“Gandxa̱ʼwún bi̱ kuya̱ edxu̱u̱”

1. Xú káʼnii eʼyáá rí Jeobá nandoo kaʼñún mugiu̱u̱ rá.

JEOBÁ nandoo kaʼñún xúgíinʼ mugiu̱u̱. Niʼtsi̱i̱n ga̱jma̱a̱ eʼdiuu Jesús bi̱ kayá edxu̱u̱ náa xúgíʼ congregación ma̱ngaa nixnájxu̱u̱n anciano rí muñewu̱u̱n (Hech. 20:28). Ikhaa nandoo rí maʼndún kuñúún. Ma̱ngaa anciano nunimbáníí ikha rí nixná Jesús, ikha jngóo nuxnún tsiaki̱i̱ ga̱jma̱a̱ nuñawu̱u̱n mu xútsíngúunʼ náa Jeobá (Is. 32:​1, 2).

2. Tsíín ñajúúnʼ bi̱ itháan naxmiéjuunʼ kaʼñúún Jeobá rá. (Ezequiel 34:​15, 16.)

² Jeobá naxmiéjuunʼ kaʼñún xúgíinʼ mugiu̱u̱, mú itháan naxmiéjuunʼ kaʼñúún bi̱ numíniiʼ. Jeobá najmiuu anciano mu mumbañún bi̱ nánguá kúwá májánʼ gajmiún ikhaa (atraxnuu Ezequiel 34:​15, 16). Á mu mbóo mbiʼi ndayóoʼ rí mixtambáyúlú, ndiéjunʼ gíʼmaa mu̱ʼni̱ rá. Dios nandoo rí muʼtákáñíí ma̱ngaa rí muʼthúún “báxtúu ga̱jma̱a̱ bi̱ nusngáa” bi̱ kúwá náa congregación ndrígúlú (Efes. 4:​11, 12).

3. Xú káʼnii gámbáyulú xúgiáánʼ artículo rígi̱ rá.

³ Náa artículo rígi̱ mbuʼyáá xú káʼnii Jeobá najmiuu a̱ngiu̱lú anciano mumbañún bi̱ nánguá mbájxu̱u̱n májánʼ gajmiún ikhaa ma̱ngaa muriʼña̱a̱ grajxe̱ rígi̱: Nguáná gáʼyóoʼ muʼthúún ancianos rá. Ndíjkha rí ndayóoʼ muʼthúún xá. Xú káʼnii ma̱ndoo mumbayulúʼ ikhiin xá. Maski ajndu xúgi̱ kuwáanʼ májánʼ má gajmiúlú Jeobá ga̱jma̱a̱ tséyóoʼ má rí mumbayulúʼ anciano, mú artículo rígi̱ maxkajxáánʼ muxnáa núma̱aʼ Jeobá ga̱jma̱a̱ numuu rí ikhaa najmiuu anciano mumbayulúʼ ma̱ngaa majmañulú mbuʼyáá xóo gúʼni̱ á mu nda̱wa̱á mbaʼyóoʼ mundu̱ʼu̱u̱n rí mumbayulúʼ.

NGUÁNÁ GÁʼYÓOʼ MUʼTHÚÚN ANCIANOS RÁ.

4. Xú káʼnii eʼyáá rí náa Santiago 5:​14-16, 19, 20 naʼthí ga̱jma̱a̱ numuu mbáa xa̱bu̱ bi̱ nánguá xtáa májánʼ ga̱jma̱a̱ Jeobá rá. (Atayáá ma̱ngaa xtiʼkhuu.)

⁴ Discípulo Santiago niʼthí xú káʼnii Jeobá najmiuu anciano mu mumbayulúʼ. Ikhaa niʼthí: “Lá xtáa mbáa náa ikháanʼ bi̱ naʼniuu nandii ráʼ. Gandxa̱ʼwún bi̱ kuya̱ edxu̱u̱ náa nagimbáanʼ” (atraxnuu Santiago 5:​14-16, 19, 20). Gi̱i̱ nandoo nduʼyáá rí Santiago xtáa raʼthí ga̱jma̱a̱ numuu mbáa xa̱bu̱ bi̱ nánguá xtáa májánʼ ga̱jma̱a̱ Jeobá. Numuu rí ikhaa naʼthí rí bi̱ naʼniuu nandii mbaʼyóoʼ mandxaʼwún anciano, raʼkháa mbáa médico. Ma̱ngaa niʼthí rí xa̱bu̱ bi̱ naʼniuu nandii maʼni̱i̱ a̱jkiu̱u̱n índo̱ gúni̱ mba̱a̱ a̱jkiu̱ún kuyáá ga̱jma̱a̱ numuu aʼkhá rí nikudaminaʼ. Xó má mbáa xa̱bu̱ bi̱ naʼniuu nandii mbaʼyóoʼ maʼga gáʼyoo mbáa médico ga̱jma̱a̱ maʼthúu̱n xúgíʼ rí naʼniuu, nda̱wa̱á mbaʼyóoʼ maʼnimbánuu rí gáʼthí médico. Xúʼko̱ má kayuuʼ mbáa xa̱bu̱ bi̱ nandoo matanga̱a̱ mambajxíiʼ májánʼ ga̱jma̱a̱ Jeobá, ndayóoʼ rí maʼga gáʼthúún anciano xú káʼnii xtáa, nda̱wa̱á maʼnimbánuu consejo rí gúxnáá ga̱jma̱a̱ Biblia.

5. Xú káʼnii grajxe̱ ma̱ndoo mu̱ʼni̱ mu mbuʼyáá xóo kuwáanʼ gajmiúlú Jeobá rá.

⁵ Náa capítulo 5 ndrígóo Santiago naʼthúlú rí mbaʼyóoʼ muʼthúún anciano á mu nduʼyáá rí nánguá kuwáánʼ májánʼ gajmiúlú Jeobá. Xáʼyóoʼ muguáʼthi̱i̱n asndu makiéʼkulú mu mbuʼyáʼ rí mixtambáyúlú, wapháá gíʼmaa muʼni. Ma̱ngaa ndayóoʼ rí muñawumíjnalú numuu rí náa Biblia naʼthí rí gamíi muʼni nduwamijná, ma̱ndoo mundxa̱ʼwa̱míjna̱ rí kuwáanʼ májánʼ gajmiúlú Jeobá mú rí phú gajkhun raʼkháa xúʼko̱ nindxu̱u̱ (Sant. 1:22). Rúʼko̱ rí nigíʼnúún tikhuun a̱ngiu̱lú bi̱ nikúwá náa Sardis, nikumu̱ún rí kúwá májánʼ gajmiún Jeobá mú Jesús niʼthúún rí na̱nguá (Apoc. 3:​1, 2). Xú káʼnii gándoo gúʼyáá á mu kuwáanʼ májánʼ gajmiúlú Jeobá rá. Mbá rí ma̱ndoo mu̱ʼni̱ nindxu̱u̱ rí mbuʼyáá xóo kuwáanʼ xúgi̱ ga̱jma̱a̱ xóo nikuwáanʼ nákhá nijngúlú iyááʼ (Apoc. 2:​4, 5). Ma̱ndoo murajximíjna̱: “Lá naniguʼ magúxnuu má xúʼko̱ Biblia ga̱jma̱a̱ mandxa̱ʼwa̱mínáʼ rí naʼthí ikhí xó má nákhá ginii ráʼ. Lá na̱jkhá má xúʼko̱ reunión ga̱jma̱a̱ naʼnirataminaʼ rí mba̱yo̱o̱ ikhí ráʼ. Lá kaʼníí nda̱yo̱o̱ rí gíʼdoo numuu magajnúʼ mataráʼa ráʼ. O nda̱yo̱o̱ rí itháán má naniguʼ ma̱ni̱ gagimina̱ʼ ga̱jma̱a̱ rí mba̱ʼyáʼ mbújkha̱a̱ dxe̱ʼ.” Xóo gúriʼña̱a̱ grajxe̱ rígi̱ mambáyulú mbuʼyáá á mu rígá rí ndayóoʼ mixtambáyúlú. Á mu tséʼngulú guriʼkumijná ndajkuáánʼ o á mu ni̱ʼni̱ má mbá rí Jeobá tsénigu̱u̱ʼ, ndayóoʼ muʼthúún anciano.

6. Ndiéjunʼ gíʼmaa maʼni mbáa á mu nikudaminaʼ mbá aʼkhá mbiiʼ rá.

⁶ Á mu mbáa nikudaminaʼ mbá aʼkhá mbiiʼ rí ma̱ndoo maʼga kayáa magajnáa náa congregación, mbaʼyóoʼ rí maʼtámíjná gajmíi̱n anciano (1 Cor. 5:​11-13). Xa̱bu̱ buʼko̱ ndayóoʼ wéñuuʼ rí mixtambáyíí mu matanga̱a̱ mambajxíiʼ ga̱jma̱a̱ Dios. Jeobá i̱ndó maʼni mba̱a̱ a̱jkiu̱u̱n kaʼyoo á mu gajkhun ‹nasngájma› rí nitanga̱a̱ a̱jkiu̱u̱n rí niʼni (Hech. 26:20). Mbá rí xóo masngájma nindxu̱u̱ rí maʼthúún anciano rí nikudaminaʼ mbá aʼkhá mbiiʼ.

7. Tsíín mangiin ndayóoʼ mundu̱ʼu̱u̱n anciano rí mumbañún rá.

⁷ Ancianos raʼkháa i̱ndó numbañún bi̱ nixudami̱jna̱ aʼkhá. Ma̱ngaa nandún mumbañún bi̱ naʼniún gakhi̱i̱ muni̱ xóo enigu̱ʼ Dios (Hech. 20:35). Atatsaʼwáminaʼ rí xtaa ratani̱ tsiakimínáʼ mu xátani̱ rí nagua̱ʼa̱ matani̱ ga̱jma̱a̱ naku̱ma̱a̱ʼ rí xáʼnga̱a̱ʼ gátríkáá. Itháan á mú nákhá xóó tsénindxa̱a̱ʼ xa̱bi̱i̱ Jeobá nijmaaʼ droga, nitayáá pornografía o nitaxúdaminaʼ aʼkhá gajmiáanʼ eʼwíinʼ. Garmáʼáan a̱jkia̱a̱nʼ rí na̱nguá xtaa mbáwíín. Ma̱ndoo marathu̱u̱n anciano, ikhiin mudxawaanʼ. Muxnaaʼ consejo rí ma̱ndoo mambáyáaʼ ma̱ngaa muni̱ marmáʼáan a̱jkia̱a̱nʼ rí Jeobá maxtáa má xúʼko̱ ga̱jma̱á nindxa̱a̱ʼ á mu naʼnga̱a̱ʼ natríkháá rí nagua̱ʼa̱ matani̱ (Ecl. 4:12). Á mu nakaguabáánʼ ga̱jma̱a̱ numuu rí nagua̱ʼa̱ má xúʼko̱ matani̱ dí ra̱májánʼ, anciano muni̱ marmáʼáan a̱jkia̱a̱nʼ rí Jeobá nadxuu a̱jkiu̱u̱n tani̱ numuu rí natandaʼa rí mixtambáyáaʼ, xúʼko̱ kaʼnii natasngájma rí nindxa̱a̱ʼ mbáa xa̱bu̱ guabaaʼ ga̱jma̱a̱ dí tséku̱ma̱a̱ʼ xtayaminaʼ i̱ndó ikháán, ma̱ngaa rí naxmiéjuanʼ xóo ku̱mu̱u̱ Jeobá rí nandaaʼ matani̱ rí maxtáa gagi (1 Cor. 10:12).

8. Lá xúgíʼ kayuuʼ rí nakiéʼkulu mbaʼyóoʼ muʼthúún anciano rá.

⁸ Raʼkháa má mámbá rí nakiéʼkulu mbaʼyóoʼ muʼthúún anciano. Mbá xkri̱da, gundxaʼwamíjna̱ rí nitani̱ gawíínʼ mbáa ndxájulú o ra̱ʼkhá tháán nikiʼnán xtayáá. Nákhá xóó tsédxúʼ gátañu̱u̱n anciano, ginii rí ma̱ndoo matani̱ nindxu̱u̱ rí matani̱ mbáníí consejo rí Jesús nixná rí xóo mambajxíiʼ ga̱jma̱a̱ ndxájuaaʼ (Mat. 5:​23, 24). Nda̱wa̱á ma̱ndoo mataʼyáʼ náa i̱yu̱lúʼ rí xóo gátani̱ mu xakiʼnán, maʼngo̱o̱ a̱jkia̱a̱nʼ ga̱jma̱a̱ matiewa̱a̱n rí matani̱. Mú, á mu natani̱ xúgíʼ rígi̱ ga̱jma̱a̱ tséʼnga̱a̱ʼ gátriʼkuminaʼ, mbáa májánʼ gáʼni dí maratha̱a̱n mbáa anciano rí mambáyaaʼ. Náa i̱yi̱i̱ʼ rí niʼnirámáʼ apóstol Pablo rí ni̱jkha̱ inún bi̱ filipenses, ikhí niʼthúu̱n mbáa ndxájulú bi̱ xtáa náa congregación rúʼko̱ rí mambáyúu Evodia ga̱jma̱a̱ Síntique mu munimbáníí xkujndu rí guáʼdáá. Xúʼko̱ má mbáa anciano bi̱ xtáa náa congregación ndrígáaʼ ma̱ndoo mambáyáaʼ (Filip. 4:​2, 3).

NÁÁ NUMUU RÍ NDAYÓOʼ MUʼTHÚÚN ANCIANO RÁ.

9. Maski ajndu nati̱yu̱lúʼ mú ndíjkha rí gíʼmaa muʼthúún anciano rí ni̱ʼni̱lú rá. (Proverbios 28:13.)

⁹ Á mu nakumulú rí xáʼngulú gúrikáá rí nagua̱ʼa̱ muʼni dí raʼkhí o á mu nixuʼdámíjná mbá aʼkhá mbiiʼ, mbáa mbaʼyulú fe mu majmáánʼ muʼthúún anciano. Mú rágíʼmaa mati̱yu̱lú mu muʼthúún rí mumbayulúʼ. Ndíjkha rá. Garmáʼáan a̱jkiu̱lú dí Jeobá nigruigi̱i̱n anciano dí mumbayulúʼ mambájxulú májánʼ gajmiúlú ikhaa. Ikha jngóo índo̱ nundu̱ʼu̱u̱n rí mumbayulúʼ nusngajmá rí nakumulú kuʼyáá Dios ga̱jma̱a̱ rí nuʼnimbulúʼ kuʼyáá. Nduʼyáá má rí Jeobá mambáyulú (Sal. 94:18). Ga̱jma̱a̱ á mu nuʼthá rí ni̱ʼni̱lú ma̱ngaa nuniʼñááʼ rí kuwáanʼ ru̱ʼni̱, Jeobá magáwíinʼ a̱jkiu̱u̱n ga̱jma̱a̱ maʼni mba̱a̱ a̱jkiu̱u̱n kaʼyulú (atraxnuu Proverbios 28:13).a

10. Ndiéjunʼ gagíʼnulúʼ á mu nurkaʼwumáʼa aʼkhá rí nixuʼdámíjnalú rá.

¹⁰ Xó má ndiʼyáá, rí mundu̱ʼu̱u̱n anciano dí mumbayulúʼ, mbaʼa xóo ma̱ndoo mambáyulú. Mú, á mu nurkaʼwumáʼa aʼkhá rí nixuʼdámíjnalú, mumíniiʼlú má ikháanʼ. Gundxaʼwamíjna̱ ga̱jma̱a̱ numuu rey David. Índo̱ ikhaa nirkaʼwumúʼúun rí nikiéʼkhun, nánguá nindoo mambajxúu ga̱jma̱a̱ Jeobá, nixtáa ngíná ga̱jma̱a̱ niʼniuu nandii (Sal. 32:​3-5). Rí makiéʼkúlú náa inuu Jeobá nindxu̱u̱ asndu xóo mbáa nandii: Á mu tséʼni thanamijnálu, maʼga raʼni itháán gakhi̱i̱. Jeobá ndaʼyoo rígi̱ ikha jngóo naʼthúlú rí muʼthúún anciano ga̱jma̱a̱ rí ‹guʼnimbáníí numulú› (Is. 1:​5, 6, 18).

11. Ndiéjunʼ garigá á mu nurkaʼwumáʼa mbá aʼkhá mbi̱i̱ʼ rí niʼni rá.

¹¹ Á mu nurkaʼumáʼa aʼkhá rí ni̱ʼni̱lú, mu̱ʼni̱ rí eʼwíinʼ mumíniiʼ. Ma̱ngaa marikhoo espíritu santo ndrígóo Dios mu xárígá náa congregación ga̱jma̱a̱ maʼni dí marigá xkujndu (Efes. 4:30). Ma̱ngaa, á mu nduʼyáá rí mbáa ndxájulú bi̱ xtáa náa congregación nakudaminaʼ mbá aʼkhá mbi̱i̱ʼ, guʼtháán rí maʼtamijna gajmíi̱n anciano.b Garmáʼáan a̱jkiu̱lú á mu nurkaʼwumáʼa rí niʼni ndxájulú mangáanʼ muguaʼdáá aʼkhúlú (Lev. 5:1). Rí nandulúʼ kuʼyáá Jeobá maxkajxáánʼ muʼthá rí gajkhun. Ga̱jma̱a̱ xúʼko̱ muñambáá mu congregación maʼni kaʼwu ga̱jma̱a̱ xa̱bu̱ bi̱ nikudaminaʼ aʼkhá ma̱ndoo mixtambáyíí mu matanga̱a̱ mambájxíiʼ ga̱jma̱a̱ Dios.

XÚ KÁʼNII GANDOO GÚMBAYÚLÚ ANCIANO RÁ.

12. Ndiéjunʼ eni̱ anciano mu mumbayíí mbáa bi̱ na̱nguá xtáa májánʼ ga̱jma̱a̱ Jeobá rá.

¹² Náa Biblia naʼthí rí anciano ndayóoʼ rí mumbañún bi̱ na̱nguá kúwá májánʼ gajmiún Jeobá (1 Tes. 5:14). Á mu ikháán nitani̱ mbá rí niʼni gachúu xóo embájxa̱a̱ʼ ga̱jma̱a̱ʼ Jeobá , ikhiin munia̱a̱ʼ tikhuu grajxe̱ mu mbuyáá xóo tatsaʼwáminaʼ ga̱jma̱a̱ xóo ku̱ma̱a̱ʼ mu xúʼko̱ ma̱ndoo mumbayáaʼ (Prov. 20:5). Mbáa nguáná maʼniaaʼ miʼskhoo dí marathu̱u̱n anciano, numuu rí nati̱ya̱a̱ʼ ga̱jma̱a̱ numuu rí nitani̱ o numuu rí nindxa̱a̱ʼ mbáa xa̱bu̱ bi̱ nati̱yu̱u̱ʼ, mú, ma̱ndoo matambáñún mu xáʼniún miʼskhaa rí mumbayáaʼ á mu narathúún xúgíʼ. Xáxmiéjuaanʼ á mu na̱nguá nitatsaʼwáá májánʼ edxa̱a̱ʼ dí marata (Job 6:3). Anciano raʼkháa mbá nacha̱ gúraʼwi̱i̱ dí muni̱, ginii mudxawíín májánʼ dí gárathu̱u̱n mu mbuyáá xóo phú xtaa nda̱wa̱á muxnaaʼ consejo rí na̱ʼkha̱ náa Biblia mu mambáyáaʼ (Prov. 18:13). Ikhiin nduyáá rí ndayóoʼ mba̱yu̱u̱ʼ mbiʼi mu ma̱ndoo mumbayíí mbáa, ikha jngóo nguáná mutamijná mbaʼa nuthu ga̱jma̱á nindxa̱a̱ʼ.

13. Ndiéjunʼ ma̱ngaa eni̱ anciano mu mumbayulú rá. (Atayáá ma̱ngaa xtiʼkhuu.)

¹³ Anciano xúni̱ dí maku̱ma̱a̱ʼ rí ikháán xtaʼdáá itháán aʼkháanʼ. Rí muni̱, mutajkáan ga̱jma̱a̱ numaaʼ. Mbáa maʼniaaʼ tsiánguá nguáthá mba̱a̱ gámbáyáaʼ mu maʼni̱i̱ a̱jkia̱a̱nʼ rí mutajkáan ga̱jma̱a̱ numaaʼ ma̱ngaa muxtajmáán “aceite ga̱jma̱a̱ mbiʼyuu Jeobá” (Sant. 5:​14-16). “Aceite” rígi̱ nindxu̱u̱ Ajngóo Dios. Ikha jngóo majmúún Biblia mu muni̱ rí maʼni̱i̱ a̱jkia̱a̱nʼ ga̱jma̱a̱ mumbayáaʼ mambajxíiʼ ga̱jma̱a̱ʼ Jeobá (Is. 57:18). Consejo rí na̱ʼkha̱ náa Biblia dí ikhiin gúxnaaʼ, maxnáaʼ tsiaki̱i̱ mu matani̱ rí májánʼ. Ga̱jma̱a̱ rí ikhiin muthaanʼ mambáyáaʼ matadxun aʼwóo Jeobá rí naʼtháanʼ: “Rígi̱ nindxu̱u̱ kamba̱a̱. Ayuʼ ikhí” (Is. 30:21).

14. Xó má eʼthí Gálatas 6:​1, xú káʼnii eni̱ anciano mu mumbayíí mbáa bi̱ na̱jkha̱ “náa kamba̱a̱ dí raʼkhí” rá. (Atayáá ma̱ngaa xtiʼkhuu.)

¹⁴ (Atraxnuu Gálatas 6:1). Á mu mbáa cristiano na̱jkha̱ “náa kamba̱a̱ dí raʼkhí”, nandoo gáʼthúu̱n dí tséʼni rí nanigu̱u̱ʼ Jeobá ga̱jma̱a̱ nanújngurámuuʼ xtángoo ndrígóo. Ga̱jma̱a̱ numuu rí anciano nandún kuyáá ndxájulú, ikha jngóo ‹munimíjna̱ rí mumbayíí ga̱jma̱a̱ májánʼ›. Náa ajngáa griego, ajngáa rígi̱ ma̱ngaa najmaa mu miʼtá índo̱ nuxuma̱a̱ʼ mbá itsu̱ rí nijuiʼngúúnʼ. Xó má mbáa xa̱bu̱ bi̱ nakumáaʼ itsu̱, tsumáá kayuuʼ eʼni mu xúʼko̱ xa̱bu̱ xágawúunʼ wéñuuʼ, xúʼko̱ má kayuuʼ eni̱ anciano índo̱ numbayíí mbáa bi̱ na̱jkha̱ náa kamba̱a̱ dí raʼkhí, nunimíjna̱ dí xúnigawíínʼ, ikha jngóo nuni̱ xó má eʼngo̱o̱ mu mumbayíí. Náa Biblia naʼthúu̱n mámbáa anciano bi̱ naxná consejo ‹rí ndayóoʼ mañewumínáʼ má ikhaa›, numuu rí nindxu̱u̱ xa̱bu̱ aʼkhá ikha jngóo gamíi maʼga náa kamba̱a̱ dí raʼkhí. Anciano munimíjna̱ dí mani̱ndxu̱ún xa̱bu̱ guabiinʼ ga̱jma̱a̱ rí magáwíinʼ a̱jkiu̱ún kuyáá, raʼkháa dí mutanumáá o maku̱mu̱ún rí ikhiin guáʼdáá itháán numún (1 Ped. 3:8).

15. Ndiéjunʼ ma̱ndoo mu̱ʼni̱ á mu guáʼdáá mbá xkujndu rá.

¹⁵ Ma̱ndoo makumulú kuʼñúún anciano bi̱ kúwá náa congregación. Ikhiin nduyáá dí xáʼyóoʼ muthún eʼwíinʼ rí ikháánʼ nuʼthúnlú ma̱ngaa nigumaratiin mu xúgíʼ consejo rí muxnulú ma̱ʼkha̱ náa Biblia, raʼkháa rí xóo na̱ʼkha̱ náa edxu̱ún ikhiin ma̱ngaa rí makuwá xawii índo̱ gáʼyóoʼ mumbayúlú (Prov. 11:13; Gál. 6:2). Gajkhun má rí anciano na̱nguá nindxu̱ún mbrígui̱ín, kúwá tikhuun bi̱ mba̱yu̱u̱ʼ má nindxu̱ún anciano, mú eʼwíinʼ ndiʼkhún nindrigú ñajunʼ rígi̱, mú asndu tsáá ma̱ndoo muʼtháán á mu guaʼdáá mbá xkujndu. Raʼkháa dí mámbáa anciano mu̱ʼgua̱ ruʼtháán asndu muxkamaa mbáa bi̱ maʼthúlú rí nandulúʼ muʼdxawíín. Tsíyulú manindxu̱lú xóo xa̱bu̱ bi̱ i̱ndó nanigu̱u̱nʼ ‹mudxuun› raʼkháa rí majmañún “kiʼsngáa rí májánʼ” dí na̱ʼkha̱ náa Ajngóo Dios (2 Tim. 4:3). Índo̱ rígá mbá rí nuʼtháán mbáa anciano, mbáa ikhaa marajxulú á mu niʼtháán má imba̱a̱ anciano ga̱jma̱a̱ numuu rígi̱ ga̱jma̱a̱ xú káʼnii consejo rí ikhaa nixnúlú. Ga̱jma̱a̱ numuu rí nindxu̱u̱ xa̱bu̱ guabaaʼ maxkajxi̱i̱ rí maʼthúu̱n imba̱a̱ anciano mu mambáyúu (Prov. 13:10).

NDIÉJUNʼ KAʼYOO MAʼNI MÁMBÁA RÁ.

16. Ndiéjunʼ kaʼyulú mu̱ʼni̱ rá.

¹⁶ Ancianos nuñewu̱nlú ga̱jma̱a̱ nuxnulúʼ consejo, mú tséthulú ndiéjunʼ dí gíʼmaa muraʼwíí mu̱ʼni̱. Mámbáa rí ikháánʼ kaʼyulú musngajmáá Jeobá ga̱jma̱a̱ rí nuʼthá ma̱ngaa rí nu̱ʼni̱ mámbá mbiʼi á mu nandulúʼ kuʼyáá ma̱ngaa rí mu̱ʼni̱ maʼdxuu a̱jkiu̱u̱n (Rom. 14:12). Ikhaa mambáyulú muraʼwíí májánʼ rí mu̱ʼni̱ ga̱jma̱a̱ dí muguajún jmbu. Ikha jngóo anciano najmún Biblia mu mumbayulúʼ makru̱ʼu̱lú xú káʼnii eʼyoo Jeobá mbá rí nandulú muraʼwíí mu̱ʼni̱, nda̱wa̱á nuniña̱a̱nʼ rí ikháánʼ má gúraʼwíí rí mu̱ʼni̱. Rúʼko̱ gámbáyulú mundxa̱ʼwáá edxu̱lú xó má Jeobá ga̱jma̱a̱ majmáánʼ muraʼwíí májánʼ rí mu̱ʼni̱ (Heb. 5:14).

17. Ndiéjunʼ rí gíʼmaa mu̱ʼni̱ rá.

¹⁷ ¡Ra̱ʼkhá tháán mitsaanʼ dí manindxu̱lú mugiu̱u̱ Jeobá! Ikhaa nikuʼmaa Jesús, “baxtúu májáanʼ”, mu maʼni káwáánʼ ma̱ngaa mu ma̱ndoo makuwáanʼ kámuu mbiʼi (Juan 10:11). Ma̱ngaa najmiuu anciano bi̱ kúwá náa congregación mu maʼnimbánuu rí nikudaminaʼ maʼni, índo̱ niʼthí: “Ma̱xnia̱la baxtúu bi̱ muni̱ xó má eyoʼ ikhúún, ikhiin muxniʼtsala ga̱jma̱a̱ ku̱ma̱ ma̱ngaa muni̱ rí mikruaʼala” (Jer. 3:15). Á mu nikáguabáánʼlu o nánguá kuwáanʼ májánʼ gajmiúlú Jeobá, gundxa̱ʼwún ancianos mumbayúlú. Gajmulú májánʼ regalo rí Jeobá nixnulu.