Lá naku̱mu̱u̱ Dios rí nakumulú ráʼ.

NDIÉJUNʼ EʼSNGÚLÚʼ NÁA XÚGÍʼ RÍ NIGUMA

Empatía nindxu̱u̱ rí makumulúʼ xóo eku̱mu̱u̱ imba̱a̱ xa̱bu̱ ma̱ngaa rí mbuʼyáá ga̱jma̱a̱ makru̱ʼu̱lú xóo endxa̱ʼóo edxu̱u̱. Doctor Rick Hanson, bi̱ naʼnigajmaa numuu rí xóo endxaʼwáá edxu̱lúʼ, naʼthí “rí makumulúʼ xóo eku̱mu̱u̱ imba̱a̱ rígá náa células ndrígúlú”.

ATATSAʼWÁMINAʼ GA̱JMA̱A̱ NUMUU RÍGI̱: Náa numuu rí ikháanʼ nandoo nusngájma rí nakumulú xóo ekumún eʼwíínʼ ga̱jma̱a̱ xujkhúʼ na̱nguá rá. Náa Biblia naʼthí rí Dios niʼniáanʼlú xó má nindxu̱u̱ ikhaa (Génesis 1:26). Rígi̱ eyoo gáʼthúu̱n rí ma̱ndoo manindxu̱lúʼ xóo ikhaa ga̱jma̱a̱ musngajmá dí ra̱ʼkhá tháán májánʼ xa̱bu̱ nindxu̱u̱. Ikha jngó índo̱ mbáa xa̱bu̱ nasngájma rí naku̱mu̱u̱ xóo eku̱mu̱u̱ imba̱a̱ xa̱bu̱, xtáa rasngájma rí nindxu̱u̱ xóo Jeobá bi̱ Niʼniáanʼlú (Proverbios 14:31).

NDIÉJUNʼ EʼSNGÚLÚʼ BIBLIA GA̱JMA̱A̱ NUMUU RÍ XÓO EKU̱MU̱U̱ DIOS RÁ.

Dios naku̱mu̱u̱ rí nakumulú ikháanʼ ga̱jma̱a̱ tséniguuʼ índo̱ numiʼnííʼlú. Índo̱ Biblia naʼthí ga̱jma̱a̱ numuu rí xóo nijma gíníi israelitas náa Egipto ga̱jma̱a̱ rí mbá a̱jma̱ skiñúʼ tsiguʼ nikuwa náa ku̱ba̱ʼ mixooʼ, naʼthí: “Índo̱ ikhiin nikuwa náa awúu̱n gaʼkhu ikhaa nixmiéjunʼ kaʼñún” (Isaías 63:9). Atayáá rí Dios raʼkháa i̱ndó ndiʼyoo rí xuajñu xtáa ramínuʼ, ma̱ngaa ikhaa nigawúunʼ rí nigíʼniin ikhiin. Ikhaa má niʼthí: “Nda̱yo̱o̱ xú káʼnii numíniiʼ” (Éxodo 3:7). “Numuu rí bi̱ naguguáanʼla xtáa ragugua itsúu iduʼ” eʼthí Dios (Zacarías 2:8). Ikha jngó índo̱ mbáa naʼniulú dí raʼkhí nindxu̱u̱ asndu xóo ikhaa egumaa.

Náa Biblia naʼthúlúʼ rí maski ajndu a̱jkiu̱lú naʼthí dí ra̱májánʼ eʼni o dí rakáʼyulú rí Dios magáwíinʼ a̱jkiu̱u̱n kaʼyulú, ikhaa nindxu̱u̱ “itháan mba̱a̱ ki xóo a̱jkiu̱lú ga̱jma̱a̱ naninuʼ xúgíʼ” (1 Juan 3:19, 20). Dios naniniáanʼ itháan májánʼ ki xóo ikháanʼ. Ndaʼyoo xúgíʼ rí nugíʼnii, rí endxaʼwáá edxu̱lúʼ ga̱jma̱a̱ naku̱mu̱u̱ rí ekumulú.

Náa Biblia naʼthúlúʼ:

• “Ikháánʼ maratha, ga̱jma̱a̱ Jeobá má gariʼña̱a̱; matanda̱ʼa̱a̱ mambáyaʼ, ga̱jma̱a̱ ikhaa maʼthí: ‹¡Gi̱i̱ xtáá!›” (ISAÍAS 58:9).

• “Numuu rí i̱ndó ikhúúnʼ eyo̱o̱ rí endxaʼwamínáʼ ga̱jma̱á numala —eʼthí Jeobá—, nandxaʼwamínáʼ rí májánʼ, raʼkháa dí ra̱májánʼ, mu makuwáanʼ májánʼ nda̱wa̱á ga̱jma̱a̱ makánala mbá rí wíji̱ ma̱ʼkha̱. Ikháanʼ mundxa̱ʼwo̱ʼ ga̱jma̱a̱ mutakháñuʼ, ga̱jma̱a̱ ikhúúnʼ madxawanlaʼ” (JEREMÍAS 29:11, 12).

• “Atiéxi̱i̱ iyoʼ iduʼ náa kulambra ndrígáʼ. Lá na̱nguá rígá náa libro ndrígáʼ ráʼ.” (SALMO 56:8.)

DIOS NANINIÁANʼ, NAKRO̱ʼO̱O̱ KAʼYULÚ GA̱JMA̱A̱ NAKU̱MU̱U̱ XÓO IKHÁANʼ

Lá ma̱ndoo mambáyulúʼ muraʼníí xkujndu índo̱ nduʼyáá rí Dios nakro̱ʼo̱o̱ rí eguáʼnii ráʼ. Guʼyáá rí nigíʼnuu María.

“Rí ndi̱yo̱o̱ xóo nimínuuʼ a̱ʼdióoʼ bi̱ gíʼdoo 18 tsiguʼ, a̱jma̱ tsiguʼ ga̱jma̱a̱ cáncer ga̱jma̱a̱ rí na̱nguá niʼngo̱o̱, nigawúunʼ wéñuʼ. Náa numuu rí niguáʼniixu rígi̱ dí ra̱májánʼ kayuʼ rá. Nikiʼnún ka̱yo̱o̱ Jeobá numuu rí nda̱a̱ rí niʼni.

”Nikumuʼ rí Jeobá na̱nguá nindoo kaʼyoʼ. Majun tsiguʼ nda̱wa̱á, ni̱thu̱u̱n rí naku̱mu̱ʼ mbáa bi̱ nambáxuʼ ga̱jmu̱ʼ bi̱ májánʼ wéñuʼ a̱jkiu̱u̱n bi̱ xtáa náa congregación ndrígóʼ. Mba̱yu̱ʼ hora rí niʼdxawunʼ rí ni̱thu̱u̱n, nda̱wa̱á niʼni marmáʼáan a̱jkiu̱nʼ mbá texto rí na̱ʼkha̱ náa Biblia rí nimbáyuʼ. Náa 1 Juan 3:19, 20, náa naʼthí rí ‹Dios itháan mba̱a̱ ki xóo a̱jkiu̱lú ga̱jma̱a̱ naninuʼ xúgíʼ›. Ga̱jma̱a̱ ikhú ma̱ngaa niʼthúnʼ rí Jeobá nakro̱ʼo̱o̱ rí numíniiʼ.

”Maski ajndu niʼthúnʼ xúʼko̱, ikhúúnʼ gúʼdoo má xúʼko̱ sia̱nʼ. Ikhú nigúxnuu Salmo 94:19, náa naʼthí: ‹Índo̱ gamiéjunʼ niʼni maʼni néʼngo̱ʼ, ikháánʼ nitani̱i̱ a̱jkiu̱nʼ›. Rúʼko̱ phú ndiyóoʼ madxuun. Nda̱wa̱á nindoo ni̱thu̱u̱n Jeobá gaʼkhu rí gúʼdoo numuu rí nda̱yo̱o̱ májánʼ rí ikhaa maʼdxawunʼ ga̱jma̱a̱ makro̱ʼo̱o̱ kaʼyoʼ. Rúʼko̱ niʼni maxtáá tsímáá”.

¡Naʼni̱i̱ a̱jkiu̱nʼ índo̱ nda̱yo̱o̱ rí Dios nakro̱ʼo̱o̱ kaʼyulú ga̱jma̱a̱ naku̱mu̱u̱ xóo ekumulú! Mú, náa numuu dí rígá wéñuʼ gamiéjunʼ rá. Lá xtáa raxnúlú castigo Dios ga̱jma̱a̱ numuu mbá aʼkhá ráʼ. Lá maʼga̱nú mbiʼi rí maʼni gámbáa tsingíná xáʼ. Graxe̱ rígi̱ maxtiʼña̱a̱ náa i̱ʼwáʼ artículos.