WANAWAPENDA WATU BADALA YA RAHA

Vijana wengine wengi kutoka sehemu mbalimbali za Muungano wa Sovieti walihamia Latvia kusaidia kazi. Maisha yao hayakuwa rahisi, lakini walikuwa tayari kujidhabihu. Kwa mfano, Anna Batnya, ambaye sasa ni painia wa pekee, alipata kazi katika kiwanda cha kushona na makao katika bweni fulani. Anasema: “Hali zilikuwa ngumu sana. Tulihubiri isivyo rasmi katika magari-moshi, vituo vya magari-moshi, mabustani, makaburi, na karibu na makanisa.

“Katika magari-moshi, ambayo yalijaa nyakati zote, tulihubiri behewa kwa behewa tukiwa wawili-wawili. Mmoja wetu alihubiri huku yule mwingine akiwa macho. Mara nyingi watu waliokuwa karibu walishiriki mazungumzo. Nyakati nyingine tulirushiwa maswali kutoka kila upande. Gari-moshi liliposimama, tulihamia behewa lingine, ikiwa lazima. Tulifurahia sana kuona Yehova akibariki huduma yetu.”

Mwaka wa 1989, wajumbe 50 hivi kutoka Latvia walihudhuria Kusanyiko la Wilaya la “Ujitoaji Kimungu” nchini Poland. Marija Andrišaka, ambaye sasa ni painia wa pekee anasema: “Kuwa pamoja na ndugu na dada wote hao kulinisaidia sana kukua kiroho.”