“Eureka Drama” Ilisaidia Watu Wengi Kupata Kweli ya Biblia

“EUREKA!” Neno hilo linamaanisha “Nimeipata!” Katika miaka ya 1800, watu waliokuwa wanachimba zahabu katika jimbo la Californie huko États-Unis, walikuwa wanasema neno hilo kila mara walipopata zahabu katika udongo. Ndugu Charles Taze Russell pamoja na Wanafunzi wa Biblia wenzake walipata jambo la maana sana kuliko zahabu, ni kusema, kweli ya Biblia, na walipenda kabisa kuijulisha watu wengine.

Karibu na mwisho wa mwaka wa 1914, Shirika la Kimataifa la Wanafunzi wa Biblia (I.B.S.A), lilitoa filme inayoitwa “Foto-Drama ya Uumbaji,” ambayo ilikuwa inafanya saa 8; watu wengi waliiona katika miji mikubwa-mikubwa. Filme hiyo yenye kutegemea Biblia ilionyesha watu wenye kutembea na vitu vyenye kutikisika, rangi zenye kupendeza, na maelezo yenye kuvutia, ilizungumuzia historia yote ya mwanadamu, kuanzia uumbaji mupaka mwisho wa Utawala wa Yesu wa Miaka Elfu.—Ufu. 20:4.a

Lakini, namna gani watu walioishi katika miji midogo-midogo ao katika vijiji wangeona filme hiyo? Ili kusaidia watu wenye hamu ya kupata kweli katika maeneo hayo, Shirika I.B.S.A. lilitoa filme inayoitwa “Eureka Drama,” ambayo ni sawa tu na “Foto-Drama,” lakini ilikuwa imefupishwa na ingeweza kubebwa kwa urahisi. Eureka Drama ilitolewa katika aina tatu na kila aina ilipatikana katika luga mbalimbali. “Eureka X” ilikuwa na sauti na muziki uliorekodiwa. “Eureka Y” ilikuwa na sauti na ilikuwa na picha zenye kuvutia. Na “Eureka Family Drama [ao Eureka Drama kwa ajili ya Familia],” ambayo ilitolewa ili itumiwe nyumbani, ilikuwa na maelezo na nyimbo za ibada. Pia, kulikuwa vyombo vya bei chini vya kutumikisha ili kuona filme hizo.

Kwa sababu hakukuwa lazima ya kutumikisha chombo cha kuonyesha filme ao écran kubwa, Wanafunzi wa Biblia waliweza kuonyesha watu filme hiyo bila malipo, hata katika maeneo ya mashambani, na hilo liliwasaidia kueneza ujumbe wa Ufalme. “Eureka X” ambayo ilikuwa na sauti tu, ingeweza kusikilizwa usiku ao muchana. Chombo ambacho kilitumiwa ili kuonyesha “Eureka Y” kilitumika bila umeme (courant); kilitumia tala iliyo kama kolema. Ripoti moja katika Munara wa Mulinzi wa luga ya Finlande, ilisema hivi: “Tunaweza kuonyesha picha hizi karibu kila mahali.” Maneno hayo yalikuwa ya kweli kabisa.

Kuliko kulipa vyumba vikubwa-vikubwa, mara nyingi Wanafunzi wa Biblia walitafuta mahali ambapo hawangelipia, kama vile masomo, vyumba kwenye tribinale, mahali pa kungojea treni ao hata mahali ambapo watu wanajifurahisha. Mara nyingi, watu waliona filme hizo wakiwa inje; picha zilionyeshwa kwenye kitambaa kikubwa cheupe, ambacho kilipigiliwa kwenye ukuta wa nyumba fulani katika shamba. Ndugu Anthony Hambuch aliandika hivi: “Walimaji walitayarisha nafasi katika mashamba yao, na walitayarisha vipande vya miti ili watu wakae wanapoona filme.” Ndugu waliopelekea watu Eureka Drama, walikuwa na gari ndogo lililokokotwa na farasi ambalo walitumia ili kubeba vyombo vya kuonyesha filme, vitu vyao vya lazima, na vyombo vya kupikia chakula.

Wakati fulani watu walioona Eureka Drama walikuwa wachache, wakati mwengine walikuwa wengi sana. Siku moja, watu 400 waliona filme hiyo kwenye masomo moja huko États-Unis, katika kijiji kidogo cha wakaaji 150 tu. Katika eneo lengine watu walitembea kilometre 8 hivi, ili waone “Eureka Drama.” Katika inchi ya Suède, majirani wa Charlotte Ahlberg, ambao walikusanyika katika nyumba yake “waliguswa moyo sana” waliposikia maneno ya Eureka Drama. Katika inchi ya Australia, watu 1500 hivi, waliona filme hiyo katika muji fulani uliokuwa mbali, ambako watu wanachimba majiwe ya bei kali. Gazeti Munara wa Mulinzi liliripoti kwamba wakati filme hiyo ilionyeshwa kwenye masomo mbalimbali, “wanafunzi na waalimu walifurahia sana picha na walishangaa kuona diske nzuri ambazo tulitumia.” Hata katika maeneo yenye vyumba vya sinema, watu walipenda sana kuona “Eureka Drama.”

KUKOMALISHA MBEGU ZA KWELI

Eureka Drama ilisaidia sana wahubiri ambao walitumwa katika maeneo ya mbali ili kuanzisha vikundi vipya vya Wanafunzi wa Biblia. Ni vigumu kujua kabisa ni watu wangapi waliona Eureka Drama. Filme hiyo ilionyeshwa mara nyingi. Hata hivyo, katika mwaka wa 1915, ni vikundi 14 tu kati ya vikundi 86 vya kuonyesha watu filme hiyo, ndivyo vilitoa ripoti kwa ukawaida. Ripoti ya mwisho wa mwaka huo ilionyesha kwamba picha fulani zilikosekana, hata hivyo watu zaidi ya milioni moja walikuwa wameona filme hiyo, na watu 30000 hivi waliomba vichapo.

Ni kweli kwamba, watu hawaone “Eureka Drama” kuwa jambo la maana sana katika historia, lakini tujue kwamba, katika inchi nyingi kama vile Australia, Argentina, Afrika ya Kusini, Uingereza, India, Visiwa vya Karibea, na inchi zingine, mamilioni ya watu waliona filme hiyo ya pekee kabisa. Wengi kati yao walipata kweli ya Biblia, ambayo ni ya maana sana kuliko zahabu, kwa hiyo wangeweza kusema hivi kwa sauti kubwa: “Eureka!”