Referencia ndrígóo I̱yi̱i̱ʼ dí najmulú náa reunión xóo kúwi̱i̱n ga̱jma̱a̱ xóo Etaraʼa Cristianos
© 2024 Watch Tower Bible and Tract Society of Pennsylvania
2-8 SEPTIEMBRE
GÍʼDOO NUMUU RÍ NA̱ʼKHA̱ NÁA BIBLIA SALMOS 79-81
Gaʼndulúʼ kuʼyáá mbiʼyuu Jeobá rí nindxu̱u̱ mitsaanʼ
Rí nijuiʼtsiwáanʼ nindxu̱u̱ mbá regalo ndrígóo Anu̱lú
5 Xú káʼnii gusngájma ikháanʼ rí nandulúʼ kuʼyáá mbiʼyuu Jeobá rá. Ga̱jma̱a̱ rí nuʼnilú. Jeobá gíʼthúu̱n rí manindxu̱lú kaʼwáanʼ (atraxnuu 1 Pedro 1:15, 16). Ikha jngó nuʼni mba̱a̱ i̱ndó ikhaa ga̱jma̱a̱ nuʼnimbulúʼ kuʼyáá ga̱jma̱a̱ xúgíʼ a̱jkiu̱lú. Asndu índo̱ nuxkulú, nuʼnimi̱jna̱ makuwáanʼ xó má eʼsngúlú Jeobá. Índo̱ nuʼnimbulúʼ xtángoo ndrígóo, nuxnáá gamajkhu mbiʼyuu (Mat. 5:14-16). Ma̱ngaa, nusngajmá rí xtángoo ndrígóo nindxu̱u̱ májánʼ ga̱jma̱a̱ rí Gixa̱a̱ nindxu̱u̱ minduwaʼ. Gajkhun má, nakiéʼkulú numuu rí ñajunlú xa̱bu̱ aʼkhá. Mú natanga̱a̱ a̱jkiu̱lú ga̱jma̱a̱ nuʼnimi̱jna̱ xúʼni̱ xúgíʼ rí maʼni gachúu mbiʼyuu Jeobá (Sal. 79:9).
ijwbv 3 kutriga̱ 4, 5
Romanos 10:13 | “Xúgíinʼ bi̱ gúgriga̱a̱ mbiʼyuu Jeobá makáwíin”
Índo̱ náa Biblia naʼthí xúgíinʼ bi̱ gúgriga̱a̱ mbiʼyuu Jeobá makáwíin, raʼkháa i̱ndó nandoo gáʼthúu̱n dí mbuʼyáá ndiéjunʼ mbiʼyuu Dios ga̱jma̱a̱ dí majmulúʼ índo̱ nduʼyamajkuíí (Salmo 116:12-14). Ma̱ngaa nandoo gáʼthúu̱n dí makumulúʼ kuʼyáá Dios ga̱jma̱a̱ muʼtháán má xúʼko̱ dí mambáyulúʼ (Salmo 20:7; 99:6).
Jesucristo ndiʼyoo dí mbiʼyuu Dios gíʼdoo wéñuuʼ numuu. Ajngáa dí nijmuu náa xkri̱da dí xóo gíʼmaa muʼtájkáan nindxu̱u̱ rígi̱: “Anu̱xu bi̱ xtaa mekhuíí, kaʼwu gáʼni mbiʼyaaʼ”, o gaguma kaʼwii (Mateo 6:9). Jesús ma̱ngaa niʼsngáa dí á mu nandulúʼ makuwáánʼ kámuu mbiʼi, gíʼmaa muniʼníiʼ, muʼnimbulúʼ ga̱jma̱a̱ maʼndulúʼ kuʼyáá bi̱ nayéjkha mbiʼyuu (Juan 17:3, 6, 26).
Guʼyáʼ rí gíʼdoo numuu
it-2 127 kutriga̱ 5, 6
José
Nuni̱ dí magiʼdoo numuu mbiʼyuu José. Numuu dí José nigiʼdoo numuu náa eji̱i̱n Jacob, ikha jngó dí májánʼ nindxu̱u̱ dí najmún mbaʼa nuthu índo̱ nuthi ga̱jma̱a̱ numuu xúgíiʼ xuajin chíʼgíiʼ ndrígóo Israel (Sl 80:1) o bi̱ nikúwá náa reino ndrígóo norte. (Sl 78:67; Am 5:6, 15; 6:6.) Ma̱ngaa mbiʼyuu nijmaa náa naʼthí náa nijuiʼtáriyaʼ dí marigá nda̱wa̱á. Náa mbá dí niwasngájmáá Ezequiel, na̱ʼkha̱ raʼthí dí a̱jma̱ nuthu kaʼyoo magruigú José dí kaʼyoo makhánáá (Eze 47:13), náa mbá xkrugua ndrígóo xuajin dí mbiʼyuu “Jeobá Mínaaʼ Xtáa Ikhí” gíʼdoo mbiʼyuu José (Eze 48:32, 35) ma̱ngaa índo̱ na̱ʼkha̱ raʼthí ga̱jma̱a̱ numuu dí mbuwa̱a̱ xuajñuu Jeobá, na̱ʼkha̱ raʼthí ga̱jma̱a̱ numuu José xóo bi̱ kayá edxu̱u̱ náa mbá tapha xuajin mba̱a̱ ga̱jma̱a̱ náa Judá ma̱ngaa xóo bi̱ kayá edxu̱u̱ náa i̱mba̱. (Eze 37:15-26.) Náa kiʼtáriyaʼ dí niʼthí Abdías naʼthí dí “goʼwóo José” manidxu̱u̱ mbáa bi̱ maʼnigámbáa “goʼwóo Esaú” (Abd 18), ga̱jma̱a̱ náa niʼnirámáʼ Zacarías naʼthí dí Jeobá maʼnikríyaaʼ “goʼwóo José”. (Zac 10:6.) Náa xuajin chíʼgíiʼ ndrígóo Israel dí rígá mekhuíí, najmaa mbiʼyuu José raʼkháa Efraín. (Rev 7:8.)
Ma̱ngaa índo̱ naʼthí ga̱jma̱a̱ numuu xuajin chíʼgíiʼ ndrígóo José náa Apocalipsis 7:8 naʼni makru̱ʼu̱lú dí niʼtáriyaʼ Jacob índo̱ inu makhañúu nindoo gáʼthí ga̱jma̱a̱ numuu Israel ndrígóo Dios. Mú ma̱ngaa nandoo nduʼyáá dí Jeobá Dios ndrígóo Jacob, niʼni dí ma̱ʼkha̱ Jesucristo bi̱ nindxu̱u̱ Baxtúu bi̱ Májáanʼ dí nixnájximinaʼ ga̱jma̱a̱ numún “mugu̱”. (Jn 10:11-16.) Jesús nindxu̱u̱ xóo itsí dí itháan gíʼdoo numuu náa grígu templo ndrígóo Dios náa kúwá israelitas bi̱ mutañajunʼ náa mekhuíí gajmiún ikhaa. (Ef 2:20-22; 1Pe 2:4-6.) Baxtúu ga̱jma̱a̱ itsí bugi̱ xtáa ga̱jma̱a̱ Dios bi̱ gíʼdoo xúgíʼ tsiaki̱i̱. (Jn 1:1-3; Hch 7:56; Heb 10:12; atayáá ma̱ngaa Gé 49:24, 25.)
9-15 SEPTIEMBRE
GÍʼDOO NUMUU RÍ NA̱ʼKHA̱ NÁA BIBLIA SALMOS 82-84
Gangajuaaʼ ñajunʼ rí nikhánaaʼ
wp16.6 8 kutriga̱ 2, 3
Ndiéjunʼ ejmañulúʼ ga̱jma̱a̱ numún ñu̱ʼu̱ rá.
Xa̱bu̱ bi̱ kúwá náa Jerusalén nuniʼnuun míjiánʼ golondrina, numuu dí nuni̱ xújúnʼ náa agoo tsu̱du̱u̱ guʼwá. Asndu náa templo ndrígóo Salomón nini xújúnʼ golondrina. Mámbá tsiguʼ nuni̱ makúwá ejñún ikhí.
Bi̱ niʼnirámáʼ Salmo 84, bi̱ na̱ʼkha̱ náa e̱ji̱i̱n Coré, ndiʼyoo xájánʼ dí rígá náa templo. Ikhaa na̱jkha̱ ikhí mbá xmáná mámbá majun igu̱nʼ , mú ikhaa nindoo mani̱ndxu̱u̱ xóo golondrina bi̱ nandoo naxtáa mbayuuʼ náa goʼwóo Dios. Ikhaa niʼthí: “¡Ra̱ʼkhá tháán mitsaanʼ guʼwá xtíin ndrígáaʼ ikháán Jeobá bi̱ naratáñajúúnʼ ángeles! Asndu tsímáá xtáá índo̱ narmáʼáan a̱jkiu̱nʼ eʼni rexo̱o̱ guʼwáaʼ Jeobá. [...] Asndu ñu̱ʼu̱ na̱jkha̱ gáxtáa náa guʼwáaʼ ga̱jma̱a̱ ñu̱ʼu̱ golondrina naʼni xújúunʼ náa mañewu̱u̱n e̱ji̱i̱n náa mijngii altar ndrígáaʼ ikháán Jeobá bi̱ naʼtáñajúúnʼ ángeles. ¡Bi̱ nindxa̱a̱ʼ Rey ndrígóʼ ga̱jma̱a̱ Dios ndrígóʼ!” (Salmo 84:1-3). Xú káʼnii eʼyáá ikháanʼ gajmiúlú ejñulúʼ rá. Nandulúʼ muwáánʼ xúgíʼ mbiʼi gajmiúlú xuajñuu Dios ga̱jma̱a̱ nduʼyáá dí gíʼdoo numuu ráʼ. (Salmo 26:8, 12.)
w08 15/7 30 kutriga̱ 3, 4
Nakuwáánʼ gagi índo̱ nuʼni dí naʼngulú
Mbáa ga̱jma̱a̱ numuu dí waniáánʼ o guaʼdáá mbá nandii dí tséniñulú muʼni káxi̱ ñajunʼ Jeobá. O mbáa xtaʼdiin eji̱n majkiin, mbáa nakumaaʼ dí tséʼngo̱o̱ matanigajma̱a̱ mbáwi̱i̱n o dí mataʼgíʼ májánʼ edxa̱a̱ʼ náa reunión ga̱jma̱a̱ numuu mbiʼi ga̱jma̱a̱ tsiaki̱i̱ dí ndañúunʼ ejña̱a̱nʼ. Mú, lá raʼkháa i̱ndó rúʼko̱ tatsaʼwamínaʼ dí asndu nguáná nambumaa ndiéjunʼ dí ma̱ndoo xóó matani ráʼ.
Xúʼko̱ kayuuʼ nigíʼnuu mbáa levita bi̱ nixtáa náa Israel. Maski ajndu nindoo mañajunʼ a̱jma̱ xmáná mámbá tsiguʼ náa templo, ikhaa nindoo maxtáa má xúʼko̱ náa inuu altar xúgíʼ mbiʼi, mbá dí ninindxu̱u̱ májánʼ dí nindoo mú na̱nguá kaʼnii maʼnimbánuu (Sal. 84:1-3). Ndiéjunʼ nimbáyúu levita bugi̱ mu xáxtáa ngíná rá. Dí maʼga̱nú makro̱ʼo̱o̱ dí asndu káaʼ mbóó mbiʼi náa rexo̱o̱ templo nindxu̱u̱ mbá privilegio dí tsémbríguíi ga̱jma̱a̱ nimbá (Sal. 84:4, 5, 10). Xúʼko̱ má kayuuʼ, ikháanʼlú ma̱ngaa gíʼmaa mbuʼyáá dí gíʼdoo wéñuuʼ numuu ñajunʼ dí naʼngo̱o̱ nuʼni, raʼkháa dí mundxaʼwamíjna̱ dí ni xáʼngulú guʼni.
Jeobá ndaʼyoo rí xtaʼdáá numaaʼ
12 Á mu naʼniulú mbá nandii, ma̱ndoo makuwáánʼ gajkhun rí Jeobá ndaʼyoo rí kuwáanʼ rugíʼníi. Guʼtákáñíí mu mambáyulúʼ mu xúʼko̱ ma̱ndoo makumulúʼ i̱mba̱ nuthu. Guraxnuu Biblia numuu rí ikhí ma̱ndoo muxkamaa Ajngóo Dios rí mambáyulúʼ. Gundxaʼwamíjna̱ náa naʼthí rí Dios ndaʼyoo rí guaʼdáá numún xa̱bi̱i̱. Índo̱ gúʼni̱ rígi̱, mbuʼyáá rí májánʼ a̱jkiu̱u̱n gajmíi̱n xúgíinʼ bi̱ nuni̱ ñajuunʼ ikhaa (Sal. 84:11).
Guʼyáʼ rí gíʼdoo numuu
it-1 1183 kutriga̱ 1, 2
E̱jín dxuáʼa bi̱ ndawaá anu̱ún
Nguáná e̱jín dxuáʼa numíniiʼ ga̱jma̱a̱ nánguá xóo mumbayumíjná, ikhaa jngóo Jeobá nijmuu ajngáa “e̱jín dxuáʼa” mu maʼthí ga̱jma̱a̱ numuu Israel índo̱ nuni̱ tsíngumíjná náa Ikhaa. Índo̱ israelita nambáxu̱u̱n májánʼ gajmiún Jeobá, nuñewu̱u̱n májánʼ e̱jín dxuáʼa; mú índo̱ nánguá enii dí jmbu, nambumún kuñún, ga̱jma̱a̱ xúʼko̱ enii náa xúgíʼ xuajin. (Sl 82:3; 94:6; Isa 1:17, 23; Jer 7:5-7; 22:3; Eze 22:7; Zac 7:9-11; Mal 3:5.) Dí ra̱májánʼ dí Jeobá naʼthí marigá na̱jkha̱ inún bi̱ nuni̱ gíníi e̱jín dxuáʼa. (Dt 27:19; Isa 10:1, 2.) Jeobá naʼthí dí ikhaa Naʼnikáwíin (Pr 23:10, 11), Nambañún (Sl 10:14). Ga̱jma̱a̱ nindxu̱u̱ xóo Anu̱ún (Sl 68:5). Ikhaa naʼthí ndiéjunʼ gaguaʼníí bi̱ nunigíníi (Dt 10:17, 18), nagáwi̱i̱n a̱jkiu̱u̱n kaʼñún (Os 14:3), naʼni maʼni̱i̱ a̱jkiu̱ún (Sl 146:9) ga̱jma̱a̱ naʼni dí makuwá má xúʼko̱. (Jer 49:11.)
Mbá dí xóo nakujmiin tsíin nindxu̱ún cristianos bi̱ gajkhun nindxu̱u̱ dí nagáwi̱i̱n a̱jkiu̱ún kuñún ga̱jma̱a̱ numbañún e̱jín dxuáʼa o bi̱ nindxu̱ún gu̱ʼú xuáʼa̱. Santiago niʼnirámáʼ náa inún cristianos: “Gamajkhu dí mikaʼwu rí na̱nguá nindxu̱u̱ mitsaga náa iduu Anu̱lú Dios nindxu̱u̱ rígi̱: Dí muñewu̱u̱n e̱jín dxuáʼa ga̱jma̱a̱ gu̱ʼú xuáʼa̱ náa rí ikhiin numíniiʼ ma̱ngaa dí xúʼni gachímíjná ga̱jma̱a̱ dí rígá náa numbaaʼ”. (Snt 1:27.)
16-22 SEPTIEMBRE
GÍʼDOO NUMUU RÍ NA̱ʼKHA̱ NÁA BIBLIA SALMOS 85-87
Rí muʼtájkáan nambáyulú mu muguajún jmbu
w12 15/5 25 kutriga̱ 10
Natasngájma ikháán aguʼ rí naxpíbiʼ ndrígóo Jeobá rá.
10 Mu ma̱ndoo musngajmá aguʼ rí naxpíbiʼ ndrígóo Dios, gíʼma muʼnimbánii ajngáa dí naʼthí náa Biblia rígi̱: “Xuniʼñáánʼ rutajkáanʼla” (Rom. 12:12). Ndayóoʼ ga̱jma̱a̱ gíʼma dí munda̱ʼa̱a̱ Jeobá mambáyulúʼ mbuyamajkuíí xóo nandoo ikhaa. Májánʼ gánindxu̱u̱ á mu nuʼtháán dí maxnúlú xi̱ʼ kaʼwu ndrígóo, mbá fe gujkhuʼ, tsiaki̱i̱ mu muraʼni tsáʼkhá ga̱jma̱a̱ mu majmañulú majmulú “ajngá rawuunʼ Dios xó má gíʼmaa” (2 Tim. 2:15; Mat. 6:13; Luc. 11:13; 17:5). Gíʼma makumulúʼ kuʼyáá Dios ndrígúlú xóo eʼni mbáa ada̱ bi̱ naku̱mu̱u̱ kaʼyoo anu̱u̱. Índo̱ nunda̱ʼa̱a̱ rí mambáyulúʼ mú muʼni ñajuunʼ kájxi̱, guʼyáá gajkhun dí ikhaa maʼdxawuun. Ga̱jma̱a̱ xúndxaʼwamíjna rí á mu nuʼtháán maʼni xkájkiu̱u̱n. Ma̱ndoo muʼtákáñii mu muʼni mba̱a̱, mu muxnáá núma̱aʼ ga̱jma̱a̱ mu maxnúlú ikha mu maʼngulú náa xkujndu ndrígúluʼ. Ma̱ngaa ma̱ndoo muʼthán mambáyulúʼ mu muʼni mba̱a̱ ga̱jma̱a̱ numuu ñajunʼ ndrígúluʼ (Sal. 86:12; Sant. 1:5-7).
Xú káʼnii eriʼña̱a̱ Jeobá rí nuʼtákáñíí rá.
17 (Atraxnuu Salmo 86:6, 7). David ndiʼyoo gajkhun rí Jeobá niʼdxawuun ga̱jma̱a̱ nariʼña̱a̱ rí niʼtájkáan. Ikháán mangáán ma̱ndoo ma̱ta̱ya̱a̱ dí gajkhun nindxu̱u̱ ajngáa rígi̱. Xkri̱da rí ndiʼyáá náa artículo rígi̱ nasngájmulú rí Jeobá maxnúlú ku̱ma̱ ga̱jma̱a̱ tsiaki̱i̱ rí ndayúlú mu maʼngulú, xó má ndiʼyáá dí ikhaa ma̱ndoo majmiuu a̱ngiu̱lú bi̱ kúwíin náa xuajñuu o eʼwíinʼ xa̱bu̱ bi̱ na̱nguá eyamajkuíí mu mumbayúlú.
18 Nduʼyáá rí Jeobá gajkhun mariʼña̱a̱ rí nuʼtájkáan maski ajndu nguáná ikhaa xáriʼñulú xó má ikháánʼ eyulú. Ikhaa maxnúlú rí ndayúlú mbiʼi dí gáʼyulúʼ. Ikha jngóo índo̱ guʼtajkháan guguaʼdáá fe rí Jeobá mañewu̱nlú xúgi̱ ga̱jma̱a̱ dí náa numbaaʼ nuxi̱ʼ “maxnún rí nda̱ñúunʼ xúgíinʼ bi̱ kúwá nduya” (Sal. 145:16).
Guʼyáʼ rí gíʼdoo numuu
it-1 551 kutriga̱ 5
A̱jkia̱a̱nʼ
Matani̱ ñajuunʼ ga̱jma̱a̱ mbá “kañiʼ a̱jkia̱a̱nʼ”. A̱jkiu̱lú dí kuaʼdáá gíʼmaa mani̱ndxu̱u̱ kañiiʼ mu xúʼko̱ mañajunʼ májánʼ, mú xóo nindxu̱lú awúnʼ ma̱ndoo maʼni a̱jma̱ a̱jkiu̱lú. David nindo̱ʼo̱o̱ Jeobá: “Atani rí maʼni mbóó a̱jkiu̱nʼ mu mamiñúʼ ka̱yo̱o̱ mbiʼyaaʼ”, rígi̱ nasngájmulú dí ma̱ndoo maʼni a̱jma̱ a̱jkiu̱lú ga̱jma̱a̱ xóo kumulúʼ ga̱jma̱a̱ dí namiñulu (Sl 86:11). Mbáa xa̱bu̱ ma̱ndoo maʼni “a̱jma̱ a̱jkiu̱u̱n”, rígi̱ gáʼni dí xáʼdxuu wéñuuʼ índo̱ gaʼni ñajuunʼ Dios (Sl 119:113; Rev 3:16). Mbáa ma̱ndoo muguáʼdáá mbóoʼ a̱jkiu̱lú dí magiʼdoo “a̱jma̱ inuu” (xóo muʼthá, “mbóoʼ a̱jkiu̱lú ga̱jma̱a̱ mbóoʼ a̱jkiu̱lú”) dí muʼgímíjna̱ muʼni ñajuunʼ mbá najmiin, o muʼthá dí nduwaʼ ga̱jma̱a̱ i̱mba̱ dí endxaʼwamíjna̱ (1Cr 12:33; Sl 12:2, nota). Ikha jngóo Jesús niʼthí mbájmbu ga̱jma̱a̱ numuu rígi̱ (Mt 15:7, 8).
23-29 SEPTIEMBRE
GÍʼDOO NUMUU RÍ NA̱ʼKHA̱ NÁA BIBLIA SALMOS 88, 89
Xóo rí naʼtáñajunʼ Jeobá nindxu̱u̱ itháan májánʼ
Gusngajmá rí Jeobá kaʼyoo maʼtáñajunʼ
5 Rígá i̱mba̱ numuu rí Jeobá kaʼyoo maʼtáñajunʼ: Ikhaa naʼtáñajunʼ ga̱jma̱a̱ jmbu kájxi̱. Ikhaa mínaʼ eʼthí: “Ikhúúnʼ ni̱ndxu̱ʼ Jeobá, Bi̱ tsétumuu ngajua ndrígóo, rí jmbu ga̱jma̱a̱ bi̱ naʼtáñajunʼ májánʼ náa ku̱ba̱ʼ; numuu dí rígi̱ naniguʼ wéñuuʼ” (Jer. 9:24). Náa ikhaa e̱ʼkha̱ rí jmbu. Tséyóoʼ mbayáaʼ nimbá xtángoo rí nini xa̱bu̱ aʼkhá mu maraʼwíí rí nindxu̱u̱ jmbu. Ga̱jma̱a̱ xtángoo rí kiʼniraʼmáʼ rí nixnúún xa̱bu̱ na̱ʼkha̱ náa rí jmbu káxi̱ ndrígóo. Náa Biblia naʼthí: “Rí jmbu ga̱jma̱a̱ rí májánʼ rígá náa naratá ñájunʼ ikháán [Jeobá]”. Ikha jngó nduʼyáá gajkhun rí xúgíʼ xtángoo ndrígóo, ikha ga̱jma̱a̱ rí naraʼwíí maʼni nindxu̱u̱ jmbu (Sal. 89:14; 119:128). Mú, Gixa̱a̱ naʼthí dí ra̱májánʼ eʼtáñajunʼ Jeobá, mú ikhaa tséʼngo̱o̱ gáʼni rí náa numbaaʼ marigá má xúʼko̱ dí jmbu.
Gusngajmá rí Jeobá kaʼyoo maʼtáñajunʼ
10 Jeobá na̱nguá nindxu̱u̱ mbáa Xa̱bu̱ Ñajunʼ bi̱ naʼniún xa̱bu̱ xó má eyoo ikhaa ga̱jma̱a̱ na̱nguá gujkhuʼ a̱jkiu̱u̱n. Xa̱bu̱ bi̱ naʼtáñajúnʼ Jeobá na̱nguá ni̱ndxu̱ún ñumbáá ga̱jma̱a̱ nakuwa gagi (2 Cor. 3:17). David niʼthí ajngáa rígi̱: “Náa inuu rígá gamajkhu ga̱jma̱a̱ naxpíbiʼ, náa xtáa [Jeobá] rígá tsiaki̱i̱ ga̱jma̱a̱ gagi” (1 Crón. 16:7, 27). Ga̱jma̱a̱ mbáa salmista bi̱ nigumbiʼyuu Etán niʼthí: “Tsímáá kúwá xa̱bu̱ bi̱ nuniʼnúuʼ gitsawaskha gagi. Tátá Jeobá, jngruigu̱u̱n náa agiuʼ inaʼ. Náa mbiʼyaaʼ makuwá gagi xúgíʼ mbiʼi, ga̱jma̱a̱ náa rí jmbu matayamajkhún” (Sal. 89:15, 16).
11 Á mu nundxaʼwamíjna̱ itháan rí Jeobá májánʼ a̱jkiu̱u̱n, mbuʼyáá gajkhun rí ikhaa naʼtáñajunʼ itháán májánʼ. Makumulúʼ xóo salmista bi̱ niʼthí: “Mbóo mbiʼi náa rexa̱a̱ʼ nindxu̱u̱ itháan májánʼ ki xóo mbá mil i̱mba̱ níʼkhá” (Sal. 84:10). Nda̱a̱ imbo̱ʼ xóo rí ma̱ndoo maʼni. Jeobá niʼniáanʼ, ikha jngó ndaʼyoo ndiéjunʼ eyúlú mu makuwáanʼ gagi ga̱jma̱a̱ naxnúlú ga̱jma̱a̱ xúgíʼ a̱jkiu̱u̱n. Asndu káʼníí má rí gándu̱ʼu̱lú nindxu̱u̱ rí mambáyulúʼ ga̱jma̱a̱ rí muʼnimbulúʼ maʼni rí makuwáanʼ tsímáá, maski ajndu maʼniulú gakhi̱i̱ muʼni tikhuu (atraxnuu Isaías 48:17).
w14 15/10 10 kutriga̱ 14
Araʼdáá káxi̱ fe náa Reino
14 Nuʼthálú ga̱jma̱a̱ numuu rí nimbánuu ga̱jma̱a̱ David (atraxnuu 2 Samuel 7:12, 16). Ga̱jma̱a̱ numuu rí nimbánuu rúʼko̱, Jeobá niʼthúu̱n rey buʼko̱ bi̱ na̱ʼkha̱ náa Israel rí Mesías ma̱ʼkha̱ náa ikha (Luc. 1:30-33). Xúʼko̱ nasngájma kaʼwu náa ga̱ʼkha̱ bi̱ mani̱ndxu̱u̱ rey. Niʼni rí mbáa bi̱ na̱ʼkha̱ náa David magiʼdoo xílí rí maʼtáñajunʼ náa Reino mesiánico (Ezeq. 21:25-27). Ga̱jma̱a̱ numuu Jesús, rí niʼtáñajunʼ David ‹mbajyúuʼ asndu kámuu mbiʼi›. Rúʼko̱ nirígá, ‹bi̱ na̱ʼkha̱ náa ikhaa maxtáa asndu kámuu mbiʼi, ga̱jma̱a̱ xílí ndrígóo mbajyúuʼ xó má a̱jkha̱ʼ› (Sal. 89:34-37). Índo̱ gáʼthá ñajunʼ Mesías nditháan xarigá dí ra̱májánʼ, ga̱jma̱a̱ xúgíʼ rí gaʼni mbajyúuʼ kámuu mbiʼi.
Guʼyáʼ rí gíʼdoo numuu
cl 281 kutriga̱ 4, 5
“I̱ndó ikháán nindxa̱a̱ʼ jmbii”
4 Náa Escrituras Hebreas ajngáa xa̱bu̱ jmbii nandoo gaʼthí índo̱ mbáa nasngájma rí májáanʼ a̱jkiu̱u̱n náa imba̱a̱ xa̱bu̱ numuu rí nandoo kaʼyoo ga̱jma̱a̱ naxtáa náa níjniúu. Rígi̱ raʼkháa índo̱ nandoo gáʼthí rí mani̱ndxa̱a̱ʼ mbáa xa̱bu̱ bi̱ ma̱ndoo maku̱mu̱ún kuyáá. Mbáa xa̱bu̱ ma̱ndoo maku̱mu̱ún kuyáá índo̱ numuu dí nandoo maʼnimbánuu rí naʼthí. Mú, náa Biblia naʼthí dí mani̱ndxa̱a̱ʼ xa̱bu̱ jmbii, na̱ʼkha̱a̱ náa ngajua. Mbá xkri̱da, Salmo 89:37 naʼthí rí Gu̱nʼ nindxu̱u̱ mbáa “testigo jmbii náa mekhuíí”, numuu rí xúgíʼ mbruʼun xtáa ikhí. Mú, xándoo muʼthá rí nindxu̱u̱ jmbii. Náá numuu rá. Numuu dí mani̱ndxa̱a̱ʼ xa̱bu̱ jmbii nindxu̱u̱ rí matasnga̱jmá ngajua, ga̱jma̱a̱ rí tséʼya na̱nguá gíʼdoo ngajua.
5 Índo̱ náa Biblia naʼthí, rí mani̱ndxa̱a̱ʼ xa̱bu̱ jmbii, nandoo gáʼthúún rí matasnga̱jmá ngajua náa i̱mba̱a̱ xa̱bu̱. Rígi̱ na̱nguá nindxu̱u̱ xóo olas ndrígóo lamáa, dí na̱ʼkha̱ ga̱jma̱a̱ najkha̱a̱. Rí mani̱ndxa̱a̱ʼ xa̱bu̱ jmbii o rí matasnga̱jmá ngajua rí tsétumuu, naʼngo̱o̱ nawi̱ji̱ gujkhuʼ índo̱ naraʼnuu mbá gamiéjunʼ rí ra̱ʼkhá tháán mingíjyúuʼ.
30 SEPTIEMBRE ASNDU 6 OCTUBRE
GÍʼDOO NUMUU RÍ NA̱ʼKHA̱ NÁA BIBLIA SALMOS 90, 91
Gakuma̱a̱ʼ xtayáá Jeobá mu maraxtaa itháán mbayuuʼ
wp19.3 5 kutriga̱ 3-5
Nunimíjna̱ muxkamaa rí makuwá mba̱yu̱u̱ʼ
Raʼkháa xúgínʼ científicos nuthi, rí maʼngo̱o̱ mbá thana mambayúlú mu xáganiáanʼ ga̱jma̱a̱ rí makuwáanʼ itháan mba̱yu̱u̱ʼ. Tikhuun xa̱bu̱ bi̱ nunigajmaa numuu ADN nuthi rí mbiʼi rí naʼngo̱o̱ nakuwáanʼ xúgi̱, nindxu̱u̱ xó má kaʼyoo. Ga̱jma̱a̱ rí xúgi̱ naʼngo̱o̱ nakuwáanʼ itháan mba̱yu̱u̱ʼ ki xóo nákha tsíguʼ 1900, naʼngo̱o̱ narígá rígi̱ numuu rí xa̱bu̱ nakúwá itháan kaʼwu, ga̱jma̱a̱ nunimíjna̱ rí xáʼgaroʼoo nandii, ma̱ngaa rí xúgi̱ rígá antibióticos ga̱jma̱a̱ vacunas.
Naʼni xóo mbá tres mil quinientos tsiguʼ, nixtáa mbáa xa̱bu̱ bi̱ niʼnirámáʼ Biblia bi̱ nigumbiʼyuu Moisés, ikhaa niʼthí: “Rí makuwáanʼ nindxu̱u̱ 70 tsiguʼ, ga̱jma̱a̱ á mu mbáa gíʼdoo wéñuuʼ tsiaki̱i̱ maxtáa mbá 80 tsiguʼ. Mú nuraʼníí gamiéjunʼ ga̱jma̱a̱ gaʼkhu, ga̱jma̱a̱ nacha̱ enújngoo xúgíʼ ga̱jma̱a̱ ni ndawáanʼ” (Salmo 90:10). Maski ajndu xa̱bu̱ ndi̱ya̱ʼ rí mambayúlú mu makuwáanʼ itháan mba̱yu̱u̱ʼ, mú táʼngu̱u̱n guxkamaa nimbá, numuu rí xúgi̱ nakuwáanʼ ikháá má tsiguʼ xóo rí niʼthí Moisés.
Mú kúwá tikhuun xujkhúʼ bi̱ naʼngu̱u̱n nakuwa mba̱yu̱u̱ʼ, xóo gu̱ʼtsi̱, ikhaa naʼngo̱o̱ naxtáa itháan rí 100 tsiguʼ. Ga̱jma̱a̱ rígá ixi̱ rí ndajyúuʼ mbayuuʼ tsiguʼ. Índo̱ nduʼyáá rígi̱ naʼni rí muraximíjna̱: “Á mu rígá ixi̱ ga̱jma̱a̱ kúwá xujkhúʼ bi̱ naʼngu̱u̱n nakuwa mbayuuʼ tsiguʼ, náá numuu rí ikháanʼ tséʼngulú gakuwáanʼ mba̱yu̱u̱ʼ rá.”
wp19.1 5, kúgumaʼá
Xú káʼnii mbiʼyuu Dios rá
Mbaʼin xa̱bu̱ nuni̱ grajxe̱ xóo rúʼko̱, mbáa asndu ma̱ngaa nitraximínáʼ. Á mu náa numbaaʼ ga̱jma̱a̱ xúgíʼ dí nirígá xtáa tsáa niʼnii, xú káʼnii ni̱jkha̱nú nixtáa Dios rá.
Mbaʼin científicos nakumu̱ún dí rígá náa nigi̱ʼdu̱u̱ numbaaʼ. Xóo ku̱ma̱ rígi̱ nambánii ga̱jma̱a̱ náa timbá versículo ndrígóo Biblia náa naʼthí: “Nákha ginii Dios niʼni mekhu ga̱jma̱a̱ ku̱ba̱ʼ” (Génesis 1:1).
Xúgíinʼ a̱ʼgua̱a̱n ga̱jma̱a̱ numbaaʼ (xóo muʼthá xúgíʼ) na̱nguá xóo marigá i̱ndó ikhaa. Mú marigá mbáa ndayóoʼ rí maxtáa mbáa bi̱ maʼni. Á mu ndáwáa tsáa niʼniáanʼlú, xárígá numbaaʼ ga̱jma̱a̱ xakuwáanʼlú. Xúʼko̱, á mu tárígá náa nigi̱ʼdu̱u̱, xúʼko̱ má ma̱ngaa xarigá náa mambáa. ¡Ikha jngóo gíʼmaa rí maxtáa tsáa niʼniáanʼlú! Ikhaa gíʼdoo tsiaki̱i̱, ga̱jma̱a̱ mbiʼyuu nindxu̱u̱ Jeobá (Juan 4:24).
Náa Biblia naʼthí ga̱jma̱a̱ numuu Dios: “Asndu nákha xóó tsiguma kúbá, o ga̱jma̱a̱ nákha xóó tséguma ku̱ba̱ʼ náa najuiʼdu ga̱jma̱a̱ numbaaʼ, ikháánʼ xtaa asndu nákha wajyúúʼ ga̱jma̱a̱ ikháánʼ má gáraxtaa asndu kámuu mbiʼi numuu rí ikháánʼ ni̱ndxa̱ʼ Dios” (Salmo 90:2). Ikha jngóo, Dios xtáa má xúʼko̱. Ikhaa nindxu̱u̱ bi̱ niʼni numbaaʼ, “nákha ginii” (Revelación [Apocalipsis] 4:11).
Ngajua ndrígóo Jeobá nambáyulú mu xámiñulúʼ
16 Gixa̱a̱ ndaʼyoo dí nduʼyamajkuíí rí makuwáanʼ. Ikha jngóo ikhaa naʼthí dí mu̱ʼni̱ asndu ndiéjunʼ má, mú mu̱ʼni̱ kawumíjna̱, asndu dí muniʼñááʼ rambáxulú gajmiúlú Jeobá (Job 2:4, 5). ¡Mú dí naʼthí nindxu̱u̱ minduwaʼ! Numuu dí ikhaa “ma̱ngoo maʼni rí makhañúlúʼ”, ikha jngóo najmuu dí namíñulú mu xúʼko̱ xúguajun jmbu náa Jeobá (Heb. 2:14, 15). Nguáná, Gixa̱a̱ najmiuu xa̱bu̱ mu xúʼko̱ munimiñúlú, muthulú dí á mu tseniʼñáán ru̱ʼni̱ ñajuunʼ Jeobá muradiáanʼlú ma̱ngaa najmuu dí nandoo kháñulúʼ mú xúʼko̱ xúguajun jmbu náa Jeobá. Nguáná médico o bi̱ kuʼñúún bi̱ na̱nguá ni̱ndxu̱ún Testigo nutsudánʼlú muta̱ʼa̱áʼ eʼdi, rúʼko̱ nindxu̱u̱ mbá dí nanújngorámuʼ xtángoo. O muthulú dí mutha̱ʼa̱áʼ i̱ʼwáʼ thana dí nanújngorámuuʼ ikha dí na̱ʼkha̱ náa Biblia.
17 Gajkhun má nimbáa dí ikháanʼ tsíyoo makhañúu, mú nduʼyáá dí á mu nakháñulú Jeobá ma̱ndoo kaʼyulú má xúʼko̱ (atraxnuu Romanos 8:37-39). Índo̱ nakháñún bi̱ nambájxu̱u̱ gajmíi̱n Jeobá, ikhaa narmáʼáan a̱jkiu̱u̱n kaʼñún má xúʼko̱ asndu xóo káʼníí kúwá ruya (Luc. 20:37, 38). Ikhaa nandoo maʼni ga̱bi̱ín (Job 14:15). Jeobá asndu nixnajxíi a̱ʼdióo mu makhañúu mu xúʼko̱ makuwáánʼlú kámuu mbiʼi (Juan 3:16). Nduʼyáá gajkhun nguáthá e̱ndoo kaʼyulú ga̱jma̱a̱ nañewu̱nlú. Ikha jngóo, índo̱ nandoo khañunlú o nutulúʼ dí muradiáánʼ, tséniʼñáánʼlú. Rí phú nu̱ʼni̱ nuʼtháán ikhaa mu maʼni̱i̱ a̱jkiu̱lú, maxnúlú ku̱ma̱ ga̱jma̱a̱ tsiakii. Rúʼko̱ dí niʼni Valeria ga̱jma̱a̱ ajmbio̱o̱ (Sal. 41:3).
Guʼyáʼ rí gíʼdoo numuu
wp17.5 5
Lá kuaʼdaa mbáa ángel bi̱ nañewu̱nlú rá.
Náa Biblia tséʼthí á mu mámbáa dí ikháánʼ kuaʼdaa mbáa ángel bi̱ nañewu̱nlú. Gajkhun má rí Jesús niʼthí: “Á mu tsíyala gúya̱a̱ mbáa bi̱ itháan chíʼgíiʼ bugi̱ [xa̱bi̱i̱ Cristo]; numuu rí ángeles wájun má xúʼko̱ náa inuu Anu̱ʼ bi̱ xtáa mekhuíí” (Mateo 18:10). Mú raʼkháa rígi̱ eyoo gáʼthúu̱n dí mámbáa xa̱bu̱ gíʼdaa mbáa ángel bi̱ nañewu̱u̱n; Jesús nindoo gáʼthí rí ángeles naxmiéjúúnʼ kuñún xúgíinʼ cristianos. Ikhaa jngóo bi̱ gajkhun cristianos nuñewumíjna̱ náa dí gamíi, na̱nguá e̱ndxa̱ʼwa̱míjna̱ dí ángeles má guñewu̱u̱n.
Rúʼko̱ eyoo gáʼthúu̱n rí ángeles tsémba̱yulú rá. Na̱nguá (Salmo 91:11). Tikhuun xa̱bu̱ nuthi gajkhun rí Dios nijmiuu ángeles mu mañewu̱u̱n ga̱jma̱a̱ maxnún ikha, mbá xkri̱da Kenneth, bi̱ na̱ʼkha̱ raʼthí numuu náa timbá artículo. Gajkhun má xándoo muʼthá mbaaʼ muʼthá, mú mbáa ikhaa naʼthí rí gajkhun. Mbaʼa nuthu testigos de Jeobá nakumu̱ún rí mbáa ángel nambáñúún náa nutaraʼa. Mú, numuu rí ángeles tsékujmiin, xándoo muʼthá nguáná ejmiuu Dios mu mumbañún xa̱bu̱. Ma̱ngaa, na̱nguá má nindxu̱u̱ ra̱májánʼ rí muxnáa núma̱aʼ Dios á mu nakumulú rí ikhaa nimbáyulúʼ (Colosenses 3:15; Santiago 1:17, 18).
7-13 OCTUBRE
GÍʼDOO NUMUU RÍ NA̱ʼKHA̱ NÁA BIBLIA SALMOS 92-95
Nda̱a̱ imbooʼ rí itháán májánʼ ki xóo rí matani̱ ñajuunʼ Jeobá
Dxámá ga̱jma̱a̱ dxáʼgú, lá xtaa rataniminaʼ matani itháan ñajuunʼ Jeobá ráʼ.
5 Timbá numuu rí mataʼgíʼ matani ñajuunʼ Jeobá nindxu̱u̱ rí matasnga̱jmáá rí naraxnáa núma̱aʼ numuu rí nandoo kaʼyáaʼ ga̱jma̱a̱ xúgíʼ rí niʼni ga̱jma̱á numaaʼ. Mbáa xa̱bi̱i̱ Dios niʼnirámáʼ: “Májánʼ rí muxnáa núma̱aʼ Jeobá”. Ga̱jma̱a̱ xóó niʼthí: “Numuu rí nitani̱ maʼdxuʼ, oh Jeobá, ga̱jma̱a̱ numuu ñajunʼ ndrígáʼ; rí nitani̱ ga̱jma̱a̱ ñawáanʼ naʼni mandxa̱ʼwa̱ ga̱jma̱a̱ gagi” (Sal. 92:1, 4). Dxámá, atatsaʼwáminaʼ náa xúgíʼ rí Jeobá nixnáʼ: Vida, rí matatsiʼnííʼ ikhaa ga̱jma̱a̱ rí gajkhun, Biblia, congregación ga̱jma̱a̱ mbá rí májánʼ rí muguaʼthi̱i̱n nda̱wa̱á. Á mu natagíʼ matani̱ ginii ñajuunʼ Jeobá matasnga̱jmá rí naraxná núma̱aʼ, ga̱jma̱a̱ mambaxáʼ itháan májánʼ ga̱jma̱ʼ.
Tsáa eʼsngóo ku̱ma̱ ndrígúlú rá.
8 Jeobá nandoo kaʼñún e̱ji̱i̱n ga̱jma̱a̱ nandoo makuwá májánʼ (Is. 48:17, 18). Ikha jngó naxnúlú ikha rí itháan gíʼdoo numuu rí xóo gíʼmaa muʼni ga̱jma̱a̱ rí xú káʼnii gúʼniu̱u̱n xa̱bu̱ numbaaʼ. Náa tema xóo rígi̱, naʼthúlúʼ rí mundxaʼwamíjna̱ xóo ikhaa ga̱jma̱a̱ mbuʼyáá rí gíʼdoo numuu. Lá rúʼko̱ eyoo gáʼthúu̱n rí xáʼyóoʼ mundxaʼwamíjna̱ ikháanʼ rá. Na̱nguá, rí phú naʼni rí mundxaʼwamíjna̱ itháan májánʼ (Sal. 92:5; Prov. 2:1-5; Is. 55:9). Nambáyulúʼ mu muraʼwi̱i̱ rí maʼni makuwáanʼ gagi ga̱jma̱a̱ naniñulú muʼni rí nanigulúʼ (Sal. 1:2, 3). Gajkhun rí mundxaʼwáá edxu̱lúʼ xóo Jeobá nambáyulúʼ.
Jeobá ndaʼyoo rí xtaʼdáá numaaʼ
18 Índo̱ na̱jkha̱ raniáánʼ, ma̱ndoo mbuʼyáá gajkhun rí Jeobá kaʼníí gíʼdoo ñajunʼ rí mu̱ʼni̱ (Sal. 92:12-15). Jesús niʼsngáa rí Jeobá ndaʼyoo rí gíʼdoo wéñuʼ numuu ñajunʼ rí nu̱ʼni̱ maski ajndu chíʼgíiʼ eʼyáá ikháanʼlu (Luc. 21:2-4). Ikha jngó, guʼyáá náa kayáa maʼngulú mu̱ʼni̱. Mbá xkri̱da, ma̱ndoo muʼthá ga̱jma̱a̱ numuu Jeobá, muʼtájkáan ga̱jma̱a̱ numún a̱ngiu̱lú ma̱ngaa gúxnún tsiaki̱i̱ mu muguajún jmbu má xúʼko̱. Jeobá ndaʼyulú rí ni̱ndxu̱lú bi̱ numbáyíí raʼkháa rí naʼngulú nu̱ʼni̱, ikhaa ndaʼyoo rí kuwáanʼlu xawii mu muyambáá ga̱jma̱a̱ dí muʼnimbulúʼ kuʼyáá (1 Cor. 3:5-9).
Guʼyáʼ rí gíʼdoo numuu
cl 176 kutriga̱ 18
¡Ra̱ʼkhá tháán mba̱a̱ “ku̱ma̱ [...] ndrígóo Dios”!
18 Pablo niʼthí xóo eʼni makamuu ku̱ma̱ rí tsembríguii ndrígóo Jeobá: “¡Rí naʼni tsajkurámáanʼlu, rí najmañuu ga̱jma̱a̱ ku̱ma̱ ndrígóo Dios nindxu̱u̱ mba̱a̱ wéñuuʼ! ¡Rí naraʼwíí maʼni nimbáa tséʼngo̱o̱ gákro̱ʼo̱o̱ ga̱jma̱a̱ kambo̱o̱ nimbáa xáʼngo̱o̱ gáʼya!” (Romanos 11:33). Índo̱ niʼthí ajngáa “mba̱a̱ wéñuuʼ” nisngájma dí ra̱ʼkhá tháán niʼniuu tsiánguá. Ajngáa mba̱a̱ wéñuuʼ náa griego ma̱ngaa najuiʼtájuíi xóo “iñá mbiʼ”. Pablo niʼthí rí: Mundxa̱ʼwa̱míjna̱ náa ku̱ma̱ dí gíʼdoo Dios nindxu̱u̱ xóo muyéjxima̱ʼa̱n náa iñá mbiʼ dí ra̱ʼkhá tháán mi̱jnu̱ʼ, mú xáʼngulú guʼyáá nguáthá mi̱jnu̱ʼ. Ikha jngóo tséʼniuu má nguáthá mba̱a̱ tsiaki̱i̱ guʼni nditháan xáʼngulú guʼyáá nguáthá mba̱a̱ ku̱ma̱ gíʼdoo Jeobá. Ga̱jma̱a̱ xáʼngulú guʼyáá rí ikhaa ndaʼyoo (Salmo 92:5). ¡Majkiáanʼ nindxu̱lú ikháánʼ náa Jeobá!
14-20 OCTUBRE
GÍʼDOO NUMUU RÍ NA̱ʼKHA̱ NÁA BIBLIA SALMOS 96-99
¡“Nataráʼa ajngáa rí májánʼ”!
w11 1/3 6 kutriga̱ 1, 2
Ndiéjunʼ nindxu̱u̱ ajngáa rí májánʼ rá.
BI̱ nindxu̱lú cristianos gíʼma mutaraʼa “ajngáa rí májánʼ ga̱jma̱a̱ numuu reino”, xóo muʼthá, muʼthún xa̱bu̱ dí Reino ndrígóo Dios nindxu̱u̱ mbáa xa̱bu̱ ñajunʼ bi̱ maʼni rí jmbu índo̱ gaʼtañajun náa tsu̱du̱u̱ Ku̱ba̱ʼ. Ma̱ngaa náa Biblia naʼthí ga̱jma̱a̱ numuu “ajngáa rí májánʼ dí maʼni kawáan”, “ajngáa rí májánʼ ndrígóo Dios” ga̱jma̱a̱ “ajngáa rí májánʼ ga̱jma̱a̱ numuu Jesucristo” (Salmo 96:2; Romanos 15:16; Marcos 1:1). Ikhaa jngóo, “ndiéjunʼ nindxu̱u̱ ajngáa rí májánʼ rá.”
Nindxu̱u̱ kisngáa dí Jesús nisngáa ga̱jma̱a̱ dí xa̱bi̱i̱ niniraʼmáʼ. Nákhá xóó tséjkha̱a̱ mekhuíí, Jesús niʼthún xa̱bi̱i̱: “Gaʼguala ga̱jma̱a̱ gusngún xa̱bu̱ bi̱ kúwá náa xúgíʼ xuajen mu mani̱ndxu̱ún xa̱bi̱ʼ. Guxuʼmíinʼ iyááʼ ga̱jma̱a̱ mbiʼyuu Anu̱ʼ, mbiʼyuu Ada̱ ga̱jma̱a̱ espíritu santo, gusngúnla munimbáníí xúgíʼ rí ikhúúnʼ nitañájuanla” (Mateo 28:19, 20). Ikhaa jngóo raʼkháa índo̱ ndayóo muʼthúún xa̱bu̱ ga̱jma̱a̱ numuu Reino, bi̱ phú gajkhun nindxu̱u̱ cristiano ndayóo maʼni mbá tsiaki̱i̱ maxkamiin xa̱bu̱ mu mani̱ndxu̱ún xa̱bi̱i̱ Cristo.
w12 1/9 16 kutriga̱ 1
Ndiéjunʼ gárígá mbiʼi rí mixtanda̱ʼa̱a̱ cuenta rá.
Xtiʼkhuu rí nakujmaa nasngájmaa rí mbaʼin xa̱bu̱ nakumu̱ún dí gárígá índo̱ náa Biblia naʼthí rí mixtanda̱ʼa̱a̱ cuenta. Nundxaʼwamíjná rí mbaʼin wéñuuʼ xa̱bu̱ makuwá náa inuu Dios náa gi̱i̱ raʼtáñajunʼ mu mandi̱ʼi̱i̱n cuenta ga̱jma̱a̱ numuu rí ninii: Mbaʼin mundrígúu rí makuwá mekhuíí, ga̱jma̱a̱ eʼwíinʼ maguáan náa infierno. Mú náa Biblia naʼthí dí mbiʼi rí mixtanda̱ʼa̱a̱ cuenta, nindxu̱u̱ mu maguma gámbáa dí ra̱májánʼ rí xtáá rarígá náa numbaaʼ (Salmo 96:13). Jesús nindxu̱u̱ bi̱ Jeobá niraʼwíí mu maʼnimbánuu xkujndu ga̱jma̱a̱ mu ma̱ʼkha̱ kayóo rí jmbu náa xa̱bu̱ numbaaʼ (Atraxnuu Isaías 11:1-5 ga̱jma̱a̱ Hechos 17:31).
w12 15/9 12 kutriga̱ 18, 19
Mil tsiguʼ marigá dí tsímáá... ¡ga̱jma̱a̱ i̱ʼwáʼ tsiguʼ xóó!
18 Xa̱bu̱ nánguá nimbájxu̱u̱nʼ májánʼ gajmiún Jeobá índo̱ ikhiin túnimbu̱ún kuyáá, ninimbu̱ún kuyáá Gixa̱a̱. Mú, índo̱ Jesús nigíʼdúu niʼtáñajunʼ nákha 1914, nigíʼdúu niʼni mbaʼa mu makuwáanʼ mbúju̱úʼ mbá kambájxulú ga̱jma̱a̱ gagi (Efes. 1:9, 10). Índo̱ gáʼtañajunʼ Jesús mil tsiguʼ marigá mbaʼa dí ra̱ʼkhá tháán mitsaanʼ rí xóó tséjuiʼyáá. Maski ajndu Jesús “nijuixnájxuʼ xúgíʼ dí rígá mekhuíí ga̱jma̱a̱ náa tsu̱du̱u̱ ku̱ba̱ʼ”, nda̱wa̱á dí gánújngoo mil tsiguʼ numuu dí ikhaa na̱nguá eyooʼ mariʼkuriya̱a̱ʼ Anu̱u̱ náa naʼtáñajunʼ “Jesús maxnájxi̱i̱ rí niʼtáñajunʼ náa Anu̱u̱ bi̱ nindxu̱u̱ Dios ndrígóo” “mu xúʼko̱ Dios bi̱ nindxu̱u̱ Anu̱lú magruigú gamajkhu” (Mat. 28:18; Filip. 2:9-11).
19 Mbiʼi rúʼko̱ xa̱bu̱ bi̱ gákúwá náa tsu̱du̱u̱ ku̱ba̱ʼ ni xánindxu̱ún xa̱bu̱ aʼkhá, mbuyaridáá xkri̱doo Jesús ga̱jma̱a̱ munimbu̱ún ma̱ngaa mbuyamajkuíí Jeobá, mbaʼyóoʼ manújngún náa iwáá gamiéjunʼ mu musngajma rí gajkhun nandún muni̱ rígi̱ (Apoc. 20:7-10). Nda̱wa̱á kayuuʼ xúgíinʼ bi̱ tsénimbu̱ún, tséʼniuu má xa̱bu̱ o ángeles, maguma gámbíin mbá kayuuʼ ¡Ra̱ʼkhá tháán mitsaanʼ gáʼni mbiʼi rúʼko̱! Makuwáánʼ mbá kambájxulú xúgiáanʼ mu muʼni mba̱a̱ Jeobá, bi̱ “mani̱ndxu̱u̱ xúgíʼ náa xúgíinʼ xa̱bu̱” (atraxnuu Salmo 99:1-3).
Guʼyáʼ rí gíʼdoo numuu
it-1 412
Ajmúú
Najuiʼthá ga̱jma̱a̱ numuu mbá “ajmúú nuxi̱ʼ” náa Salmos mú ma̱ngaa náa niʼnirámáʼ Isaías ga̱jma̱a̱ náa niʼnirámáʼ apóstol Juan (Sl 33:3; 40:3; 96:1; 98:1; 144:9; 149:1; Isa 42:10; Rev 5:9; 14:3.) Ajmúú rígi̱ naguma numuu dí nirígá mbá dí nuxi̱ʼ ga̱jma̱a̱ numuu xóo eʼtáñajunʼ Jeobá. Xó má eʼthí náa Salmo 96:10: “Jeobá mínaaʼ ni̱jkha̱nú ninindxu̱u̱ rey”. Nuni̱ ajmúú nuxi̱ʼ numuu rí naʼtáñajunʼ Jeobá nindxu̱u̱ itháán mba̱a̱, xóo má dí nandoo gáʼthúu̱n ga̱jma̱a̱ numuu mekhu ma̱ngaa ku̱ba̱ʼ, na̱ʼkha̱ raʼthí náa “ajmúú nuxi̱ʼ” (Sl 96:11-13; 98:9; Isa 42:10, 13.)
21-27 OCTUBRE
GÍʼDOO NUMUU RÍ NA̱ʼKHA̱ NÁA BIBLIA SALMOS 100-102
Xú káʼnii esngajmá Jeobá ngajua rí tsétumuu
Xú káʼnii gátanirataminaʼ mu majnguáanʼ iyááʼ rá.
18 Rí maʼndaaʼ xtayáá Jeobá rúʼko̱ nindxu̱u̱ mbá rí itháán mitsaanʼ dí ma̱ndoo maraʼdáá (atraxnuu Proverbios 3:3-6). Na̱nguá nindxu̱u̱ mbóoʼ dí maku̱ma̱a̱ʼ dí maʼga̱ raguámbá, rúʼko̱ nindxu̱u̱ rí mambáyáaʼ mu nditháan xákanajkhaa índo̱ gátraʼníí xkujndu. Náa Biblia naʼthí mbaʼa nuthu dí Jeobá nasngájmúún ngajua rí jmbu xa̱bi̱i̱. Rígi̱ eyoo gaʼthí rí nditháan tséniñúnʼ ga̱jma̱a̱ nditháan tseniñuu dí nandoo kaʼñún (Sal. 100:5). Numuu rí ikháán niguma xóo má kaʼnii Dios (Gén. 1:26). Ikha jngóo xú káʼnii gándoo matasngajmá ngajua rúʼko̱ rá.
19 Timbá nindxu̱u̱ rí maraxna núma̱aʼ (1 Tes. 5:18). Atrajxi̱mínáʼ xúgíʼ mbiʼi: “Xú káʼnii nisngájmuʼ Jeobá mbiʼi rígi̱ dí nandoo kaʼyoʼ ráʼ”. Nda̱wa̱á índo̱ gárata káñii, araxnáa núma̱aʼ ga̱jma̱a̱ numuu rúʼko̱ ma̱ngaa dí nindoo kaʼyaaʼ. Atayáá xúgíʼ rí ikhaa naʼni rí nandoo kaʼyaaʼ xó má ni̱jkha̱nú niʼni apóstol Pablo (atraxnuu Gálatas 2:20). Ga̱jma̱a̱ atrajxi̱mínáʼ: “Nandoʼ masngajmúu Jeobá rí nandoʼ ka̱yo̱o̱ ráʼ”. Índo̱ ikháán gaʼndaaʼ xtayáá itháán, rúʼko̱ gámbáyáaʼ mu maʼnga̱a̱ʼ matraʼníí asndu ndiéjunʼ má tsáʼkhá ga̱jma̱a̱ asndu xkáʼnii má xkujndu ma̱ngaa rí matani má xúʼko̱ ñajuunʼ ikhaa. Xúʼko̱ gatasngajmá xúgíʼ mbiʼi rí ikháán nandaaʼ xtayáá Ana̱a̱ʼ bi̱ xtáa mekhuíí.
“¡Gundxa̱ʼwa̱míjna má xúʼko̱ rí májánʼ ga̱jma̱a̱ gakuwáanʼla xawii!”
10 Tikhuu dí xáʼyóoʼ muʼni nindxu̱u̱, muʼtsíin gajmiúlú gu̱ʼu̱ o xa̱bekha, matatsiʼtsu ga̱jma̱a̱ migi̱i̱n wéñuuʼ, marata ajngá dí magawúúnʼ eʼwíinʼ, ma̱ta̱ya̱a̱ película náa nuxmijná wéñuuʼ o náa nagájnún xa̱bu̱ tsaʼtsiinʼ bi̱ nu̱ni̱ aʼkhá (Sal. 101:3). Gixa̱a̱ ndayáʼ ma xúʼko̱ mu maʼni dí ní xambájxu gajmiúlú Jeobá (1 Ped. 5:8). Á mú tseñaumíjna̱ gamíi magiwa̱nʼ náa a̱jkiu̱lú ga̱jma̱a̱ náa edxu̱lú tsíxígú, dí muʼni nduwaʼ, magua̱ʼa̱ muguaʼdáálu, makiʼnáanʼlu wéñuuʼ, muʼni mbaʼumíjna̱ ga̱jma̱a̱ muyexíilú sia̱nʼ (Gál. 5:19-21). Mbáa naku̱ma̱a̱ʼ ikháán dí na̱nguá má gamíi matani̱ xúgíʼ rúʼko̱, mú, á mu tsetriyáaʼ mbáa nacha̱, gamíi mbaja̱a̱ má xúʼko̱ xóo eʼni mbóoʼ iná dí mbiiʼ ga̱jma̱a̱ maʼni gacháánʼlu (Sant. 1:14, 15).
w11 15/7 16 kutriga̱ 7, 8
Muʼnimbulú ikha dí naxnúlú Jeobá rá.
7 Tséʼnimbulú dí nuthi xa̱bu̱ bi̱ nusngáa dí minduwaʼ, tsérajxu̱u̱nlú, ni má tséndriguíinlú náa guʼwúlú, nditháan tsédxaʼwíin ga̱jma̱a̱ tséraxnuu dí nuthi náa tele, i̱yi̱i̱ʼ, Internet ni má tséʼyáá ni tséʼni̱i̱ comentar náa páginas ndrígún. Nuʼni xúgíʼ rígi̱, numuu rí nandulúʼ kuʼyáá Jeobá, “Dios bi̱ naʼthí dí gajkhun”. Ikha jngóo tsédxawíín nimbá nduwaʼ dí tsémbríguii ga̱jma̱a̱ rí naʼthí náa Ajngáa rawuunʼ dí nindxu̱u̱ gajkhun (Sal. 31:5; Juan 17:17). Ma̱ngaa nandulúʼ kuʼyáá xuajñuu, ikhí nijmañulúʼ mbiʼyuu Dios ga̱jma̱a̱ ndiéjunʼ eyóoʼ gáʼthúu̱n, náá numuu niguma Ku̱ba̱ʼ, xóo kúwíin bi̱ nikháñún ga̱jma̱a̱ dí magabiín xa̱bu̱. Narmáʼáan a̱jkia̱a̱nʼ índo̱ nitadxawíín xúgíʼ rígi̱ ráʼ. Ikha jngóo, náá numuu guʼdxawíín rí nuthi xa̱bu̱ bi̱ nuthi dí ragájkhun ga̱jma̱a̱ numuu Jeobá, bi̱ nanigu̱u̱nʼ mutsijmaa xuajñuu Dios dí ra̱ʼkhá tháán niʼsngúlú rá. (Juan 6:66-69).
8 ¡Guthi asndu ndiéjúúnʼ má eñún xa̱bu̱ bugi̱! Ikháanʼ xúʼnimbulú, ikhiin ninindxu̱ún xóo mbá pozo mijxooʼ, i̱ndó nuʼthí dí minduwaʼ ga̱jma̱a̱ dí naʼni rí xákuwáanʼ gagi. Ikháanʼ nandulúʼ muguajún jmbu náa Jeobá ga̱jma̱a̱ náa xuajñuu, náa naʼni̱i̱ dí xakándáulú, numuu rí naxnúlú muʼwa̱a̱n i̱ya̱a̱ʼ dí na̱ʼkha̱ náa Biblia (Isa. 55:1-3; Mat. 24:45-47).
Guʼyáʼ rí gíʼdoo numuu
it-2 629
Pelícano
Nda̱wa̱á dí pelícano naguámbóo nakuiʼtsu, na̱jkha̱ náa ndáwi̱i̱n xa̱bu̱, índo̱ ndayáa jxu̱u̱ʼ nakujmaa rí xtáa ngíná, narmáʼáan edxu̱u̱ náa xpajpoo, wíí guanúu rí asndu ma̱ndoo makujmaa dí nindxu̱u̱ mbá itsí miʼxá mba̱a̱. Mbayuuʼ hora guanúu wíí dí nakujmaa dí xtáa ngíná, rígi̱ rí nindxa̱ʼwáminaʼ salmista índo̱ niʼthí: “Xóo pelícano bi̱ xtáa náa ku̱ba̱ʼ mijxooʼ kaʼniúnʼ” (Sl 102:6.) Gi̱i̱, índo̱ nijmaa ajngáa “ku̱ba̱ʼ mijxooʼ” tsíyoo gáʼthí ga̱jma̱a̱ numuu mbá ku̱ba̱ʼ mijxooʼ, naʼthí ga̱jma̱a̱ numuu náa ndáwi̱i̱n mbaʼin xa̱bu̱, mbáa náa gíwánʼ na̱ma̱a̱ʼ. Rígi̱ rígá náa norte, xkua̱ ndrígóo Jordán, ikhí xóó kúwíin pelícanos, mú káaʼ tikhuu gu̱nʼ. Náa Israel kúwíin ajtsú enii dí pelícanos. Bi̱ itháán najmaʼnuuʼ nindxu̱u̱ pelícano vulgar (Pelecanus onocrotalus), mú ndáwi̱i̱n wéñuuʼ pelícano ceñudo (Pelecanus crispus) ga̱jma̱a̱ pelícano africano (Pelecanus rufescens).
Pelícano iwáá nanigu̱u̱ʼ maxtáa náa ndáwi̱i̱n mbaʼin xa̱bu̱, náa xa̱bu̱ xáʼni xkájkiu̱ún. Ikhí naʼni xújúunʼ ga̱jma̱a̱ ikhí nagíwáanʼ aʼdióo ga̱jma̱a̱ najkha̱a̱ nda̱wa̱á dí nigugua̱a̱ mbá e̱gi̱ʼ. Numuu dí pelícano nanigu̱u̱ʼ maxtáa mbáwíi náa ndáwi̱i̱n xa̱bu̱, ikha jngóo náa Biblia najmuu xóo tsinaʼ mu maʼthí dí mbá xuajin maguma gámbáa mbá kayuuʼ. Mu majuiʼthá dí xuajin Edom inuu maguma gámbáa, Isaías niʼthí dí pelícano maguanúu ga̱jma̱a̱ ku̱ba̱ʼ rúʼko̱ (Isa 34:11.) Sofonías niʼthí dí pelícanos makuwíin náa edxu̱u̱ rajkhúu xuajin Nínive, rí nandoo gáʼthúu̱n dí maguma gámbáa mbá xúgíʼ ga̱jma̱a̱ ni xákuwíin xa̱bu̱ (Sof 2:13, 14.)
28 OCTUBRE ASNDU 3 NOVIEMBRE
GÍʼDOO NUMUU RÍ NA̱ʼKHA̱ NÁA BIBLIA SALMOS 103, 104
Ikhaa “gíwáanʼ a̱jkiu̱u̱n rí yujndaʼ ñajunlú”
Gakru̱ʼu̱lú kuʼñúún eʼwíinʼ xó má Jeobá
5 Jeobá nakro̱ʼo̱o̱ kaʼyulú numuu rí ikhaa guabaaʼ ga̱jma̱a̱ májánʼ a̱jkiu̱u̱n. Mbá xkri̱da, nisngájma rí májánʼ a̱jkiu̱u̱n índo̱ inuu maʼni gámbi̱i̱n xúgíinʼ xa̱bu̱ bi̱ ramíjíin bi̱ nikúwíin náa Sodoma. Ikhaa nikuʼmiin tikhuun ángeles mu magún gúthán Lot rí magayúu náa kúbá. Mú Lot nimiñuu maʼga ikhí. Ikha jngóo nindo̱ʼo̱o̱ Jeobá dí á mu ikhaa ga̱jma̱a̱ bi̱ kúwá náa goʼwóo ma̱ndoo magún náa Zóar, mbá xuajin chíʼgíiʼ náa Dios má nindxa̱ʼwa̱míjna̱ ma̱ngaa maʼni gámbáa. Jeobá ma̱ndoo maʼthúu̱n Lot rí maʼnimbo̱o̱ xó ma eʼthúu̱n ikhaa, mú na̱nguá niʼni xúʼko̱ káʼnii, ikhaa niʼdxawun rí niʼthúu̱n Lot maski asndu rúʼko̱ niʼni rí xáʼni gámbáa xuajin Zóar (Gén. 19:18-22). Tsiguʼ nda̱wa̱á, Jeobá nisngájma rí nigáwíinʼ a̱jkiu̱u̱n nini xa̱bu̱ bi̱ nikúwíin náa Nínive. Ikhaa nikuʼmaa profeta Jonás mu maʼthúún rí ikhiin ga̱jma̱a̱ xuajin maguma̱a̱ gámbáa numuu rí nuni̱ dí raʼkhí, mú índo̱ ninivitas nitanga̱a̱ a̱jkiu̱ún rí nini̱, Jeobá nigáwíinʼ a̱jkiu̱u̱n kaʼñún ga̱jma̱a̱ niʼni mba̱a̱ a̱jkiu̱u̱n kaʼyoo xuajin (Jon. 3:1, 10; 4:10, 11).
Atambáyumina náa Jeobá, xó má niʼni Sansón
16 Maski ajndu Sansón nimínuuʼ ga̱jma̱a̱ dí niraʼwíí maʼni, mú tániñuuʼ raʼnimbánuu dí nandoo Jeobá. Xúʼko̱ má mangáánʼ, xáʼyoo makanájkulú á mu nuxuʼdamíjná aʼkhá ga̱jma̱a̱ muxprigulú o asndu mandáti̱gu̱lú ñajunʼ dí kuaʼdáá náa guʼwá nagimbáanʼ. Gármáʼáanʼ a̱jkiu̱lú dí Jeobá, maʼndoo kaʼyulú má xúʼko̱ (Sal. 103:8-10). Maski ajndu makiéʼkúlú, mú ma̱ndoo majmiuu má xúʼko̱ ga̱jma̱á nindxu̱lú, xó má niʼni ga̱jma̱a̱ Sansón.
17 Guʼyáá rí nigíʼnuu ndxájulú bi̱ mbiʼyuu Michael. Ikhaa ninindxu̱u̱ siervo ministerial ga̱jma̱a̱ precursor regular, ra̱ʼkhá tháán eʼni ñajuunʼ Jeobá. Phú migíná numuu rí nikudaminaʼ mbá aʼkhá ga̱jma̱a̱ rúʼko̱ niʼni dí nindáti̱go̱o̱ ñajunʼ dí gíʼdoo náa guʼwá nagimbáanʼ. Ikhaa naʼthí: “Májánʼ má xtáá rani̱ ñajuunʼ Jeobá, na̱ni̱ asndu xó má naʼngo̱o̱. Mú índo̱ ni̱jkha̱nú mbiʼi rúʼko̱, asndu niku̱mu̱ʼ xóo nixkumún náa pared. Mú, ndi̱yo̱o̱ má kaʼwu dí Jeobá nditháan xániñuʼ, maski ajndu xúʼko̱ narajximínáʼ á mu ma̱ndoo mambaxúʼ gajmuʼ Jeobá xó má nákha ginii o á mu matanga̱án ma̱ni̱ ñajunʼ náa guʼwá nagimbáanʼ”.
18 Ra̱ʼkhá tháán májánʼ dí Michael tákanájkoo. Ikha naʼthí: “Nini̱ tsiakimínaʼ dí mambájxuʼ itháán gajmuʼ Jeobá. Rí nimbáyuʼ nindxu̱u̱ dí matajkáan ga̱jma̱a̱ xúgíʼ a̱jkiu̱nʼ, manigajma̱a̱, ga̱jma̱a̱ rí mandxa̱ʼwa̱mínáʼ”. Nda̱wa̱á Michael nigruigúu ñajunʼ rí gíʼdoo náa guʼwá nagimbáanʼ ga̱jma̱a̱ rí xúgi̱ nindxu̱u̱ mbáa bi̱ kayá edxu̱u̱ ga̱jma̱a̱ precursor regular. Ikhaa naʼthí: “Rí nimba̱yúʼ ga̱jma̱a̱ tsiaki̱i̱ rí nixnuʼ a̱ngiu̱lú, mú itháán a̱ngiu̱lú bi̱ kuya̱ edxu̱u̱ nimbáyúʼ mba̱yo̱o̱ dí Jeobá nandoo kaʼyoʼ má xúʼko̱. Xúʼko̱ ma̱ndoo mani̱ ñajuunʼ rí asndu xáʼni gawúnʼ ku̱ma̱ ndrígóʼ. Dí nigíʼnuʼ rígi̱, niʼni mba̱yo̱o̱ dí Jeobá ma̱ndoo maʼni mba̱a̱ a̱jkiu̱u̱n kaʼyoo xa̱bi̱i̱ bi̱ gajkhun natanga̱a̱ a̱jkiu̱u̱n”. Ikhaa má xóo Michael, ma̱ndoo mbuʼyáá gajkhun á mu nixuʼámijná aʼkhá, ma̱ndoo majmiuu ga̱jma̱á nindxu̱lú má xúʼko̱ Jeobá ma̱ngaa maguma tsajkurámáánʼ ma̱ngaa á mu nuni xúgíʼ xó má naʼngo̱o̱ mu muriʼkhui̱i̱ xóo nindxu̱lú ga̱jma̱a̱ xuniʼñáá rumbáyumijná náa ikhaa (Sal. 86:5; Prov. 28:13).
Maʼngaaʼ matanimbaníí meta ndrígáaʼ
2 Xákanajkhaaʼ á mu dí tséʼnga̱a̱ʼ gátanimbaníí mbóoʼ meta dí xtaʼdáá. Mu matanimbaníí mbóoʼ meta tséʼniuu á mu dí ragákhi̱i̱ ndayóoʼ mbiʼi ga̱jma̱a̱ tsiaki̱i̱. Á mu tsékanájkaaʼ matasnga̱jmá dí nandaaʼ mambajxáaʼ má xúʼko̱ ga̱jma̱a̱ Jeobá ga̱jma̱a̱ dí nandaaʼ maraxna̱ dí itháán májánʼ. Xúgíʼ rígi̱ Jeobá ndaʼyoo ga̱jma̱a̱ ikhaa tsénda̱ʼa̱a̱ʼ matani mbóoʼ dí xáʼnga̱a̱ʼ gátani̱ (Sal. 103:14; Miq. 6:8). Ikha jngóo gíʼmaa matayaa á mu meta dí nitraʼwíí matani̱ gajkhun maʼnga̱a̱ʼ matanimbaníí. Ndiéjunʼ gándoo gámbáyáaʼ mu maʼnga̱a̱ʼ matanimbaníí rá. Guʼyáálu.
Guʼyáʼ rí gíʼdoo numuu
cl 55 kutriga̱ 18
Gíʼdoo tsiaki̱i̱ mu maʼniwíi: Jeobá niʼni mekhu ga̱jma̱a̱ Ku̱ba̱ʼ
18 Ndiéjunʼ ejmañulú rí Jeobá gíʼdoo tsiaki̱i̱ mu maʼniwíi rá. Naʼniulú tsiánguá xúgíʼ dí niʼniwíi Jeobá. Mbáa salmista niʼthí: “¡Oh Jeobá, ra̱ʼkhá tháán mbaʼa rí nitani̱! [...] Náa ku̱ba̱ʼ kajtíí rí nitani̱” (Salmo 104:24). ¡Phú gajkhun ajngáa rígi̱! Xa̱bu̱ niguánú ndiyáá dí kúwíin itháán dí mbá millón xujkhúʼ náa tsu̱du̱u̱ ku̱ba̱ʼ, mú, mbáa kúwíin itháan ki xóo rígi̱. Xa̱bu̱ nguáná nánguá eʼngo̱o̱ gúndxaʼwámijnaʼ itháan dí muni̱, mú Jeobá ma̱ndoo maʼniwíi má xúʼko̱ mbaʼa dí nuxi̱ʼ ga̱jma̱a̱ mixtiʼkhu, ikhaa tsértumuu dí nandxa̱ʼwáminaʼ.