JINSI YA KUSHINDA CHUKI

4 | Shinda Chuki kwa Msaada wa Mungu

Biblia Inasema:

“Tunda la roho ni upendo, shangwe, amani, subira, fadhili, wema, imani, upole, kujizuia.”—WAGALATIA 5:22, 23.

Inamaanisha Nini?

Inawezekana kushinda chuki kwa msaada wa Mungu. Roho yake takatifu inaweza kutusaidia kusitawisha sifa ambazo hatungeweza kuzisitawisha kwa uwezo wetu wenyewe. Hivyo, badala ya kujaribu kushinda chuki kwa nguvu zetu wenyewe, itakuwa vizuri ikiwa tutategemea msaada wa Mungu. Tukifanya hivyo, tutakuwa kama mtume Paulo, aliyeandika hivi: “Kwa mambo yote nina nguvu kupitia yule anayenipa nguvu.” (Wafilipi 4:13) Kwa kweli, tutaweza kusema hivi: “Msaada wangu hutoka kwa Yehova.”—Zaburi 121:2.

Jinsi ya Kutumia Kanuni Hii:

“Kwa msaada wa Yehova, nimefaulu kushinda hasira yangu kali na sasa naishi kwa amani.”—WALDO

Sali kwa Yehova, ukimwomba kwa unyoofu akupe roho takatifu. (Luka 11:13) Mwombe akusaidie uonyeshe sifa nzuri maishani mwako. Jifunze mambo ambayo Biblia inasema kuhusu sifa zitakazokusaidia kushinda chuki, kama vile upendo, amani, subira, na kujizuia. Tafuta fursa za kusitawisha sifa hizo maishani mwako. Na shirikiana na wale wanaojitahidi kusitawisha sifa hizo. Watu hao wanaweza ‘kuchochea ndani yako upendo na matendo mazuri.’—Waebrania 10:24.

Simulizi la Maisha—WALDO

Alishinda Chuki na Jeuri

Waldo alilelewa katika mazingira yaliyomfanya awe na chuki. Anasema hivi: “Nilihusika katika mapigano na wauzaji wa dawa za kulevya . . . Pindi moja, niliponea chupuchupu baada ya kudungwa kisu na mtu aliyekodiwa na genge la wahalifu ili aniue.”

Waldo hakufurahia mke wake alipoanza kujifunza Biblia na Mashahidi wa Yehova. Anasema: “Niliwachukia Mashahidi, na mara nyingi niliwatukana kwa sauti. Lakini sikuzote walikuwa wapole.”

Hatimaye, Waldo alianza kujifunza Biblia. Anasema hivi: “Ilikuwa vigumu kufuata mambo niliyokuwa nikijifunza. Niliamini kwamba singeweza kamwe kuidhibiti hasira yangu kali.” Hata hivyo, jambo moja alilojifunza katika Biblia lilimsaidia sana.

Waldo anasema: “Siku moja, Alejandro, ambaye alikuwa akinifundisha Biblia, aliniambia nisome Wagalatia 5:22, 23. . . . Alejandro aliniambia ili nisitawishe sifa hizo, sikupaswa kutegemea uwezo wangu, bali roho takatifu ya Mungu. Hilo lilibadili kabisa maoni yangu!”

Kwa msaada wa Mungu, Waldo amefaulu kushinda chuki maishani mwake. Anasema: “Watu wa ukoo na rafiki zangu wa zamani hawaamini kwamba nimebadilika. Kwa msaada wa Yehova, nimefaulu kushinda hasira yangu kali na sasa naishi kwa amani.”