Jeobá nimbáyúxu̱ makuwáánʼ gagi ga̱jma̱a̱ maguʼwunxu asndu náá

Mats ga̱jma̱a̱ Ann-Catrin nigún náa escuela ndrígóo Galaad nákha 1979, náa mba̱yu̱u̱ʼ tsiguʼ nixuʼmiin magún náa Irán, Mauricio, Myanmar, Tanzania, Uganda ga̱jma̱a̱ náa Zaire. Índo̱ nikúwá náa Galaad Jack Redford mbáa bi̱ niʼsngúún, niʼthúún dí gakuwá gagi ga̱jma̱a̱ gaguʼwúún asndu náá ma mínaaʼ guxuʼmiin magún. Consejo rígi̱ nimbáñún mámbá índo̱ nigún náa mbá xuajin rí tséniʼnuuʼ. Guniʼñááʼ rí ikhiin muthi xóo nikúwá.

Ginii ma̱ndoo mutala, xóo nijmañala dí gajkhun rá.

Mats: Anu̱ʼ nixtáa náa Polonia nákha nirígá Raga̱jma̱ Guerra náa Xúgíʼ Numbaaʼ ga̱jma̱a̱ ndiʼyoo dí náa guʼwá ndxajkun tsénimbáníí dí nuthi. Mú, ikhaa naʼthí: “Gíʼmaa marigá mbá religión dí nindxu̱u̱ gajkhun”. Nda̱wa̱á ndi̱yo̱o̱ dí gajkhun rí niʼthí. Ikhúún naniguʼ ma̱tsi̱ libro dí nijmaa má mu magúxnúu, ga̱jma̱a̱ mbóo mbiʼi nitsi mbá libro azul dí kayá edxu̱u̱ La verdad que lleva a vida eterna. Rígi̱ niʼni dí manigu̱ʼ mba̱yo̱o̱ ndiéjunʼ e̱ʼkha̱ raʼthí, ikha jngóo mbruʼun má rúʼko̱ nigúxnúu mbá kañiiʼ libro. Índo̱ niguámboʼ nigúxnúu nijkhánú ndi̱yo̱o̱ dí nixkamaa dí gajkhun.

Asndu nákha abril tsiguʼ 1972, nigíʼdu̱u̱ nigúxnúu mbaʼa i̱yi̱i̱ʼ dí nurawíi testigos de Jeobá ga̱jma̱a̱ ndi̱yo̱o̱ xóo exti̱ʼña̱a̱ grajxe̱ dí nigúʼdoo ga̱jma̱a̱ numuu Biblia. Niku̱mu̱ʼ dí nindxu̱ʼ xóo xa̱bu̱ bi̱ naʼtsingaa bi̱ Jesús niʼthí náa xkri̱da dí nigíʼ, dí nda̱wa̱á dí nixkamaa mbá itsí mitsaanʼ nigujua̱a̱ xúgíʼ rí gíʼdoo mu maʼtsi itsí mitsaanʼ rúʼko̱. Xúʼko̱ má ni̱ni̱ mangúún, niraʼwíí ma̱ni̱ ñajuunʼ Jeobá ga̱jma̱a̱ na̱nguá ninigajmaa náa universidad mu mani̱ndxu̱ʼ médico (Mat. 13:​45, 46). Nijngúnʼ iyááʼ nákha 10 ñajunʼ gu̱nʼ diciembre tsiguʼ 1972.

Táʼni mbá tsiguʼ dí anu̱ʼ, ru̱dúʼ ga̱jma̱a̱ giʼtioʼ nidrigú dí gajkhun ga̱jma̱a̱ nijngún iyááʼ. Nákha julio tsiguʼ 1973 ninindxu̱ʼ precursor regular. Náa congregación dí na̱jkuáxu̱ xtáa mbáa precursora mitsiʼyáa ga̱jma̱a̱ ra̱ʼkhá tháán nandoo kaʼyoo Jeobá, ikhaa nindxu̱u̱ Ann-Catrin. Ninduxu̱ʼ kuyamíjna̱, ga̱jma̱a̱ nákha 1975 nidamijnáxu. Náa mbá a̱jkhu̱ tsiguʼ nikúwáanʼxu rayambáá náa Strömsund, nindxu̱u̱ mbá xuajin dí rígá náa Suecia náa kúwá mbaʼin xa̱bu̱ bi̱ nanigu̱u̱nʼ majmañún itháan dí naʼthí náa Biblia.

Ann-Catrin: Anu̱ʼ nijmañuu dí gajkhun índo̱ inuu maráʼmúuʼ náa universidad dí rígá náa Estocolmo. Maski ajndu nákha ikhú, ikhúún káaʼ gúʼdoo ajtsú igiu̱nʼ mú na̱jkha̱ kañún reunión ga̱jma̱a̱ náa na̱jkha̱ gáʼtaraʼa. Rígi̱ tánigu̱u̱ʼ ru̱dúʼ ga̱jma̱a̱ nindoo masngájma dí ragájkhun dí nusngáa Testigos, mú táʼngo̱o̱, ikhaa jngóo nda̱wa̱á ma̱ngaa nijngún iyááʼ. Ikhúún nijngún iyááʼ nákha nigúʼdoo 13 tsiguʼ ga̱jma̱a̱ índo̱ nigúʼdoo 16 ninindxu̱ʼ precursora. Nda̱wa̱á dí niyambáá náa Umeå náa ndawi̱i̱n mbaʼin bi̱ mutaraʼa, nithu̱nʼ mani̱ndxu̱ʼ precursora especial.

Nda̱wa̱á dí Mats ga̱jma̱a̱ ikhúún nidamíjna̱xu, nisngúúnʼxu mbaʼin xa̱bu̱. Mbáa dí ikhaa ninindxu̱u̱ Maivor, mbáa dxáʼgú bi̱ ni̱jkha̱nú niniñuuʼ mbá ñajunʼ náa mada̱a̱ʼ mba̱a̱ mbújkha̱a̱ ga̱jma̱a̱ náa muniʼniiʼ xúgíinʼ xa̱bu̱. Ikhaa niʼtáráʼa mbóó ga̱jma̱a̱ giʼtioʼ dxáʼgú. Mbá najmiin nigún náa Galaad nákha 1984, ga̱jma̱a̱ dí xúgi̱ nindxu̱ún misioneras náa Ecuador.

Ndiéjunʼ nimbáyálá makuwáanʼ gagi ga̱jma̱a̱ maguʼwanla náa nijkuala xóo misioneros rá.

Mats: Gajkhun má dí mbaʼa nuthu nixuʼmáanʼxu muʼguá i̱mba̱ ni̱ʼkhá, mú dí nimbáyúxu̱ nindxu̱u̱ dí mbuyaridáá Jesús, xóo dí mani̱ndxu̱xuʼ xa̱bu̱ wabaaʼ (Col. 2:​6, 7). Mbá xkri̱da, tuguáʼti̱i̱nxu̱ dí a̱ngiu̱lú bi̱ kúwá náa mámbá xuajin magu̱ʼwún kuyuxu. Ikháanʼ niguʼwunxu xóo kúwá ikhiin. Ninimíjna̱ makru̱ʼu̱xu̱ xóo e̱ndxa̱ʼwa̱míjna̱ ga̱jma̱a̱ xóo kúwíin. Índo̱ itháan má ndiyaridáá Jesús, itháan má nacha̱ niguʼwunxu ga̱jma̱a̱ nikúwáanʼxu gagi (Sal. 1:​2, 3).

Ann-Catrin: Mu mbá ixi̱ dí najuiʼdu̱u̱ i̱mba̱ níʼkhá maga̱ja̱a̱ má xúʼko̱, ndayóoʼ dí mbaʼyoo a̱jkha̱ʼ. Xúʼko̱ má mangáanʼ. Jeobá ninindxu̱u̱ xóo a̱jkha̱ʼ ndrígúxu̱, rígi̱ nimbáyuxu mu maguʼwunxu (Sal. 84:11). Nijmiuu a̱ngiu̱lú mu masngájma dí nandoo kaʼyuxu̱. Mbá xkri̱da, a̱ngiu̱lú bi̱ kúwá náa congregación dí nikúwáanʼxu náa Teherán (Irán) ra̱ʼkhá tháan májáanʼ a̱jkiu̱ún, xó má a̱ngiu̱lú bi̱ na̱ʼkha̱ raʼthí ga̱jma̱a̱ numún náa Biblia. Ninduxu̱ʼ maguanúxu náa Irán, mú nákha julio 1980, xa̱bu̱ ñajunʼ nánguá niniñuuʼ dí mbiʼyamajkuíí Jeobá. Ga̱jma̱a̱ niʼthúxu dí kuáʼdáá a̱jma̱ mbiʼi mu magajnáaʼxu náa xuajin rúʼko̱. Ikhú nixuʼmáanʼxu muʼguá náa mbá xuajin dí rígá náa África, rí nákha ikhú najmaʼnuuʼ xóo Zaire ga̱jma̱a̱ dí xúgi̱ mbiʼyuu República Democrática del Congo.

Ra̱ʼkhá tháan nimbi̱ya̱ʼ índo̱ nidxawun dí nixuʼmáanʼxu muʼguá náa África. Nimíñúʼ numuu dí nidxuun dí ikhí kúwá a̱bu̱nʼ ga̱jma̱a̱ dí rígá nandii. Mú a̱jmi̱i̱n bi̱ nambájxuxu gajmiúxu̱, ikhiin nikúwá rayambáá mbayuʼ tsiguʼ ikhí, nituxu̱: “Xámiñalaʼ, maski ajndu timbá aʼphu̱ dí muʼguala náa África, mú manigua̱la”. Gajkhun má dí nithi, a̱ngiu̱lú bi̱ kúwá náa África ra̱ʼkhá tháan májáanʼ a̱jkiu̱ún. Nda̱wa̱á dí nijngoo majun tsiguʼ, xa̱bu̱ ñajunʼ nánguá niniñuuʼ mbiʼyamajkuíí Jeobá náa Zaire, ikha jngóo ndiyóoʼ magajnáaʼxu ikhí. Nindu̱ʼwa̱ índo̱ nirmáʼáan a̱jkiu̱nʼ dí ni̱tha̱ nákha ginii ga̱jma̱a̱ dí xúgi̱ xtáá ra̱thu̱u̱n Jeobá dí tsíyuxu magajnáaʼxu náa África.

Ma̱ndoo mutala dí niniguala xóo nikuwáanʼla náa xúgíʼ tsiguʼ rígi̱ rá.

Mats: Mbá dí narmáʼáan a̱jkiu̱nʼ nindxu̱u̱ dí nimbájxuxu májánʼ gajmiúxu̱ eʼwíinʼ misioneros bi̱ naguwáʼ náa mixtiʼkhu xuajin. Ma̱ngaa náa tikhu xuajin mámbáa dí ikháanʼxu̱ nisngúún mbá 20 xa̱bu̱. Ga̱jma̱a̱ narmáʼáan a̱jkiu̱nʼ dí a̱ngiu̱lú bi̱ kúwá náa África nixnuxu dí guáʼdáá ga̱jma̱a̱ nindúún ku̱yuxu̱. Índo̱ nikúwáanʼxu náa Tanzania ga̱jma̱a̱ najkuáxu náa mbaʼa congregación gúñúun a̱ngiu̱lú, naguanúxu nunuʼ náa carro dí nuniʼñáánʼ náa mijngíí guʼwún a̱ngiu̱lú ga̱jma̱a̱ ikhiin nixnuxu xúgíʼ dí ndiyúuxu maski ajndu raguáʼdáá wéñuuʼ (2 Cor. 8:3). I̱mba̱ dí naniguxu̱ʼ nindxu̱u̱ índo̱ nutrigáanʼ nutamíjnáxu. Xúgíʼ mbiʼi nákha xóó tséjkua̱a̱ʼ gúnuxu Ann-Catrin ga̱jma̱a̱ ikhúún nutamíjnáxu dí niguáʼníí náa mbá xúgíʼ mbiʼi ma̱ngaa nuxnáa núma̱aʼ Jeobá numuu dí nixtáa ga̱jma̱a̱ nindxu̱xu̱.

Ann-Catrin: Ikhúún ninigu̱ʼ dí maniʼnúunʼ a̱ngiu̱lú bi̱ naguwaʼ náa mixtiʼkhu xuajin. Nijmañuxuʼ ajngáa francés, luganda, persa ga̱jma̱a̱ suajili. Ma̱ngaa ndi̱ya̱xu̱ xóo mixtiʼkhu kúwíin xa̱bu̱ náa mámbá xuajin. Nimbáñúnxu a̱ngiu̱lú bi̱ nuxu̱u̱nʼ mu muni̱ itháan ñajuunʼ Jeobá, nimbájxuxu májánʼ gajmiúxu ga̱jma̱a̱ ni̱ni̱xu̱ ñajuunʼ Jeobá mbá kambájxuxu gajmiúxu ikhiin (Sof. 3:9).

Ma̱ngaa ndi̱ya̱xu̱ mbaʼa dí ra̱ʼkhá tháán nagui̱i̱ dí Jeobá niʼniwíi, mámbá índo̱ na̱jkuáxu̱ i̱mba̱ níʼkhá niku̱mu̱xu xóo Jeobá xtáa rasngájmuxu náa kamba̱a̱ muʼguáxu̱. Ikhaa niʼni dí makuwáanʼxu gagi ga̱jma̱a̱ numuu dí ni̱ni̱xu. Niʼsngúxu mbaʼa dí tajmañuxu á mu ikhaa táʼsnguxu.

Ndiéjunʼ xkujndu niraʼnííla ga̱jma̱a̱ ndiéjunʼ ni̱nila mu maʼngala rá.

Mats: Náa xúgíʼ tsiguʼ rígi̱ niʼniuxu̱ mbaʼa nandii, xóo malaria (o paludismo). Ga̱jma̱a̱ Ann-Catrin mbaʼa nuthu ndiyóoʼ magumaa operar. I̱mba̱ dí niʼni maxmiéjunxu nindxu̱u̱ dí anu̱ʼ ga̱jma̱a̱ ru̱dúʼ xó má anu̱u̱ ga̱jma̱a̱ ru̱dúu̱ Ann-Catrin nigún raganiin. Mú a̱ngiu̱xu̱ niñewu̱u̱n májánʼ, ikha jngóo nu̱xnixu wéñuuʼ núma̱aʼ ga̱jma̱a̱ numuu rúʼko̱ (1 Tim. 5:4). Maski ajndu nikúwáanʼxu mitsínguánʼ, ninimíjna̱ mumbáñún, mú nirígá mbiʼi dí nikúwáanʼxu ngíná numuu dí táʼngo̱o̱ gúnixu̱ xó má ikháanʼ ninduxu̱ʼ.

Ann-Catrin: Nákha 1983, índo̱ kuwáanʼxu̱ náa Zaire, niʼniuu nandii cólera. Médico niʼthúu̱n Mats: “¡Mbá nacha̱ ayuʼ jcháa i̱mba̱ níʼkhá xuajin!”. Ikha jngóo i̱mba̱ mbiʼi ni̱jkuáxu Suecia ga̱jma̱a̱ mbóo avión dí nigájnuu mbiʼi rúʼko̱ dí tséjmún mu maʼga kagui̱i̱n xa̱bu̱.

Mats: Médico niʼthí dí Ann-Catrin xáʼni̱i̱ a̱jkiu̱u̱n. Mú niʼni̱i̱ má a̱jkiu̱u̱n. Maski ajndu xúʼko̱ nimbiyaʼxu, numuu dí niku̱mu̱xu dí muniʼñááʼ rani̱ndxu̱xu̱ misioneros. Mú, mbá tsiguʼ nda̱wa̱á nindoo nitangáanʼxu náa Zaire, ga̱jma̱a̱ niguáʼdi̱i̱ niyambáá náa mbá congregación chíʼgíiʼ náa nuthi ajngáa suajili dí rígá náa Lubumbashi.

Ann-Catrin: Nákha kuwáanʼxu̱ náa Lubumbashi, niguewáan ada̱, mú nigrájkhaa. Maski ajndu na̱nguá ninduxu̱ʼ muguaʼdiin e̱ji̱i̱n, mú ra̱ʼkhá tháan nigáwíinʼ a̱jkiu̱nʼ índo̱ nigrájkháa a̱ʼdióʼ. Mú, Jeobá niʼni ga̱jma̱a̱ numuxuʼ mbá dí táguaʼthi̱i̱n. Niguáʼdi̱i̱ nisngúúnxu itháan mbaʼin xa̱bu̱ ga̱jma̱a̱ numuu Biblia. Asndu xóó tséʼni mbá tsiguʼ, náa congregación dí kuwáanʼxu̱, nákha wapháá kúwá mbá 35 publicadores, mú nda̱wa̱á niguánu ninindxu̱ún mbá 70. Ma̱ngaa náa reunión nigimbíin 40, mú nda̱wa̱á nigimbíin mbá 220. Ikha jngóo ra̱ʼkhá tháan niguáʼdááxu̱ ñajunʼ dí munixu̱ʼ. Niʼnii a̱jkiu̱nʼ índo̱ ndi̱yo̱o̱ dí Jeobá xtáa raʼni tsajkurámáanʼxu. Maski ajndu xúʼko̱ nguáná narmáʼáan a̱jkiu̱xu̱ ma̱ngaa nutamíjnáxu ga̱jma̱a̱ numuu a̱ʼdiúxu. Nanduxu mbuyaaʼ ndiéjunʼ gáʼni Jeobá nda̱wa̱á mu maʼnii a̱jkiu̱xu̱ mbá kayúʼ.

Mats: Nda̱wa̱á Ann-Catrin nigi̱ʼdu̱u̱ nikáwabaaʼ wéñuuʼ ga̱jma̱a̱ niʼni néʼngo̱o̱. Ikhú má nithu̱nʼ dí ikhúún gúʼdoo cáncer náa chámbóʼ ga̱jma̱a̱ dí mbaʼyóoʼ magumún operar mbá nacha̱, dí xúgi̱ xtáá má májánʼ ga̱jma̱a̱ Ann-Catrin naʼni xó má eʼngo̱o̱ mu maʼni ñajuunʼ Jeobá.

Ndu̱ya̱xu̱ dí raʼkháa i̱ndó ikháanʼxu̱ eraʼníí xkujndu. Nda̱wa̱á dí niradíin mbaʼin xa̱bu̱ náa Ruanda nákha tsiguʼ 1994, ni̱jkuáxu gúñún a̱ngiu̱lú bi̱ kúwá náa nagún xa̱bu̱ bi̱ nuni̱ kawúmíjná. Índo̱ ndi̱ya̱a̱ dí gujkhuʼ fe ndrígún ga̱jma̱a̱ dí tsékawabiinʼ, ma̱ngaa nuxná dí guáʼdáá maski ajndu nuraʼníí xkujndu. Ndi̱ya̱xu̱ dí Jeobá gíʼdoo tsiaki̱i̱ mu mambáñún xa̱bi̱i̱, tséʼniuu má asndu ndiéjunʼ dí gaguáʼníí (Sal. 55:22).

Ann-Catrin: Niraʼnííxu i̱mba̱ gamiéjunʼ nákhá 2007, ni̱jkuáxu náa niguma ndxo̱o̱ sucursal dí rígá náa Uganda. Nda̱wa̱á dí nijngoo kúwáanʼ rajkuáaʼxu náa Nairobi (Kenia), gajmiúxu mbá 25 misioneros ga̱jma̱a̱ betelitas. Nákha xóó tséjkuánuxu náa ndawaa mbaaʼ ga̱jma̱a̱ Kenia, mbóo carro dí na̱ʼkha̱ xígií, nigájnutiyooʼ náa kamba̱a̱ ga̱jma̱a̱ niruwamínáʼ ga̱jma̱a̱ carro dí kúwáanʼxu rajkua ikháanʼ. Bi̱ na̱jkha̱ kayóo ga̱jma̱a̱ mbá witsiin a̱ngiu̱lú nikháñún ga̱jma̱a̱ imba̱a̱ ndxájulú a̱ʼgu̱ nikháñúu nda̱wa̱á dí nijkha náa hospital. ¡Ra̱ʼkhá tháán nanduxuʼ matangáan mbuñu̱u̱n mbu̱júu̱ bi̱ nambájxuxu gajmiúxu! (Job 14:​13-15).

Nda̱wa̱á, niʼni̱i̱ náa nigawúnʼ. Mú Mats ga̱jma̱a̱ ikhúún ma̱ngaa eʼwíinʼ a̱ngiu̱lú bi̱ ndiyáá dí nirígá, numíníiʼxu índo̱ narmáʼáan a̱jkiu̱xu̱. Ikhúún, tikhu mbruʼun asndu namíñúʼ natujxuʼ, naku̱mu̱ʼ xóo asndu nánguá eʼngo̱ʼ gáyá xi̱ʼ. Mbá dí nimbáyuxu mu maʼni̱i̱ a̱jkiu̱xu̱ nindxu̱u̱ dí mutakháñii Jeobá ma̱ngaa dí muraxnuxu ga̱jma̱a̱ mundxaʼwamíjna̱xu rí naʼthí texto dí naniguxu̱. Ma̱ngaa ni̱jkuáxu náa médico, dí xúgi̱ nánguá eminíiʼxu wéñuuʼ. Nutakháñíí Jeobá dí mambáyúxu mu munii a̱jkiu̱ún bi̱ numíníiʼ xó má ikháanʼxu̱.

Xú káʼnii nimbáyálá Jeobá índo̱ niraʼníílá gamiéjunʼ rá.

Mats: Náa ajngáa suajili nuthi: “Nigún kudáanʼxu xóo xndú”. Xó má mbáa xa̱bu̱ bi̱ na̱jkha̱ kagu̱u̱ xndú, tsumáá eʼni mu xáwiʼthá. Xúʼko̱ Jeobá niñewu̱nxu̱ ga̱jma̱a̱ tsumáá. Náa xúgíʼ ñajunʼ dí ninixu̱ náa xuajñuu, niguáʼdááxu dí ndiyúxu, nguáná asndu dí na̱nguá má ndiyúxu. Mbá xkri̱da, ndi̱ya̱xu̱ dí Jeobá nandoo kaʼyuxu̱ ga̱jma̱a̱ xtáa rambáyuxu índo̱ a̱ngiu̱lú Cuerpo Gobernante nisngajma dí nakru̱ʼu̱u̱n kuyuxu.

Ann-Catrin: Dí niʼthí Mats, ga̱jma̱a̱ numuu dí Jeobá niñewu̱u̱nxu ga̱jma̱a̱ tsumáá, naʼni marmáʼáan a̱jkiu̱nʼ ga̱jma̱a̱ numuu mbá dí niguáʼnixu. Mbóo mbiʼi nitaroʼoʼ mu muthu̱nʼ dí anu̱ʼ xtáa náa hospital ga̱jma̱a̱ dí nánguá eʼngo̱o̱. Xíjkhóó Mats niʼni̱i̱ a̱jkiu̱u̱n numuu dí niʼniuu nandii malaria, ikha jngóo na̱nguá kuaʼdááxu̱ mbújkha̱a̱ mu muʼguáxu̱ náa Suecia, nindxa̱ʼwa̱míjna̱xu mugujua̱a̱ carro ndrígúxu̱. Mú ikhú nitaruʼuxu a̱jmi̱i̱n a̱ngiu̱lú. Ginii niʼtáruʼuxu mbáa ndxájulú ga̱jma̱a̱ a̱ʼgiu̱u̱, ikhiin nidxawíín dí kúwá raguáʼnixu, nituxu̱ dí mutsi mbóo boleto ndrígóo avión. Imba̱a̱ bi̱ niʼtáruʼuxu nindxu̱u̱ mbáa ndxájulú a̱ʼgú nikhi̱i̱, ikhaa nigujxi̱i̱ mbújkha̱a̱ náa mbá caja mu maxnúu bi̱ gáʼyóoʼ. Mbá nacha̱ Jeobá nimbáyuxu mu mutsi boletos dí muʼguáxu̱ ga̱jma̱a̱ (Heb. 13:6).

Ndiéjunʼ nijmañala náa mbá 50 tsiguʼ dí kuwáanʼla runi̱ kájxi̱ ñajuunʼ Jeobá rá.

Ann-Catrin: Nijmañuʼ dí xó má naʼthí náa Isaías 30:​15, dí maguaʼdáálu tsiaki̱i̱ á mu tséʼni miñúmíjnálu ga̱jma̱a̱ nakumulú kuʼyáá Jeobá. Índo̱ nakumulú kuʼyáá Jeobá, nindxu̱u̱ xóo ikhaa xtáa raxmína̱ʼ ga̱jma̱a̱ numulú (2 Crón. 20:​15, 17). Mbaʼa xóo niguma tsajkurámáanʼxu, numuu dí ninixu̱ xó má eʼngo̱o̱ ñajuunʼ Jeobá, xákuwáanʼxu xígi̱ á mu turaʼwííxu muni̱ ñajuunʼ ikhaa.

Mats: Dí itháan gíʼdoo numuu dí nijmañuʼ nindxu̱u̱ dí maku̱mu̱ʼ ka̱yo̱o̱ Jeobá náa asndu ndiéjunʼ má xkujndu gáraʼnuu, mu xúʼko̱ mba̱yo̱o̱ xóo ikhaa xtáa rambáyuʼ (Sal. 37:5). Ikhaa nixtáa má xúʼko̱ ga̱jma̱a̱ nindxu̱xu̱ xó má nikudaminaʼ maʼni ga̱jma̱a̱ ndu̱ya̱a̱xu dí xtáa rambáyuxu má xúʼko̱ asndu xúgi̱ dí kúwáanʼxu rayambáá náa Betel dí rígá náa Myanmar.

Nanduxuʼ dí a̱ngiu̱lú jiámá ga̱jma̱a̱ wa̱ʼxa̱ʼ bi̱ nandún muni̱ itháan ñajuunʼ Jeobá, dí ikhaa má gasngájmúún dí nandoo kaʼñúún xó má niʼni ga̱jma̱a̱ nindxu̱xu̱. Ga̱jma̱a̱ ndu̱ya̱a̱xu gajkhun dí maguma tsajkurámíinʼ á mu nuniñamíjná dí Jeobá mambáñún makuwá gagi ga̱jma̱a̱ maguʼwún asndu náá má guxuʼmiinʼ magún.