Ndiéjunʼ gúʼni índo̱ gáguma gínáaʼlu rá.

1, 2. a) Ndiéjunʼ eni̱ mbaʼin xa̱bu̱ índo̱ nduyáá dí eʼwíinʼ naguma gíníi rá. b) Ndiéjunʼ ma̱ndoo murajximíjnalú rá.

NÁA xúgíʼ numbaaʼ naguma ngíníi xa̱bu̱, mbáa ga̱jma̱a̱ numuu dí na̱nguá kuáʼdáá mbújkha̱a̱, ga̱jma̱a̱ numuu xuajñún, xóo kaʼniún o mbáa ga̱jma̱a̱ numuu i̱ʼwáʼ. Ma̱ngaa mbaʼin xa̱bu̱ numíniiʼ ga̱jma̱a̱ numuu dí xa̱bu̱ ñajunʼ o xa̱bu̱ bi̱ guáʼdáá mbújkha̱a̱ i̱ndó nandún maguaʼdáá itháán ikhiin ga̱jma̱a̱ tsixmiéjúúnʼ eni̱ eʼwíinʼ, xúgíʼ rígi̱ naʼni dí mumíniiʼ o namínúuʼ mbáa bi̱ nuniʼníiʼ.

² Xúgiáánʼ nandulúʼ dí makuwáánʼ tsímáá ga̱jma̱a̱ nandulúʼ rí muniulúʼ rí májánʼ. Ikha jngóo mbaʼin xa̱bu̱ nakiʼníin índo̱ nduyáá dí eʼwíinʼ naguma gíníi. Tikhuun nuxujximíjna̱ náa inún xa̱bu̱ ñajunʼ ga̱jma̱a̱ tsénimbu̱u̱n xtángoo dí ikhiin nundri̱ga̱ o numbañún xa̱bu̱ ñajunʼ bi̱ nuxudamíjna̱ munimbáníí xkujndu. Mú, ikháanʼlú na̱nguá exuʼdamíjná náa xkujndu dí narígá náa numbaaʼ ga̱jma̱a̱ nduʼyáá dí Xa̱bu̱ Ñajunʼ ndrígóo Dios maʼni gámbáa xúgíʼ xkujndu dí rígá náa numbaaʼ (Juan 17:16). Maski ajndu xúʼko̱ mbáa nagawúnlú o asndu nakiʼnáánʼ índo̱ nduʼyáá dí mbáa namínúuʼ. Mbáa nurajximíjna̱: “Ndiéjuunʼ gáni̱ rá. Lá rígá mbá dí ma̱ndoo ma̱ni̱ xúgi̱ mu mambáñún xa̱bu̱ bi̱ numíniiʼ ráʼ.” Náa artículo rígi̱ mbuʼyáá xóo exti̱ʼña̱a̱ grajxe̱ rígi̱. Mú ginii guʼyáá xóo eku̱mu̱u̱ Jeobá ga̱jma̱a̱ Jesús índo̱ naguma gíníi xa̱bu̱.

JEHOVÁ GA̱JMA̱A̱ JESÚS TSÉNI̱ GÍNÍI XA̱BU̱

3. Náá numuu dí tséniguluʼ dí muni̱ gínáaʼ o dí muni̱ gíníi eʼwíinʼ rá. (Isaías 5:7.)

³ Náa Biblia naʼthí náá numuu dí tsénigu̱lú dí muni̱ gínáá o dí eʼwíinʼ maguma gíníi: Numuu dí Jeobá niʼniáánʼ xó má kaʼnii ikhaa, “ikhaa xtaa gagi índo̱ naguma rí jmbu ga̱jma̱a̱ naguma xó má kaʼyoo” (Sal. 33:5; Gén. 1:26). Jeobá nditháan tséʼni dí ra̱májánʼ ga̱jma̱a̱ tsíyoo dí eʼwíinʼ muni̱ dí ra̱májánʼ (Deut. 32:​3, 4; Miq. 6:8; Zac. 7:9). Guʼyáá mbá xkri̱da, nákha nixtáa profeta Isaías. Jeobá niʼdxawuun dí mbaʼin israelitas naguma gíníi eni̱ eʼwíinʼ israelitas, ikha jngóo niʼdxawun mbá “gitsaʼwá dí ngíná” (atraxnuu Isaías 5:7). Ikhaa niʼni dí mumíniiʼ xúgíinʼ bi̱ túni̱ mbáníí Xtángoo ga̱jma̱a̱ bi̱ nini̱ gíníi eʼwíinʼ (Is. 5:​5, 13).

4. Xú káʼnii eku̱mu̱u̱ Jesús índo̱ mbáa naguma gínáa rá. (Atayáá ma̱ngaa xtiʼkhuu.)

⁴ Xó má Jeobá, Jesús ma̱ngaa nanigu̱u̱ʼ dí maguma dí májánʼ ga̱jma̱a̱ tsénigu̱u̱ʼ dí maguma gíníi xa̱bu̱. Gundxaʼwamíjna̱ ndiéjuunʼ niʼni índo̱ nixtáa náa tsu̱du̱u̱ Ku̱ba̱ʼ. Mbóo mbiʼi ndiʼyoo mbáa xa̱bu̱ bi̱ nánguá eku̱mu̱u̱ mbóo ñawúunʼ. Nigáwíinʼ a̱jkiu̱u̱n kaʼyoo ga̱jma̱a̱ niʼni thanuu. Mú, índo̱ ndiyáá rígi̱ ndxajkun bi̱ kuya̱ edxu̱u̱ nikiʼníin kuyáá. Ikhiin tágáwíinʼ a̱jkiu̱ún kuyáá xa̱bu̱, nithi dí Jesús tséʼnimbánuu xtángoo ndrígóo sábado, na̱nguá nidxúún numuu rí xa̱bu̱ niʼni̱i̱ a̱jkiu̱u̱n. Jesús “nigawúunʼ índo̱ ndiʼyoo rí gújkhúʼ a̱jkiu̱ún” (Mar. 3:​1-6).

5. Ndiéjunʼ gíʼmaa marmáʼáan a̱jkiu̱lú índo̱ gákiʼnáaʼlú numuu rí niguma gínáaʼlú o nduʼyáá dí naguma gíníi eʼwíinʼ rá.

⁵ Jeobá ga̱jma̱a̱ Jesús nakiʼníin índo̱ nduyáá dí naguma gíníi xa̱bu̱. Ikha jngóo na̱nguá má nindxu̱u̱ raʼkhí dí makiʼnáánʼ mangáánʼ ga̱jma̱a̱ numuu dí narígá dí ra̱májánʼ (Efes. 4:26 ga̱jma̱a̱ nota “Cuando se enojen” dí na̱ʼkha̱ náa Biblia de estudio). Gíʼmaa marmáʼáan a̱jkiu̱lú dí maski ajndu nakiʼnáánʼ, nditháan má xáʼngulú gúʼni̱ gámbáa dí ra̱májánʼ. Á mu ikháanʼ mbaʼ nújngóó ekiʼnáánʼ gamíi maʼniulú nandii ga̱jma̱a̱ ni xáʼdxuu a̱jkiu̱lú (Sal. 37:​1, 8; Sant. 1:20). Guʼyáá xkridoo Jesús, ndiéjuunʼ dí gíʼmaa mu̱ʼni̱ índo̱ gúʼyáá dí tséguma dí májánʼ.

DÍÍ NIʼNI JESÚS ÍNDO̱ NDIʼYOO DÍ NAGUMA GÍNÍI XA̱BU̱ RÁ.

6. Ndiéjunʼ ndiʼyoo Jesús índo̱ nixtáa náa tsu̱du̱u̱ Ku̱ba̱ʼ rá. (Atayáá ma̱ngaa xtiʼkhuu.)

⁶ Índo̱ Jesús nixtáa náa tsu̱du̱u̱ Ku̱ba̱ʼ, ndiʼyoo dí mbaʼin xa̱bu̱ naguma gíníin. Mbá xkri̱da, ndiʼyoo dí ndxajkun bi̱ kuya̱ edxu̱u̱ nundri̱ga̱ mbaʼa ikha náa xa̱bu̱ dí xáʼngu̱u̱n gúnimbáníí (Mat. 23:​2-4). Ma̱ngaa nikúwá xa̱bu̱ ñajunʼ romano bi̱ nini̱ gíníi xa̱bu̱ xuajin. Ikha jngóo nikúwá mbaʼin judíos bi̱ nánguá nindúún dí mutañajúúnʼ romanos, xóo zelotes, bi̱ ninindxu̱ún mbá nguéjmi̱i̱n judíos bi̱ nixmijná gajmiún xa̱bu̱ ñajunʼ. Mú, Jesús na̱nguá niyéjkha̱ edxu̱u̱ ni má támbáñún xa̱bu̱ bugi̱. Índo̱ ndiʼyoo dí nindúún mugíiʼ xóo rey ikhaa nigáyúu ni̱jkha̱ náa kúbá (Juan 6:15).

7, 8. Ndíjkha dí Jesús tágíʼ maʼnimbánuu xúgíʼ xkujndu dí nirígá nákhá nixtáa náa tsu̱du̱u̱ Ku̱ba̱ʼ rá. (Juan 18:36.)

⁷ Jesús tákudaminaʼ náa política mu maʼni gámbáa xkujndu dí nirígá nákha ikhú. Numuu rí ndiʼyoo dí xa̱bu̱ rakáʼñúún mutañajumijná (Sal. 146:3; Jer. 10:23). Ma̱ngaa xáʼngu̱u̱n gúni gámbáa dí naʼni mumíniiʼ. Náa numbaaʼ naʼtáñajunʼ Gixa̱a̱ ga̱jma̱a̱ xa̱bu̱ nuni̱ xó má naʼni ikhaa (Juan 8:44; Efes. 2:2). Ma̱ngaa nindxu̱lú xa̱bu̱ aʼkhá, ikha jngóo tséʼngulú gúʼni̱ má xúʼko̱ dí májánʼ maski ajndu nandulú muʼni (Ecl. 7:20).

⁸ Jesús ndiʼyoo dí i̱ndó Xa̱bu̱ Ñajunʼ ndrígóo Dios maʼngo̱o̱ maʼni gámbáa mbá xúgíʼ dí naʼni mumíniiʼ. Ikha jngóo nijmuu tsiaki̱i̱ ga̱jma̱a̱ mbiʼi ndrígóo mu maʼtáraʼa “ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios” (Luc. 8:1). Niʼthúún xa̱bu̱ bi̱ nandún maguma rí jmbu dí maguma gámbáa mbá kayuuʼ dí naʼni mumíniiʼ (Mat. 5:6 ga̱jma̱a̱ nota dí na̱ʼkha̱ náa Biblia de estudio; Luc. 18:​7, 8). Xa̱bu̱ ñajunʼ bi̱ kúwá náa numbaaʼ nditháan xáʼngu̱u̱n muni̱ gámbáa xúgíʼ dí naʼni mumíniiʼ, i̱ndó xa̱bu̱ Ñajunʼ ndrígóo Dios maʼngo̱o̱ maʼni (atraxnuu Juan 18:36).

GUʼYARIDÁÁ JESÚS ÍNDO̱ GÚʼYÁÁ DÍ XA̱BU̱ NUMÍNÍIʼ

9. Náá numuu ku̱ma̱a̱ʼ ikháán dí i̱ndó Xa̱bu̱ Ñajunʼ ndrígóo Dios maʼngo̱o̱ maʼni gámbáa dí naʼni mumíniiʼlú rá.

⁹ Numuu rí kuwáanʼ náa iwáá mbiʼi, ikha jngóo rígá itháán xkujndu ki xóo nákha mbiʼi rí nixtáa Jesús. Mú, ikháá má Gixa̱a̱ ga̱jma̱a̱ xa̱bu̱ bi̱ nuni̱ xó má naʼni ikhaa nindxu̱ún bi̱ nuni̱ rí mumíniiʼ (2 Tim. 3:​1-5, 13; Apoc. 12:12). Ikháánʼ mangáánʼ nduʼyáá dí i̱ndó Xa̱bu̱ Ñajunʼ ndrígóo Dios maʼngo̱o̱ maʼni gámbáa dí naʼni mumíniiʼ. Ikha jngóo tséxuʼdamijná índo̱ xa̱bu̱ nuni̱ plantóon ni má tsémbáñúún bi̱ nunimíjna̱ muni̱ gámbáa xkujndu. Guʼyáá dí niʼni ndxájulú Stacy.a Nákha ikhaa xóó tséʼni̱ ga̱jma̱a̱, nambáñúún xa̱bu̱ bi̱ nandún maguma rí májánʼ. Mú, nda̱wa̱á nigíʼdu̱u̱ nindxa̱ʼwa̱mínáʼ á mu rí naʼni maʼngo̱o̱ maʼnimbánuu xkujndu. Ikhaa naʼthí: “Nákhá niʼníí nandxa̱ʼwa̱mínáʼ á mu nambáñún xa̱bu̱ dí xtáá rani̱. Mú dí xúgi̱ dí nambáyúu Xa̱bu̱ Ñajunʼ ndrígóo Dios, nda̱yo̱o̱ dí ikhaa maʼngo̱o̱ maʼnimbánuu xkujndu. Nda̱yo̱o̱ gajkhun dí Jeobá maʼni gámbáa xúgíʼ dí naʼni mumíniiʼ xa̱bu̱, mbá dí ikhúún xáʼngo̱ʼ gáni̱” (Sal. 72:​1, 4).

10. Xó má eʼthí náa Mateo 5:​43-48, ndíjkha jngóo tséʼnimíjna̱ muriʼkhu̱u̱ xtángoo ga̱jma̱a̱ muriʼkuwíin xa̱bu̱ ñajunʼ rá. (Atayáá ma̱ngaa xtiʼkhuu.)

¹⁰ Rí mbiʼi xúgi̱ kúwá mbaʼin xa̱bu̱ bi̱ nandún muriʼkuwíin xa̱bu̱ ñajunʼ. Ikha jngóo nanújngurámún xtángoo ga̱jma̱a̱ nuni̱ gíníi eʼwíinʼ, Jesús na̱nguá niʼsngúlú dí muʼni rígi̱ (Efes. 4:31). Mbáa ndxájulú bi̱ mbiʼyuu Jeffrey naʼthí: “Nda̱yo̱o̱ dí índo̱ xa̱bu̱ nagún gúñún xa̱bu̱ ñajunʼ mu munimbáníí xkujndu ndrígu̱ún, mbá nacha̱ ma̱ndoo makiʼníin ga̱jma̱a̱ mugíʼdi̱i̱ muni̱ gámbáa o muni̱ kuʼwáʼ o asndu muni̱ gawúúnʼ eʼwíinʼ”. Mú, Jesús naʼsngúlú dí maʼndulú kuʼñúún xúgíinʼ xa̱bu̱, asndu bi̱ tséndxaʼwamíjna̱ xó má ikháánʼ o bi̱ nuni̱ gínáánʼlú (atraxnuu Mateo 5:​43-48). Ga̱jma̱a̱ ikháanʼ bi̱ nindxu̱lú xa̱bi̱i̱ nuʼnimíjna̱ mbuʼyaridáá xkridoo ga̱jma̱a̱ nuʼnimíjna̱ muʼnimbáníí xúgíʼ dí niʼsngúlú.

11. Ndíjkha rí nguáná maʼniulú gakhi̱i̱ mbuʼyaridáá Jesús rá.

¹¹ Maski ajndu nduʼyáá dí i̱ndó Xa̱bu̱ Ñajunʼ ndrígóo Dios maʼngo̱o̱ maʼnimbánuu xúgíʼ dí naʼni mumíníiʼ, mú mbáa maʼniulú gakhi̱i̱ mbuʼyaridáá Jesús índo̱ nuniu̱lú dí ra̱májánʼ. Guʼyáá dí nigíʼnuu ndxájulú Janiya bi̱ niguma gínáa. Ikhaa naʼthí: “Ra̱ʼkhá tháán nixtáá ngíná ga̱jma̱a̱ nikiʼnún, nindoʼ dí xa̱bu̱ bi̱ niniu̱ʼ dí ra̱májánʼ muni̱ numa̱a̱. Nigíʼdu̱u̱ nimbáñún xa̱bu̱ bi̱ nandún rí xúgíinʼ magumiin rí májánʼ ga̱jma̱a̱ makuwá tsímáá. Niku̱mu̱ʼ dí rígi̱ gámbáyúʼ mu ni xáxtáá gíná ga̱jma̱a̱ mu xákiʼnún wéñuuʼ”. Mú nda̱wa̱á nijkha̱nú ndiʼyoo dí ndayóoʼ mariʼkhu̱u̱ xóo endxa̱ʼwáminaʼ. Ikhaa naʼthí xóó: “Nijkhánú ndi̱yo̱o̱ dí niniʼñúuʼ raku̱mu̱ʼ ka̱yo̱o̱ Jeobá ga̱jma̱a̱ niku̱mu̱ʼ ka̱ñu̱u̱n xa̱bu̱ dí ikhiin gúni mbáníí xkujndu dí rígá, ikha jngóo niniʼñúuʼ rambáñún xa̱bu̱ buʼko̱”. Mbáa nakiʼnááʼlú índo̱ naguma gínáaʼ o nduʼyáá dí nuni̱ gínáa i̱mba̱a̱, mú, xúniʼñááʼ dí rígi̱ maʼni dí muxuʼdamijná náa política o muʼgua kidxúún xa̱bu̱ bi̱ nandún munimbáníí xkujndu (Juan 15:19).

12. Ndíjkha gíʼmaa muñewa̱a̱n rí nduʼyáálú, nuraxnuu ga̱jma̱a̱ dí nuʼdxawíínlú rá.

¹² Ndiéjunʼ gámbáyulú mu xákiʼnááʼ índo̱ naguma gínáaʼ o nduʼyáá dí naguma gíníi eʼwíinʼ rá. Ma̱ndoo muñewa̱a̱n rí nduʼyáá, nuraxnuu o nuʼdxawíín. Náa Internet rígá mbaʼa noticia náa nutha numún xa̱bu̱ ñajunʼ mu xúʼko̱ xa̱bu̱ muxujximíjna̱. Ma̱ngaa periodista tséthi dí gajkhun, nuthi dí nakumu̱ún ikhiin. Maski ajndu mbá noticia nindxu̱u̱ gajkhun, mú, ikháanʼlú ragíʼmaa mundxa̱ʼwamíjna má xúʼko̱ ga̱jma̱a̱ numuu. Á mu nújngoó eʼyáá, eraxnuu o eʼdxawíín noticia ga̱jma̱a̱ numuu rígi̱, mbáa maʼni dí maxmiéjunlú wéñuuʼ, makuwáanʼ itháan gínáa ga̱jma̱a̱ makiʼnááʼlú (Prov. 24:10). Mbáa asndu mambumulú dí i̱ndó Xa̱bu̱ Ñajunʼ ndrígóo Dios maʼngo̱o̱ maʼnimbánuu xúgíʼ dí naʼni mumíníiʼlú.

13. Xú káʼnii embáyulú dí muraxnuu tsejtsíí mbiʼi Biblia rá.

¹³ I̱mba̱ dí ma̱ndoo mambáyulú nindxu̱u̱ dí muraxnuu tsejtsíí mbiʼi Biblia ga̱jma̱a̱ mundxaʼwamíjna̱ májánʼ dí nuraxnulú. Mbáa ndxájulú bi̱ mbiʼyuu Alia, nigáwíin a̱jkiu̱u̱n índo̱ ndiʼyoo xóo eguma gíníi xa̱bu̱ xuajñuu ga̱jma̱a̱ nikiʼnáa índo̱ ndiʼyoo dí xa̱bu̱ bi̱ niniu̱u̱ dí ra̱májánʼ nda̱a̱ dí niguáʼníí. Ikhaa naʼthí: “Ndiyóoʼ marmáʼáan a̱jkiu̱nʼ dí Jeobá nindxu̱u̱ bi̱ maʼnimbánuu xúgíʼ xkujndu. Niguxnuu dí naʼthí náa Job 34:​22-29, náa naʼthí dí Jeobá ndaʼyoo xúgíʼ dí rígá ma̱ngaa naʼni dí májánʼ ga̱jma̱a̱ dí i̱ndó ikhaa maʼngo̱o̱ maʼnimbánuu xkujndu ndrígulú”. Mú ndiéjunʼ gúʼni nákhá Xa̱bu̱ Ñajunʼ ndrígóo Dios xóó tséʼnimbánuu xúgíʼ xkujndu dí naʼni mumíníiʼlú rá.

DÍÍ MA̱NDOO MUʼNILÚ XÚGI̱

14. Ndiéjunʼ rí ma̱ndoo muʼnilú xúgi̱ rá. (Colosenses 3:​10, 11.)

¹⁴ Xáʼngulú murikháá dí xa̱bu̱ muni̱ gíníi eʼwíinʼ, mú kaʼyulú muraʼwíí xóo gúʼniu̱u̱n eʼwíinʼ. Ikháánʼlú nduʼyaridáá Jesús, nusngajmá dí nandulú kuʼñúúnʹxa̱bu̱, ikha jngóo nduʼyamajkún xúgíinʼ maski ajndu nuni̱ gínáaʼlú (Mat. 7:12; Rom. 12:17). Jeobá nadxuu índo̱ ndaʼyoo dí májáanʼ a̱jkiu̱lú ga̱jma̱a̱ nuʼniu̱u̱n dí májánʼ xúgíinʼ xa̱bu̱ (atraxnuu Colosenses 3:​10, 11).

15. Xú káʼnii embáñunlú xa̱bu̱ índo̱ nuʼsngúún dí eʼthí náa Biblia rá.

¹⁵ Rí itháán mambáñún xa̱bu̱ nindxu̱u̱ dí majmañúún ga̱jma̱a̱ numuu Jeobá, numuu dí índo̱ gájmañún muriʼkumijnáa, muniña̱a̱ʼ rajmangu̱únʼ maguánú mani̱ndxu̱ún xa̱bu̱ guabiinʼ ga̱jma̱a̱ manigu̱u̱nʼ makuwá tsímáá (Is. 11:​6, 7, 9). Nákhá xóó tséʼniga̱jma̱a̱, mbáa xa̱bu̱ bi̱ mbiʼyuu Jemal ni̱jkha̱ kidxúúnʼ xa̱bu̱ bi̱ nindúún muriʼkuriya̱a̱ʼ xa̱bu̱ ñajunʼ numuu rí niku̱mu̱ún dí tséʼthá ñájúnʼ májánʼ. Ikhaa naʼthí: “Xáʼnga̱a̱ matani̱ dí mbáa xa̱bu̱ mariʼkumina̱a̱ʼ á mu natagiʼdaaʼ ga̱jma̱a̱ʼ, mú, á mu natrasngáá dí naʼthí náa Biblia, ma̱ngaa matani̱ dí mariʼkumina̱a̱ʼ. Rúʼko̱ dí nimbáyúʼ ikhúún”. Índo̱ Jemal nijmañuu dí naʼthí náa Ajngá rawuunʼ Dios, nimbáyúu mu maniñuuʼ ragi̱ʼdu̱u̱ gajmíi̱n xa̱bu̱ ñajunʼ. Índo̱ nuʼsngúún xa̱bu̱ dí e̱ʼkha̱ raʼthí náa Biblia ma̱ndoo mumbáñún mu muniña̱a̱ʼ runi̱ dí ra̱májánʼ.

16. Náá numuu dí nandaaʼ marataráʼa ga̱jma̱a̱ numuu Xa̱bu̱ Ñajunʼ ndrígóo Dios rá.

¹⁶ Xó má Jesús, mangáánʼ nandulúʼ muʼthúún xa̱bu̱ dí i̱ndó Xa̱bu̱ Ñajunʼ ndrígóo Dios maʼngo̱o̱ maʼni gámbáa asndu kámuu xúgíʼ xkujndu dí naʼni mumíníiʼlú. Ga̱jma̱a̱ xúʼko̱ muʼni̱i̱ a̱jkiu̱ún xa̱bu̱ bi̱ naguma gíníi (Jer. 29:11). Stacy, bi̱ niʼthá ga̱jma̱a̱ numuu náa kutriga̱ 9, naʼthí: “Dí ni̱ni̱ga̱jma̱a̱ náa Biblia nimbáyúʼ mu xákiʼnún índo̱ naguma gínúu o índo̱ nda̱yo̱o̱ dí nagumaa gínáa i̱mba̱a̱. Jeobá najmuu Ajngá rawuunʼ mu maʼni̱i̱ a̱jkiu̱lú”. Mu ma̱ndoo mumbáñún maʼni̱i̱ a̱jkiu̱ún, gíʼmaa makuwáanʼ xawii muʼthúún dí eʼthí náa Biblia. Á mu ikháánʼlú nduʼyáá gajkhun dí Xa̱bu̱ Ñajunʼ ndrígóo Dios maʼni gámbáa xúgíʼ dí naʼni mumíníiʼ, xáʼniulú gakhi̱i̱ muʼthúún eʼwíinʼ ga̱jma̱a̱ numuu rígi̱ náa escuela o náa nuñajunʼlú.b

17. Xú káʼnii embáyulú Jeobá maʼngulú índo̱ náguma gínáaʼlú o nduʼyáá dí naguma gíníi eʼwíinʼ rá.

¹⁷ Náa numbaaʼ marigá má xúʼko̱ dí ra̱májánʼ numuu dí Gixa̱a̱ xtáa raʼtáñájunʼ, mú Jeobá má gámbáyulú ga̱jma̱a̱ nakudaminaʼ dí ginuu má maxkriya̱a̱ʼ Gixa̱a̱ (Juan 12:31). Náa Biblia ma̱ngaa naʼthulú náá numuu nuniu̱u̱lú dí ra̱májánʼ ga̱jma̱a̱ dí Jeobá nagáwíinʼ a̱jkiu̱u̱n índo̱ ndaʼyoo dí numíníiʼlú (Sal. 34:​17-19). Jeobá naʼsngulú ga̱jma̱a̱ xkri̱doo Aʼdióo mu mbuʼyáá ndiéjunʼ gúʼni índo̱ gúniulú dí ra̱májánʼ ma̱ngaa naʼsngulú dí Xa̱bu̱ Ñajunʼ bi̱ ikhaa nigíiʼ ginuu má maʼni gámbáa mbá kayuuʼ xúgíʼ dí naʼni mumíníiʼ (2 Ped. 3:13). Ikha jngóo xúniʼñááʼ ruʼtáraʼa ga̱jma̱a̱ gagi ajngáa dí májánʼ ga̱jma̱a̱ numuu Xa̱bu̱ Ñajunʼ ndrígóo Dios, nákhá xóó tsérígá “dí májánʼ ma̱ngaa dí jmbu” náa xúgíʼ tsu̱du̱u̱ Ku̱ba̱ʼ (Is. 9:7).