10:23) Sababu nyingine ni mtazamo wa watu kuelekea maonyo ya kiasili na yale yanayotolewa na wenye mamlaka.

Jifunze Kutambua Dalili

Mwanzoni lazima tukubali kwamba misiba ya asili inaweza kutokea bila onyo. Mhubiri 9:11 inasema: “Wakati na tukio lisilotazamiwa [hutupata sote].” Lakini mara nyingi, kunakuwa na maonyo, ya kiasili au kutoka kwa wenye mamlaka, kwamba hatari inakaribia. Hivyo, watu wanapotambua dalili, wanaweza kupata nafasi ya kuokoka.

Tsunami ilipopiga kisiwa cha Simeulue huko Indonesia, mnamo 2004, ni watu saba tu waliokufa kati ya maelfu ya watu. Kwa sababu wakazi wa eneo hilo wanajua kwamba maji yanaposonga mbali sana kutoka ufuoni kwa njia isiyo ya kawaida, inamaanisha kwamba tsunami iko karibu kutokea, wengi wao walikimbia walipoona hilo likitukia. Vivyo hivyo, watu wamepona dhoruba kali na milipuko ya volkano kwa kutii maonyo. Kwa sababu nyakati nyingine maonyo ya kiasili huwa yameanza mapema kabla ya maonyo kutoka kwa wenye mamlaka, ni jambo la hekima kufahamiana na yote, hasa ikiwa unaishi katika eneo ambalo misiba hutokea sana.

Hata hivyo, inasikitisha kwamba “watu wana mwelekeo wa kupuuza hatari hata wakati inapoonekana wazi,” anasema mtaalamu wa masuala ya volkano. Hilo ni kweli hasa kunapokuwa na maonyo ya uongo au mahali ambapo misiba ya kiasili ilitokea zamani sana. Wakati mwingine watu hawapendi kuacha mali zao za kimwili, hata inapokuwa wazi kwamba msiba utatokea.

Katika maeneo mengi watu ni maskini sana hivi kwamba inakuwa vigumu kwao kuhamia maeneo yenye usalama. Hivyo badala ya kudhani kwamba Muumba ndiye msababishaji wa misiba, umaskini unafunua kushindwa kwa wanadamu. Kwa mfano, mara kwa mara serikali hutumia pesa nyingi kununua silaha na kutumia kiasi kidogo kusaidia wenye uhitaji.

Hata hivyo, msaada wa kadiri fulani unapatikana kwa ajili ya watu wote bila kujali wana hali gani. Hilo linawezekanaje? Kwa sababu Mungu kupitia Neno lake, Biblia Takatifu, ametoa kanuni nzuri ambazo zikifuatwa zinaweza kuokoa uhai.

Kanuni Zinazookoa Uhai

◼ Usimjaribu Mungu. Kumbukumbu la Torati 6:16 inasema hivi: “Msimjaribu Yehova Mungu wenu.” Wakristo wa kweli hawaamini kwa ushirikina kwamba Mungu atawalinda dhidi ya madhara yote yanayoweza kuwapata. Hivyo, kunapokuwa na hatari, wao hutii shauri lifuatalo katika Neno la Mungu: “Mtu mwerevu ni yule ambaye ameona msiba na kujificha, lakini wasio na uzoefu wameendelea mbele nao lazima waumie.”—Methali 22:3.

◼ Thamini uhai kuliko vitu vya kimwili. “Hata wakati mtu ana vitu vingi uzima wake hautokani na vitu alivyo navyo.” (Luka 12:15) Ni kweli kwamba vitu vya kimwili vina sehemu yake, lakini haviwezi kutumiwa na mtu aliyekufa. Hivyo, watu wanaopenda uhai na wanaothamini pendeleo la kumtumikia Mungu, hawajihatarishi ili kulinda vitu vya kimwili.—Zaburi 115:17.

Mnamo 2004, Tadashi, anayeishi Japani, alitoka kwenye nyumba yake mara tu tetemeko la nchi lilipotukia hata kabla ya mamlaka kutoa maelekezo. Uhai wake ulikuwa na thamani sana kuliko vitu vya kimwili. Akira, ambaye anaishi katika eneo hilohilo aliandika kwamba “kiwango halisi cha uharibifu kinategemea si mali zilizopotea, bali mtazamo wa mtu mwenyewe. Niliona msiba huo kuwa nafasi nzuri ya kurahisisha maisha yangu.”

◼ Sikiliza maonyo yanayotolewa na serikali. ‘Jitiishe kwa mamlaka zilizo kubwa.’ (Waroma 13:1) Wenye mamlaka wanapotoa amri ya kuhama au ya kufuata hatua fulani za kiusalama, ni vizuri kutii. Tadashi alikaa mbali na eneo la hatari ili atii amri ya kuhama na hivyo akaepuka kujeruhiwa au kufa kutokana na matetemeko madogo baada ya tetemeko kubwa kutokea.

Kunapokuwa hakuna maonyo kutoka kwa wenye mamlaka kuhusu msiba unaokaribia lazima watu wajiamulie watatendaje, wakifikiria mambo yote yanayohusika. Katika maeneo fulani, serikali zinaweza kutoa miongozo inayofaa ili kuokoka msiba. Ikiwa miongozo kama hiyo inapatikana katika eneo lenu je, unaifahamu? Na je, umeizungumzia na familia yako? (Ona sanduku lililo katika ukurasa huu.) Katika sehemu nyingi za ulimwengu kwa kufuata mwelekezo wa ofisi ya tawi, makutaniko ya Mashahidi wa Yehova yamepanga utaratibu wa kufuata kunapokuwa na hali ya dharura, na miongozo hiyo imesaidia sana.

◼ Onyesha upendo wa Kikristo. “Ninawapa ninyi amri mpya,” akasema Yesu, “kwamba mpendane, kama vile ambavyo nimewapenda ninyi.” (Yohana 13:34) Watu ambao hujidhabihu na kuonyesha upendo kama wa Kristo hufanya kila kitu wanachoweza ili kusaidiana kujitayarisha kwa ajili ya msiba wa asili na kukabiliana nao. Kwenye makutaniko ya Mashahidi wa Yehova, wazee hufanya kazi kwa bidii ili kuwasiliana na washiriki wote wa kutaniko na kuhakikisha kwamba wako salama au wanaweza kufika mahali salama. Pia, wazee huchunguza ili kuhakikisha kwamba kila mmoja ana mahitaji ya lazima kama vile maji safi ya kunywa, chakula, mavazi, na dawa zinazohitajika. Familia za Mashahidi katika maeneo salama huwakaribisha Mashahidi wenzao wanaohitaji msaada. Kwa kweli upendo kama huo ni “kifungo kikamilifu cha muungano.”—Wakolosai 3:14.

Je, misiba ya asili itakuwa mibaya zaidi kama watu fulani wanavyotabiri? Huenda ikawa hivyo, lakini si kwa muda mrefu. Kwa nini? Kwa sababu muda wa mwanadamu kuishi bila kumtegemea Mungu unakaribia kwisha. Baada ya hapo, dunia yote na wakazi wake itakuwa chini ya utawala wenye upendo wa Yehova, kukiwa na hali nzuri kama tutakavyoona sasa.

[Maelezo ya Chini]

[Sanduku/Picha katika ukurasa wa 7]

JE, UKO TAYARI KUKIMBIA?

Ofisi ya Kukabiliana na Hali ya Dharura ya New York City, inapendekeza kwamba kila nyumba iwe na mpango wa kuhama kwa kutayarisha “mfuko wa dharura,” yaani mfuko imara, uliowekwa mahali panapofikika kwa urahisi, unaoweza kubebwa kwa urahisi, ulio na vifaa muhimu kwa ajili ya hali ya dharura. Vitu vifuatavyo vinaweza kuwekwa humo:c

◼ Nakala ya hati muhimu zikiwa ndani ya kifaa kisichoingiza maji

◼ Kishada cha ziada cha funguo za gari na nyumba

◼ Kadi za benki na pesa

◼ Maji ya kunywa na chakula kisichoharibika

◼ Tochi, redio inayoshika mawimbi ya AM/FM, simu ya mkononi (ikiwa unayo), betri za ziada

◼ Dawa za angalau juma moja, mwelekezo wa kuzitumia, cheti chenye maandishi ya daktari, na majina ya madaktari na namba zao za simu. (Hakikisha kwamba umeweka dawa mpya kabla muda wa zile ulizo nazo haujapita)

◼ Kisanduku cha huduma ya kwanza

◼ Viatu imara vinavyofaa na mavazi kwa ajili ya mvua

◼ Habari kwa ajili ya familia yako ya jinsi mtakavyowasiliana, na mahali pa kukutana na pia ramani ya eneo lenu

◼ Mahitaji ya mtoto mchanga

[Maelezo ya Chini]

[Hisani ya Picha katika ukurasa wa 4]

USGS, David A. Johnston, Cascades Volcano Observatory

Misiba Itakwisha Karibuni

MATETEMEKO ya nchi, vita, njaa, na magonjwa ni baadhi ya matukio ambayo Yesu alitabiri yangekuwa ishara ya “umalizio wa mfumo wa mambo” tunamoishi sasa. (Mathayo 24:3, 7, 8; Luka 21:7, 10, 11) Bila shaka, matukio hayo hayasababishwi na Mungu. Hatupaswi kumlaumu Yesu au Yehova Mungu, Baba yake, kwa sababu ya matukio hayo.

Lakini matukio hayo yaliyotabiriwa ni ishara ya mambo ambayo Mungu atafanya. Mungu atasimamisha Ufalme wake, yaani, serikali ya kimbingu mikononi mwa Yesu Kristo, na atawaangamiza wote wanaopinga enzi kuu ya Yehova. (Danieli 2:44; 7:13, 14) Baada ya hapo, dunia itakuwa mahali pa amani ambapo watu hawataogopa misiba ya asili. Ahadi hii ya Mungu itatimizwa kwa ukamili: “Watu wangu watakaa katika makao yenye amani na katika makao ya uhakika kamili na katika mahali pa kupumzika pasipo na usumbufu.”—Isaya 32:18.

Msikilize Mungu Ili Uishi!

Kama ilivyofafanuliwa katika makala iliyotangulia, kutii maonyo kunaweza kuokoa uhai. Kanuni hiyo inatumika hata zaidi katika maonyo ya Mungu yaliyotajwa katika Biblia. Mungu anaahidi: “Kwa habari yake mtu anayenisikiliza, yeye atakaa salama wala hatasumbuliwa na hofu ya msiba.”—Methali 1:33.

Mashahidi wa Yehova hujitahidi kumsikiliza Mungu kwa kusoma kwa ukawaida Neno lake lililoongozwa kwa roho na kufuata mafundisho yake. Nao wanakutia moyo ufanye vivyo hivyo. Naam, wote ambao humsikiliza Yehova na kumtii, hawahitaji kuogopa wakati ujao au msiba utakaowapata waovu. Badala yake wanaweza kutazamia kupata uzima wa milele katika dunia Paradiso, ambapo “watapata furaha yao tele katika wingi wa amani.”—Zaburi 37:10, 11.

[Sanduku katika ukurasa wa 8]

FARAJA KWA WANAOOMBOLEZA

Je, umempoteza mtu yeyote unayempenda katika kifo, labda kwenye msiba wa asili au kwa njia nyingine? Karibu miaka 2,000 hivi iliyopita, Lazaro aliyekuwa rafiki wa karibu wa Yesu alikufa. Alipojua kuhusu jambo hilo, Yesu alienda Bethania katika kijiji ambacho Lazaro alikuwa akiishi, naye akamfufua kutoka katika “usingizi” wa kifo.—Yohana 11:1-44.

Yesu hakufanya muujiza huo kuonyesha tu kwamba alimpenda Lazaro na familia yake, bali pia ili akazie ahadi yake ya kuwafufua “wote waliomo ndani ya makaburi ya ukumbusho” wakati wa utawala wake. (Yohana 5:28, 29) Naam, katika Paradiso inayokuja Yesu ataondoa madhara yote ambayo yalisababishwa na uasi kule Edeni.a—1 Yohana 3:8.

[Maelezo ya Chini]

[Sanduku/Picha katika ukurasa wa 9]

TETEMEKO LA NCHI LILIBADILISHA MAISHA YANGU

Mnamo 1971, nikiwa ningali msichana, nilikuwa na mtoto mchanga nami nilikuwa mwimbaji mashuhuri wa sauti ya soprano. Mnamo 1957, nilihama kutoka Winnipeg, Manitoba, Kanada ambako nilizaliwa na kwenda Hollywood, California, Marekani, ili kufuatilia kazi niliyopenda sana ya muziki.

Kila mwaka kwa miaka tisa, Mama, ambaye alikuwa Shahidi wa Yehova, alisafiri kutoka Kanada ili kunitembelea. Alitumia pindi hizo kuzungumza nami kuhusu Biblia akiwa na hakika kwamba ilitoa mashauri bora zaidi kuhusu furaha na maisha ya familia. Nilimpenda Mama nami nilimsikiliza kwa sababu nilimheshimu. Hata hivyo, kila wakati alipoondoka nilitupa vichapo alivyokuwa akinipa nikiwa na uhakika kwamba maisha yangu yalikuwa yanaelekea mahali panapofaa.

Kisha mapema asubuhi ya Jumanne (Siku ya 2) Februari (Mwezi wa 2) 1971, niliamshwa na tetemeko la nchi lenye kipimo cha 6.6. Kulikuwa na kelele nyingi na mtikisiko mkubwa. Nikitetemeka kwa woga, nilimkimbilia mwanangu nami nikafurahi sana nilipomkuta akiwa salama kitandani. Mtikisiko huo ulipokoma, glasi zilizovunjika na vitu vilivyokuwa kabatini vilitapakaa sakafuni nayo maji yaliyokuwa ndani ya kidimbwi cha kuogelea yalikuwa yamemwagika kila mahali bustanini. Ingawa familia yangu ilikuwa salama usingizi wangu ulipotea.

Mama alikuwa amezungumza kuhusu “siku za mwisho,” ambazo zingekuwa na “matetemeko makubwa ya nchi.” (2 Timotheo 3:1; Luka 21:7-11) Mwaka huo mama alikuja kunitembelea kama kawaida yake lakini hakuwa na vichapo vyovyote vya Biblia. Baada ya kunihubiria kwa miaka tisa bila mafanikio, alikata kauli kwamba sipendezwi. Alikuwa amekosea sana! Alipofika tu, nilimuuliza maswali mengi sana. Mambo niliyoyaona kuwa muhimu maishani, yaani kuimba na umashuhuri, hayakuwa na umuhimu tena.

Juma hilohilo nilihudhuria mikutano ya Kikristo pamoja na Mama katika Jumba la Ufalme, na baada ya hapo nilihudhuria mikutano kwa ukawaida. Mama alipanga niwe na funzo la Biblia. Nilibatizwa mnamo 1973, na leo mimi hutumia saa 70 hivi kwa mwezi nikiwatangazia wengine habari njema ya Ufalme wa Mungu. (Mathayo 24:14) Badala ya kuvunja imani yangu katika Mungu, tetemeko la nchi lilinisaidia kuwa na imani.—Limesimuliwa na Colleen Esparza.