Mbá milagru náa lamáa Maña̱ʼ

Índo̱ rí faraón niʼdxaun rí israelitas nigájnun náa Egipto, nitanga̱a̱ a̱jkiu̱u̱n dí niniñúnʼ magún. Niʼthún soldados ndrígio̱o̱: “Guni majan xúgíʼ carros ndrígóʼ rí najmuʼ náa guerra, ga̱jma̱a̱ guʼgua̱ kidxu̱únʼ. Raʼkhí niʼni rí niniʼñúʼ magúun”. Ikhú, ikhaa gajmíi̱n xa̱bi̱i̱ nigún kidxu̱únʼ israelitas.

Jeobá naxnúu ikha xuajñu, ga̱jma̱a̱ mbá du̱u̱n rí mbiʼi ma̱ngaa rí mbruʼun naxnúún aguʼ mu mambiʼi. Ni̱jkha̱ kagui̱i̱n náa lamáa Maña̱ʼ ga̱jma̱a̱ niʼthúún rí maguanún ikhí.

Nda̱wa̱á, bi̱ israelitas ndiyáá rí faraón na̱ʼkha̱ gajmíi̱n xa̱bi̱i̱ raxkhúún. Bi̱ israelitas nánguá náa magún numuu rí mbá níjniúu kri̱ga̱ lamáa ga̱jma̱a̱ i̱mba̱ níjniúu naguwáʼ xa̱bu̱ egipcios. Nigíʼdi̱i̱ nindxa̱ʼwa̱ ga̱jma̱a̱ nitháán Moisés: “¡Makhañúxuʼ! Náa numuu nitrawáanʼxu náa Egipto rá”. Ikhú Moisés niriʼñún: “Xámiñalaʼ. Aguaʼthi̱i̱n ga̱jma̱a̱ gu̱ya̱a̱ xóo Jeobá gaʼni káwáanʼ”. ¡Phú gajkhun rí Moisés nikumu̱u̱ ka̱yo̱o̱ Jeobá!

Nda̱wa̱á, Jeobá niʼthúún israelitas rí muraxi̱i̱ guʼwún. Mbruʼun má rúʼko̱, Jeobá niʼni rí du̱u̱n marikoo kambu̱ún bi̱ egipcios. Náa naguwáʼ niʼni kríná, mú náa egún bi̱ israelitas nimbiʼi.

Nda̱wa̱á, Jeobá niʼthúu̱n Moisés rí makruiyaʼ ñawúunʼ náa lamáa. Ikhú niʼni rí maxnúu mbá giñánʼ gakhi̱i̱ wéñuʼ kañiʼ mbruʼun. Ikhú lamáa niguiʼtóo niʼni a̱jma̱, náa tapha iyaʼ niʼni mbá kamba̱a̱. Ikhú mbaʼin wéñuʼ israelitas ninújngún náa ku̱ba̱ʼ mixooʼ mú níjniúu tri̱ga̱ iyaʼ.

Faraón gajmíi̱n xa̱bi̱i̱ ni̱jkha̱ raxkhúún bi̱ israelitas náa ku̱ba̱ʼ mixooʼ náa tapha lamáa. Mú Jeobá niʼni dí mangawariʼiin bi̱ egipcios. Llántóo carro ndrígu̱ún niʼni dí magajnúu. Ikhú xa̱bi̱i̱ faraón nindxa̱ʼwa̱ ga̱jma̱a̱ nithi: “¡Gagajnúlu gi̱jyooʼ! Jeobá xtáa raxmínaʼ ga̱jma̱a̱ numuu xuajñu”.

Jeobá niʼthúu̱n Moisés: “Atatsriyaaʼ ñawáanʼ náa lamáa”. Nda̱a̱ tsu̱ma̱ niwa̱a̱ iyaʼ. Ikhú faraón gajmíi̱n xa̱bi̱i̱ nikháñun. Nimbáa takríyaaʼ.

I̱mba̱ níjniúu lamáa, xúgínʼ xa̱bu̱ nini mba̱a̱ Dios ga̱jma̱a̱ ajmúú: “Mani ajmúú náa Jeobá, numuu rí ni̱jkha̱nú nijmaʼnuʼ gloria ndrígóo. Nikumíínʼ náa lamáa wáyú ga̱jma̱a̱ xa̱bu̱ bi̱ nudramiunʼ”. Índo̱ xa̱bu̱ kuwa runi ajmúú, gu̱ʼu̱ nusian ga̱jma̱a̱ nudi̱i̱ pandereta. Xúgínʼ nadxuu a̱jkiu̱ún numuu rí niguma káwíin.