Yehova Atonene Kilonghaano Kimukitile Syani Olia Waakikita Lizambi Likata?

1. Yehova atonene kila muntu akite ki?

YEHOVA waatubumbile twali ni buvinde bwa kwikwatila bupinguzi. Bupinguzi bwa mana bukilile pa bonse ni bobu: kwipeela kuli Yehova ni kwingila mu lupua lwakue. Yehova atonene kila muntu akite evio. Juu ya ki? Pantu wene abatonene bantu, kabili atonene tuye twali ni nsansa. Atonene baaluke benakue ni kwikala lonse.—Mal Miz. 30:19, 20; Bag. 6:7, 8.

2. Yehova atonene muntu onse asinalapile akite ki? (1 Yoane 2:1)

² Inzi, Yehova tezi kupatikizia muntu ata umo evi amubombele. Atonene kila muntu apingule ye mwine kelia kyali wakaba kukita. Ale kunti kyaaluka syani kine Mukristu abatiziiziwe watyona sheria yakue Leeza, i kulanda, kine wakita lizambi likata? Kine talapiile, apalile kufumiiwa mu kilonghaano. (1 Bakor. 5:13) Anzia evio, Yehova atonene sana olia wafumiiwa mu kilonghaano alapile ni kwaluka kabili mwinakue. Kulanda kisinka, nsambu ikata yaalengiizie Yehova apeele kilubula-mulandu ni ezi: aye waeleela baalia bali balapila kisia kukita lizambi. (Soma 1 Yoane 2:1.) Leeza wetu wa ntono ali walomba muntu onse wakita lizambi likata, alapile.—Zek. 1:3; Bar. 2:4; Yak. 4:8.

3. Tuli kumona ki mu leli lyasi?

³ Yehova atonene tuye twali ni mawazo nga akue palua lizambi ni palua bantu baalia bali bakita mazambi akata. Leli lyasi, lili kulondolola vituli kuvinda kukita evio. Luuli kuya wasoma leli lyasi, ikwinde kumona (1) kilonghaano kya mu Korinto vikibanga kyakita kine muntu wakita lizambi likata, (2) Paulo vyaalandile kekio kilonghaano kiye kyakita kine olia waakikita lizambi likata walapila, ni (3) mawazo akue Yehova palua Bakristu baalia bakita lizambi likata.

KILONGHAANO KYA KORINTO KYAALI KYAKITA SYANI KINE MUKRISTU WAKITA LIZAMBI LIKATA?

4. Ni kiki kyaakitikile mu kilonghaano kya mu Korinto? (1 Bakorinto 5:1, 2)

⁴ Soma 1 Bakorinto 5:1, 2. Mu lwendo lwakue lwa butatu lwa bumisyonere, Paulo waaunvwile kintu kimo kibipile kibanga kyakitika mu kilonghaano kya lenu kya mu Korinto. Lupua umo wa mu kekio kilonghaano, abanga wakita bukambue ni muka baba wakue. Bukambue bwa evio te bubanga “bwakitika pa bantu basimumanine Leeza!” Kekio kilonghaano kyaamwene nangue kibanga kyali sie bwino ozo lupua atwalilile kuya wali mu kilonghaano. Pange bange babanga batontonkania nangue kumulekelela ozo lupua i nzila ya kulangilila luse nga Leeza ku bantu basipwililikile. Inzi kulanda kisinka, Yehova tezi kwitabizia pa bantu bakue paye pali lwendo lubipile. Pange lolo lwendo lubipile, lwaalengiizie baalia basibanga bamupupa Yehova bonvue ovio ni kutendeka kulanda bintu bibipile palua bantu bakue. Kabili, ozo mwalalume asyalenge mu kilonghaano, pange nga waatendekele kubasonsezia ni Bakristu bange baalia babanga wapisia nabo musita. Pa kako, Paulo waalandile kilonghaano kikite ki?

5. Paulo waalombele kilonghaano kikite syani, kabili abanga wakeba kulanda ki? (1 Bakorinto 5:13) (Mona ni foto.)

⁵ Soma 1 Bakorinto 5:13. Yehova waamutungulwile Paulo kupitila mupasi utakatifu evi abalembele mukanda Bakristu ba mu kekio kilonghaano. Paulo waabanine nangue ozo mwalalume asibanga walapila apalile kufumiiwa mu kilonghaano. Bakristu ba kisinka ba mu kekio kilonghaano babanga bapalile kuya bali nakue syani? Paulo waabalandile nangue ‘te bapalile kukita burafiki,’ pamo nakue (NWT). Paulo abanga wakeba kulanda ki? Wene waalondolwele nangue kekio kibanga kyabiikile mukati ‘kusilia na muntu wa ozo musango.’ (1 Bakor. 5:11, NWT) Lingi, musita utuli twalia kyakulia pamo ni muntu, tuli twalanziana, ni kekio kunti kyalengia tutendeke kupisia musita wingi pamo. Pa kako, Paulo abanga wali ni nsambu ya kulanda nangue kilonghaano te kibanga kyapalile kupisia musita usili wa mana pamo ni ozo muntu. Ezio i nzila ya kusunga kilonghaano evi te kunti kyambukilue na lwendo lubipile. (1 Bakor. 5:5-7) Kukila pa kako, kukita evio kubanga kwali nzila ya kumukwasia ozo muntu enike nangue waakimuluvia sana Yehova, ni kumulengia onvue ovio ni kufikiila kulapila.

6. Bakristu ba mu Korinto baakitile ki kisia kupokelela mukanda wakue Paulo, ni olia mwalalume waakitile lizambi waakitile ki?

⁶ Kisia kubatumina mukanda Bakristu ba mu Korinto, Paulo waatendekele kwiipuzia kine bakaba kukitapo syani. Lisyuko, Tito waamupeele mpunda yaamusansamusiizie. Bakristu ba mu kilonghaano kya Korinto baaunvwile bwino palua mukanda wakue Paulo. (2 Bakor. 7:6, 7) Baamufumiizie mu kilonghaano olia muntu waakitile lizambi. Kyaakilile kumusansamusia Paulo ni keki: musita unini kisia kubatumina ba lupua ni ba nkazi ba mu kekio kilonghaano mukanda wakue wa kwanza, olia mwalalume abanga wakita bukambue waalapiile! Waalulwile lwendo lwakue ni mawazo akue, kabili waatendekele kukonka mafunde alungheeme akue Yehova. (2 Bakor. 7:​8-11) Kisia papo, Paulo waabanine Bakristu ba mu Korinto bakite ki?

KILONGHAANO KIBANGA KYAPALILE KUMUKITILA SYANI OLIA MWALALUME WAALAPIILE?

7. Kisia kufumiiwa mu kilonghaano, olia mwalalume waakitile lizambi waakitile syani? (2 Bakorinto 2:5-8)

⁷ Soma 2 Bakorinto 2:5-8. Paulo waalandile nangue ‘kukandua kwa ozo muntu kubanga kwapalile.’ Mu milandu inge, kulapiziiwa ao kufumiiwa mu kilonghaano kwaabombele miilo yakue ku ozo muntu. Miilo ki? Kwaamusonseziizie alapile.—Baeb. 12:11.

8. Kisia olia mwalalume kulapila, Paulo waabanine Bakristu ba mu kilonghaano kya Korinto bakite ki?

⁸ Pantu ozo mwalalume waalapiile, Paulo waabanine bakote bamubwezie mu kilonghaano. Kabili, waabanine ‘bamweleele ni kumukoselezia’ evi ‘amone nangue bamutonene.’ Kupitila kulanda evio, Paulo abanga watonene ba lupua bamulangilile ozo mwalalume kupitila milandu ni bikitua byabo nangue baamweleele kakiine, kabili nangue babanga bamutonene. Kukita evio, i kwasiile kumukwasia enike nangue baaunvwile makola pantu waabwelele mu kilonghaano.

9. Juu ya ki pange bamo baamwene kyakolele kumweleela olia mwalalume waalapiile?

⁹ Eba, Bakristu bamo ba mu kekio kilonghaano baafipilue pantu ozo mwalalume waabweziiziwe mu kilonghaano? Bibilia te ilandile, inzi pange kibanga kyali enka evio. Twalanda evio pantu bintu byaakitile ozo mwalalume byaaleteele kilonghaano kyonse maavia, kabili pange byaabakisiizie ni bange pa lwabo bunke. Kukila pa kako, pange bange baafipilue ni kumona nangue te kibanga kyapalile kumubwezia mu kilonghaano ozo mwalalume pantu bene babanga baikwinda sana evi batwalilile kuya bali ni lwendo luweme. (Palania ni Luka 15:28-30.) Anzia evio, juu ya ki kibanga kyali kintu kya mana kilonghaano kimulangilile ntono ya kisinka ozo lupua wabo waalapiile ni kubweziiwa?

10-11. Ni kiki kyasiile kukitika bakote bakanenge kumweleela olia mwalalume waalapiile?

¹⁰ Ezia kutontonkania kintu kyaasiile kukitika bakote bakanenge kumubwezia mu kilonghaano olia mwalalume waalapiile kakiine, ao ba lupua ni ba nkazi bakanenge kumulangilila ntono kisia wene kubweziiwa. Pange nga waamininue na “bulanda bupitiliile.” Pange nga waamwene nangue takamubombela kabili ata kanini Yehova. Kabili, pange nga waamwene nangue kwikwinda kwakue evi kuwamia burafiki bwakue pamo ni Yehova, ni kwa mpuni.

¹¹ Ale ni kiki kinge kyaasiile kukitika ba lupua ni ba nkazi bakanenge kumweleela ozo mwalalume waalapiile? Nga baazeziizie burafiki bwabo pamo ni Yehova. Juu ya ki? Pantu nga te baamupalile Yehova, olia ali wamweleela muntu akitile lizambi kine walapila. Inzi, nga baamupalile Sataana, olia akosele mutima, kabili asizi kutona kweleela. Sataana nga waababombiizie juu ya kumutyona mutima ozo mwalalume evi te kunti amubombele Yehova.—2 Bakor. 2:10, 11; Baef. 4:27.

12. Bakristu babanga bapalile kukita ki evi kumupala Yehova?

¹² Kansi, Bakristu ba mu kilonghaano kya Korinto babanga bapalile kukita ki evi kumupala Yehova kuliko kumupala Sataana? Babanga bapalile kubeleela baalia bali balapila nga vili vyakita Yehova. Mona bintu bimo byaalandile ba kalemba bamo ba Bibilia pa lwakue Yehova. Daudi waalandile evi: ‘Wewe uweme, kabili uleengele kweleela.’ (Malum. 86:5) Mika waalembele evi: “Ni Leeza ki ali nga wewe, olia ali waeleela kilubo, kabili asizi kupoza mano ku bilubo?” (Mik. 7:18) Ni Isaya waalandile evi: “Kansi muntu abipile alekele nzila yakue, ni mubifi alekele malanga akue, amubwelele Yehova, olia ali kumulangilila luse, kuli Leeza wetu, pantu ali kweleela mu nzila ikata.”—Is. 55:7.

13. Juu ya ki kyaali kyapalile kumubwezia mu kilonghaano olia mwalalume waakitile lizambi ni kulapila? (Mona kisanduku kilandile, “Olia Mwalalume wa mu Korinto Waabweziiziwe Musita ki?”)

¹³ Evi kumupala Yehova, Bakristu ba mu kilonghaano kya Korinto baali bapalile kumupokelela bwino ozo mwalalume waalapiile ni kumusininkiziizia nangue bamutonene. Kupitila kukonka malaizio akue Paulo a kumupokelela ozo mwalalume waakitile lizambi ni kulapila, nga baalangiliile nangue ‘baali bakita byonse byaali walanda.’ (2 Bakor. 2:9) Kakiine, kwaapitile sie myezi inini ntangia ozo mwalalume afumiiwe mu kilonghaano, inzi kumulapizia ozo muntu kwaakwasiizie pantu kwaalengiizie alapile. Pa kako, te kubanga kwali nsambu ya kulengia bakote bakokole bila bamubwezia mu kilonghaano.

KUNTI TWAPALA SYANI NSAMBU NI LUSE LWAKUE YEHOVA?

14-15. Twasambilila ki kupitila kintu kyaakitikile mu Korinto ya kale? (2 Petro 3:9) (Mona ni foto.)

¹⁴ Kintu kelia kyaakitikile mu kilonghaano kya Korinto ya kale palua olia waakitile lizambi likata, kyaalembelue mu Bibilia “juu ya kutusambilizia.” (Bar. 15:4, NWT) Lelio lyasi lyatusambilizia nangue Yehova tezi kutona Mukristu olia ali wakita lizambi likata bila kulapila asyale pakati ka bantu bakue. Bange kunti batontonkania nangue pantu Yehova ali ni luse, kunti walekelela sie muntu olia asizi kulapila asyale mu kilonghaano. Inzi, kulanda kisinka Yehova tezi kulangilila luse mu ezio nzila. Ata sie kine wene ali ni luse, tezi kwitabizia lwendo lwa kila namuna. Kabili, mawazo akue palua kibipile ni kiweme te ezi kwaluluka. (Yud. 4) Kabenge Yehova ali walekelela babifi basizi kulapila basyale mu kilonghaano, kekio nga kili kyalangilila nangue tali na luse pantu nga kili kyaletela kilonghaano kyonse bwavia.—Tus Maf. 13:20; 1 Bakor. 15:33.

¹⁵ Kabili, twasambilila nangue Yehova tatonene muntu ata umo akenoonue. Atonene kupususia bantu bengi kine kyakitika. Ali wabalangilila luse baalia bali baalulula mawazo pamo ni bikitua byabo ni kutona kabili kumubombela. (Ezek. 33:11; soma 2 Petro 3:9.) Pa kako, musita olia mwalalume wa mu Korinto lwaalapiile ni kulekela lwendo lwakue lwa lizambi, Yehova waamubombiizie Paulo evi abalondolwele Bakristu ba mu kilonghaano kya Korinto nangue bapalile kumweleela ni kumubwezia mu kilonghaano.

16. Bintu byakitile kilonghaano kya mu Korinto palua olia mwalalume waakitile lizambi likata, byatusambilizia ki pa lwakue Yehova?

¹⁶ Bintu byaakitile kilonghaano kya mu Korinto palua olia mwalalume waakitile lizambi likata, byatusambilizia nangue Yehova ali ni ntono, alungheeme, kabili ni wa nsambu. (Malum. 33:5) Eba, wewe te umwene nangue upalile kukila kumutasia? Tuli twamutasia sana pantu ali watulangilila luse fwe bantu basipwililikile. Kabili, tuli twamutasia pantu waapeele kilubula-mulandu evi aye waeleela mazambi etu. Ni kintu kya kusansamusia sana kumana nangue Yehova abatonene bantu bakue kakiine, kabili atonene baye bali ni nsansa lonse!

17. Twakaba kusambilila ki mu maasi akonkelepo?

¹⁷ Eba, lelo kunti kyaaluka syani kine lupua ao nkazi wakita lizambi likata? Eba, bakote ba mu kilonghaano kunti bapala syani ntono yakue Yehova ni kumukwasia alapile? Ba lupua ni ba nkazi kunti bakita syani kine bakote bapingula kumufumia muntu umo mu kilonghaano ao kine bapingula kumubwezia? Bebi bipuzio byakaba kwasukua mu maasi akonkelepo.