ஊழியத்தில் திறமைகளை மெருகூட்ட... மறுசந்திப்பிற்கு அடித்தளம் போடுங்கள்

ஏன் முக்கியம்: நாம் விதைத்த சத்திய விதைக்குத் தண்ணீர் ஊற்ற வேண்டுமென்றால், ஆர்வம் காட்டும் நபரை மறுபடியும் சந்திக்க வேண்டும். (1 கொ. 3:6) இதற்கு, வீட்டுக்காரரிடம் பேசிவிட்டு கிளம்பும்முன் மறுசந்திப்பிற்கான அடித்தளத்தைப் போடுங்கள். இதை எப்படிச் செய்வது? வீட்டுக்காரரை மறுபடியும் எப்போது சந்திக்க முடியும் என்று கேளுங்கள்; மறுசந்திப்பிற்காக ஒரு கேள்வியையும் கேளுங்கள். அப்போது, வீட்டுக்காரர் நம்மை மறுபடியும் சந்திப்பதற்கு ஆவலாக இருப்பார். அதோடு, அவரிடம் கேட்ட கேள்விக்கு நாம் கொடுத்த பத்திரிகையில் பதில் இருந்தால் அதைப் படித்துப் பார்க்கவும் அவர் விரும்புவார். இப்படி அடித்தளம் போடுவது மறுசந்திப்பு செய்ய உதவியாக இருக்கும். ஏனென்றால், எதைப் பற்றி பேசப் போகிறோம் என்பது நமக்கும் தெரியும், வீட்டுக்காரருக்கும் தெரியும். மறுசந்திப்பு செய்யும்போது, ‘போனமுறை வந்தப்போ உங்ககிட்ட ஒரு கேள்விக்கு பதில் சொல்றேன்னு சொல்லியிருந்தேன்ல அதை பத்திதான் இன்னைக்கு பேச வந்திருக்கேன்’ என்று சொல்லி பேச்சை ஆரம்பிக்கலாம்.

எப்படிச் செய்யலாம்:

ஊழியத்திற்காகத் தயாரிக்கும்போது, மறுசந்திப்பிற்கு அடித்தளம்போடும் விதத்தில் என்ன கேள்வி கேட்கலாம் என்று யோசித்துப் பாருங்கள். நீங்கள் கொடுக்கும் பிரசுரத்தின் அடிப்படையில் ஒரு கேள்வியைக் கேளுங்கள். அல்லது பைபிள் படிப்பிற்குப் பயன்படுத்தும் பிரசுரங்களில் உள்ள ஒரு கேள்வியைக் கேளுங்கள். அவரை மறுபடியும் சந்திக்கும்போது அந்தப் பிரசுரத்தைக் கொடுங்கள்.
ஆர்வம் காட்டிய நபரிடம், அவரை மறுபடியும் சந்தித்துப் பேச விரும்புவதாகச் சொல்லுங்கள். மறுசந்திப்பிற்காக தயாரித்த கேள்வியையும் அவரிடம் கேளுங்கள். சில இடங்களில், மக்கள் ரொம்ப வேலையாக இருப்பதால் நீங்கள் அவர்களை மறுபடியும் சந்தித்துப் பேசுவதை விரும்பமாட்டார்கள். ஆனால், அவர்களிடம் இப்படிச் சொல்லலாம்: “இந்த நேரத்துல வந்தா, நீங்க வீட்டுல இருப்பீங்களா? [பதில் சொல்ல அனுமதியுங்கள்.] அடுத்த வாரம் வரும்போது, இந்த கேள்விக்கான பதில சொல்றேன். ஒருவேளை நான் வரும்போது நீங்க வேலையா இருந்தா பரவாயில்ல, நீங்க ஃப்ரியா இருக்கும்போது மறுபடியும் வர்றேன்.”
சொன்ன நேரத்தில் மறுசந்திப்பு செய்யுங்கள். (மத். 5:37) மறுசந்திப்பு செய்தபிறகு, அடுத்த சந்திப்பிற்கு அடித்தளம் போடுங்கள்.

இந்த மாதம் முயன்று பாருங்கள்:

ஊழியத்திற்காகத் தயாரிக்கும்போது, மறுசந்திப்பிற்கான ஒரு கேள்வியையும் யோசித்துப் பாருங்கள். நீங்கள் யோசித்துவைத்த கேள்வியை உங்களோடு ஊழியம் செய்பவரிடம் சொல்லுங்கள்.