BINELÍWAMI 56
Iʼwiri jiti echi congregación napawika nima
Japalí ti muchuwi echi hermanos yúa, ati nili japi riká echi silíami David: “¡We aʼlá ju alí we semati ju japalí echi hermanos napawí sinéami ka napawika!” (Salmo 133:1). Jiti ta sinibí napawika nipo, sinéami ta iʼwérili nokisáré jiti echi riká nima.
1. ¿Piri namuti chopi iyiri noká echi testigo Jeobá?
Ami simisáaká bilecho congregación biléana país, ami we kanílima echi yúa napawía tákoré ke mi inami japi riká echi raʼicha. ¿Chúsiá? Jiti tákoré mi biléana simiyé, echoná napawíliwachi ati biné echi Biblia néeka echi publicaciones japi sinéami Testigos nee omáana Wichimóbachi. Ayénachó ati iʼwérili noká galea anakupi niraa. Tákoré ti jaréanachó piréami ke, sinéami ti walubéala anénali Jeobá riwalá alí napawika nijewia (Sofonías 3:9; nota).
2. ¿Piri mi omeri isiá jiti echi congregación napawika nima?
“Galebo aʼnagupi, ne sulachí niráa” (1 Pedro 1:22). ¿Chúriká mi nijéwima jepuná busuréliami? Ke mi inésaré echi namuti japi ke aʼlá noká echi hermanos, nalí inésaré echi aʼláala namuti japi noká. Alí ke bi yúa napawí echi japi kanili isiá japi riká mujé, nalí iʼwérili isí jarecho yúa napawía japi jaréanami piréami ju o sinúrika raʼíchami. Ayénachó iʼwérili isí ke cha riká natia jarecho jitra japi sinúrika ju mujé yúa (leeri 1 Pedro 2:17).a
3. ¿Piri mi isima japalí mi cha nílitisa bilé hermano?
A bichíwali ju japi ta napawíkami ju alí ti we kanili. Nalí isini kaachi ati aní o noká jaré namuti japi cha níliti jarecho. Jiti la echi Onorúami Raʼicháala jéaní: “Sinibí aʼnagupi [...] ku wikáwasi, achigórigá mapurigá Riosi ʼyemi mi ku wikáwali” (leeri Efesios 4:32). Jeobá echi riká isimí tamó wikawia tákoré ti wisabé echi risoa níliti. Jiti la echi tamó ané japi ta wikáwipo echi hermanos. Ami machisáaká japi mi cha nílitili bilecho, iʼwérili isí ku raʼíchika akarewia (leeri Mateo 5:23, 24).b
AMINABI NATABO JAPI TA BINÉ
Natá piri mi omero isiá jiti echoná congregación kilí nima alí napawika.
¿Piri mi isima jiti mi akaréwima echi hermanos yúa?
4. Galé japi sinúrika ju mujé yúa
Ati newa nokinali japi ta we galé sinéami echi hermanos. Nalí isini kaachi ati jilí niráboré galea jaré hermanos jiti echi ko sinúrika ju tamujé yúa. ¿Piri tamó iʼwírima echi riká ikisáaká? Leérisi Hechos 10:34, 35 alí raʼichasi jepuná jitra:
Jeobá ko bayé sinéami pagótami jiti echi testígowala nima. Machiyá japi Jeobá echi riká isimí, ¿chúriká mi inésaré echi pagótami japi sinúrika ju mujé yúa?
Japoná mujé bité, ¿chúriká iné echi pagótami japi sinúrika ju echi yúa? ¿Chúsiá mujé ke echi riká inésaré jarecho japi riká noká echi pagótami?
Leérisi 2 Corintios 6:11-13 alí raʼichasi jepuná jitra:
¿Piri mi isísaré jiti mi aminabi we galema echi hermanos alí hermanas?
5. Raʼíchika akarewi alí ku wikawi
Tákoré Jeobá ko ke newalé japi ta echi wikáwipo, echi ko tamó wikawi. Leérisi Salmo 86:5 alí raʼichasi jepuná jitra:
Japi ta leérili jenaʼí versículo, ¿piri ta biné Jeobá jitra?
Jiti Jeobá wikáwiami ju, ¿chúsiá matétara iyásaré?
¿Piri namuti isima japi ta ke napawika nipo jarecho yúa?
Jiti napawika nipo echi hermanos yúa, ¿piri ti nokisáré japi riká isimí Jeobá? Leérisi Proverbios 19:11 alí raʼichasi jepuná jitra:
Japalí bilé mi cha nílitisa, ¿piri mi isima jiti checho ku anakupi kanílima?
Isini kaachi tamujé ju japi cha nílitili jarecho. Echi riká ikisáaká, ¿piri ta nokisáré? Inesi echi VIDEO alí raʼichasi jepuná jitra:
¿Chu isili echi hermana ku akaréwimia bilé namuti japi ikili bilecho hermana yúa?
6. Iné echi aʼláala namuti japi noká echi hermanos
Japalí ti aminabi machí echi hermanos, ke ti bi iné echi aʼláala namuti japi noká, ayénachó ti iné japi ke aʼlá noká. Jiti la, ¿piri ta nokisáré jiti ta ke bi inepo echi namuti japi ke aʼlá noká? Inesi echi VIDEO alí raʼichasi jepuná jitra:
¿Piri mi iʼwírima jiti mi aʼláala namuti bi inema japi noká echi hermanos?
Jeobá ko iné echi aʼláala namuti japi ta noká. Leérisi 2 Crónicas 16:9a alí raʼichasi jepuná jitra:
¿Chu mi nili machiyá japi Jeobá iné echi aʼláala namuti japi mi isimí?
Tákoré bilé anillo japi niwárami ju bilé namuti we natéami jitra sulúkami ju, echi ko a bijí we natijí. Echi riká cho ju echi hermanos yúa: tákoré ke sébali aʼlá nokáami ju, Jeobá ko we natéami niraa iné.
JAPI ANÍ JARÉ PAGÓTAMI: “Ani wikáwima, nalí ni sinibí a newalama japi tamí olali”.
¿Chúsiá ta sébali aʼlá niraa wikáwisaré?
JAPI MI BINELI
Ami galésaká sinéami echi hermanos alí mi wikáwisaká, mujé ko iʼwírima jiti echi congregación napawika nima.
Piri mi animea
¿Piri mi isísaré jiti mi galema jarecho japi sinúrika ju mujé yúa?
¿Piri mi isima japalí mi cha nílitisa bilé hermano?
¿Ami kanílisa nili wikáwiami niya japi riká isimí Jeobá? ¿Chúsiá?
JITI MI CHE BINEMA
Jesús ko néeli bilé ejemplo japi tamó iʼwiri ke cha riká inea jarecho. Iné piri jitra raʼíchili.
¡Ne bachá machí pa echi walú kutega echoʼná mujé binói busílachi! 7:01
¿Achi ti wikáwili tánisaré jarecho tákoré ti mayé japi ta ke chati namuti nokali?
“Wikáwili tanipo jiti kilí pirélipo jarecho yúa” (Echi Nawésami, 1 inárachi noviembre 2002)
Iné chúriká jaré ko bineli we natéami niraa inea sinéami echi pagótami.
Kiti cha riká natá jarecho jitra echi bi jitra japi mi iné 5:06
Leeri chúriká nokiboa akarewia bilecho yúa jiti kilí nipo echoná congregación.
“We galéami nipo jiti akaréwipo echi hermanos yúa” (Echi Nawésami, mayo 2016)