Xáne gúʼne̱lóʼ ma̱juwalóʼ gagi tsigu 2024 rá. | Dí iʼthán Ajngóo Ana̱ʼlóʼ rá.

Maske máʼ nikhú ni̱gi̱ʼdu̱u̱n tsigu 2024 phú ríga̱ gaʼkho̱, ikhaa jngó mbaʼiin xa̱bo̱ na̱ju̱mu̱ú rí ni miʼtsú ma̱xáwámba̱ gaʼkho̱. Maske má xkuaʼnii, ríga̱ mbaʼa rí máján guaʼthi̱ínlóʼ ma̱ri̱gá mbiʼi rí ma̱ʼkha̱ nda̱wa̱á. Náá iʼthán rúʼkhue̱n rá.

Ajngóo Ana̱ʼlóʼ naxnálóʼ tsiakhe̱

Ná I̱yu̱u̱ Ajngóo Ana̱ʼlóʼ, jmína̱a̱ʼ máʼ Ana̱ʼlóʼ Mikhuíí naxuʼda mina̱ʼ rí ma̱ʼne gámba̱a̱ xúgíí gaʼkho̱ rí naʼne ngínáaʼlóʼ jamí mangaa naʼthánlóʼ xúgíí rí inu máʼ ma̱ʼnii̱ ga̱jma̱á numúú xa̱bo̱: “Ana̱ʼlóʼ maxúdíi iyoo idúu̱n, jamí ná xájáñúu, ná xáthájuíin a̱kuíi̱n jamí ná xúmbiye̱e̱ʼ, ni máʼ ná xáríga̱ gaʼkho̱. Numuu rí wámba̱a̱ máʼ xúgíí rí niríga̱ ginii”(Apocalipsis 21:4).

Xí nandaaʼ ma̱ma̱ñaaʼ i̱wa̱á xóó ga̱jma̱á numuu xúgíí rí mitsaan naʼthán ajngóo Ana̱ʼlóʼ, araxnuu ná naʼthán “Xúgíí rí mitsaan guaʼthi̱ínlóʼ gakon ma̱ri̱gá”.

Xáne gámbáyáaʼ xúge̱ʼ Ajngóo Ana̱ʼlóʼ

Xúgíí rí mitsaan ma̱ʼne Ana̱ʼlóʼ Mikhuíí naʼthán Ajngáa Rawuu̱n mambáyáaʼ ma̱xáraxtaa jíná mi̱ndaʼkho, rí gagi gára̱xtaa (Romanos 15:13). Ajngóo Ana̱ʼlóʼ naʼthán mangaa mbaʼa ajngáa máján rí mambáyáaʼ ma̱tha̱ne̱ ga̱jma̱a̱ʼ gaʼkho̱ rí xtaʼdáá xúge̱ʼ, xí nda̱a̱ mbúkha̱a̱ ithane̱, na̱gu̱ma ngínáá o najáñaaʼ mbo̱ʼ.

Athiyáá xáne rí xúgíí rí mitsaan ma̱ʼne Ana̱ʼlóʼ naʼtháan Ajngóo nimbáyúu mbáa xa̱bo̱ ma̱xtáa̱ gagi jamí tsímáá maske máʼ phú ngíná nigaja̱a̱. Athiyáá video Juan Pablo Zermeño: Jeobá niʼni rí magiʼdoo numuu vida ndrígóʼ.
Athiyáá xáne gámbáyáaʼ Ajngóo Ana̱ʼlóʼ xí nijáñuu mbáa dxájuaʼ tsí maphú nandaaʼ xtayáá, xúʼkhue̱n máʼ mangaa xí nathájuíin a̱kia̱anʼ o xtaa gaʼkho̱. Araxnuu ná naʼthán “Á ma̱jmaa Ajngóo Ana̱ʼlóʼ mambáyíʼ xí nathájuíin a̱kui̱nʼ rá dxe̱ʼ.”.
Athiyáá xáne rí mbáa a̱’go̱ tsí ninindxu̱u̱ soldado ni’thán rí “phú gúkú a̱kui̱in jamí jámba̱ miʼtsú najiʼnáa” nakhí rí ginii. A̱ʼgo̱ tsíge̱ʼ maphú nimbáyúu Ajngóo Ana̱ʼlóʼ. Athiyáá video Ajngóo Ana̱ʼlóʼ neʼne rí ni̱ni̱ʼñúulo̱ʼ aju̱nʼ namídá.

Á nandaaʼ ma̱ra̱xtaa májáanʼ ikháánʼ jamí mangiin xa̱bo̱ guʼwáaʼ tsigu 2024 rá. Ajngóo Ana̱ʼlóʼ mambáyáaʼ. Maxátha̱ne̱ numa ma̱thi̱ya̱á xáne i̱sngúúnxo̱’ xa̱bo̱ numuu Ajngóo Ana̱’ló’. Xúgíí rí ma̱ma̱ñaaʼ mambáyáa’ mi̱nda’kho ma̱thi̱ya̱á xane rí Ajngóo Ana̱’ló’ ma̱’ne rí ma̱ra̱xtaa tsímáá jamí gagi (Jeremías 29:11).