Sababu gani Mungu anaruhusu watu wenye uwezo wawaonee watu wa hali ya chini?

Biblia inaeleza hali fulani zenye kuhuzunisha, katika hali hizo watu wa hali ya chini walionewa na watu wenye uwezo. Hilo linatukumbusha habari ya Nabothi.a Ahabu, mufalme wa Israeli katika miaka kati ya 901 na 1000 mbele ya kuzaliwa kwa Yesu, alimuruhusu Yezebeli, bibi yake, amuue Nabothi na watoto wake ili yeye achukue shamba la mizabibu la Nabothi. (1 Wafalme 21:1-16; 2 Wafalme 9:26) Sababu gani Mungu alimuruhusu Ahabu atumie vibaya uwezo wake?

Acheni tuzungumuzie sababu moja ya maana: Mungu hawezi kusema uongo. (Tito 1:2) Hilo linahusu namna gani matendo ya kuonea wengine? Hapo mwanzo, Mungu aliwaonya wanadamu kwamba wakimuasi watapata matokeo mabaya, ni kusema, kifo. Kama Mungu alivyosema, wanadamu wanakufa tangu uasi ulipoanza katika bustani ya Edeni. Kwa kweli, kifo cha kwanza kabisa kilitokana na tendo la mwanadamu mumoja kumuonea mwengine, wakati Kaini alimuua ndugu yake Abeli.​—Mwanzo 2:16, 17; 4:8.

Tangu wakati huo, Neno la Mungu linaeleza kwa kifupi historia ya wanadamu kwa kusema hivi: ‘Mwanadamu amemutawala mwanadamu kwa kumuumiza.’ (Mhubiri 8:9) Je, maneno hayo yameonekana kuwa ya kweli? Yehova alionya taifa la Israeli, watu wake, kwamba wafalme wao wangewaonea na kuwafanya watu wamulilie Mungu. (1 Samweli 8:11-18) Hata Mufalme Sulemani mwenye hekima aliwalipisha watu wake kodi ya juu sana. (1 Wafalme 11:43; 12:3, 4) Wafalme waovu, kama vile Ahabu, waliwatendea watu kwa ukali sana. Fikiria jambo hili: Mungu angezuia matendo kama hayo ya watu kuwaonea wengine, hilo lingefanya maneno yake yaonekane kuwa uongo, sivyo?

Pia, kumbuka kuwa Shetani alidai kwamba watu wanamutumikia Mungu kwa sababu tu ya faida zao wenyewe. (Ayubu 1:9, 10; 2:4) Ikiwa Mungu angewalinda watumishi wake wasikandamizwe kwa njia yoyote, hilo lingeonyesha kuwa mambo Shetani alisema ni ya kweli, sivyo? Na ikiwa Mungu angemulinda kila mutu asionewe kwa njia yoyote, hilo lingemufanya Mungu awe muongo hata zaidi, sivyo? Ikiwa Mungu angelinda watu hivyo, wengi wangewaza kwamba wanadamu wanaweza kujitawala vizuri wenyewe bila kumutegemea Mungu. Lakini Neno la Mungu linasema mambo yaliyo tofauti kabisa, linaonyesha kwamba mwanadamu hana uwezo wa kujitawala mwenyewe. (Yeremia 10:23) Tunahitaji Ufalme wa Mungu uje; na utakapokuja matendo yote ya ukosefu wa haki yataisha.

Basi, je, hilo linamaanisha kwamba Mungu hafanye jambo lolote kuhusu matendo ya kuoneana? Hapana, halimaanishe hivyo. Fikiria mambo mawili anayofanya: Jambo la kwanza, anafunua matendo ya watu waliotendea wengine kwa ukali. Kwa mufano, Neno lake linafunua mipango yote mibaya ambayo Yezebeli alifanya juu ya Nabothi. Pia Biblia inaonyesha kwamba matendo mabaya kama hayo yanafanywa na mutawala mwenye nguvu anayeficha namna alivyo. (Yohana 14:30; 2 Wakorintho 11:14) Biblia inaonyesha kwamba mutawala huyo ni Shetani Ibilisi. Kwa kuonyesha waziwazi mutu anayechochea uovu na matendo ya kuoneana, Mungu anatusaidia tuepuke kuwa watu waovu. Kwa hiyo, anatusaidia tupate uzima wa milele.

Jambo la pili, Mungu anatupatia tumaini la hakika kwamba matendo yote ya kuonea wengine yataisha. Namna alivyofunua, alivyohukumu, na kuazibu Ahabu na Yezebeli, na watu wengine kama hao, inatuhakikishia kwamba siku moja atatimiza ahadi yake ya kuharibu watu wote waovu. (Zaburi 52:1-5) Pia Mungu anatoa tumaini hakika kwa ajili ya watu wanaomupenda kwamba hivi karibuni ataondoa matokeo mabaya ya uovu.b Wakati huo, Nabothi, mutu muaminifu, pamoja na watoto wake wataishi milele katika Paradiso ambamo hamutakuwa ukosefu wa haki.​—Zaburi 37:34.