Kuhubiria Watu Wengi Kadiri Iwezekanavyo
1 Wafuasi wa Yesu wa mapema walijaribu kueneza ujumbe wa Ufalme kwa bidii. Walichukua hatua zenye kufaa ili kuhubiria wengi habari njema kadiri iwezekanavyo. Waandikaji wa Biblia Wakristo waliandika maandishi yao yaliyoongozwa na roho ya Mungu katika Kigiriki cha kawaida, iliyokuwa lugha ya kimataifa ya Milki ya Roma. Zaidi ya hayo, huenda wahubiri wenye bidii wa karne ya pili na ya tatu W.K. walichukua nafasi ya kwanza katika kutumia kodeksi (hati-kunjo ya namna ya kitabu), iliyokuwa rahisi kutumia ili kutafuta mitajo kuliko hati-kunjo (kitabu cha kukunjwa).
2 Matumizi ya Tekinolojia: Kupitia nabii Isaya, Yehova alitabiri hivi: “Nawe kwa kweli utanyonya maziwa ya mataifa.” (Isa. 60:16) Katika utimizo wa kisasa wa unabii huo, watumishi wa Yehova wanatumia mali za thamani kutoka kwa mataifa ili kuendeleza kazi ya kuhubiri. Kwa mfano, katika mwaka 1914, miaka mingi kabla ya sinema kuwa yenye kusitawi kibiashara, Wanafunzi wa Biblia walianza kuonyesha watu “Photo-drame de la création.” Sinema hiyo yenye rangi na sauti ambayo picha zilionyeshwa kwa saa nane, ilitoa ushahidi wenye nguvu kwa mamilioni ya watu.
3 Leo, watu wa Mungu wanafanya matumizi ya mashine za kuchapishia zenye mwendo sana na vyombo vya kompyuta ili kuchapisha Biblia na vichapo vya Biblia katika mamia ya lugha. Vyombo vya usafirishaji vyenye mwendo wa haraka sana vinasaidia kupeleka vichapo vya Biblia kwenye sehemu za mbali za dunia, kufikia watu katika nchi 235. Kupitia roho yake, Yehova amechochea watumishi wake ili watumie kwa matokeo tekinolojia hiyo, wakifanya kweli ya Biblia iwafikie watu wengi zaidi kuliko wakati mwingine wowote katika historia.
4 Marekebisho ya Kibinafsi: Waabudu wa kweli wamechochewa pia kufanya marekebisho ya kibinafsi ili kuwahubiria watu wengi zaidi habari njema. Wengi wamerahisisha maisha yao ili kushiriki kikamili katika kazi ya kuhubiri. Wengine wameenda kutumikia mahali ambapo kuna uhitaji mkubwa zaidi wa watangazaji wa Ufalme. Wengine wamepanua huduma yao kwa kujifunza lugha ya kigeni.
5 Zaidi ya hilo, tunaweza pia kuhubiria watu wengi zaidi habari njema kwa kuhubiri wakati watu wapo nyumbani na mahali watu wanapoweza kupatikana. Ikiwa katika eneo lenu watu hawapo nyumbani mara nyingi wakati wa mchana, je, unaweza kurekebisha programu yako ili kutoa ushahidi saa za jioni? Je, kuna mahali watu wengi wanapopatikana ambapo ushahidi unaweza kutolewa? Je, umejaribu kutoa ushahidi kwa njia ya simu na kutumikia katika eneo la biashara? Je, unatafuta nafasi za kutoa ushahidi wa vivi hivi?
6 Tunalo pendeleo kabisa la kushiriki katika utoaji mkubwa wa ushahidi kuhusu jina la Yehova na Ufalme wake. Na tuendelee kushiriki kweli kutoka katika Neno la Mungu na watu wengi kadiri iwezekanavyo, kweli yenye kutoa uzima.—Mt. 28:19, 20.
[Maulizo ya Funzo]
1. Wakristo wa mapema walifanya nini ili kuhubiria watu wengi habari njema kadiri iwezekanavyo?
2, 3. (a) Namna gani Isaya 60:16 inatimizwa katika nyakati za kisasa? (b) Namna gani tekinolojia inatumiwa ili kuendeleza ibada safi?
4. Ni marekebisho gani ambayo wengine wamefanya katika maisha yao ili kuhubiria watu wengi zaidi habari njema?
5, 6. Ni nini kinachoweza kufanywa ili kuhubiria watu wengi kadiri iwezekanavyo katika eneo letu?