Walemavu—Lakini Wenye Kuzaa Matunda

¹ Ikiwa wewe ni mmoja wa wale Mashahidi wa Yehova wengi walio walemavu, bado unaweza kuwa na huduma yenye kuzaa matunda. Kwa kweli, hali zako zinaweza kukutolea nafasi za pekee za kutoa ushahidi na kutia wengine moyo.

² Kutoa Ushahidi: Wengi wanaolazimika kupambana na ulemavu ni wenye kushiriki kikamili katika huduma. Kwa mfano, dada mmoja ambaye uwezo wake wa kutembea na wa kusema ulipatwa na matokeo mabaya ya upasuaji aliona kwamba angeweza kushiriki katika kazi ya kutoa magazeti ikiwa mume wake angeegesha gari lao karibu na njia yenye watu wengi wanaoenda kwa miguu. Kwenye pindi moja, aliachia watu magazeti 80 kwa muda wa saa mbili tu! Hali zako za pekee zinaweza pia kufanya ukutane na watu ambao ni vigumu kuwafikia kwa njia nyingine. Ikiwa ni hivyo, waone kuwa eneo lako la pekee.

³ Mahubiri yako yanaweza kuwa yenye matokeo sana! Wengine wanapoona azimio lako na uvutano mzuri ambao kweli ya Biblia imekuwa nao juu ya maisha yako, wanaweza kuvutwa kwenye ujumbe wa Ufalme. Zaidi ya hiyo, unapokutana na watu wanaoteseka, mambo uliyojionea maishani yanaweza kukuandalia vifaa vya kuwafariji kupitia Neno la Mungu.—2 Kor. 1:4.

⁴ Tia Wengine Nguvu: Je, haukutiwa moyo na masimulizi ya maisha ya Laurel Nisbet, aliyeishi katika pafu la chuma kwa miaka 37 na bado alisaidia watu 17 wapate ujuzi sahihi wa kweli ya Biblia? Katika njia hiyohiyo, mfano wako unaweza kuchochea waamini wenzako wajitahidi katika utumishi wa Yehova.—g93-SW 1/22 uku. 18-21.

⁵ Hata ikiwa hali zako zinakuzuia usitoke katika huduma kwa kadiri ambavyo ungetaka, bado unaweza kutia wengine nguvu. Ndugu mmoja alisema: “Nimejifunza kwamba hata mtu aliye mlemavu sana anaweza kusaidia sana wengine. Mke wangu na mimi tumekuwa kama nanga ya namna fulani kwa watu mbalimbali kundini. Kwa sababu ya hali zetu tunakuwapo sikuzote, tunapatikana sikuzote.” Hata hivyo, kwa sababu ya ulemavu wako, inasikika kwamba hauwezi sikuzote kufanya mambo kulingana na bidii yako. Lakini, kwa msaada fulani unaweza kushiriki kwa matokeo katika huduma. Kwa hiyo, ikiwa unahitaji msaada fulani, usisite kujulisha wazee au wengine wanaoweza kukusaidia katika kutaniko.

⁶ Yehova anaona kila jambo unalofanya ili kumtumikia, na anapendezwa na utumishi unaotoa kwa nafsi yote. (Zab. 139:1-4) Unapomtegemea, anaweza kukutia nguvu ili uwe na huduma yenye maana na yenye kuzaa matunda.—2 Kor. 12:7-10.