Maagizo kwa Ajili ya Mukutano Utumishi na Maisha ya Mukristo

Mambo Yenye Kuwa Ndani

• Maneno ya Utangulizi 2

• Utajiri wa Neno ya Mungu 3-5

  • Hotuba 3

  • Mali ya Kiroho 4

  • Usomaji wa Biblia 5

• Tujitoe Kabisa mu Kazi ya Kuhubiri 6-14

  • Kuanzisha Mazungumuzo 7

  • Kuendelesha Mazungumuzo 8

  • Kufanya Wanafunzi 9

  • Kufasiria Mambo Yenye Unaamini 10

  • Hotuba 11

  • Habari ya Kuzungumuzia 12

  • Aina ya Mahubiri 13

  • Matumizi ya Video na Vichapo 14

• Maisha ya Mukristo 15-16

  • Funzo ya Biblia ya Kutaniko 16

• Maneno ya Kumalizia 17

• Kupongeza na Kutoa Mashauri 18

• Wakati 19

• Wakati Mwangalizi wa Muzunguko Anatembelea Kutaniko 20

• Juma ya Mukusanyiko wa Muzunguko ao wa Eneo 21

• Juma ya Ukumbusho 22

• Mwangalizi wa Mukutano Utumishi na Maisha 23

• Musimamizi wa Mukutano Utumishi na Maisha 24

• Mushauri Musaidizi 25

• Masomo mu Jumba ya Pili ao ya Tatu 26

• Video 27

1. 1. Maagizo yenye kuwa mu hii dokima itasaidia kila mutu mwenye kuwa na mugao ku mukutano Utumishi na Maisha ya Mukristo. Wakati unapata mugao, mbele ya kuutayarisha, unapaswa kufikiria maagizo yenye inahusu mugao wako, yenye kuwa mu Buku ya Mukutano—Utumishi na Maisha ya Mukristo na yenye kuwa mu hii dokima. Inafaa kutia moyo wahubiri wote wakuwe tayari kupitisha vipindi. Wengine wenye wanahuzuria kwa ukawaida mikutano ya kutaniko wanaweza kupitisha vipindi kama wanakubali mafundisho ya Biblia na kama maisha yao inapatana na kanuni za Kikristo. Kama mutu mwenye haiko muhubiri anapenda kukuwa napitisha vipindi, mwangalizi wa Mukutano Utumishi na Maisha anapaswa kuzungumuza naye juu ya kuona kama anatimiza sifa zenye kuombwa. Kisha kuchunguza ule mutu, mwangalizi wa Mukutano Utumishi na Maisha atamujulisha ikiwa anastahili ao hapana. Wakati wa ile mazungumuzo, mwalimu wa ule mwanafunzi (ao muzazi mwenye kuamini) anapaswa kuwa pale. Sifa zenye kuombwa ni zile tu zenye mutu mwenye anapenda kuwa muhubiri mwenye hayabatizwa anapaswa kutimiza.—od sura ya 8 fu. 8.

MANENO YA UTANGULIZI

1. 2. Dakika 1. Kila juma, kisha wimbo na sala ya kwanza, musimamizi wa Mukutano Utumishi na Maisha anapaswa kusema mambo fulani yenye itapatia watu hamu ya kufuata programu ya ile siku, na atakazia sana mambo yenye italetea kutaniko faida.

UTAJIRI WA NENO YA MUNGU

1. 3. Hotuba: Dakika 10. Buku ya Mukutano Utumishi na Maisha inatoa kichwa na maelezo ya mufupi juu ya mambo makubwa mbili ao tatu ya kuzungumuzia. Hii hotuba inapaswa kupewa muzee ao mutumishi wa huduma mwenye iko na uwezo wa kuipitisha muzuri. Wakati tunaanza kitabu mupya ya Biblia mu usomaji wa Biblia wa kila juma, video ya utangulizi ya ile kitabu itaonyeshwa. Musemaji anaweza kuonyesha namna gani mambo yenye iko mu ile video inapatana na kichwa ya habari. Lakini, asikose kuzungumuzia mawazo yote yenye inaonyeshwa katika hotuba yake mu buku ya mukutano. Tena, kama wakati inaruhusu, anapaswa kuzungumuzia picha yenye imetayarishwa ili kukamilisha hotuba yake. Pia, kama kuko habari ingine yenye inapatana na hotuba yake, anaweza kuitia ndani.

2. 4. Mali ya Kiroho: Dakika 10. Ni sehemu ya maulizo na majibu. Haina maneno ya utangulizi ao ya kumalizia. Inapaswa kutolewa na muzee ao mutumishi wa huduma mwenye iko na uwezo wa kuipitisha muzuri. Anapaswa kuuliza maulizo yote mbili. Tena, anaweza kuamua kama ni lazima kusoma maandiko ao hapana. Majibu ya ndugu na dada haipaswe kupitisha segonde 30.

3. 5. Usomaji wa Biblia: Dakika 4. Mwanaume njo anapaswa kufanya hii kipindi. Mwanafunzi atasoma sehemu yake bila kusema maneno ya utangulizi ao ya kumalizia. Musimamizi wa mukutano atatafuta zaidi sana kusaidia wanafunzi wasome bila makosa, wasome kwa njia yenye inaeleweka, wasome bila kusita-sita, wakazie mambo makubwa, wabadilishe sauti, wajue ni fasi gani inaomba kutua, na wasome kwa njia ya kawaida. Juu sehemu fulani za usomaji wa Biblia ni za murefu na zingine ni za mufupi, mwangalizi wa Mukutano Utumishi na Maisha ya Mukristo anapaswa kufikiria uwezo wa kila mwanafunzi mbele ya kumupatia hii kipindi.

TUJITOE KABISA MU KAZI YA KUHUBIRI

1. 6. Dakika 15. Hii sehemu inapatia wote nafasi ya kufanya mazoezi juu ya namna ya kuhubiri na inawasaidia wakomalishe ufundi wao wa kuzungumuza na watu, na pia ufundi wao wa kuhubiri na kufundisha. Kama ni lazima, wazee pia wanaweza kupewa migao ya wanafunzi. Kila mwanafunzi anapaswa kutumikisha somo ya mu broshua Kufundisha ao Penda Watu yenye inaonyeshwa mu paranteze chini ya kipindi yake mu Buku ya Mukutano Utumishi na Maisha. Wakati fulani, sehemu ya mazungumuzo pamoya na wasikilizaji itakuwa napangwa. Ile sehemu itakuwa naongozwa na muzee ao mutumishi wa huduma mwenye iko na uwezo wa kuipitisha muzuri.—Ona fungu ya 15 juu ya kujua namna ya kuongoza sehemu ya mazungumuzo pamoya na wasikilizaji.

2. 7. Kuanzisha Mazungumuzo: Hii kipindi inaweza kupitishwa na mwanafunzi mwanaume ao mwanamuke. Kama mwanafunzi ni mwanaume, musikilizaji wake anapaswa kuwa mwanaume ao mutu wa familia yake; na kama ni mwanamuke, musikilizaji wake anapaswa kuwa mwanamuke ao mutu wa familia yake. Mwanafunzi na musikilizaji wake wanaweza kuikala ao kusimama.—Juu ya kujua habari ya kuzungumuzia na namna kipindi inaweza kupitishwa, ona fungu ya 12 na ya 13.

3. 8. Kuendelesha Mazungumuzo: Hii kipindi inaweza kupitishwa na mwanafunzi mwanaume ao mwanamuke. Kama mwanafunzi ni mwanaume, musikilizaji wake anapaswa kuwa mwanaume; na kama ni mwanamuke, musikilizaji wake anapaswa kuwa mwanamuke. (km 5/97 uku. 2) Mwanafunzi na musikilizaji wake wanaweza kuikala ao kusimama. Kusudi ya mwanafunzi ni kusaidia watu wajue namna ya kuendelesha mazungumuzo na mutu mwenye ulihubiriaka.—Juu ya kujua habari ya kuzungumuzia na namna kipindi inaweza kupitishwa, ona fungu ya 12 na ya 13.

4. 9. Kufanya Wanafunzi: Hii kipindi inaweza kupitishwa na mwanafunzi mwanaume ao mwanamuke. Kama mwanafunzi ni mwanaume, musikilizaji wake anapaswa kuwa mwanaume; na kama ni mwanamuke, musikilizaji wake anapaswa kuwa mwanamuke. (km 5/97 uku. 2) Mwanafunzi na musikilizaji wake wanaweza kuikala ao kusimama. Kusudi ya hii sehemu ni kuonyesha namna ya kuongoza funzo ya Biblia yenye ilishakaanza. Haiko lazima mwanafunzi aseme maneno ya utangulizi ao ya kumalizia, anaweza kufanya vile kama somo yenye alipewa inamuomba kufanya vile. Haiko lazima kusoma kwa sauti mafungu yote yenye kuonyeshwa, hata kama haiko mubaya kufanya vile.

5. 10. Kufasiria Mambo Yenye Unaamini: Kama hii kipindi ni hotuba, mwanafunzi mwanaume njo ataipitisha. Kama ni onyesho, mwanafunzi mwanaume ao mwanamuke anaweza kuipitisha. Kama mwanafunzi ni mwanaume, musikilizaji wake anapaswa kuwa mwanaume ao mutu wa familia yake; na kama ni mwanamuke, musikilizaji wake anapaswa kuwa mwanamuke ao mutu wa familia yake. Kwa kutumia habari yenye kuwa mu referanse yenye ilitolewa, mwanafunzi anapaswa kujibia ulizo ya hotuba ao ya onyesho kwa busara na mu njia yenye kuwa wazi. Mwanafunzi iko huru kuamua ikiwa atataya referanse saa iko napitisha kipindi yake ao hapana.

6. 11. Hotuba: Mwanaume njo anapaswa kufanya hii kipindi na ataipitisha sawa vile hotuba mbele ya kutaniko. Kama hotuba inategemea nukta moya ya mu nyongeza ya A ya broshua Penda Watu, mwanafunzi ataonyesha namna ya kutumia ile maandiko mu mahubiri. Kwa mufano, anaweza kufasiria ni wakati gani ile andiko inaweza kutumiwa, maana ya ile andiko, na namna ya kufikiri na mutu juu ya ile andiko. Kama hotuba inategemea wazo moya ya mu broshua Penda Watu, mwanafunzi atakazia namna ya kutumikisha ile wazo mu mahubiri. Anaweza kukazia zaidi mufano wenye kuwa mu nukta ya 1 ya somo, ao kukazia maandiko ingine yenye kuwa mu somo, kama ile inaweza kusaidia.

7. 12. Habari ya Kuzungumuzia: Habari yenye kuwa mu hii fungu na mu fungu yenye kufuata inahusu sehemu “Kuanzisha Mazungumuzo” na “Kuendelesha Mazungumuzo.” Kama hakuna maagizo ingine, kusudi ya mwanafunzi ni kuambia musikilizaji kweli fulani ya Biblia yenye inaweza kumufurahisha na kuweka kilalo kwa ajili ya mazungumuzo yenye itafuata. Mwanafunzi anaweza kuchagua habari yenye watu watafurahia mu eneo na yenye watu wako nazungumuzia sana. Iko huru kuamua ikiwa atatumia kichapo ao video moya yenye kuwa mu Vyombo Vyetu vya Kufundishia. Kuliko kutia mu akili mambo yote yenye atasema, mwanafunzi anapaswa njo kujikaza kukomalisha sifa mbalimbali, sawa vile kujitia pa nafasi ya mutu na kuzungumuza mu njia ya kawaida.

8. 13. Aina ya Mahubiri: Mwanafunzi anapaswa kupatanisha kipindi yenye alipewa kulingana na hali ya eneo. Kwa mufano:

   1. (1) Mahubiri ya Nyumba kwa Nyumba: Hii aina ya mahubiri inamaanisha kuhubiri nyumba kwa nyumba; ikuwe uso kwa uso, kupitia telefone ao barua. Hii aina ya mahubiri inatia ndani pia kumurudilia mutu juu ya kuendelesha mazungumuzo yenye ulianzisha wakati ulimutembelea mu mahubiri ya nyumba kwa nyumba.

   2. (2) Mahubiri ya Wakati Wowote: Kusudi ya hii kipindi ni kuonyesha namna ya kugeuza mazungumuzo ya kawaida ikuwe mahubiri. Unaweza kuzungumuzia wazo ya andiko fulani pamoya na watu wenye unakutana nao mu kazi, ku masomo, karibu na kwenye unaikalaka, mu bisi ao fasi ingine yoyote wakati uko naenda mu kazi yako ya kila siku.

   3. (3) Mahubiri ya Mahali pa Watu Wengi: Hii aina ya mahubiri inaweza kuwa mahubiri ya ku prezantware, fasi kwenye watu wanauzishaka na kutumika, mu barabara, mu park, mu maparking ao fasi yoyote kwenye watu wanaweza kupatikana.

9. 14. Matumizi ya Video na Vichapo: Kulingana na hali, mwanafunzi ataamua ikiwa anaweza kuonyesha video ao kutoa kichapo. Kama kipindi inatia ndani kuonyesha video ao kama mwanafunzi anaamua kutumia video, atafanya utangulizi wa ile video na kuzungumuzia na musikilizaji wake bila kuionyesha.

MAISHA YA MUKRISTO

1. 15. Kisha wimbo, hii sehemu ya dakika 15 itakuwa na kipindi kimoja ao viwili vya kusaidia wasikilizaji wajue namna ya kutumikisha Neno ya Mungu mu maisha yao. Kama hakuna maagizo fulani yenye kuonyeshwa, vile vipindi vinaweza kupewa wazee ao watumishi wa huduma wenye wako na uwezo wa kuvipitisha muzuri. Lakini kama ni mahitaji ya kutaniko, inapaswa kupitishwa na muzee. Kama sehemu yenye kutolewa ni Mazungumuzo, ndugu mwenye kupewa hii sehemu anaweza kutumia maulizo ingine ili kukazia mambo makubwa yenye kuwa mu ile habari. Anapaswa kufanya utangulizi mufupi juu apate nafasi ya kuzungumuzia mawazo makubwa na kuachia wasikilizaji nafasi ya kutoa maelezo. Kama kuko sehemu ya kuuliza mutu maulizo, itakuwa muzuri ndugu ao dada mwenye ataulizwa maulizo apite mbele kama inawezekana kuliko kubakia fasi yake.

2. 16. Funzo ya Biblia ya Kutaniko: Dakika 30. Hii sehemu inapaswa kupewa muzee mwenye iko na uwezo wa kuiongoza muzuri. (Mu makutaniko yenye haina wazee wengi, watumishi wa huduma wenye wako na uwezo wa kuiongoza muzuri wanaweza kutumiwa.) Baraza ya wazee inapaswa kuchagua ni nani wanastahili kuongoza Funzo ya Biblia ya Kutaniko. Ndugu wenye kuchaguliwa wanapaswa kuwa na uwezo wa kuongoza funzo muzuri kwa kuheshimia wakati, kukazia maandiko ya musingi, na kusaidia wasikilizaji waone namna ya kutumikisha habari yenye kuzungumuziwa. Wenye kuongoza watachunguza maagizo yenye imekwisha kuchapishwa juu ya namna ya kuongoza sehemu ya maulizo na majibu. (w23.04 uku. 24, kisanduku) Kisha kujifunza kwa uangalifu habari yenye ilitayarishwa kwa ajili ya ile juma, haiko lazima kurefusha funzo. Ikiwezekana, ni muzuri kila juma kubadilisha kiongozi na musomaji. Kama musimamizi wa Mukutano Utumishi na Maisha anaomba funzo ifupishwe, kiongozi ataamua namna ya kufanya ili kuifupisha. Anaweza kuamua mafungu fulani isisomewe.

MANENO YA KUMALIZIA

1. 17. Dakika 3. Musimamizi wa Mukutano Utumishi na Maisha atarudilia mambo fulani ya lazima yenye ilizungumuziwa ku mukutano. Ataonyesha pia mambo fulani yenye itazungumuziwa ku mukutano juma ya kufuata. Kama wakati inaruhusu, anaweza kutaya majina ya wanafunzi wenye watakuwa na vipindi mu juma ya kufuata. Kama hakuna maagizo tofauti, musimamizi wa mukutano njo mwenye atatoa matangazo ya lazima ao kusoma barua fulani kama ni lazima mu maneno yake ya kumalizia. Matangazo ya kawaida, kwa mufano yenye inahusu mikutano ya mahubiri ao usafi, haipaswe kutangazwa ku jukwaa, lakini inapaswa kuwekwa ku ubao wa matangazo. Musimamizi akiona kama haitawezekana kupitisha matangazo yote ao kusoma barua zote mu dakika za kumalizia zenye amepewa, anaweza kuomba ndugu wenye watapitisha migao mu sehemu Maisha ya Mukristo wapunguze wakati wao ikiwezekana ili apate wakati wa kusoma ile matangazo. (Ona fungu ya 16 na ya 19.) Mukutano utamalizika kwa wimbo na sala.

KUPONGEZA NA KUTOA MASHAURI

1. 18. Kisha kila kipindi ya mwanafunzi, musimamizi wa Mukutano Utumishi na Maisha iko na dakika moya hivi juu ya kumupongeza na kumutolea mashauri kwa kutumia somo yenye ilipewa. Wakati musimamizi anaalika mwanafunzi apitishe kipindi yake, hataonyesha somo yenye alipewa. Lakini, kisha mwanafunzi kupitisha kipindi yake na kisha kumupongeza, musimamizi anaweza kuonyesha somo yenye mwanafunzi alikuwa anatumikia na kusema mambo yenye inaonyesha kama aliitumikia muzuri, ao kumuonyesha kwa upole juu ya nini itakuwa muzuri aendelee kutumikia ile somo na namna atafanya vile. Musimamizi anaweza pia kuzungumuzia mambo ingine yenye mwanafunzi alifanya mu onyesho, yenye anawaza kama inaweza kusaidia mwanafunzi na kutaniko. Anaweza kupatia mwanafunzi mashauri ingine kipekee, yenye inatoka mu broshua Penda Watu, broshua Kufundisha, ao kitabu Shule ya Huduma. Atafanya vile kisha mukutano ao wakati ingine. Ile mashauri itahusu somo yenye alipewa ao somo ingine.—Ili kupata habari zaidi kuhusu daraka ya musimamizi wa Mukutano Utumishi na Maisha na daraka ya mushauri musaidizi, ona fungu ya 19, 24, na ya 25.

WAKATI

1. 19. Hakuna sehemu yenye inapaswa kupitisha wakati, hata mashauri ya musimamizi haipaswe kupitisha wakati. Hata kama Buku ya Mukutano Utumishi na Maisha inaonyesha wakati wa kila sehemu, haiko lazima mutu arefushe habari yake juu tu ya kueneza dakika kama alishazungumuzia mambo yote. Kama ndugu wengine wenye kupitisha migao wanapitisha wakati, mushauri musaidizi wa Mukutano Utumishi na Maisha anapaswa kuwashauria kipekee. (Ona fungu ya 24 na ya 25.) Mukutano wote, kuchanga nyimbo na sala, unapaswa kufanya saa 1 na dakika 45.

WAKATI MWANGALIZI WA MUZUNGUKO ANATEMBELEA KUTANIKO

1. 20. Kama mwangalizi wa muzunguko anatembelea kutaniko, programu itaendeshwa namna imeonyeshwa mu Buku la Mukutano Utumishi na Maisha, isipokuwa tu: Mu sehemu Maisha ya Mukristo, hakutakuwa Funzo ya Biblia ya Kutaniko; hotuba ya utumishi ya mwangalizi wa muzunguko ya dakika 30 itakamata ile nafasi. Mbele hotuba ya utumishi ya mwangalizi wa muzunguko ianze, musimamizi wa Mukutano Utumishi na Maisha atarudilia mambo fulani yenye ilizungumuziwa, ataonyesha mambo fulani yenye itazungumuziwa mu juma ya kufuata, atasoma matangazo ya lazima na kusoma barua zenye zinapaswa kusomewa, kisha ataalika mwangalizi wa muzunguko. Kisha hotuba ya utumishi, mwangalizi wa muzunguko atamalizia mukutano kwa wimbo wenye atachagua. Anaweza kualika ndugu mwingine amalizie kwa sala. Hakutakuwa masomo mu jumba ya pili ao ya tatu. Kama kutaniko iko na kikundi ya luga ingine, ile kikundi inaweza kufanya mikutano yake kama kawaida. Lakini, itajiunga na kutaniko juu ya kusikiliza hotuba ya utumishi ya mwangalizi wa muzunguko.

JUMA YA MUKUSANYIKO WA MUZUNGUKO AO WA ENEO

1. 21. Hakutakuwa mukutano wowote wa kutaniko mu juma ya mukusanyiko wa muzunguko ao wa eneo. Kutaniko inapaswa kukumbushwa kama habari zenye zilipangwa kwa ajili ya mikutano ya ile juma zinapaswa kuchunguzwa wakati wa funzo ya kipekee ao wakati wa ibada ya familia.

JUMA YA UKUMBUSHO

1. 22. Kama Ukumbusho unakuwa katikati ya juma, hakutakuwa Mukutano Utumishi na Maisha.

MWANGALIZI WA MUKUTANO UTUMISHI NA MAISHA

1. 23. Baraza ya wazee inapaswa kuchagua muzee moya akuwe mwangalizi wa Mukutano Utumishi na Maisha. Daraka yake ni kuhakikisha kama hii mukutano inapangwa muzuri na kuongozwa kulingana na maagizo yenye iko mu hii fomu. Anapaswa kupashana habari kwa ukawaida na mushauri musaidizi. Wakati tu Buku ya Mukutano Utumishi na Maisha inatoka, mwangalizi wa Mukutano Utumishi na Maisha anapaswa kupanga vipindi vyote kwa ajili ya ile miezi mbili. Ni yeye njo anapaswa kupanga vipindi vyote, ikuwe vya wanafunzi ao vyenye haviko vya wanafunzi. Anapaswa pia kupanga wasimamizi wa mukutano wa katikati ya juma kati ya wale wenye wamekubaliwa na baraza ya wazee. (Ona fungu ya 3-16 na ya 24.) Wakati iko napanga migao ya wanafunzi, anapaswa kufikiria umri wa mwanafunzi, uwezo wake na uhuru wa kujieleza kuhusu habari yenye atazungumuzia. Anapaswa kufanya vilevile wakati iko napanga migao ya sehemu zingine za mikutano. Kila mutu mwenye kuhusika anapaswa kujulishwa kama iko na kipindi majuma 3 hivi mbele ya tarehe ya kipindi yake. Fomu Utumishi na Maisha ya Mukristo—Karatasi ya Mugao (S-89) inapaswa kutumiwa kwa ajili ya vipindi vya wanafunzi. Mwangalizi wa Mukutano Utumishi na Maisha anapaswa kuhakikisha kama kopi ya programu imewekwa kwenye ubao wa matangazo. Baraza ya wazee inaweza kuchagua muzee ao mutumishi wa huduma mwengine ili amusaidie. Hata hivyo, ni wazee tu njo wanapaswa kutumiwa ili kupanga vipindi vyenye haiko vya wanafunzi.

MUSIMAMIZI WA MUKUTANO UTUMISHI NA MAISHA

1. 24. Kila juma, muzee moya atasimamia Mukutano Utumishi na Maisha. (Mu makutaniko yenye haina wazee wengi, watumishi wa huduma wenye wako na uwezo wanaweza kuombwa wasimamie mukutano.) Musimamizi anapaswa kutayarisha maneno ya utangulizi na ya kumalizia. Atatanguliza pia kila sehemu, na kulingana na hesabu ya wazee mu baraza, anaweza kupitisha sehemu fulani za mukutano, zaidi sana sehemu zenye zinaomba tu kuonyesha video bila mazungumuzo yoyote pamoya na wasikilizaji. Maelezo yake kisha sehemu fulani na mbele ya kualika sehemu ingine inapaswa kuwa ya mufupi sana. Baraza ya wazee itaamua ni wazee gani njo wako na uwezo wa kusimamia muzuri mukutano. Wazee wenye watachaguliwa watakuwa wanasimamia mukutano kwa kubadilishana. Kulingana na hali ya kwenu, mwangalizi wa Mukutano Utumishi na Maisha anaweza kuwa anasimamia mukutano mara mingi kuliko wazee wengine. Kama muzee fulani iko na uwezo wa kuongoza muzuri Funzo ya Biblia ya Kutaniko, inawezekana akuwe pia musimamizi wa mukutano. Hata hivyo, tafazali, mukumbuke kama musimamizi wa mukutano anapaswa kupongeza wanafunzi, na kuwapatia mashauri kwa upendo kama inawezekana. Anapaswa pia kuhakikisha kama mukutano unamalizika kwa wakati. (Ona fungu ya 17 na ya 19.) Kama musimamizi anapenda, na kama kuko fasi ya kuenea ku jukwaa, munaweza kutia mikro ingine ku jukwaa juu musimamizi aitumie ili kutanguliza sehemu ya kufuata wakati ndugu mwenye atatoa ile sehemu iko naenda ku kinara (pupitre) ya musemaji. Tena, kama musimamizi anapenda, anaweza kuikala ku kiti ku jukwaa wakati ya Usomaji wa Biblia na wakati ya sehemu Tujitoe Kabisa mu Kazi ya Kuhubiri. Ile inaweza kusaidia kukomboa wakati.

MUSHAURI MUSAIDIZI

1. 25. Ikiwezekana, muzee mwenye ni musemaji mwenye uzoefu, njo anapaswa kuchaguliwa kuwa mushauri musaidizi. Kazi yake ni kushauria wazee na watumishi wa huduma kipekee, kama ni lazima, kuhusiana na migao yoyote ya ufundishaji yenye walipewa, ikuwe mugao ku Mukutano Utumishi na Maisha, hotuba ya watu wote, kuongoza funzo ya Munara wa Mulinzi, Funzo ya Biblia ya Kutaniko, ao kusoma mafungu ku mikutano. (Ona fungu ya 19.) Kama wazee wengi mu kutaniko ni wasemaji na walimu wazuri, munaweza kubadilisha mushauri musaidizi kila mwaka. Haiko lazima mushauri musaidizi akuwe nashauria ndugu kisha kila mugao.

MASOMO MU JUMBA YA PILI AO YA TATU

1. 26. Kulingana na hesabu ya wanafunzi, kutaniko inaweza kupanga wanafunzi wengine wapitishe vipindi mu jumba ya pili ao jumba ya tatu. Kila jumba inapaswa kuwa na mushauri mwenye iko na uwezo wa kusimamia muzuri; na ni muzuri zaidi akuwe muzee. Kama ni lazima, hata mutumishi wa huduma mwenye iko kabisa na uwezo wa kusimamia muzuri anaweza kutumiwa. Baraza ya wazee inapaswa kuamua ni nani anaweza kushugulikia ile daraka na kama ni lazima kubadilishana ao hapana. Mushauri anapaswa kufuata muongozo wenye kupatikana mu fungu ya 18. Kama kutaniko imepanga kukuwe jumba ya pili na jumba ya tatu, wanafunzi wataombwa kuenda mu jumba ya pili ao jumba ya tatu kisha sehemu Mali ya Kiroho, ya Utajiri wa Neno ya Mungu. Watarudia mu jumba ya kwanza kisha kipindi ya mwanafunzi wa mwisho.

VIDEO

1. 27. Video zitatumiwa mu hii mukutano. Zile video zitapatikana ku JW Library® na mutu anaweza kuziangalia kwa kutumia vyombo mbalimbali vya kielektroniki.

© 2023 Watch Tower Bible and Tract Society of Pennsylvania

S-38-ZS 11/23