Tumia Vizuri Broshua Barabara
1 Eneo letu linatofautiana na maeneo mengi ulimwenguni kwa kuwa watu wengi huku ni wanadini. Huenda wengi wao wameathiriwa na imani ya kimapokeo kuhusu ibada ya mababu na uchawi. Imani hiyo inatokana na mafundisho ya uwongo kuhusu nafsi na roho. Ijapokuwa broshua Mungu Anataka Tufanye Nini? na broshua Wewe Unaweza Kuwa Rafiki ya Mungu! zimetumiwa kwa mafanikio, broshua hizo hazielezi mafundisho hayo kwa undani. Katika kusanyiko letu la wilaya la 2002, tulipokea kifaa kipya kilichokusudiwa kutumiwa katika kazi ya kufanya wanafunzi huku Afrika, yaani, ile broshua Je, Umeipata Barabara Inayoongoza Kwenye Uhai wa Milele? Je, umekuwa ukitumia broshua hiyo vizuri?
2 Jinsi ya Kuitumia: Baadhi ya wahubiri wamejiuliza jinsi broshua hiyo inavyopaswa kutumiwa katika huduma ya shambani. Je, tunaweza kuitumia kuanzisha mafunzo ya Biblia? Bila shaka. Nchini Tanzania, mwangalizi mmoja wa mzunguko na ndugu mwingine walikuwa wakihubiri nyumba kwa nyumba walipompata ofisa fulani ambaye aliwakaribisha. Ofisa huyo alikuwa akiwapinga Mashahidi hapo awali, lakini baada ya Jumba la Ufalme kujengwa katika eneo lao, alibadili maoni yake kuwahusu. Mwangalizi huyo wa mzunguko alianza kujifunza Biblia na ofisa huyo kwa kutumia somo la 4 lenye kichwa, “Wazazi Wetu wa Kale Wako Wapi?” Walijifunza somo lote kutia ndani yale masimulizi kwenye ukurasa wa 14. Mwishowe ofisa huyo akasema, “Kitabu hiki ni kizuri sana! Kinaeleza matatizo yetu hasa. Kwa kweli, kila mtu katika eneo hili anapaswa kukisoma. Hiki ni kitabu bora!” Kisha akamsihi ndugu yake aliyekuwa amemtembelea aketi na kusoma somo hilo, na kusema, “Kitakueleza mambo yote tunayofanya hapa na kitakusaidia kuacha kuyafanya.” Mkimaliza kujifunza broshua Barabara, itafaa mjifunze broshua Anataka, ili mwanafunzi ajue ni mwenendo gani unaompendeza Mungu.
3 Huenda ulianzisha funzo kwa kutumia broshua Anataka, lakini mwanafunzi ana maswali kuhusu hali ya wafu. Kwa majuma kadhaa mnaweza kuzungumzia somo la 3 lenye kichwa “Ni Nani Wanaoishi Katika Makao ya Roho?” na la 4 lenye kichwa “Wazazi Wetu wa Kale Wako Wapi?” Ikiwa anauliza maswali kuhusu kuwasiliana na pepo, mnaweza kuzungumzia somo la 5 lenye kichwa, “Ukweli Kuhusu Uchawi na Ulozi.” Kisha mwendelee kujifunza broshua Anataka. Pia broshua Barabara huzungumzia kwa undani tofauti baina ya ibada ya kweli na ya uwongo, na hivyo inaweza kutumiwa kumwonyesha mwanafunzi kwa nini anahitaji kutoka katika Babiloni Mkubwa, yaani milki ya ulimwengu ya dini ya uwongo.—Ufu. 18:2, 4.
4 Tunaweza Kuitoaje: Katika kitabu Kutoa Sababu chini ya vichwa, “Matangulizi ya Kutumia Katika Huduma ya Shambani,” “Ibada ya Mababu,” “Nafsi,” na “Roho,” kuna mapendekezo tunayoweza kutumia tunapotoa broshua Barabara. Kwa mfano:
◼ Unaweza kumuuliza mwenye nyumba, “Umewahi kujiuliza: Je, kifo ndio mwisho wa mambo yote? Au kuna jambo lingine baada ya kifo?” [Ngojea jibu.] “Biblia inajibu swali lolote tunaloweza kuwa nalo juu ya kifo.” (Soma Mhubiri 9:5, 10.) Kisha, fungua ukurasa wa 13 wa broshua Barabara na uzungumzie kichwa kidogo, “Hali ya Wafu.”
◼ Au unaweza kumuuliza, “Umewahi kufikiria kuwahusu mababu zetu? Wako wapi? Wanaweza kutusaidia au kutudhuru?” [Ngojea jibu.] “Ona kile ambacho Biblia inasema kuhusu wafu katika Zaburi 49.” (Soma Zaburi 49:10, 17-19.) Kisha uzungumzie somo la 4 katika broshua Barabara.
5 Wasaidie Kuipata Barabara Hiyo: Yesu alisema kwamba watu wachache ndio wangeipata “barabara inayoongoza kwenye uzima.” (Mt. 7:13, 14) Tunafurahi sana kwa sababu mtu fulani alitusaidia kuipata! Nasi hushangilia tunapomsaidia mtu mwingine awe mwanafunzi wa Yesu na kuwa na taraja la uzima wa milele. (1 The. 2:19) Broshua Barabara ni kifaa bora tunachoweza kutumia katika kazi hii ya kuokoa uhai. Na tuitumie vizuri.