Endelea Kutarajia Mwisho kwa Uhakika

Hivi karibuni sana subira ya Yehova kuelekea ulimwengu huu itafikia kikomo. Dini ya uwongo itaharibiwa, muungano wa mataifa utawashambulia watu wa Mungu, na Yehova atawaangamiza waovu kwenye Har–Magedoni. Wakristo wanatazamia kwa hamu matukio hayo yenye kusisimua.

Bila shaka, hatujui mambo yote kuhusu dhiki kuu. Kwa mfano, hatujui itaanza lini kihususa. Hatujui serikali zitatumia sababu zipi ili kutetea shambulio lao dhidi ya dini. Hatujui mataifa yatawashambulia watu wa Mungu kwa muda mrefu kadiri gani wala hatujui mambo yatakayohusika. Pia hatujui njia hususa ambayo Yehova atatumia kuwaangamiza waovu kwenye Har–Magedoni.

Hata hivyo, Maandiko yanatupa habari zote tunazohitaji ili kuukabili wakati ujao tukiwa na uhakika na ujasiri. Kwa mfano, tunajua kwamba tunaishi katika kipindi cha mwisho cha “siku za mwisho.” (2Ti 3:1) Tunajua kwamba shambulizi dhidi ya dini ‘litafupishwa’ ili dini ya kweli isiharibiwe. (Mt 24:22) Tunajua kwamba Yehova atawakomboa watu wake. (2Pe 2:9) Pia, tunajua kwamba Yule ambaye Yehova amemchagua kuwaangamiza waovu na kuwaokoa umati mkubwa wakati wa Har–Magedoni ni mwadilifu na mwenye nguvu.​—Ufu 19:11, 15, 16.

Bila shaka, matukio ya wakati ujao yatawafanya watu ‘wazimie kwa woga.’ Hata hivyo, kwa kusoma na kutafakari matendo ya Yehova ya wokovu ya wakati uliopita na mambo ambayo amefunua kuhusu wakati ujao, tutaweza ‘kusimama wima na kuinua vichwa vyetu,’ tukiwa na uhakika kwamba ukombozi wetu unakaribia.​—Lu 21:26, 28.