Guʼyamajkún eʼwíinʼ

1. Ndíjkha itháan má gíʼdoo numuu dí mbuyamajkulú xá. (Proverbios 22:1.)

XÚGIÁANʼ nanigulúʼ ga̱jma̱a̱ nakuwáanʼ gagi índo̱ nduyamajkulú, numuu dí xúʼko̱ má niʼniwáánʼ Jeobá. Ikha jngóo náa Biblia naʼthí dí “itháan má májánʼ dí mbuyamajkuaaʼ ki xó dí maraʼdáá plata ga̱jma̱a̱ oro” (atraxnuu Proverbios 22:1).a

2, 3. Ndíjkha dí naʼniulú gakhi̱i̱ mbuʼyamajkún eʼwíinʼ ga̱jma̱a̱ ndiéjunʼ gúʼyáá náa artículo rígi̱ rá.

² Mú, mbáa nguáná maʼniulú gakhi̱i̱ mbuʼyamajkún eʼwíinʼ, numuu dí nduʼyáá náa dí najngawiin ma̱ngaa kuwáanʼlu náa mbá numbaaʼ dí nda̱a̱ gamajkhu. Mú ikháanʼ nandulúʼ mbuʼyamajkún eʼwíinʼ numuu dí xúʼko̱ endu̱ʼu̱lúʼ Jeobá mu̱ʼni̱, dí mbuʼyamajkún “xúgíinʼ enii xa̱bu̱” (1 Ped. 2:17).

³ Náa artículo rígi̱ mbuʼyáá ndiéjunʼ eyoo gáʼthúu̱n dí matayamajkhún eʼwíinʼ ga̱jma̱a̱ mbuʼyáá xú káʼnii gusngajmá dí nduʼyamajkhún, 1) bi̱ kuʼñúún, 2) a̱ngiu̱lú ga̱jma̱a̱ 3) xa̱bu̱ bi̱ na̱nguá nindxu̱ún Testigos. Mbuʼyáá xú káʼnii gusngajmá dí nduʼyamajkhún xa̱bu̱ bi̱ tseyamajkhulú.

NDIÉJUNʼ EYOO GÁʼTHÚU̱N DÍ MATAYAMAJKHÚN EʼWÍINʼ RÁ.

4. Ndiéjunʼ eyoo gáʼthúu̱n dí matayamajkhún eʼwíinʼ rá.

⁴ Ndiéjunʼ eyoo gáʼthúu̱n gamajkhu ku̱ma̱a̱ ikháánʼ rá. Gamajkhu nindxu̱u̱ dí mundxaʼwamíjna̱ dí májánʼ ga̱jma̱a̱ numún xa̱bu̱ ma̱ngaa dí muʼniu̱u̱n dí májánʼ. Tséʼniulú gakhi̱i̱ mbuʼyamajkuíí mbáa xa̱bu̱ bi̱ májáanʼ a̱jkiu̱u̱n o naʼni rí májánʼ, mú gíʼdoo wéñuuʼ numuu dí magajnúu asndu náa a̱jkiu̱lú dí mbuʼyamajkuíí (Mat. 15:8).

5. Ndíjkha dí nduʼyamajkhún eʼwíinʼ rá.

⁵ Jeobá nandoo dí mbuʼyamajkún eʼwíinʼ. Mbá xkri̱da, naʼthúlú dí mbuʼyamajkún “xa̱bu̱ ñajunʼ” (Rom. 13:​1, 7). Tikhuun xa̱bu̱ nundxa̱ʼwa̱míjna̱ o nuthi: “Ikhúún i̱ndó ndayamajkún bi̱ nuni̱ dí májánʼ”, mú ragíʼmaa mundxaʼwamíjna̱ xígi̱ kaʼnii. Bi̱ nindxu̱lú xa̱bi̱i̱ Jeobá nduʼyáá dí gíʼmaa mbuʼyamajkún eʼwíinʼ numuu dí nandulúʼ kuʼyáá ga̱jma̱a̱ nandulúʼ mu̱ʼni̱ dí nanigu̱u̱ʼ, raʼkháa ga̱jma̱a̱ numuu dí xa̱bu̱ naʼni dí májánʼ o na̱nguá (Jos. 4:14; 1 Ped. 3:15).

6. Lá ma̱ndoo mbuʼyamajkuíí mbáa xa̱bu̱ bi̱ tseʼyamajkhulú ráʼ. (Atayáá ma̱ngaa xtiʼkhuu.)

⁶ Mbáa nurajximíjnalú: “Lá ma̱ndoo mbayamajkuu mbáa xa̱bu̱ bi̱ tséʼyamajkhuʼ ráʼ.” Ma̱ndoo. Gundxaʼwamíjna̱ ga̱jma̱a̱ numuu xkri̱da rígi̱. Rey Saúl niriyaʼ gamajkuu Jonatán bi̱ nindxu̱u̱ a̱ʼdióo náa inún eʼwíinʼ xa̱bu̱ (1 Sam. 20:​30-34). Mú Jonatán ndiʼyamajkuu má xúʼko̱ anu̱u̱ ga̱jma̱a̱ nimbáyúu náa nijkha gáxmína̱ʼ asndu índo̱ nikháñuu (Éx. 20:12; 2 Sam. 1:23). Ndxajkun Elí mbaʼ niʼthíí dí Ana najnga̱a̱ (1 Sam. 1:​12-14). Mú Ana niriʼñuu ga̱jma̱a̱ gamajkhu, maski ajndu xúgíinʼ xa̱bu̱ Israel nduyáá dí Elí taxprígúún e̱ji̱i̱n índo̱ nini̱ dí raʼkhí ga̱jma̱a̱ dí tséʼnimbánuu májánʼ ñajunʼ dí kajkuáa ñawuun dí nindxu̱u̱ ndxajkun (1 Sam. 1:​15-18; 2:​22-24). Tikhuun xa̱bu̱ bi̱ nikúwá náa Atenas nitawéñííʼ Pablo ga̱jma̱a̱ nithi dí “mbaʼ naʼthíí” (Hech. 17:18). Mú ikhaa niʼthúún má xúʼko̱ ga̱jma̱a̱ gamajkhu (Hech. 17:22). Xkri̱da rígi̱ nasngájmulú dí á mu nandulúʼ kuʼyáá Jeobá ga̱jma̱a̱ nandulúʼ mu̱ʼni̱ rí nanigu̱u̱ʼ, mbuʼyamajkún eʼwíinʼ maski ajndu ikhiin tséyamajkulú. Rí xúgi̱, guʼyáá tsíín gíʼmaa mbuyamajkún ga̱jma̱a̱ náá numuu.

GUʼYAMAJKÚN BI̱ KUʼÑÚÚN

7. Ndíjkha dí naʼniulú gakhi̱i̱ mbuʼyamajkún bi̱ kuʼñúún rá.

⁷ Ndíjkha naʼniulú gakhi̱i̱ rá. Índo̱ nakuwáanʼ mbóó gajmiúlú bi̱ kuʼñúún nduʼyáá náa dí najmiin nu̱ni̱ ga̱jma̱a̱ náa najngawi̱i̱n. Mbáa kua̱ʼda̱a̱ mbáa bi̱ kuʼyáá bi̱ naʼniuu nandii ga̱jma̱a̱ rígi̱ naʼni dí maʼniulú gakhi̱i̱ muñewa̱a̱n. Tikhuun numíníiʼ ga̱jma̱a̱ numuu dí naxmiéjúúnʼ wéñuuʼ, ikha jngóo nuni̱ o nutulúʼ dí naʼni gawúnlú. Tikhuun bi̱ kúwá mbá guʼwíin tséyamajkumijná, ikha jngóo na̱nguá kúwá tsímáá. Gundxa̱ʼwámi̱jna̱ ga̱jma̱a̱ numuu rígi̱. Índo̱ mbáa xa̱bu̱ naʼniuu mbá nandii, naʼni dí xuyuuʼ xáñajunʼ májánʼ. Xúʼko̱ má kayuuʼ índo̱ xa̱bu̱ bi̱ kúwá náa mbá guʼwíin tséyamajkumijná naʼni dí xákúwá mbá jnduʼ o xákúwá májánʼ. Mú, xó má mbáa xa̱bu̱ bi̱ naʼniuu nandii ma̱ndoo maguma thanáá, xúʼko̱ má ma̱ndoo majmañún mbuyamajkumijná bi̱ kúwá mbá guʼwíin.

8. Ndíjkha gíʼmaa mbuʼyamajkún bi̱ kuʼñúún rá. (1 Timoteo 5:​4, 8.)

⁸ Ndíjkha nduʼyamajkhún xá. (Atraxnuu 1 Timoteo 5:​4, 8.) Náa timbá i̱yi̱i̱ʼ dí Pablo niʼnirámáʼ náa inuu Timoteo niʼthí dí ndayóoʼ muni̱ bi̱ kúwá mbá guʼwíin mu muñeumíjna̱. Ma̱ngaa niʼthí dí gíʼmaa mbuʼyamajkún bi̱ kuʼñúún, raʼkháa numuu dí kaʼyulú mu̱ʼni̱, nindxu̱u̱ numuu dí nu̱ʼni̱ ñajuunʼ Dios, xóo muʼthá, numuu dí nandulúʼ kuʼyáá Jeobá ga̱jma̱a̱ índo̱ nduʼyamajkhún eʼwíinʼ, nduʼyamajkuíí ikhaa. Jeobá niʼni dí xa̱bu̱ makuwá mbá guʼwíin (Efes. 3:​14, 15). Ikha jngóo gíʼdoo numuu musngajmá dí nduʼyamajkhún bi̱ kuʼñúún, numuu rí xúʼko̱ nusngajmá rí nduʼyamajkuíí Jeobá.

9. Xú káʼnii gándoo gusngajmá rí nduyamajkumijná bi̱ nidamijná rá. (Atayáá ma̱ngaa xtiʼkhuu.)

⁹ Xú káʼnii gúsngajmá gamajkhu rá. Xa̱bu̱ bi̱ ninigúnʼ ndaʼyamajkuu a̱ʼgiu̱u̱ xó má índo̱ xtáa ga̱jma̱a̱ mbáwíí ga̱jma̱a̱ náa kúwá mbaʼin xa̱bu̱ (Prov. 31:28; 1 Ped. 3:7). Tséxnúu, tsériyaʼ gamajkuu ni má tséʼni maku̱mu̱u̱ dí ragíʼdoo numuu. Ndxájulú Arielb bi̱ xtáa náa Argentina naʼthí: “Numuu dí a̱ʼgiu̱ʼ gíʼdoo mbá nandii, ikha jngóo nguáná naʼthí ajngáa dí naʼni gawúnʼ, mú ikhú narmáʼáan a̱jkiu̱nʼ dí raʼkháa xúʼko̱ xóo phú eku̱mu̱u̱ ma̱ngaa narmáʼáan a̱jkiu̱nʼ dí naʼthí náa 1 Corintios 13:​5, rígi̱ nambáyuʼ mu mathu̱u̱n ga̱jma̱a̱ gamajkhu ma̱ngaa mu xákiʼnún ka̱yo̱o̱” (Prov. 19:11). A̱ʼgu̱ bi̱ ninújunʼ ndaʼyamajkuu ajmbio̱o̱ índo̱ naʼthí dí májánʼ ga̱jma̱a̱ numuu (Efes. 5:33). Tséʼthá numuu, na̱nguá etsíjmaa, tsériyaʼ gamajkuu ni má tséʼthá wéñuuʼ, numuu dí ndaʼyoo dí rígi̱ maʼni dí xákuwá májánʼ (Prov. 14:1). Mbáa ndxájulú bi̱ xtáa náa Italia bi̱ gíʼdaa mba̱yi̱i̱ʼ bi̱ namínúuʼ ga̱jma̱a̱ numuu dí naxmiéjuunʼ, ikhaa naʼthí: “Nguáná naku̱mu̱ʼ dí ikhaa mbaaʼ exmiéjúúnʼ, nákha niʼníí tsésngajmá rí ndayamajkhuu ga̱jma̱a̱ ajngáa rí na̱tha̱ ma̱ngaa xóo eni̱ inuʼ. Mú ndi̱yo̱o̱ rí mambajxúúʼ gajmíʼ xa̱bu̱ bi̱ nduyamajkhún eʼwíinʼ nambáyuʼ mbayamajkuu a̱jmbio̱ʼ”.

10. Ndiéjuunʼ gándoo muni̱ e̱ji̱n mu musngajmúún rí nduyamajkhún xabuanii rá.

¹⁰ E̱ji̱n, gu̱nimba̱la kuñu̱u̱n xabuanii ma̱ngaa guthu̱u̱n ga̱jma̱a̱ gamajkhu (Éx. 21:17; Efes. 6:​1-3). Índo̱ ikhiin naʼni wanii mbáa mbaʼyóoʼ dí muñewu̱u̱n. Ikha jngóo guʼni tsiakimijna muñewu̱u̱n májánʼ. Guʼyáá xkri̱da ndrígóo mbáa ndxájulú bi̱ mbiʼyuu María. Índo̱ anu̱u̱ bi̱ na̱nguá nindxu̱u̱ Testigo niʼniuu nandii, ikhaa ndiyóoʼ mañewu̱u̱n, mú anu̱u̱ na̱nguá ndiʼyamajkuu xúgíʼ dí ikhaa niʼni. María naʼthí: “Nitakáñuu Jeobá dí mambáyuʼ mbayamajkuu anu̱ʼ ga̱jma̱a̱ dí maʼngo̱ʼ masngajmúu gamajkhu. Nandxa̱ʼwa̱mínáʼ, á mu Jeobá nando̱ʼo̱ʼ dí mbayamajkúún xabuanii ikhaa má gámbáyúʼ mu ma̱ni̱ rígi̱. Nda̱wa̱á nijkhánú nikro̱ʼo̱ʼ dí gíʼdoo numuu mbayamajkuu anu̱ʼ maski ajndu ikhaa tséʼyamajkhuu dí na̱ni̱”. Índo̱ nduʼyamajkhún bi̱ kuʼñúún maski ajndu ikhiin tséyamajkulú, nusngajmá rí nduʼyamajkuíí Jeobá bi̱ niʼni rí makuwáanʼ mbá guʼwáanʼ.

GUʼYAMAJKÚN A̱NGIU̱LÚ

11. Ndíjkha rí naʼniulú gakhi̱i̱ mbuʼyamajkún a̱ngiu̱lú rá.

¹¹ Ndíjkha naʼniulú gakhi̱i̱ rá. Gajkhun má dí a̱ngiu̱lú nuni̱ tsiakimíjna̱ munimbáníí dí naʼthí náa Biblia. Mú, mbáa nguáná xúniulúʼ rí májánʼ, mbáa muthi dí raʼkhí ga̱jma̱á numulú o asndu muni̱ mbá rí maʼni makiʼnáánʼ. Á mu ikháánʼ guáʼdáá mbá numuu rí muxiéʼkhá ga̱jma̱a̱ numuu mbáa ndxájulú, mbáa maʼniulú gakhi̱i̱ mbuʼyamajkuíí (Col. 3:13). Mú, ndiéjunʼ gándoo gámbáyulú rá.

12. Ndíjkha gíʼdoo numuu mbuʼyamajkún a̱ngiu̱lú rá. (2 Pedro 2:​9-12.)

¹² Ndíjkha nduʼyamajkhún xá. (Atraxnuu 2 Pedro 2:​9-12.) Náa raga̱jma̱ i̱yi̱i̱ʼ dí niʼnirámáʼ Pedro niʼthí dí tikhuun cristianos bi̱ nikúwá nákha siglo timbá tusngajma gamajkhu náa xa̱bu̱ “gamajkhun”, xóo muʼthá bi̱ nindxu̱ún ancianos. Ndiéjunʼ nini̱ ángeles índo̱ ndiyáá dí xígi̱ kaʼnii xtáa rarígá rá. Pedro niʼthí dí na̱nguá nitha wéñúúnʼ xa̱bu̱ bugi̱ bi̱ na̱nguá guáʼdáá gamajkhún numuu rí nduyamajkuíí Jeobá. Maski ajndu ángeles nindxu̱ún jmbiin, mú túthi dí raʼkhí ga̱jma̱a̱ numún xa̱bu̱ bugi̱. Rí phú nini̱, niniñaaʼ dí Jeobá mandiʼíín cuenta ga̱jma̱a̱ dí ikhaa maxprígún (Rom. 14:​10-12; atani̱ mbríguii ga̱jma̱a̱ Judas 9). Mbaʼa dí ma̱ndoo majmañulú náa ángeles. Á mu nduʼyamajkhún xa̱bu̱ bi̱ nuxkulú, xúʼko̱ má gíʼdoo numuu dí mbuʼyamajkún a̱ngiu̱lú. Gináánʼ ikháánʼ gíʼmaa mbuʼyamajkún (Rom. 12:10). Xúʼko̱ musngajmá rí nduʼyamajkuíí Jeobá.

13, 14. Xú káʼnii ma̱ndoo musngajmúún dí nduʼyamajkhún a̱ngiu̱lú rá. (Atayáá ma̱ngaa xtiʼkhuu.)

¹³ Xú káʼnii gúsngajmá gamajkhu rá. Ancianos gusngajmá dí nandala kuñu̱u̱n eʼwíinʼ índo̱ gúsngaa (Filem. 8, 9). Á mu ndayóo mataxpríguíí mbáa gajmaaʼ ajngáa wabaʼ ga̱jma̱a̱ xátriyíí. A̱ngiu̱lú gu̱ʼu̱ xúnila xtujtaa ma̱ngaa xutha dí raʼkhí ga̱jma̱a̱ numún eʼwíinʼ, mu xúʼko̱ marigá dí tsímáá náa congregación (Tito 2:​3-5). Xúgiáanʼ ma̱ndoo musngajmá dí nduʼyamajkhún ancianos, índo̱ numbáñún ma̱ngaa índo̱ nuxníí núma̱aʼ ga̱jma̱a̱ numuu xúgíʼ ñajunʼ dí nuni̱ mu marigá reunión, mu magajnulúʼ gúʼtaraʼa ma̱ngaa mu mumbáñún bi̱ nuni̱ dí raʼkhí (Gál. 6:1; 1 Tim. 5:17).

¹⁴ Mbáa ndxájulú bi̱ mbiʼyuuʼ Rocío niʼniuu gakhi̱i̱ mbaʼyamajkuu mbáa anciano bi̱ nixnúu consejo. Ikhaa naʼthí: “Niku̱mu̱ʼ dí i̱ndó niríyúʼ, náa goʼwóʼ natha númuu, niniminaʼ dí xákujmaa dí tséku̱mu̱ʼ ka̱yo̱o̱, mú nandxa̱ʼwa̱mínáʼ dí tsixmiéjuun kaʼyoʼ ga̱jma̱a̱ na̱nguá nindoʼ gánimbánuu consejo dí nixnúʼ”. Ndiéjunʼ nimbáyúu xá. Ikhaa naʼthí xóó: “Niguxnuu 1 Tesalonicenses 5:​12, 13, ga̱jma̱a̱ ndi̱yo̱o̱ dí na̱nguá xtáá rayamajkuu ndxájulú, ikhú ndi̱yo̱o̱ dí raʼkhí dí xtáá rani̱, nitakáñuu Jeobá ga̱jma̱a̱ ndiʼyáʼ náa i̱yi̱i̱ʼ ndrígulú dí mambáyuʼ mariʼkhu̱u̱ xóo eni̱. Nda̱wa̱á ndi̱yo̱o̱ dí raʼkháa aʼkhúún ndxájulú, ikhúún ndayóoʼ mani̱ndxu̱ʼ xa̱bu̱ wabaaʼ mu masngajmá dí ndayamajkhuu. Nda̱yo̱o̱ má dí ndayóoʼ mariʼkumina̱a̱ʼ xóó, mú naʼni̱i̱ a̱jkiu̱nʼ rí Jeobá ndaʼyoo dí nani tsiakimínáʼ”.

GUʼYAMAJKÚN BI̱ NA̱NGUÁ NINDXU̱ÚN TESTIGOS

15. Ndíjkha nguáná naʼniulú gakhi̱i̱ mbuʼyamajkún bi̱ na̱nguá nindxu̱ún Testigos rá.

¹⁵ Ndíjkha naʼniulú gakhi̱i̱ rá. Nguáná náa najkhualú gúʼtáráʼa nuxkamiin xa̱bu̱ bi̱ tsénigu̱u̱nʼ mudxawíín ga̱jma̱a̱ numuu Dios ni má dí naʼthí náa Biblia (Efes. 4:18). Tikhuiin tsíñún gúdxawu̱nlú ga̱jma̱a̱ numuu rí nijuiʼsngúún nákhá majkhiinʼ. Ma̱ngaa kúwá xa̱bu̱ bi̱ nuñajunʼ gajmiúlú o compañeriulú náa escuela bi̱ nda̱a̱ gamajkhún. O mbáa patriúnlu o maestriulu tséʼyamajkuu dí nu̱ʼni̱. Rígi̱ ma̱ndoo maʼni dí mangáanʼ ní xúʼyamajkún ga̱jma̱a̱ muniʼñááʼ ruʼniu̱u̱n dí májánʼ.

16. Ndíjkha gíʼdoo numuu dí mbuʼyamajkún bi̱ xóó tsénindxu̱ún xa̱bi̱i̱ Jeobá rá. (1 Pedro 2:12; 3:15.)

¹⁶ Ndíjkha nduʼyamajkhún xá. Gármáʼáan a̱jkiu̱lú dí Jeobá ndaʼyoo xóo eʼñu̱u̱n bi̱ na̱nguá nindxu̱ún Testigos. Apóstol Pedro niʼni marmáʼáan a̱jkiu̱ún cristianos dí á mu nugíʼ mbá májánʼ xkri̱da rúʼko̱ gáʼni dí tikhuun xa̱bu̱ muxkajxi̱i̱n muni̱ mba̱a̱ Dios, ikha jngóo niʼthúún rí índo̱ gúthi rí nunimbu̱u̱n ‹gíʼmaa muni̱ ga̱jma̱a̱ gamajkhu, ma̱ngaa xákiʼníin› (atraxnuu 1 Pedro 2:12; 3:15). Índo̱ ikhiin gútambáyíí dí nunimbu̱u̱n náa inuu xa̱bu̱ ñajunʼ o inuu asndu tsáá má xa̱bu̱, gíʼmaa dí musngajma dí guáʼdáá gamajkhún, muni̱ xó má gúni á mu Dios xtáa ikhí. Jeobá ndaʼyoo xúgíʼ dí nu̱ʼni̱ ga̱jma̱a̱ naʼdxawuun xúgíʼ rí nuʼthá. Ikha jngóo gíʼdoo numuu rí mbuʼyamajkún bi̱ na̱nguá nindxu̱ún Testigos.

17. Xú káʼnii esngajmá rí nduʼyamajkhún bi̱ na̱nguá nindxu̱ún Testigos rá.

¹⁷ Xú káʼnii gúsngajmá gamajkhu rá. Índo̱ na̱jkua̱ gúʼtáráʼa, tsíyulú musngajmúún xa̱bu̱ rí ikháanʼ itháán najmañulú dí naʼthí náa Biblia ki xóo ikhiin. Gármáʼáan a̱jkiu̱lú dí ikhiin kuáʼdáá numún náa iduu Dios ga̱jma̱a̱ ikháanʼ nduʼñún xó má eʼñún Dios (Ageo 2:7; Filip. 2:3). Ikha jngóo á mu mbáa naʼniulú dí raʼkhí ga̱jma̱a̱ numuu dí nuʼnimbulú, ikháanʼ xútanga̱án muʼni̱i̱ dí raʼkhí. Ni má xágiʼdu gajmiúlú o xúʼtháán dí maʼni makiʼnáa (1 Ped. 2:23). Á mu nuʼtháán mbá dí rakáʼyoo, mbá nacha̱ gúʼthán dí maʼni mba̱a̱ a̱jkiu̱u̱n kaʼyulú. Xú káʼnii gusngajmá gamajkhu náa nuñajunʼ rá. Ndayóoʼ muñajunʼ gakhi̱i̱ ga̱jma̱a̱ muʼnimíjna̱ mbuʼyáá náa dí májánʼ rí nuni̱ bi̱ nuñajunʼ gajmiúlú ga̱jma̱a̱ patriúnlú (Tito 2:​9, 10). Ma̱ngaa gíʼdoo numuu rí xúʼni̱ nduwaʼ. Á mu nuʼni xúgíʼ rígi̱, maski ajndu xa̱bu̱ tsénigu̱u̱nʼ dí nu̱ʼni̱, mú kúwáanʼ ru̱ʼni̱ dí nanigu̱u̱ʼ Jeobá (Col. 3:​22, 23).

18. Ndíjkha gíʼdoo numuu mbuʼyamajkún eʼwíinʼ rá.

¹⁸ Kuaʼdáá mbaʼa numuu rí mbuʼyamajkún eʼwíinʼ. Nijmañulúʼ dí á mu nduʼyamajkhún bi̱ kuʼñúún, makuwáánʼ ruʼyamajkuíí Jeobá bi̱ niʼni rí makuwáanʼ mbá guʼwáanʼ. Xúʼko̱ má ma̱ngaa á mu nduʼyamajkhún a̱ngiu̱lú, makuwáánʼ ruʼyamajkuíí Anu̱lú bi̱ xtáa mekhuíí. Ga̱jma̱a̱ á mu nduʼyamajkhún xa̱bu̱ bi̱ na̱nguá nindxu̱ún Testigos, mbáa rígi̱ gáʼni dí mangiin maguánú mbuyamajkuíí Dios ndrígulú. Maski ajndu makuwá tikhuun bi̱ xúyamajkulú, mú, á mu ikháanʼ nduʼyamajkhún, Jeobá maʼni tsajkurámáánʼlú. Ikhaa naʼthí: “Mbayamajkún bi̱ nduyamajkhuʼ” (1 Sam. 2:30).