LISOMO LYA 54
“Muzia wa Kisinka ni wa Maano” Ali na Miilo ki?
Yesu i Mutue wa kilonghaano kya Kikristu. (Baefeso 5:23) Leenu, Yesu ali mukutungulula basambi bakue bali pa kyalo wali ku muulu, kupitila “muzia wa kisinka ni wa maano”. (Some Mateo 24:45, NWT.) Yesu i waamubiikile “muzia” ni kumupeela nsaambu ya kukwata bupinguzi paleepale. Anzia evio, apalile kutwalilila kumunakila Kristu ni kubombela balupua bakue Kristu. Ozo muzia naani? Ali watwemena siani?
1. “Muzia wa kisinka ni wa maano” naani?
Lyonse, Yehova ali wabombia mwalalume umo ao kikundi kiniini kya balalume eevi kibapeele malaizio bantu bakue. (Malaki 2:7; Baebrania 1:1) Kisia Yesu kufua, batumua pamo ni bakote, i baatendekele kutungulula ku Yerusalemu. (Miilo ya Batumua 15:2) Eevi kukoonka ozo mufuano, leenu, kuli kikundi kiniini kya bakote, i kulanda, Kabungue Kali Katungulula ka Bakasininkizia Bakue Yehova. Keekio kikundi, kili kyateania kyakulia kya kimupasi ni kutungulula miilo ya kusimikila. Keekio kikundi i “muzia wa kisinka ni wa maano olia abiikilue na [Yesu].” (Mateo 24:45a, NWT) Babo balupua bali mu Kabungue Kali Katungulula, ni Bakristu babiikilue mafuta. Bali bapata mpaalo yabo ya kuteeka pamo ni Kristu mu Bukolo bwa ku muulu, kine buikazi bwabo bwa pa kyalo bwafika ku mpela.
2. Muzia wa kisinka ali watupeela kyakulia ki kya kimupasi?
Yesu waalandile nangue muzia wa kisinka apalile ‘kupeela babombi nakue bilio ao byakulia pa musita upalile.’ (Mateo 24:45b) Kyakulia kya kimubili kili kyatukwasia kuya twalumine kimubili ni kuya twakosele. Enka evio, kyakulia kya kimupasi ni kyene, i kulanda masambilizio ali mu Mulandu Wakue Leeza, ali atupeela maka atukebele eevi tutwalilile kuya twali ba kisinka kuli Yehova ni kubomba miilo itwaalandilue na Yesu tukite. (1 Timoteo 4:6) Tuli twapata kyakulia kya kimupasi ku kulonghaana kwa mu kilonghaano, kulonghaana kwa muputule, kulonghaana kwa kalaale, mu mpapulo iswapiile Bibilia ni mu ma viideo. Bebio byakulia, bili byatukwasia kumana keelia kitonene Leeza ni kulumia bukibuza bwetu pamo nakue.
TUKEBE SAANA
Tumone juu ya ki tupalile kuya twali ni “muzia wa kisinka ni wa maano”, i kulanda Kabungue Kali Katungulula.
Kabungue Kali Katungulula, kali kabapeela Bakasininkizia Bakue Yehova mu kyalo kyonse kyakulia kya kimupasi ni malaizio, kabili kali kabakwasia
3. Bantu bakue Yehova bapalile kuya bapaangilue buino
Kupitila butunguluzi bwakue Yesu, Kabungue Kali Katungulula kali kapaanga buino miilo ya Bakasininkizia Bakue Yehova. Yesu waali wabatungulula enka evio ni Bakristu ba ku ntendeko. Mone VIIDEO.
Some 1 Bakorinto 14:33, 40, kisia londoluele keeki kiipuzio:
Eezi milongo, yalangilila siani nangue Yehova atonene Bakasininkizia bakue baye bapaangilue buino?
4. Muzia wa kisinka, ali wapaanga miilo yeetu ya kusimikila
Kusimikila i yaali miilo ya mana saana ku Bakristu ba ku ntendeko. Some Miilo ya Batumua 8:14, 25, kisia londoluele beebi biipuzio:
Ni baani baali batungulula miilo ya kusimikila musita wa Bakristu ba ku ntendeko?
Petro ni Yoane baaitabiziizie siani malaizio abapeelue na batumua benaabo?
Kusimikila, ni miilo ya mana saana ipaangilue na Kabungue Kali Katungulula. Mone VIIDEO.
Yesu waalangiliile nangue miilo ya kusimikila ni ya mana saana. Some Marko 13:10, kisia londoluele beebi biipuzio:
Juu ya ki Kabungue Kali Katungulula kamwene miilo ya kusimikila kuya yali ya mana saana?
Juu ya ki tupalile kuya twali ni “muzia wa kisinka ni wa maano” eevi emanine eezi miilo ya kusimikila mu kyalo kyonse?
5. Muzia wa kisinka ali watupeela malaizio
Kabungue Kali Katungulula, kali kabapeela malaizio Bakristu ba mu kyalo kyonse. Kali kakita siani eevi kapate malaizio a kunti katupeele? Mona vyaali vyakita kabungue kali katungulula musita wa Bakristu ba ku ntendeko. Some Miilo ya Batumua 15:1, 2, kisia londoluele beebi biipuzio:
Ni kiki kyaalengiizie Bakristu ba ku ntendeko bandue kunvuana?
Paulo, Barnaba ni bangeko, baabaloombele baani babakwasie kupuisia bobo buavia?
Some Miilo ya Batumua 15:12-18, 23-29 (NWT), kisia londoluele keeki kiipuzio:
Ntaanzi ya kukwata bupinguzi, kabungue kali katungulula ka ku ntendeko, kaakitile siani eevi kapate butunguluzi palua bobo buavia?—Mona mulongo wa 12, 15, ni 28.
Some Miilo ya Batumua 15:30, 31 ni 16:4, 5, kisia londoluele beebi biipuzio:
Bakristu ba ku ntendeko, baakitile siani lubaapokeleele malaizio kufuma ku kabungue kali katungulula?
Yehova waabapaalile siani paantu baanakiile?
Some 2 Timoteo 3:16 ni Yakobo 1:5, kisia londoluele keeki kiipuzio:
Enu nsiku, Kabungue Kali Katungulula kali kapata pi butunguluzi bwakukakwasia kukwata bupinguzi?
BANGE BALI BALANDA: “Kine watuilizia bili byalanda Kabungue Kali Katungulula, wakoonkasie bantu.”
Ni kiki kyakusininkiziizia nangue Yesu i ali watungulula Kabungue Kali Katungulula?
MU KIFUPI
Kabungue Kali Katungulula, i “muzia wa kisinka ni wa maano” waabiikilue na Kristu. Kali kaleeta malaizio ni kubapeela Bakristu ba mu kyalo kyonse kyakulia kya kimupasi.
Kunti waasuka siani?
Naani waamubiikile “muzia wa kisinka ni wa maano”?
Kabungue Kali Katungulula kali katwemena siani?
Eba, waitabizia nangue Kabungue Kali Katungulula i “muzia wa kisinka ni wa maano”?
MANAKO NI BINGE
Mona vipaangilue Kabungue Kali Katungulula eevi kabombe miilo yakue.
Mona vili vyakita Kabungue Kali Katungulula, eevi kasininkizie nangue twapata kyakulia kya kimupasi kya kisinka.
Balupua bali mu Kabungue Kali Katungulula, bali baiunvua siani palua miilo ibapeelue na Yesu bakite?
Kulonghaana kwetu kwa mu kilonghaano pamo ni kulonghaana kukata, konse kuli mukusininkizia siani nangue Yehova ali mukutungulula Kabungue Kali Katungulula?