Yehova Atonene Bantu Bonse Balapile

1. Kine muntu walapila, ali wakita ki?

KINE twakita kintu kibipile, ni kintu kya mana kulapila. Bibilia ili yalanda nangue kine muntu walapila, ali waunvua bulanda palua kilubo kelia kyaakikita, ali walekela kukita kekio kilubo, kabili ali wapingula nangue takaba kukikita kabili.—Mat. 3:8; Miil Bat. 3:19; 2 Pet. 3:9.

2. Juu ya ki fwe bonse tupalile kusambilila palua kulapila? (Nehemia 8:9-11)

² Fwe bonse tupalile kusambilila palua kulapila. Juu ya ki? Pantu tuli twakita lizambi kila busiku. Juu tuli bena Adamu ni Eva, fwe bonse twaapyene lizambi ni lufu. (Bar. 3:23; 5:12) Fwe bonse, tuli bantu ba lizambi, pa kako tupalile kulapila. Ata sie bantu baalia babanga bali ni kiketekelo kikata, nga evelia mutumua Paulo, baamwene kyakolele kulwisia lwinso lubipile lwa kukita lizambi. (Bar. 7:21-24) Eba, kekio kilangiliile nangue tupalile kuya twali sie ni bulanda nsita yonse juu ya mazambi etu? Ata, te evio. Yehova ali ni luse, kabili atonene tuye twali ni nsansa. Tontonkania aali ya Bayuda ba mu nsiku yakue Nehemia. (Soma Nehemia 8:9-11.) Yehova taali watonene baye bali ni bulanda sana palua mazambi abaakitile lwa kale, inzi waali watonene baye bamupupa wene kwa nsansa. Yehova amanine nangue kine twalapila, twakaba kwaluka ni nsansa. Kekio i kili kyalengia atusambilizie palua kulapila. Kine twalapila mazambi etu, kunti twasininkizia nangue Baba wetu wa luse wakaba kutweleela.

3. Tuli kusambilila ki mu leli lyasi?

³ Mu leli lyasi, tuli kusambilila bingi palua kulapila. Tuli kupata byasuko bya bipuzio bitatu. Kya kwanza ni keki, Yehova waabasambiliziizie ki Baisraeli palua kulapila? Kya bubili, Yehova waabakwasiizie syani bantu baalia babanga bakita mazambi evi bafikiile kulapila? Ni kya butatu, basambi bakue Yesu baasambiliile ki palua kulapila?

YEHOVA WAABASAMBILIZIIZIE KI BAISRAELI PALUA KULAPILA?

4. Yehova waabasambiliziizie ki Baisraeli palua kulapila?

⁴ Musita Yehova lwaabapeele Baisraeli sheria yakue, bene baalaile nangue bakaba bainakila. Ni Yehova waabalaile nangue kine bakita evio, wakaba kubasunga ni kubapaala. Wene waalandile evi palua ezio sheria: “Lonu, ezi sheria indi mukukupeela wewe lelo, te ikolele sana kuli wewe kuikonka, wala te ili ku fwasi kuuli kwandua kufika.” (Mal Miz. 30:11, 16) Inzi, Yehova waalandile nangue kine Baisraeli bamusangukila wene, i kulanda, kine basaakula kupupa ba leeza bange, wene takaba kubasunga, kabili wakaba kufumia mpaalo yakue pakati kabo. Kukila pa kako, bakaba kwema. Anzia evio, kiswapilo kya kwitabilua kabili na Yehova kibanga kyaliko. Babanga bali ni buvinde bwa “kubwela kuli Yehova Leeza [wabo] ni kutwilizia lizui lyakue.” (Mal Miz. 30:1-3, 17-20) Mu milandu inge, babanga bali ni buvinde bwa kulapila. Bakitenge evio, Yehova wasiile kubapalama ni kubapaala kabili.

5. Yehova waalangiliile syani nangue taabapozele bantu bakue? (2 Makolo 17:13, 14)

⁵ Bantu baalia baasaakwilue na Yehova, babanga bamusangukila lingi. Babanga bapupa mikisi ni kukita bintu binge bibipile sana. Kekio kyaalengiizie batendeke kwema. Inzi, Yehova waatwaliliile kubakwasia evi batendeke kumubombela kabili. Waatumine ba kabika mara ingi evi kubapapaata bantu bakue balapile ni kubwela kabili kuli wene.—Soma 2 Makolo 17:13, 14.

6. Yehova waababombiizie syani ba kabika bakue evi kusambilizia bantu bakue nangue ni kintu kya mana kulapila? (Mona ni foto.)

⁶ Lingi, Yehova abanga wabombia ba kabika bakue evi kubasoka ni kuboolola bantu bakue kine baluvia. Kwa mufuano, wene waalandile evi kupitila Yeremia: “Bwela, We Israeli kisanguka . . . Nsikaba kukukenta nafipilue, pantu ndi wa kisinka . . . Nsikaba kusyala nakufipiilue lonse. Wewe itabila sie kilubo kyobe, pantu waakimusangukila Yehova.” (Yer. 3:12, 13) Yehova waalandile evi kupitila Yoeli: “Bwele kuli nene kwa mitima yenu yonse.” (Yoel. 2:12, 13) Yehova waamutumine Isaya alande evi: “Iiswesie; fumie pa menso ane bikitua byenu bya bubifi; lekele kukita bibipile.” (Is. 1:16-19) Kabili, kupitila Ezekieli, Yehova waaipuziizie evi: “Eba, nene ndi nasekelela kakiine lufu lwa mubifi? . . . Eba, nsizi kutona kine wene walekela nzila yakue ni kutwalilila kuya wakosele? Nene nsizi kusekelela ata kanini lufu lwa muntu yeyonse, . . . Kansi, aluluke ni kusyala mwakosele.” (Ezek. 18:23, 32) Yehova ali waunvua makola kine bantu balapila pantu atonene bekale lonse! Pa kako, Yehova tezi kupembelelanke muntu alapile mane amukwasie. Ale tumone mifuano paleepale isininkiziizie evio.

7. Kupitila kubombia lyasi lyakue kabika Hosea pamo ni mukazi wakue, Yehova waabasambiliziizie ki bantu bakue?

⁷ Mona Yehova vyaabasambiliziizie bantu bakue kupitila kubombia lyasi lyakue Gomeri, muka kabika Hosea. Kisia kukita bukende, Gomeri waamusiile Hosea ni kuya ku balalume bange. Yehova waakitile syani? Pantu wene ali wasoma mu mitima, waamwanine evi Hosea: “Endo waye kabili utone mwanakazi olia atonenue na mwalalume unge, kabili ali mukukita bukende, nga evelia sie Yehova vyatonene Baisraeli anzia kine bali mukupilibukila ku ba leeza bange.” (Hos. 3:1; Tus Maf. 16:2) Languluka nangue muka Hosea abanga wakili mukukita sie lizambi likata. Inzi, mu wenka ozo musita, Yehova waamulandile Hosea aye amweleele ni kumwalula kabili mukazi wakue. a Enka evio, Yehova ni wene taabalekeleele bantu bakue ata sie kine babanga bakosele mitima. Anzia kine babanga bakili sie mukukita mazambi, wene abanga wabatonene sie, kabili waatwaliliile kubakwasia kupitila ba kabika evi balapile ni kwalulula lwendo lwabo. Eba, kekio kilangiliile nangue Yehova, olia ‘ali watoosia mitima,’ wakaba kumukwasia muntu olia akili mukukita lizambi evi alapile? (Tus Maf. 17:3) Lekela tumone.

YEHOVA ALI WABAKWASIA SYANI BANTU BAAKIKITA MAZAMBI EVI BAFIKIILE KULAPILA?

8. Yehova waakitile syani evi kumukwasia Kaini alapile? (Kutendeka 4:3-7) (Mona ni foto.)

⁸ Kaini i abanga wali libeli wa ba Adamu ni Eva. Ni wene waapyene ku bavyazi bakue lwinso lwa kukita bintu bibipile. Kukila pa kako, Bibilia ili yalanda evi pa lwakue Kaini: “Bikitua byakue byaali byabipile.” (1 Yoan. 3:12) Musita Kaini lwaapeele ngeleelo, Yehova “taamwitabiile [Kaini] pamo ni bupe bwakue.” Pange waakeene pantu bikitua byakue byaali byabipile. Paali pa kunti alulule lwendo lwakue, ‘Kaini waafipilue ni kunvua bulanda.’ Kisia papo, Yehova waakitile ki? Waalandile nakue. (Soma Kutendeka 4:3-7.) Languluka nangue Yehova waalanziene ni Kaini mu nzila iweme, abanga wamulanda nangue wakaba kumupaala kine wakita kintu kiweme, kabili nangue kine watwalilila kuya wafipilue, wakaba kufikiila kukita lizambi. Kya bulanda, Kaini waakeene kutwilizia. Taamulekeleele Yehova amukwasie evi alapile. Pantu Kaini waakeene kumutwilizia, eba Yehova waapingwile nangue takakwasia kabili muntu ata umo evi afikiile kulapila kine waakikita lizambi? Ata, wene taapingwile evio!

9. Yehova waakitile ki evi kumukwasia Daudi alapile?

⁹ Yehova abanga wamutonene sana Likolo Daudi. Kabili, waafikiile kumukuuta nangue “muntu ali wasansamusia mutima wane.” (Miil Bat. 13:22, NWT) Inzi, Daudi waakitile mazambi akata sana, kubiika mukati bukende ni bungipaani. Kukonkana ni Muzilo Wakue Musa, Daudi abanga wapalile kwipaiwa. (Bal. 20:10; Mpen. 35:31) Inzi, Yehova waamukwasiizie evi alapile.b Waamutumine Natani, kabika wakue, aye amumone Daudi ata sie kine abanga wali tanalapile mazambi akue. Natani waabombiizie mufuano umo evi kumukwasia Daudi enike nangue waakitile mazambi akata sana. Daudi waainikile nangue waaluviizie sana kuli Yehova, pa kako waalapiile. (2 Sam. 12:​1-14) Waalembele malumbo amo juu ya kulangilila nangue waalapiile. (Malum. 51, bulondolozi bwa ntanzi) Azo malumbo ali asonsezia bantu bengi sana balapile kine bakita lizambi. Tuli ni nsansa ya kumana nangue Yehova abanga wamutonene Daudi, kabili nangue waamukwasiizie evi alapile.

10. Kumana nangue Yehova ali watupembelela ni kutweleela, kwalengia wiunvue syani?

¹⁰ Yehova ali wasuula lizambi lya kila musango. (Malum. 5:4, 5) Inzi, amanine bwino nangue fwe bonse tuli twakita mazambi. Anzia evio, pantu atutonene, ali watukwasia tulapile kine twakita lizambi. Lyonse, ali wabakwasia ata sie baalia bali bakita mazambi abipile sana evi balapile ni kupalama kuli wene. Kumana evio, kuli kwatuteekia sana mutima! Kutontonkania palua mibele yakue Yehova ya kupembelela pamo ni kweleela, kuli kwatusonsezia tupingule kuya twali ba kisinka kuli wene ni kulapila penka palia kine twakita lizambi. Lonu, tumonenke Yesu vyaabasambiliziizie basambi bakue palua kulapila.

BINTU BYAASAMBILIILE BASAMBI BAKUE YESU PALUA KULAPILA

11-12. Yesu waabasambiliziizie ki ba katwilizia bakue palua kweleela kwakue Baba wakue? (Mona ili ku ntendeko ya kazeeti.)

¹¹ Mu myaka mia ya ku ntendeko, musita waafikile wa kwizilapo Masiya. Nga vilandile lyasi lyaakipita, Yehova waababombiizie ba Yoane Mubatizi pamo ni Yesu Kristu evi babasambilizie bantu juu ya ki ni kintu kya mana kulapila.—Mat. 3:1, 2; 4:17.

¹² Lwabanga wali panu pa kyalo, Yesu abanga wabasambilizia bantu nangue Yehova ali watona kutweleela kine twaluvia. Yesu waakitile evio kupitila kubombia mufuano wa mwana mwalalume olia waazezele. Ozo mulumendo, waasaakwile kufumako kwabo ni kukita bintu bibipile sana. Inzi, kisia musita, “waalukile kabili ni mano aweme,” kabili waabwelele kwabo. Baba wakue waakitile syani? Yesu waalandile nangue, musita ozo mwana “lwaali wasyapalama kwabo, se [ao baba wakue] waamumwene ni kumunvwila nkumbu. Waamusensekeele ni kuya kumukumbatila.” Ozo mwana abanga wasyakeba kumulomba baba wakue amwalule mubombi wa mu nsesi yakue, inzi baba wakue waamukuutile nangue, “ozu mwana wane.” Kukila pa kako, waamubweziizie pa fwasi yakue mu lupua lwabo. Ozo baba waalandile evi: “Waali wazezele, inzi lonu wamoneka.” (Luk. 15:11-32) Lwabanga wali ku muulu, ntanzi ya kwiza panu pa kyalo, Yesu waaimweneene kakiine Baba wakue wali mukulangilila nkumbu ya evio ku bantu bengi sana baalia baali balapila kisia kukita mazambi. Ozo mufuano waabombiizie Yesu watuteekia mutima kakiine, kabili watusambilizia nangue Yehova, Baba wetu, ali ni luse sana!

13-14. Ni masomo ki aasambiliile Petro palua kulapila, kabili ni kiki kyaabasambiliziizie bange palua kekio? (Mona ni foto.)

¹³ Mutumua Petro waasambiliile masomo a mana kupitila Yesu pa lwakue Yehova vyali waeleela baalia bali balapila. Lingi, Petro abanga wakabiile kweleelua, ni Yesu waamweleele mu kwitonena. Kwa mufuano, kisia Petro kubisia mara itatu nangue tabanga wamumanine Mulopue wakue, waaunvwile bulanda bukata sana. (Mat. 26:34, 35, 69-75) Inzi, kisia Yesu kutuntumunua, waamwenekele kuli Petro. Pange waakitile evio bila pali muntu unge. (Luk. 24:33, 34; 1 Bakor. 15:3-5) Kulanda kisinka, Yesu abanga wamanine nangue Petro waalapiile kakiine, kabili waamusininkiziizie nangue waamweleele.

¹⁴ Pantu Petro waaunvwile nsansa ili yafuma mu kulapila ni kweleelua, ni wene waavindile kusambilizia bange masomo aasambiliilemo. Mu kipindi kimo, kisia nsiku-nkulu ya Pentekoste, Petro waalandile lyasi ntanzi ya Bayuda bengi nangue, bene i baamwipaile Masiya. Anzia evio, waabalandile evi: “Kansi, lapile ni kupilibuka evi mazambi enu avutue evi nsita ya kuwaaminua ifume kuli Yehova mwine.” (Miil Bat. 3:14, 15, 17, 19) Kupitila kulanda evio, Petro waalangiliile nangue kine muntu walapila, ali waaluluka, i kulanda, ali waalulula namuna yakue ya kutontonkania pamo ni bikitua byakue, kabili ali walekela kukita bibipile ni kutendeka kukita biweme evi kumusansamusia Leeza. Kabili, ozo mutumua waalangiliile nangue, Yehova wakaba kuvuta kakiine mazambi abo, ao kuazezia kakiine. Kisia myaka ingi kupita, Petro waabasininkiziizie evi Bakristu: “Yehova . . . ateekele mutima pantu tatonene muntu ata umo enoonue, inzi atonene bantu bonse balapile.” (2 Pet. 3:9) Twateeka mutima pantu twamana nangue kine twakita lizambi, ata sie mazambi akata, Yehova wakaba kutweleela kakiine kine twalapila!

15-16. (a) Mutumua Paulo waasambiliile syani palua kweleela? (1 Timoteo 1:12-15) (b) Twakaba kusambilila ki mu lyasi likonkelepo?

¹⁵ Paulo, olia abanga wakuutua nangue Sauli wa ku Tarso, waakitile bintu bingi sana bibipile. Abanga wabatesa sana basambi bakue Kristu. Pange bantu bengi sana babanga batontonkania nangue wene takaaluluka ata kanini. Inzi, Yesu wene abanga wamanine nangue Sauli wakaba kwaluluka ni kulapila. Yesu pamo ni Baba wakue baamwene mibele iweme mu mutima wakue Sauli. Yesu waalandile evi: “Naakimusaakula ambombele.” (Miil Bat. 9:15) Yesu waakitile ni kimpezia-mano evi kumukwasia Sauli alapile. (Miil Bat. 7:58–8:3; 9:1-9, 17-20) Sauli ao Paulo, waalapiile ni kwaluka Mukristu. Yesu waamupeele miilo ya kubomba wali mutumua. Lingi, Paulo abanga walanda vyaali wasantila pantu Yehova pamo ni Yesu baamulangiliile buwame ni luse. (Soma 1 Timoteo 1:12-15.) Mutumua Paulo waalandile evi: “Leeza kupitila buwame bwakue, ali mukwezia kukutungulula evi ufikiile kulapila.”—Bar. 2:4, NWT.

¹⁶ Musita umo, Paulo waaunvwile nangue kilonghaano kya Kikristu kya mu Korinto kyaalekeleele mwalalume umo abanga wakita bukambue asyale mu kilonghaano. Bintu byaabalandile bakite byatusambilizia nangue Yehova ali wabalapizia kwa ntono babombi bakue, kabili nangue ali wabalangilila luse kine balapila. Mu lyasi likonkelepo, twakaba kusambilila bingi palua bintu byaakitikile mu kilonghaano kya Korinto.