Xú káʼnii eyáá Testigos de Jeobá dí nikháñún mbaʼin xa̱bu̱ | Ndiéjunʼ eʼthí náa Biblia rá.

Mbiʼi 27 ñajunʼ gu̱nʼ enero tsiguʼ 2023, mbaʼin xa̱bu̱ náa xúgíʼ numbaaʼ niniri̱ya̱a̱ʼ mbiʼi dí nikháñún mbaʼin xa̱bu̱ (Holocausto). Mbáa ga̱jma̱a̱ numuu ra̱májánʼ dí nirígá rígi̱ dí naʼni má itháán dí 75 tsiguʼ, maʼniaaʼ dí ikháán matrajximínáʼ, náá numuu rí Dios niniñuuʼ rí makhañún mbaʼin wéñuʼ xa̱bu̱ rá.

• Mu ma̱ta̱ya̱a̱ itháán rí naʼthí náa Biblia, atraxnuu artículo “¿Por qué sucedió el Holocausto judío? ¿Por qué Dios no lo impidió?”.

Judíos ninindxu̱ún bi̱ niguáʼníí rígi̱. Nimíniiʼ wéñuʼ, mbaʼin dí ikhiin nikháñún ga̱jma̱a̱ numuu awan rí nigájnuu. Ma̱ngaa nirígá i̱ʼwáʼ grupo bi̱ nijuixkúún ga̱jma̱a̱ niradíin mbaʼin wéñuʼ. Xúʼko̱ má mangiin testigos de Jeobá nijuixkúún ga̱jma̱a̱ numuu rí nunimbu̱u̱n rí naʼthí náa Biblia.

• Mu ma̱ta̱ya̱a̱ itháán, atraxnuu artículo “¿Qué les ocurrió a los testigos de Jehová durante el Holocausto?”.

“Makuwáanʼ májánʼ nda̱wa̱á ga̱jma̱a̱ makhánala mbá rí wíji̱ ma̱ʼkha̱”

Mbaʼin xa̱bu̱ namíñúún dí xóo nikháñún mbaʼin xa̱bu̱ matanga̱a̱ marigá mbu̱júu̱. Mú naʼni̱i̱ a̱jkiu̱lú dí náa Biblia naʼthí rí nda̱wa̱á ni xátanga̱a̱ marigá mbu̱júu̱ gamiéjunʼ xóo rúʼko̱.

• “Numuu rí i̱ndó ikhúúnʼ eyo̱o̱ ndiéjunʼ rí endxaʼwamínáʼ maʼni ga̱jma̱a̱ numala, eʼthí Jeobá, nandoʼ makuwáanʼla tsímáá raʼkháa dí mumíníiʼ, nandoʼ rí makuwáanʼ májánʼ nda̱wa̱á ga̱jma̱a̱ makhánala mbá rí wíji̱ ma̱ʼkha̱” (Jeremías 29:11).a

Dí kua̱ʼthi̱i̱n rígi̱ gajkhun maʼga̱nú marigá índo̱ Jeobá gáʼni gámbáa xúgíʼ dí ra̱májánʼ dí rígá, ga̱jma̱a̱ maʼni májáanʼ xúgíʼ rí nichúu, gítháán má rí Dios maʼni rígi̱:

• Maʼni gámbíin bi̱ ra̱míjíinʼ bi̱ nuni̱ gíníi eʼwíinʼ (Proverbios 2:22).

• Maʼni thanún mbá xúgíinʼ bi̱ nimíniiʼ ga̱jma̱a̱ ikhiin muxkamaa rí maʼni̱i̱ a̱jkiu̱ún (Apocalipsis 21:4).

• Maʼnigabi̱ín makuwá mbu̱júu̱ náa tsu̱du̱u̱ ku̱ba̱ʼ bi̱ nikháñún (Juan 5:28, 29).

Ikháán ma̱ndoo matatsimbaʼ rí naʼthí náa Biblia dí mitsaanʼ dí kua̱ʼthi̱i̱n rígi̱. Á mu nandaaʼ ma̱ta̱ya̱a̱ náá numuu, nutha̱a̱nʼxu ma̱ta̱ya̱a̱ programa de clases particulares de la Biblia.