¿Ichka ju Esukristo?

1. ¿Churigá chojkile bejté Esusi?

Esusi seʼwináriga nile ujché jaré ralómeli, napugiti bilé espíritu nile ʼpa rewagachi napuʼlige taʼchó oʼchérachi jena gawichí (Juan 8:23). Alué bajchá api Jeobá newale Esusi nile, ʼlige Esusi guʼírile newá suwábaga ujché jaré tábiri (Proverbios 8:22, 23, 30). Alué Bíbliachi aneme ju alué biʼlepi Onorúgame Ranala, napugiti Onorúgame newale alué, ta ʼwesi guʼírile (Juan 1:14). Abéchigó alué Raʼíchali aniliame ju, napugiti alueka raʼíchale napu boʼné Oʼnola anele. Leériwa Colosenses 1:15, 16.

2. ¿Chonigá Esusi nawale jena gawichí?

Onorúgame boʼné Inolá júlale jena gawichí. Ajchárigame nile rojpachí bilé iwé judía María aniliame. Alekeri, Esusi tabilé oʼnógame nile jena gawichí (Lucas 1:30-35). Alué ka nawale jena gawichí olamia baikiá tábiri najtékame: 1) benírimia alué bijchiá Onorúgame, 2) apirigá Esusi bejtele, ramué ʼla bené churigá ʼla umeba bejtea apirigá Onorúgame najkí, rekó ʼwe resí nilia mochíruga, ʼlige 3) nawale mukumea apirigá weʼká ralómeli neyúrimala. Leériwa Mateo 20:28.

3. ¿Chonigá resíʼlá ramué neyúrigame nímala?

Iʼsínimi bilé ralómeli najtétimili júkuru enomí apirigá bilé ralómeli cárcelchi ajtígame ikiru maʼchina (Éxodo 21:29, 30). Napuʼlige Onorúgame newale alué ralómeli, tabilé najkile api oʼchérame gainámala nibilé api suwimela. Ramué ka machí ye napugiti Jeobá anele bajchá rió Arani api tabilé eʼwame nísaká, mukumea nile. Alekeri, ʼla eʼwame nísaká, tajsiné mukumea nile, nobi Arani tabilé eʼwale Jeobá, alué olale napu Bíbliachi pecado aniliame ju (Génesis 2:16, 17; 5:5). Alué Biblia aní nerú suwiyame, Arani chojkila gite. Arani nachútale alué chátiri aʼboi ʼkúchila ʼlige alekeri alué ralómeli jípesi ejperégame ʼma suwísimi niru. Alekeri, suwábaga resíʼlá neyúrigame nímala. Alué Biblia beniri: “Alué pecado mukugá najtétimili júkuru. Nobi Onorúgame nejí nabí ejperélima Waʼlula Kristo Esusi gite” (Romanos 6:23, TNM). Leériwa Romanos 5:12.

ʼLiko, ¿ichka umeba najtetia ramué pecado gite ʼlige neyuri ramué alué suwiyame? Napuʼlige ramué suwisá ʼma najtetia alué tábiri cha olame. Napugiti ramué tabilé ʼla sébali olame júkuru, ta ʼwesi ralómeli umebámala najtetia alué pecado ujché jaré gite. Leériwa Salmo 49:7-9.

4. ¿Chonigá Esusi mukule?

Esúsika seʼwináriga nile ramué, napugiti ʼwe ʼla sébali olame nile ʼlige tajsiné pecado inile. Alekeri, alué ka tabilé mukule boʼné pecado gite, mukule napu najtetia alué pecado ujché jaré. Napuʼlige Onorúgame júlale boʼné Inolá napu mukumea suwábaga ramué gite, Onorúgame benírile api ʼwe galé suwábaga ralómeli. Abéchigó, Esusi benírile api ʼwe galé ramué napuʼlige eʼwale boʼné Oʼnola ʼlige mukule napu neyuri ʼlige bujemio alué pecado ʼlige alué suwiyame. Alué Biblia aní: “Onorúgameka ʼwe galele ralómeli, alekeri boʼné biʼlepi Inolá júlale napurigá alué ʼsímala ralómeli guʼiria. Suwábaga ralómeli napu ekí ʼla Onorúgame Inolá oyérame ju, tabilé suwárigame nímala, eligá ʼla nabí ejperélima” (Juan 3:16, TNM). Leériwa Romanos 5:18, 19, TNM.

Eʼnewa alué video ¿Chonigá Esusi mukule?

5. ¿Chu ʼsia ajtí Esúsika jipe?

Napuʼlige eʼyénale jena gawichí, Esúsika ʼyole nayume, ku ajánale suwígame ʼlige guʼírile alué ralómeli ʼwe resí nile, alarigá benírile napu pe aʼminana olámala apirigá suwábaga eʼwame ju Onorúgame (Mateo 15:30, 31; Juan 5:28). Napuʼlige Esusi mukule Onorúgame ku ajánale, ajagá mochí rewagachi (Efesios 1:20). Aʼkinana Esusi buwele wajtoná napu ajtí Onorúgame, napusí alué nejímala aʼwalí apirigá nulá jena gawichí (Hebreos 10:12, 13). Jipe rawé, Esusi ʼma nulá ʼpa rewagachi, ʼlige aʼboi oyérame ʼma ruigá eʼyena aʼlá raʼíchali bochígimi gawichí. Leériwa Lucas 1:32, 33 ʼlige Marcos 13:10.

Ye selígame aʼwágame lisensia api Onorúgame ʼyale, pe ʼwe suwibámala alué ralómeli iníligame ʼlige suwábaga tábiri api cha olagá eʼyena. Suwábaga api bijchigi Esusi ʼlige eʼwame ju ʼwe ganíliga ejperélima jena gawichí ʼlige ye gawichí ʼwe semátiri nímala. Leériwa Salmo 37:9-11.