Mbá dí ma̱ndoo mambáñún gu̱ʼu̱ bi̱ naguma ngíníi

Xígi̱ kaʼnii eʼthí náa nagi̱ʼdu̱u̱ artículo dí nitsimuu náa jw.org rí kayá edxu̱u̱ “Nimbáa a̱ʼgo̱ náxágu̱ma ngínáa: Dí iʼthán Ajngóo Ana̱ʼlóʼ rá.” Náa naguámbá artículo rígi̱ na̱ʼkha̱ náa ma̱ndoo matani̱i̱ descargar PDF ga̱jma̱a̱ nda̱wa̱á ma̱ndoo matani̱i̱ imprimir ga̱jma̱a̱ matarmi̱ga̱a̱ʼ. Mbáa ndxájulú bi̱ xtáa Estados Unidos bi̱ mbiʼyuu Stacy naʼthí: “Nigúwíi tikhuu copia, ni̱jkhá ka̱gu̱ʼ ga̱jmu̱ʼ i̱mba̱a̱ ndxájulú náa guʼwá rí naxtiewu̱u̱n gu̱ʼu̱ dí rígá mijngii”.

Mbáa a̱ʼgu̱ bi̱ nañejunʼ náa guʼwá rúʼko̱ nindo̱ʼo̱ʼ xóó copia mu maxnún gu̱ʼu̱ bi̱ kúwá ikhí. Rígi̱ niʼni dí majuixnájxi̱ mbá 40 copia ga̱jma̱a̱ mbá 30 tarjetas dí mambáñún matu̱ʼu̱u̱n náa jw.org. I̱mba̱ mi̱ʼtsu̱ dí ni̱jkuáxu bi̱ kayá edxu̱u̱ ikhí niʼthúxu dí májánʼ gáʼni dí musngajmááxu mámbáa xóo nindxu̱u̱ dí miʼsngáá ga̱jma̱a̱ numuu Biblia.

Stacy gajmíi̱n i̱mba̱ a̱jmi̱i̱n a̱ngiu̱lú nindriguíin májánʼ mangiin náa i̱mba̱ guʼwá rí naxtiewu̱u̱n gu̱ʼu̱, ikhí nixna mbá witsu copia ga̱jma̱a̱ nindu̱ʼu̱u̱n xóó itháan. Mbáa a̱ʼgu̱ bi̱ nañejunʼ ikhí niʼthí: “Ndayúxuʼ, numuu dí folleto rígi̱ mambáñún gu̱ʼu̱ bi̱ kúwá gi̱i̱”. Índo̱ nitangiín mbu̱júu̱, mbaʼin gu̱ʼu̱ bi̱ kúwá ikhí nigimbíin mu mbuyáá xóo nindxu̱u̱ dí najuiʼsngáa ga̱jma̱a̱ numuu Biblia, a̱jmi̱i̱n dí ikhiin nithi dí nandún magún náa guʼwá nagimbáanʼ xmáná má rúʼko̱.

Stacy naʼthí: “Naʼniuxu̱ tsiánguá dí ra̱ʼkhá tháán májánʼ nindrigú artículo rígi̱. Índo̱ nagájnuu copia ma̱ndoo matarmi̱ga̱a̱ʼ ikhú naʼni xóo mbá folleto, nindxu̱u̱ mbá i̱yi̱i̱ʼ mitsaanʼ dí ma̱ndoo majmulú mu muʼthúún ga̱jma̱a̱ gu̱ʼu̱ bugi̱ dí maʼni Xa̱bu̱ Ñajunʼ ndrígóo Dios ga̱jma̱a̱ numún. Ra̱ʼkhá tháán nidxuxu índo̱ ndi̱ya̱a̱ dí gu̱ʼu̱ bugi̱ nindrigú májánʼ i̱yi̱i̱ʼ rígi̱ ga̱jma̱a̱ ra̱ʼkhá tháan eyuxu̱ʼ mbu̱ya̱a̱ xóo Jeobá gáʼni tsajkurámuuʼ tsiaki̱i̱ dí nu̱nixu ga̱jma̱a̱ dí muxkamaa i̱ʼwáʼ xóo ma̱ndoo mu̱thu̱u̱nxu̱ ga̱jma̱a̱ numuu ajngáa rí májánʼ gu̱ʼu̱ bugi̱”.