Japi mi iʼwírima binea

Natá chu iyiri namuti nalí wabé natéami ju

Tákoré ti we kanili binea echi Biblia, isini kaachi ke ti ikiri wilí binea japi riká ti nakí. Jiti la, ¿piri ta oméripo nokayá? Bachá, japalí mi binea asisaa tákoré teeli bi nisa, we aʼlá biné. Wabé aʼlá ju japi ta kuabi leéripo nalí we aʼlá binea alí ke ko wiká leeria nalí we sapuka niraa.

Okuá, aʼlá natá chu iyiri namuti nalí wabé natéami ju (Efes. 5:15, 16). Jenaʼí nirú jaré busuréliami japi mi omeri isiá jiti mi we aʼlá binema:

• Leeri echi Biblia sinibí rawé (Sal. 1:2). Japi riká, ami omeri leeria echi capítulos echi Biblia jitra japi ta binepo echoná napawíliwachi.

• Kecho séachi echi napawíliwami aʼlá biné japi ta binepo echoná, japi riká echi napawíliwami Nokiboa japi riká isili Cristo alí echi oselí Echi Nawésami. We aʼlá biné jiti mi nijima comentarios (Sal. 22:22).

• Aminabi mi ikíriaká binea, leeri jarecho oselí japi riká japi iyáliwa echi pagótami japi ta nawesi, iné echi videos alí suwaba japi buyaní echoná jw.org.

• Chotasi binea japi mi machinali. Japi riká, ami omérima binea bilé namuti jilírami jitra japi mi ikí o bilé namuti echi Biblia jitra japi mi ke me aʼlá inami. Jiti mi machimea jarecho namuti jitra japi mi omeri binea, bakí echoná jw.org japoná aní “Actividades para estudiar la Biblia”.