Gumbáñún mbá nacha̱ bi̱ nandún majmañún

1. Ndiéjunʼ eni̱ xa̱bu̱ índo̱ nuʼtáruʼúún rá. (Hechos 13:​47, 48; 16:​14, 15.)

NÁKHÁ timbá siglo mbaʼin xa̱bu̱ nidxúún índo̱ nidxawíín ga̱jma̱a̱ numuu Jesús ga̱jma̱a̱ mbá nacha̱ ninindxu̱ún xa̱bi̱i̱ (atraxnuu Hechos 13:​47, 48; 16:​14, 15). Ikháá má kayuuʼ rí mbiʼi xúgi̱, kúwá xa̱bu̱ bi̱ nanigu̱u̱nʼ mudxawíín índo̱ nuʼthúún timbá míʼtsú ajngáa dí májánʼ. Tikhuiin bi̱ tsénigu̱u̱nʼ mudxawíín nákhá wapháá mú nda̱wa̱á nandún majmañún. Ndiéjunʼ gúʼni á mu nuxkamaa mbáa xa̱bu̱ bi̱ nandoo majmañuu ga̱jma̱a̱ numuu Dios ga̱jma̱a̱ dí eʼthí náa Biblia rá.

2. Ndíjkha ma̱ndoo mumbríguíiʼ dí nuʼtáráʼa ga̱jma̱a̱ ñajunʼ dí naʼni xa̱bu̱ bi̱ naʼdu rá.

² Dí nuʼtáraʼa nindxu̱u̱ xóo ñajunʼ dí naʼni bi̱ naʼdu. Rígá tikhu fruta dí nakhi̱i̱ wapháá ikha jngóo mbaʼyóoʼ mixtagijxi̱i̱, mú rígá tikhu fruta dí xóó tsékhíi ikha jngóo bi̱ naʼdu mbaʼyóoʼ maxtíjyooʼ ga̱jma̱a̱ mañewu̱u̱n. Ikháá má kayuuʼ, kúwá xa̱bu̱ bi̱ mbá nacha̱ nundrigú ajngáa rí nuʼtáraʼa ga̱jma̱a̱ numbáñunlú mu mani̱ndxu̱ún xa̱bi̱i̱ Cristo, mú, makuwá tikhuun bi̱ mbaʼyóoʼ muʼsngúún má xúʼko̱ ga̱jma̱a̱ numuu Dios ga̱jma̱a̱ dí eʼthí náa Biblia (Juan 4:​35, 36). Índo̱ gúʼyáá dí xa̱bu̱ naniguu maʼdxawuun, guʼyááʼ xóo ma̱ndoo mumbáyíí, xúʼko̱ má bi̱ naʼniuu gakhi̱i̱ maʼnimboo mbá nacha̱. Náa artículo rígi̱ mbuʼyáá ndiéjunʼ gúʼni á mu timbá míʼtsú dí nuʼtámíjná gajmiúlú xa̱bu̱ nduʼyáá dí naniguuʼ maʼdxawuun ma̱ngaa mbuʼyáá ndiéjunʼ gúʼni mu ma̱ndoo mumbáyíílú mu mambajxúu ga̱jma̱a̱ Dios ma̱ngaa mu maʼga̱nú mani̱ndxu̱u̱ xa̱bi̱i̱.

Á MU XA̱BU̱ NANIGUUʼ MAʼDXAWUUN

3. Ndiéjunʼ gúʼni á mu nuxkamaa mbáa bi̱ naniguuʼ maʼdxawuun náa nuʼtáraʼa rá. (1 Corintios 9:26.)

³ Á mu náa nuʼtáráʼa nuxkamaa mbáa bi̱ naniguuʼ maʼdxun, gumbáyíílú mu maniniiʼ Jeobá ma̱ngaa rí mambajxúu májánʼ ga̱jma̱a̱. Guʼtháán dí á mu nandoo, ma̱ndoo muʼsngáá ga̱jma̱a̱ numuu Biblia ma̱ngaa ma̱ndoo muʼthán dí maʼga reunión (atraxnuu 1 Corintios 9:26).

4. Arathá mbá xkri̱da náa nasngájmaa dí kúwá xa̱bu̱ bi̱ nundrigú mbá nacha̱ dí munigajmaa.

⁴ Aratháán dí marasngáá. Kúwá xa̱bu̱ bi̱ mbá nacha̱ eguáʼdi̱i̱ enigajma̱a̱. Guʼyáá dí nirígá náa Canadá. Mbóo mbiʼi jueves, mbáa dxáʼgú nijkha kanuuʼ náa carrito ga̱jma̱a̱ niguajthun folleto ¡Araxtaa gagi kámuu mbiʼi! Ndxájulú niʼthúu̱n dí ma̱ndoo miʼsngáá ga̱jma̱a̱ follleto rúʼko̱ ga̱jma̱a̱ rí xáxtumaan. Ndxáʼgú niʼthí dí manigu̱u̱ʼ rí miʼsngáá ga̱jma̱a̱ niniñuuʼ númeriuu ma̱ngaa ndxájulú nixnúu númeriuu. Ikháá má mbiʼi rúʼko̱, dxáʼgú nixuʼma mbá mensaje náa inuu ndxájulú náa nirajxu̱u̱ nguáná gúniga̱jma̱a̱, ndxájulú niʼthúu̱n dí índo̱ gámbáa xmáná, mú dxáʼgú niʼthí: “Náá numuu dí tséʼniga̱jma̱a̱lú gájtsíí rá.” Dí viernes niguáʼdi̱i̱ ninigajmaa, xmáná má rúʼko̱ nijkha reunión ga̱jma̱a̱ mbá nacha̱ nijkha rambájxu̱u̱ ga̱jma̱a̱ Jeobá.

5. Ndiéjunʼ gíʼmaa marmáʼáan a̱jkiu̱lú índo̱ gúʼthán xa̱bu̱ dí muʼsngáá ga̱jma̱a̱ numuu Biblia rá. (Atayáá ma̱ngaa xtiʼkhuu.)

⁵ Gajkhun má dí nguáná makuwá tikhuiin xa̱bu̱ bi̱ xáguáʼdi̱i̱ munigajma̱a̱ mbá nacha̱. Mú, garmáʼáan a̱jkiu̱lú dí nguáná mbaʼyóoʼ muʼthúún dí nanigu̱u̱nʼ ikhiin mu xúʼko̱ maʼndún mudxawunlú. Ragíʼmaa makánájkulú mbá nacha̱ ga̱jma̱a̱ gíʼmaa maxmiéjunlú kuʼñúún. Ndiéjunʼ gáratha̱a̱n xa̱bu̱ mu ma̱ndoo matagíʼdi̱i̱ marasngáá rá. Guʼyáá dí nithi tikhuun a̱ngiu̱lú bi̱ tséʼniún gakhi̱i̱ muguáʼdi̱i̱ musngúún xa̱bu̱.

6. Ndiéjunʼ gúʼthán xa̱bu̱ mu ma̱ndoo matangaán muʼtamíjná gajmiúlú dí naʼthí náa Biblia rá.

⁶ A̱ngiu̱lú bugi̱ nuthi dí nguáná itháan májánʼ dí xájmulú ajngáa xóo: Masngáa, matanigajma̱a̱. Itháan májánʼ rí muʼthán: Muʼtámíjná, majmañaaʼ, matayaa dí eʼthí náa Biblia. Mu ma̱ndoo matangaán muʼtamíjná gajmiúlú ma̱ndoo muʼthá: “Ra̱ʼkhá tháán mitsaanʼ dí náa Biblia naxtiʼña̱a̱ dí nurajxi̱míjnalú” o “náa Biblia raʼkháa i̱ndó na̱ʼkha̱ raʼthí ga̱jma̱a̱ numuu Dios ma̱ngaa kagu̱ consejo dí nambáyulú”. Ma̱ngaa ma̱ndoo maratha̱a̱n xóó: “Ma̱ndoo majmañaaʼ mbaʼa dí mambáyáaʼ náa kááʼ 10 o 15 minuto”. Tséyóoʼ má maratha̱a̱n dí midxuʼ mámbá semana, mu xúʼko̱ xa̱bu̱ xákumu̱u̱ dí natatsudaaʼ maʼniga̱jma̱a̱.

7. Ndiéjunʼ nambáñúún xa̱bu̱ mu mbuyáá dí nixkamaa dí gajkhun rá. (1 Corintios 14:​23-25.)

⁷ Aratháán maʼga reunión. Nákhá nixtáa apóstol Pablo mbaʼin xa̱bu̱ ndiyáa dí nixkamaa rí gajkhun índo̱ nigún timbá míʼtsú reunión (atraxnuu 1 Corintios 14:​23-25). Ikháá má kayuuʼ narígá rí mbiʼi xúgi̱. Mbaʼin xa̱bu̱ nambájxu̱u̱n itháan nacha̱ gajmiún Jeobá índo̱ nagún reunión. Mú, nguáná ma̱ndoo muʼthúún dí magún reunión xá. Náa libro Araxtaa gagi, náa kíxnuu 10 naʼthún bi̱ nunigajmaa dí gagún reunión, mú tséyóoʼ muguaʼthi̱i̱n asndu maguánú ikhí mu muthúnlú. Asndu nákhá timbá míʼtsú dí nuʼtámíjná gajmiúlú, ma̱ndoo muʼthán dí maʼga reunión dí narígá índo̱ naguámbáa xmáná, mbáa ma̱ndoo muʼthá rí kayá edxu̱u̱ discurso dí majuixná o mbá dí ma̱ʼkha̱ raʼthí náa artículo dí muʼnigajmaa xmáná rúʼko̱ náa i̱yi̱i̱ʼ Bi̱ Nayejngoo.

8. Ndiéjunʼ ma̱ndoo muʼthán xa̱bu̱ bi̱ nuʼtháán maʼga reunión rá. (Isaías 54:13.)

⁸ Índo̱ gúʼthán xa̱bu̱ dí maʼga reunión ma̱ndoo muʼthán xóo mixtiʼkhu eʼnilú ikháanʼ ga̱jma̱a̱ xóo eni̱ i̱ʼwáʼ religión dí ikhaa naninuuʼ. Nda̱wa̱á dí mbáa a̱ʼgu̱ ndiʼyoo xóo eʼnigajmaa i̱yi̱i̱ʼ Bi̱ Nayejngoo, nirajxu̱u̱ ndxájulú bi̱ naʼsngóo: “Bi̱ naʼni grajxe̱, ndaʼyoo dí mbiʼyuu mámbáa ráʼ.” Ndxájulú niʼthúu̱n dí congregación nindxu̱u̱ xóo mbá familia, ikha jngóo nuʼnimíjna muniʼnúuʼ dí mbiʼyuu mámbáa. A̱ʼgu̱ niʼthí dí náa na̱jkha̱ ikhaa, na̱nguá eyá dí mbiʼñún eʼwíinʼ. Májánʼ gáʼni dí muʼthúún náá numuu dí nagimbáánʼlú, numuu dí mbaʼin na̱nguá eyá (atraxnuu Isaías 54:13). Nagimbáánʼlú mu mbuʼyamajkuíí Jeobá, najmañulú ga̱jma̱a̱ numuu ma̱ngaa nuxnamíjnalú tsiaki̱i̱ (Heb. 2:12; 10:​24, 25). Ikha jngóo asndu nákhá wapháá nagájnuu awan ndiéjunʼ gúʼniga̱jma̱a̱, raʼkháa mbóó dí ejmañulú o kikháá dí e̱ʼni̱ga̱jma̱a̱ (1 Cor. 14:40). Numuu dí índo̱ nagimbáánʼ najkua̱lú mu majmañulú, ikha jngóo Guʼwá náa nagimbáanʼ niguma májáánʼ mu xáʼniu̱lú gakhi̱i̱ muʼgíiʼ edxulú muʼdxawíín. Ma̱ngaa tséxuʼdamijnálu náa política ni má tsémbáñún xa̱bu̱ ñajunʼ. Índo̱ nagimbáánʼ tségi̱ʼdu̱lú ni má tséndxaʼwaská, ma̱ngaa ma̱ndoo musngajmáá video Káʼnii erígá náa Guʼwá nagimbáanʼ rá. Mu mbaʼyoo ndiéjunʼ eʼnilú.

9, 10. Á mu nuʼtháán mbáa dí maʼga reunión, xú káʼnii gúmbáyíí mu xámíñuu maʼga xá. (Atayáá ma̱ngaa xtiʼkhuu.)

⁹ Mbaʼin tsíñún gágún reunión numuu dí namíñún dí majuiʼthúún dí ndayóoʼ mani̱ndxu̱ún testigos de Jeobá. Ikha jngóo guʼtháán xa̱bu̱ dí nanigulúʼ índo̱ nagún bi̱ na̱nguá nindxu̱ún Testigos, ma̱ndoo maʼga mu i̱ndó maʼdxawuun. Nimbáa xátsudaaʼ mu maxújxi ñawúunʼ ga̱jma̱a̱ mu mani̱ndxu̱u̱ Testigo. E̱ji̱n najuiʼsngún ikháá má dí najmañún xabuanii, ikha jngóo bi̱ kúwá mbá guʼwíin ma̱ndoo magún ga̱jma̱a̱ matrigi̱i̱n mbóó gajmiún e̱jñu̱ún. Xúʼko̱ xabuanii nduyáá náá kúwá e̱jñu̱ún ga̱jma̱a̱ ndiéjunʼ ejuiʼsngún (Deut. 31:12). Tsénda̱ʼa̱xu̱ mbújkha̱a̱, numuu dí Jesús niʼthí: “Nimina̱ánʼla, ikha jngóo guxna̱ála mangáanʼ” (Mat. 10:8). Ma̱ngaa, ma̱ndoo muʼthán xa̱bu̱ dí tséyóoʼ má magúwúunʼ xtíin minumuu. Numuu rí Dios ndaʼyoo dí gíwánʼ náa a̱jkiu̱ún xa̱bu̱, tséʼyoo dí kááʼ mbájníí (1 Sam. 16:7).

¹⁰ Á mu xa̱bu̱ ni̱jkha̱ reunión, atambáyíí mu manigu̱u̱ʼ. Aratháán tsíin nindxu̱ún ancianos ma̱ngaa atasngájmiún eʼwíinʼ a̱ngiu̱lú. Á mu naniguuʼ xóo nixtáa náa reunión mbáa manigu̱u̱ʼ ma̱ʼkha̱ mbu̱júu̱. Á mu tayéʼga Biblióo, ma̱ndoo muxnatíʼñáá dí najmulú ikháanʼ, gumbáyíí mbayáʼ texto ga̱jma̱a̱ gumbáyíí makro̱ʼo̱o̱ discurso dí najuixná.

Á MU NIGUÁʼDI̱I̱ NIʼNIGAJMAA GAJMIÚLÚ MBÁA

11. Xú káʼnii esngajmá dí nduʼyáá dí xa̱bu̱ gíʼdoo ñajunʼ dí maʼni rá.

¹¹ Ndiéjunʼ gúʼni á mu niguáʼdi̱i̱ niʼnigajmaa gajmiúlú mbáa xa̱bu̱ rá. Garmáʼáan a̱jkiu̱lú dí xa̱bu̱ gíʼdoo ñajunʼ dí maʼni, ikha jngóo á mu niʼthá muʼgua mbá hora guʼnimbáníí ajngúlú maski ajndu xa̱bu̱ tségu̱ʼúún muni̱ rígi̱. Ma̱ngaa, timbá míʼtsú dí gúʼnigajma̱a̱, xájyúlú wéñuuʼ. Tikhuun a̱ngiu̱lú bi̱ guáʼdiin mbaʼin bi̱ nusngúún nuthi dí á mu niʼtálú má nguáthá mbayuuʼ gájyulú mu muʼnigajmaa, guʼnimbáníí ajngúlú maski ajndu xa̱bu̱ nandún munigajmaa xóó. Guniʼñááʼ dí maʼthí xóo eku̱mu̱u̱ ga̱jma̱a̱ ndiéjunʼ endxa̱ʼwáminaʼ (Prov. 10:19).

12. Ndiéjunʼ nandulúʼ dí majmañuu xa̱bu̱ asndu nákhá timbá míʼtsú dí nuʼsngáá rá.

¹² Asndu nákhá timbá míʼtsú dí nuʼsngáá xa̱bu̱ ga̱jma̱a̱ numuu Biblia nandulúʼ dí maniniiʼ ga̱jma̱a̱ maʼndoo kaʼyoo Jeobá ma̱ngaa Jesús, ikha jngóo índo̱ gúʼsngáa gajmulú Biblia, xúʼthá i̱ndó rí najmañulú ikháanʼ (Hech. 10:​25, 26). Apóstol Pablo nigíʼ mbá májánʼ xkri̱da, índo̱ niʼsngúún xa̱bu̱ niʼthí ga̱jma̱a̱ numuu Jesús bi̱ Jeobá nikunguaaʼ mu mambáyulú muniʼníiʼ ga̱jma̱a̱ maʼndulú kuʼyáá (1 Cor. 2:​1, 2). Pablo ma̱ngaa nimbáñún a̱ngui̱i̱n mu mbuyáá dí gíʼdoo numuu mumbañún bi̱ ndiʼkhún eguáʼdi̱i̱ mu mani̱ndxu̱ún míjíinʼ xa̱bu̱ xó má gíʼdoo numuu oro, plata ga̱jma̱a̱ itsí rí mitsaanʼ (1 Cor. 3:​11-15). Xóo rí musngajma dí guáʼdáá fe, ku̱ma̱, nundxa̱ʼwa̱ májánʼ edxu̱ún ga̱jma̱a̱ rí namíñúún kuyáá Jeobá (Sal. 19:​9, 10; Prov. 3:​13-15; 1 Ped. 1:7). Guʼyaridáá xkri̱doo ga̱jma̱a̱ gumbáñún bi̱ nuʼsngúún mu maguaʼdáá mbá fe gújkhúʼ ga̱jma̱a̱ mambajxúún májánʼ gajmiún Anu̱lú bi̱ nandoo kaʼyulú bi̱ xtáa mekhuíí (2 Cor. 1:24).

13. Xú káʼnii gúsngajmá dí naʼngo̱o̱ a̱jkiu̱lú ga̱jma̱a̱ nakru̱ʼu̱lú kuʼyáá bi̱ nuʼsngáá rá. (2 Corintios 10:​4, 5; atayáá ma̱ngaa xtiʼkhuu.)

¹³ Gaʼngo̱o̱ a̱jkiu̱lú ga̱jma̱a̱ gakru̱ʼu̱lú kuʼyáá bi̱ nuʼsngáá xó má niʼni Jesús. Xurajxi̱i̱ mbá dí maʼni matiyuuʼ. Á mu nduʼyáá dí rígá mbá dí tséʼngo̱o̱ gákro̱ʼo̱o̱, tséyóoʼ má muʼnigajmalú má xúʼko̱ asndu náá makro̱ʼo̱o̱, itháán má májánʼ dí manújngulú i̱mba̱ punto ga̱jma̱a̱ nda̱wa̱á ma̱ndoo matangáanʼlú mbuʼyáá. Xútsudaaʼlú maʼnimboo mbá nacha̱ dí na̱ʼkha̱ náa Biblia, guníʼñááʼ dí mañu mañúú gáʼga̱nú asndu náa a̱jkiu̱u̱n dí xtáa rajmañuu (Juan 16:12; Col. 2:​6, 7). Náa Biblia naʼni mbríguíiʼ kiʼsngáa dí nduwaʼ “xóo mbá muro rí wíji̱ májánʼ” dí ndayóo muʼni gámbáa (atraxnuu 2 Corintios 10:​4, 5; atayáá ma̱ngaa nota “derrumbar cosas fuertemente atrincheradas” dí na̱ʼkha̱ náa Biblia de estudio). Mu xa̱bu̱ maniñuuʼ dí naguʼwuun naʼni, ginii ndayóoʼ mumbáyíí maku̱mu̱u̱ kaʼyoo Jeobá (Sal. 91:9).

Á MU XA̱BU̱ NA̱ʼKHA̱ REUNIÓN

14. Xóo gúndríguíin bi̱ naguwáʼ reunión rá.

¹⁴ Jeobá nandoo dí mundriguíin májánʼ xa̱bu̱ bi̱ naguwáʼ reunión ga̱jma̱a̱ dí musngajmá dí nandulúʼ kuʼñúún, tséʼniuu tsíín nindxu̱ún, náa eguwáʼ, á mu guáʼdáá mbújkha̱a̱ o na̱nguá (Sant. 2:​1-4, 9). Guʼyáá xóo gúʼnilú rígi̱.

15, 16. Ndiéjunʼ gúʼni mu bi̱ ndiʼkhún eguáʼdi̱i̱ egún reunión manigu̱u̱nʼ rá.

¹⁵ Tikhuun xa̱bu̱ i̱ndó nagún reunión numuu rí nandún mbuyáá ndiéjunʼ eʼnilú o mbáa bi̱ xtáa mijngii niʼthún rí magún. Ikha jngóo á mu nduʼyáá dí na̱jkha̱nú mbáa nuxi̱ʼ, guʼtháán rí májánʼ niʼni dí ni̱ʼkha̱. Ma̱ndoo muʼthán mutrigáanʼ mbóó gajmiúlú, guxnáá mbóoʼ Biblia, i̱yi̱i̱ʼ dí majmulú náa reunión o ma̱ndoo muxnatiʼñáán i̱yi̱i̱ʼ dí najmulú ikháanʼ mu mbuʼyáá mbóó gajmiúlú. Ndiéjunʼ imbo̱ʼ ma̱ndoo muʼni mu manigu̱u̱ʼ reunión xá. Guʼyáá mbá xkri̱da, mbáa xa̱bu̱ bi̱ ni̱jkha̱ náa Guʼwá nagimbáanʼ narmáʼáan a̱jkiu̱u̱n dí índo̱ ni̱jkha̱ reunión nikumu̱u̱ dí xtíñuu na̱nguá eʼkuri̱yo̱o̱ʼ, mú ndxájulú bi̱ nigruiguíi niʼthúu̱n dí xáxmiéjuunʼ, numuu dí testigos de Jeobá nindxu̱lú xó má eʼwíinʼ xa̱bu̱. Xa̱bu̱ buʼko̱ ni̱jkha̱nú nijngúun iyááʼ ga̱jma̱a̱ nditháan támbumuu rí niʼthúu̱n ndxájulú. Índo̱ mbáa gáʼkha̱ reunión, gura̱xi̱i̱, gaxmiéjunlú kuʼyáá, mú ragíʼmaa muʼni̱i̱ wéñuuʼ grajxe̱ o murajxi̱ mbá dí maʼni mati̱yu̱u̱ʼ (1 Ped. 4:15).

¹⁶ Ndiéjunʼ imbo̱ʼ ma̱ndoo muʼni mu xa̱bu̱ manigu̱u̱nʼ reunión rá. Índo̱ nuʼtámijná gajmiúlú a̱ngiu̱lú, índo̱ nuxná comentario, o nanújngulú náa plataforma gíʼmaa muñewa̱a̱n rí nuʼthá ga̱jma̱a̱ numún bi̱ na̱nguá nindxu̱ún Testigos o ga̱jma̱a̱ numuu rí nuni̱ o nunimbu̱ún. Xúʼthá mbá dí maʼni magawúúnʼ ga̱jma̱a̱ dí ni xáʼndúún maguwáʼ mbu̱júu̱ (Tito 2:8; 3:2). Mbá xkri̱da, xúʼthá numún o xúʼthá dí nda̱a̱ numuu rí nuni̱ o nunimbu̱ún (2 Cor. 6:3). A̱ngiu̱lú bi̱ nuxna discurso índo̱ naguámbáa xmáná ni̱ndxu̱ún bi̱ itháan gíʼmaa munimbáníí rígi̱. Ndayóoʼ muñewa̱a̱n rí nutha, ndayóoʼ majmúún ajngáa dí xáʼniuu miʼskhoo makru̱ʼu̱u̱n bi̱ nagún ma̱ngaa mbáa nguáná mbaʼyóoʼ mutha dí eyoo gáʼthúu̱n tikhu ajngáa dí najmulú bi̱ nindxu̱lú Testigos mu bi̱ ndiʼkhún egún makru̱ʼu̱u̱n.

17. Ndiéjunʼ gúʼni á mu nuxkamaa mbáa bi̱ naniguuʼ maʼdxuun rá.

¹⁷ Mámbá mbiʼi na̱jkha̱ ragiʼdoo itháan numuu dí muʼtáraʼa ga̱jma̱a̱ nuxkamiin xa̱bu̱ “bi̱ nusngajma rí nandún makuwá kámuu mbiʼi” (Hech. 13:48). Ikha jngóo á mu nuxkamaa mbáa bi̱ naniguuʼ maʼdxuun ajngáa dí nuʼtáraʼa, guʼtháán dí ma̱ndoo muʼsngáá ga̱jma̱a̱ numuu Biblia ma̱ngaa guʼtháán dí maʼga reunión, mu xúʼko̱ magíʼdu̱u̱ maʼga náa kamba̱a̱ rí maʼga kayáa maxtáa kámuu (Mat. 7:14).