Top left: Marek M. Berezowski/Anadolu Agency via Getty Images; bottom left: Halfpoint Images/Moment via Getty Images; center: Zhai Yujia/China News Service/VCG via Getty Images; top right: Ismail Sen/Anadolu Agency via Getty Images; bottom right: E+/taseffski/via Getty Images
¡A̱JUWALÓʼ XAWI JÁMBA̱ MIʼTSÚ!
Tsigu 2023: Mbá tsigu rí neʼne rí maphú nijúwa̱ʼ gaʼkho̱ xa̱bo̱ | Dí iʼthán Ajngóo Ana̱ʼlóʼ rá.
Xugíí gaʼkho̱ rí niríga̱ tsigu 2023 nasngájma rí na̱ka̱ ra̱tri̱go̱o̱ mbiʼi rí ma̱mbáa rí ra̱máján (2 Timoteo 3:1). Athiyáá xáne rí mbá xúgíí rí naríga̱ mbiʼi rí juwalóʼ xúge̱ʼ wapha máʼ niʼthán ajngóo Ana̱ʼlóʼ rí ma̱ri̱gá ne̱.
Rí naʼthán Ajngóo Ana̱ʼlóʼ jamí xúgíí rí naríga̱ ná numbaa
“Mudxawíínlaʼ rí ge̱e̱ ñúʼún ríga̱ xkujndu ná numbaa jamí mu̱wán rí ma̱ri̱gá ne̱” (Mateo 24:6).
“Phú i̱wa̱á mbaʼa xkujndu ríga̱ ná xúgíí numbaa”.a
Araxnuu ná naʼthán “Tsáa gáñawúún xa̱bo̱ tsí numíni̱í e’ne xkujndu rá.” jamí mangaa ná naʼthán “Nanújngoo a̱jma̱ billón mbúkha̱a̱ dolar nijmúú xa̱bo̱ ñajon muni̱i̱ xkujndu”.
“Phú mbaʼa xuajen ná ma̱xma” (Marcos 13:8).
“Asndo nákhí ni̱gi̱ʼdu̱u̱n tsigu 2023 asndo xúge̱ʼ maphú gakhe̱ nixma mbá 13 nothon, gue̱tso̱ nothon ríge̱ʼ maphú gakhe̱ nixma xó rí iʼwá miʼtsú rí nixma”.b
Araxnuu ná naʼthán “Maphú gakhe̱ nixma ná Turquía jamí na Siria mangaa”.
“Ngamí mi̱ndaʼkho ma̱ri̱gá” (Lucas 21:11).
“Rí phú nigigoo numbaa wámba̱ máʼ. Xúge̱’ rí phú mika mi̱nda’kho nagaʼá numbaa” (Ajngóo táta̱ António Guterres, mbo̱ secretario general de las Naciones Unidas).c
Araxnuu ná naʼthán “Maphú nanújngoo e’ne mika xúgíí inuu numbaa tsigu 2023”.
“Ewe” (Mateo 24:7).
“Tsigu 2023: I̱mba̱ tsigu rí phú júwa̱ʼ gaʼkho̱ xa̱bo̱ xáne gúni̱i̱ muxníʼtsúún xa̱bo̱ guʼwúun”.d
Araxnuu ná naʼthán “Xkujndu jamí rí na̱ka̱ raʼchúu numbaa naʼne rí nda̱a̱ rí mo̱pho̱ xa̱bo̱”.
“Ído̱ gáʼga ra̱tri̱go̱o̱ mbiʼi maphú gakhe̱ gáʼne” (2 Timoteo 3:1).
“Mba’iin xa̱bo̱ ná xúgíí numbaa phú júwa̱ʼ gaʼkho̱”.e
Araxnuu ná naʼthán “Phú ngamí rí mba’iin mi̱nda’kho jiáma jamí i̱jín go̱’o̱ júwa̱ʼ jínúú”.
Dí gáríga̱ tsigu 2024 rá.
Nimbáa xa̱bo̱ tsíʼyoo rí ma̱ri̱gá tsigu rí na̱ʼkha̱. Maske máʼ xkuaʼnii, xúgíí rí naríga̱ mbiʼi rí juwalóʼ xúge̱ʼ nasngájma rí inu máʼ Xa̱bo̱ Ñajon tsí niʼgíi̱ Ana̱ʼlóʼ, mbo̱ xtáa̱ mikhuíí, máʼthán ñajuii̱n, ná xúthan ñajon xa̱bo̱ ñajon numbaa jamí ma̱ʼne gámba̱a̱ xúgíí rí naʼne ngínáaʼlóʼ jamí naʼne rí ma̱juwalóʼ gaʼkho̱ (Daniel 2:44; Apocalipsis 21:4).
Ikhaa jngó, xí naʼne jíná a̱kia̱nʼlóʼ, ma̱goo mu̱nda̱ʼa̱álóʼ Ana̱ʼlóʼ Mikhuíí rí mambáyálóʼ. Ajngáa Rawuun Ana̱ʼlóʼ naʼthán:
“Ído̱ rí namíñuʼ, jañii eʼne a̱kui̱nʼ ja̱ya̱a̱ʼlo̱ʼ” (Salmo 56:3).
Xáne gúsnga̱jmálóʼ rí jañii eʼne a̱kia̱nʼló juʼyáá Ana̱ʼlóʼ rá. Athane̱ gajma̱a̱ rí naʼthán Ajngáa Rawuun Ana̱ʼlóʼ, ikhín ma̱ma̱ñaaʼ rí Ana̱ʼlóʼ ma̱ʼnii̱ rí nimbáa xa̱bo̱ ná xámínu̱u̱. Xí nandaaʼ ma̱ma̱ñaaʼ i̱wa̱á xóó, athane̱ gajma̱a̱ Ajngóo Ana̱ʼlóʼ ga̱jma̱á nindxa̱ʼxo̱ʼ, ma̱ma̱ñaaʼ xáne imbáyáaʼ ikháánʼ jamí xúgíin xa̱bia̱ʼ xúgíí rí naxuʼda mina̱ʼ ma̱ʼne Ana̱ʼlóʼ naʼthán ná I̱yu̱u̱ Ajngáa Rawuu̱n.
a Foreign Affairs, “A World at War: What Is Behind the Global Explosion of Violent Conflict?” (Maphú ríga̱ xkujndu ná numbaa: Náá numuu jngó phú ríga̱ xkujndu ná xúgíí numbaa rá.), nána̱ Emma Beals jamí táta̱ Peter Salisbury; mbiʼi 30 i̱ka̱ ñajun go̱nʼ octubre tsigu 2023.
b Nguátha̱ nothon nixmaa tsigu “2023: Phú mbaʼa nothon maphú gakhe̱ nixmaa tsigu ríge̱ʼ xó rí iʼwá tsigu”; nákhí go̱nʼ mayo tsigu 2023.
c Xa̱bo̱ ede̱ nuthúún Naciones Unidas, “Secretary-General’s Opening Remarks at Press Conference on Climate” (ajngáa rí niʼthán táta̱ mbo̱ secretario general sobre el clima náá inúú mbaʼiin xa̱bo̱); mbiʼi 27 i̱ka̱ ñajun go̱nʼ julio tsigu 2023.
d Awan rí nigájnuu mi̱ʼxná ráʼa rí mo̱pho̱ xa̱bo̱ ngíníi, “Numíni̱í xa̱bo̱ ná xúgíí numbaa nda̱a̱ rí mu̱phi̱i̱”.
e Xa̱bo̱ ede̱ tsí nuthúún Organización Mundial de la Salud, “Mbiʼi kiajuun ná xúgíí numbaa mi̱tambáñúú xa̱bo̱ tsí phú júwa̱ʼ gaʼkho̱”; mbiʼi 10 i̱ka̱ ñajun go̱nʼ octubre tsigu 2023.