Apokalipse

1 Neʼe mak buat neʼebé Jesus Kristu hatudu sai ona. No Jesus simu buat sira-neʼe husi Maromak, atu bele hatudu sai ba Maromak nia atan sira kona-ba buat neʼebé tenke mosu lakleur tan. Jesus haruka ninia anju ba João neʼebé nuʼudar Maromak nia atan, no fó sai ida-neʼe ba João liuhusi sinál sira. 2 No João fó sasin kona-ba Maromak nia liafuan no kona-ba sasin neʼebé Jesus Kristu fó, sin, kona-ba buat hotu neʼebé nia haree. 3 Ksolok ba ema neʼebé lee ho lian makaʼas no neʼebé rona liafuan santu sira-neʼe, no neʼebé halo tuir buat neʼebé hakerek iha laran; basá tempu neʼebé hili tiha ona sai besik daudaun.

4 Husi João, hakerek ba kongregasaun sira neʼebé iha área Ázia nian:

Haʼu harohan katak imi sei simu laran-diʼak boot no dame husi “Ida neʼebé iha ohin no neʼebé iha uluk, no neʼebé atu mai”, no husi espíritu hitu neʼebé iha kadunan nia oin, 5 no husi Jesus Kristu, “Sasin-Naʼin neʼebé Laran-Metin”, “Ida neʼebé moris-hiʼas primeiru husi mate”, no neʼebé sai nuʼudar “Ukun-Naʼin ba liurai sira iha rai”.

No nia hadomi ita no halo ita livre husi ita-nia sala liuhusi ninia raan rasik, 6 no nia halo ita nuʼudar liurai no amlulik ba ninia Maromak no Aman, sin, nia deʼit mak merese simu glória no kbiit ba nafatin. Amen.

7 Haree! Nia sei mai ho kalohan, no matan hotu sei haree nia, neʼe inklui sira neʼebé sona nia; no suku hotu iha rai sei baku sira-nia an ho triste tanba nia. Sin, Amen.

8 “Haʼu mak Alfa no Ómega”, Maromak Jeová dehan, “Ida neʼebé iha ohin no neʼebé iha uluk, no neʼebé atu mai, Ida neʼebé iha Kbiit Boot Liu Hotu”.

9 Haʼu João, imi-nia maluk fiar-naʼin no ida neʼebé hetan susar no tahan terus hamutuk imi tanba ida deʼit ho Jesus no hola parte hamutuk ho imi nuʼudar liurai; haʼu iha rai kiʼik ida naran Patmos tanba haʼu koʼalia kona-ba Maromak no fó sasin kona-ba Jesus. 10 Espíritu santu lori haʼu ba Naʼi nia loron, no haʼu rona lian makaʼas ida iha haʼu-nia kotuk hanesan trombeta, 11 dehan: “Hakerek iha livru ida buat neʼebé ó haree no haruka neʼe ba kongregasaun hitu: Éfeso, Esmirna, Pérgamo, Tiatira, Sardes, Filadélfia, no Laodiseia.”

12 No haʼu fila oin atu haree sé mak koʼalia ba haʼu, no kuandu haʼu fila, haʼu haree ahi-oan nia fatin hitu husi osan-mean, 13 no iha ahi-oan fatin neʼe nia klaran haʼu haree ema ida neʼebé hanesan oan-mane husi ema, nia hatais unuk neʼebé naruk toʼo ninia ain no kesi hena osan-mean haleʼu ninia hirus-matan. 14 Liután neʼe, fuuk iha ninia ulun mak mutin loos, no ninia matan hanesan ahi neʼebé lakan; 15 no ninia ain hanesan riti diʼak kuandu nabilan iha fornu; no ninia lian hanesan bee barak nia tarutu. 16 No iha fitun hitu iha nia liman-loos, no surik kroʼat naruk ho kroʼat rua sai husi nia ibun, no ninia oin hanesan loro-matan kuandu fó naroman ho kbiit boot. 17 No kuandu haʼu haree nia, haʼu monu iha nia ain hanesan ema neʼebé mate.

No nia tula nia liman-loos iha haʼu-nia leten no dehan: “Keta taʼuk. Haʼu mak ida neʼebé Uluk no ida neʼebé Ikus, 18 no haʼu mak ida neʼebé moris; no uluk haʼu mate tiha, maibé ohin haʼu moris ba nafatin, no haʼu iha xave ba mate no ba rate.* 19 Tan neʼe, hakerek buat sira neʼebé ó haree ona, no mós hakerek buat neʼebé mosu agora no buat neʼebé sei mosu depois neʼe. 20 Kona-ba segredu santu husi fitun hitu neʼebé ó haree iha haʼu-nia liman-loos, no kona-ba ahi-oan nia fatin husi osan-mean: Fitun hitu katak anju sira iha kongregasaun hitu, no ahi-oan nia fatin hitu mak kongregasaun hitu.

2 “Hakerek ba anju iha kongregasaun Éfeso dehan: Neʼe mak lia-menon husi ida neʼebé kaer fitun hitu iha nia liman-loos, no neʼebé laʼo iha ahi-oan nia fatin hitu husi osan-mean nia klaran: 2 ‘Haʼu hatene ó-nia hahalok sira, no ó-nia serbisu no ó tahan susar oioin, no katak ó la simu ema aat iha ó-nia leet, no katak ó koko sira neʼebé dehan katak sira mak apóstolu, maibé sira laʼós, no ó haree katak sira bosok-teen. 3 Ó mós tahan ona susar oioin, no hakaʼas an nafatin iha susar laran tanba haʼu-nia naran no ó la sai laran-tun. 4 Maibé, haʼu la kontente ho ó kona-ba ida-neʼe, katak ó husik ona ó-nia domin uluk nian.

5 “‘Tan neʼe, hanoin-hetan kona-ba buat neʼebé uluk ó iha maibé lakon ona,* no hakribi sala bá no halo hahalok neʼebé ó halo uluk. Se ó la hakribi sala, haʼu sei toʼo ba ó, no haʼu sei hasai tiha ó-nia ahi-oan fatin husi ninia fatin. 6 Maski nuneʼe, ó halo buat ida neʼebé diʼak, katak ó odi hahalok husi grupu Nicolau nian neʼebé haʼu mós odi. 7 Ema neʼebé iha tilun, rona bá buat neʼebé espíritu dehan ba kongregasaun sira: Ba nia neʼebé manán, haʼu sei fó lisensa atu han husi ai-hun moris nian neʼebé iha paraízu Maromak nian.’

8 “No hakerek ba anju iha kongregasaun Esmirna dehan: Neʼe mak lia-menon husi ‘ida neʼebé Uluk no Ikus’, ida neʼebé mate maibé moris fali ona: 9 ‘Haʼu hatene ó-nia terus no ó-nia kiak. Maski nuneʼe, ó riku. No haʼu mós hatene kona-ba ema neʼebé dehan katak sira ema judeu no sira koʼalia aat imi, maibé sira laʼós ema judeu, no sira mak husi sinagoga Satanás nian. 10 Keta taʼuk kona-ba susar neʼebé ó sei hasoru. Haree! Diabu sei kontinua soe imi balu ba komarka atu imi bele hetan koko neʼebé kompletu, no atu imi hetan terus ba loron sanulu. Hatudu bá katak imi laran-metin toʼo mate, no haʼu sei fó ba imi koroa moris nian. 11 Ema neʼebé iha tilun, rona bá buat neʼebé espíritu dehan ba kongregasaun sira: Ema neʼebé manán sei nunka hetan mate segundu nian.’

12 “No hakerek ba anju iha kongregasaun Pérgamo dehan: Neʼe mak lia-menon husi ida neʼebé iha surik kroʼat naruk ho kroʼat rua: 13 ‘Haʼu hatene ó hela iha neʼebé, katak, iha fatin neʼebé Satanás tau ninia kadunan; maski nuneʼe ó kontinua kaer metin ba haʼu-nia naran, no ó la nega ó-nia fiar ba haʼu iha Ántipas nia loron, nia mak haʼu-nia sasin neʼebé laran-metin, ida neʼebé ema oho iha imi-nia leet, iha neʼebé Satanás hela bá.

14 “‘Maibé, haʼu la kontente ho ó kona-ba buat balu, katak iha ó-nia leet iha ema neʼebé halo tuir hanorin Balám nian, ida neʼebé hanorin Balak atu tau fatuk sidi nian iha Izraél nia oan sira-nia oin, atu sira han buat neʼebé hasaʼe tiha ona ba estátua no halo sala-foʼer.* 15 Nuneʼe mós iha ó-nia leet iha ema sira neʼebé halo tuir hanorin husi grupu Nicolau nian. 16 Tan neʼe, hakribi sala bá. Se lae karik, haʼu sei toʼo lalais ba imi, no haʼu sei halo funu ho sira hodi uza surik naruk husi haʼu-nia ibun.

17 “‘Ema neʼebé iha tilun, rona bá buat neʼebé espíritu dehan ba kongregasaun sira: Ba ema neʼebé manán, haʼu sei fó maná* balu neʼebé subar hela; no haʼu sei fó ba nia fatuk mutin, no iha fatuk neʼe nia leten iha naran foun ida neʼebé hakerek ona, no ema ida la hatene naran neʼe só deʼit ema neʼebé simu nia.’

18 “No hakerek ba anju iha kongregasaun Tiatira dehan: Neʼe mak lia-menon husi Maromak nia Oan-Mane, ida neʼebé iha matan hanesan ahi lakan, no ain hanesan riti diʼak: 19 ‘Haʼu hatene ó-nia hahalok sira, ó-nia domin, ó-nia fiar, ó-nia serbisu ba Maromak no ó tahan ona susar oioin, no haʼu hatene katak ó-nia hahalok ikus nian diʼak liu fali uluk nian.

20 “‘Maibé, haʼu la kontente ho ó kona-ba ida-neʼe, katak ó husik deʼit iha ó-nia leet feto Jezabel neʼe, ida neʼebé bolu nia an nuʼudar profeta ida, no nia hanorin no lohi haʼu-nia atan sira hodi halo sala-foʼer no han buat neʼebé hasaʼe ona ba estátua. 21 Haʼu fó tempu ba nia atu hakribi ninia sala, maibé nia lakohi atu arrepende an husi sala-foʼer. 22 Haree! Lakleur tan haʼu sei soe nia ba toba-fatin ema moras nian, no kona-ba sira neʼebé halo sala-foʼer* ho nia, se sira la hakribi feto neʼe nia hahalok sira, haʼu sei soe sira ba susar boot. 23 No haʼu sei oho ninia oan sira ho moras neʼebé halo mate, atu nuneʼe kongregasaun hotu sei hatene katak haʼu mak ida neʼebé buka-hatene ema nia hanoin no laran, no haʼu sei selu ba imi tuir imi ida-idak nia hahalok.

24 “‘Maibé, kona-ba sira seluk neʼebé iha Tiatira, katak imi hotu neʼebé la simu hanorin Jezabel nian no neʼebé la hatene buat neʼebé ema bolu nuʼudar “buat kleʼan” husi Satanás, haʼu dehan ba imi, haʼu sei la tau tan todan ba imi. 25 Maski nuneʼe, kaer metin ba buat diʼak neʼebé imi iha ona toʼo tempu neʼebé haʼu toʼo ba imi. 26 No ba ema neʼebé manán no halo tuir haʼu-nia hahalok sira toʼo rohan, haʼu sei fó ba nia kbiit atu ukun nasaun sira, 27 no nia sei ukun ema ho ai-tonka besi, nuʼudar haʼu mós simu kbiit atu ukun husi haʼu-nia Aman. No nia sei harahun sira hanesan sanan-rai. 28 No haʼu sei fó ba nia fitun dadeer nian. 29 Ema neʼebé iha tilun, rona bá buat neʼebé espíritu dehan ba kongregasaun sira.’

3 “No hakerek ba anju iha kongregasaun Sardes dehan: Neʼe mak lia-menon husi ida neʼebé iha Maromak nia espíritu hitu no iha fitun hitu: ‘Haʼu hatene ó-nia hahalok sira; ema hanoin katak ó moris, maibé ó mate. 2 Matan-moris bá, no hametin buat sira neʼebé besik mate ona, basá haʼu haree katak ó seidauk halo buat hotu neʼebé Maromak hakarak ó atu halo. 3 Tan neʼe, kontinua hanoin kona-ba buat neʼebé ó simu no rona ona, no kontinua halo tuir ida-neʼe, no hakribi sala bá. Tuir loloos, se ó la hadeer, haʼu sei mai hanesan naʼok-teen ida, no ó sei la hatene iha oras saida mak haʼu sei toʼo ba ó.

4 “‘Maibé, iha ema balu iha ó-nia leet iha Sardes neʼebé la hafoʼer sira-nia hatais, no sira sei laʼo ho haʼu ho hatais mutin tanba sira merese ida-neʼe. 5 Nuneʼe, ema neʼebé manán sei hatais hena mutin; no haʼu sei la hasai ninia naran husi livru moris nian, maibé haʼu sei sai sasin ba nia naran iha haʼu-nia Aman nia oin no iha anju sira-nia oin. 6 Ema neʼebé iha tilun, rona bá buat neʼebé espíritu dehan ba kongregasaun sira.’

7 “No hakerek ba anju iha kongregasaun Filadélfia dehan: Neʼe mak lia-menon husi ida neʼebé santu, neʼebé loos, neʼebé kaer xave David nian, neʼebé loke odamatan atu ema ida labele taka, no taka odamatan atu ema ida labele loke: 8 ‘Haʼu hatene ó-nia hahalok sira. Haʼu loke ona odamatan ida iha ó-nia oin, odamatan neʼebé ema ida la bele taka. No haʼu hatene katak ó iha kbiit uitoan, no ó kaer metin ba haʼu-nia liafuan no ó hatudu laran-metin ba haʼu-nia naran. 9 Kona-ba ema sira neʼebé husi sinagoga Satanás nian neʼebé dehan katak sira ema judeu, maibé laʼós no sira bosok, haʼu sei halo sira bá toʼo ó no hakruʼuk an iha ó-nia ain no haʼu sei halo sira hatene katak haʼu hadomi ó. 10 Tanba ó halo tuir ona haʼu-nia ezemplu kona-ba tahan susar, haʼu sei tau matan ba ó iha oras koko nian, neʼebé atu mosu ba raiklaran tomak hodi koko ema sira neʼebé hela iha rai. 11 Haʼu sei mai lalais. Kontinua kaer metin ba buat diʼak neʼebé ó iha ona, atu nuneʼe ema ida labele hadau ó-nia koroa.

12 “‘Ema neʼebé manán, haʼu sei halo nia nuʼudar ai-riin iha haʼu-nia Maromak nia templu, no la iha buat ida neʼebé sei hasai tiha nia husi neʼebá. No haʼu sei hakerek haʼu-nia Maromak nia naran iha nia no naran husi sidade haʼu-nia Maromak nian, katak Jeruzalein foun, ida neʼebé tun mai husi lalehan husi haʼu-nia Maromak, no haʼu mós sei hakerek haʼu-nia naran foun iha nia. 13 No ema neʼebé iha tilun, rona bá buat neʼebé espíritu dehan ba kongregasaun sira.’

14 “No hakerek ba anju iha kongregasaun Laodiseia dehan: Neʼe mak lia-menon husi Amen, sasin-naʼin neʼebé laran-metin no loos, ida neʼebé Maromak kria ulukliu: 15 ‘Haʼu hatene ó-nia hahalok sira, katak ó la malirin no la manas. Haʼu hakarak katak ó malirin ka manas. 16 Maibé, tanba ó morna deʼit no la manas ka la malirin, entaun haʼu sei muta sai ó husi haʼu-nia ibun. 17 Ó dehan: “Haʼu riku no haʼu halibur ona rikusoin, entaun haʼu la presiza tan buat seluk”, maibé ó la hatene katak ó la kontente, kasian liu, kiak, matan-delek, no isin-tanan. 18 Haʼu haruka ó atu sosa husi haʼu osan-mean neʼebé hamoos ona ho ahi atu ó bele sai riku, sosa unuk mutin atu ó bele hatais hodi ó la sai moe tanba ema haree ó isin-tanan, no sosa ai-moruk matan nian atu kose ba ó-nia matan hodi ó bele haree.

19 “‘Haʼu fó konsellu no dixiplina ba sira hotu neʼebé haʼu hadomi. Tan neʼe, sai laran-manas bá no hakribi sala. 20 Haree! Haʼu hamriik iha odamatan oin hodi tuku. Se ema ruma rona haʼu-nia lian no loke odamatan, haʼu sei tama ba nia uma no han-kalan hamutuk ho nia no nia hamutuk ho haʼu. 21 Ba ema neʼebé manán, haʼu sei fó lisensa ba nia atu tuur hamutuk ho haʼu iha haʼu-nia kadunan, nuʼudar haʼu mós manán no tuur hamutuk ho haʼu-nia Aman iha ninia kadunan. 22 Ema neʼebé iha tilun, rona bá buat neʼebé espíritu dehan ba kongregasaun sira.’”

4 Depois buat sira-neʼe, haʼu haree odamatan ida nakloke iha lalehan, no lian primeiru neʼebé haʼu rona mak hanesan trombeta ida, no koʼalia ba haʼu dehan: “Saʼe mai iha neʼe, no haʼu sei hatudu ba ó buat neʼebé tenke mosu.” 2 Depois neʼe, derrepente deʼit Maromak nia espíritu tun ba haʼu, no haʼu haree kadunan ida iha lalehan, no haʼu mós haree ida neʼebé tuur iha kadunan neʼe nia leten. 3 No ida neʼebé tuur iha kadunan neʼe nabilan hanesan fatuk-jaspe no fatuk mean neʼebé folin-boot, no arkiris neʼebé haree hanesan fatuk-ezmeralda haleʼu kadunan neʼe.

4 No kadunan ruanulu-resin-haat haleʼu kadunan neʼe, no katuas naʼin ruanulu-resin-haat neʼebé hatais unuk mutin mak tuur iha kadunan sira-neʼe, no sira iha koroa osan-mean nian iha sira-nia ulun. 5 Rai-lakan no lian oioin no rai-tarutu sai husi kadunan neʼe; no iha kadunan neʼe nia oin iha ahi-oan hitu neʼebé lakan hela, no neʼe katak espíritu hitu husi Maromak. 6 No iha kadunan neʼe nia oin iha buat neʼebé hanesan bee-lihun neʼebé haree hanesan vidru ka kristál.

No iha kadunan neʼe nia klaran no haleʼu kadunan neʼe, iha anju haat neʼebé nakonu ho matan iha oin no iha kotuk. 7 No anju primeiru hanesan leaun ida, no anju segundu hanesan karau-oan, no anju terseiru iha oin hanesan ema, no anju ida tan hanesan manu-makikit. 8 No kona-ba anju haat neʼe, sira ida-idak iha liras neen; no sira-nia liras hotu nakonu ho matan. No loron no kalan sira kontinua dehan: “Santu, santu, santu, Jeová, Maromak Kbiit Boot Liu Hotu, ida neʼebé iha uluk no neʼebé iha ohin no neʼebé atu mai.”

9 No dala ida-idak neʼebé anju sira-neʼe fó glória no hahiʼi no agradese ba Ida neʼebé tuur iha kadunan neʼe, Ida neʼebé moris ba nafatin, 10 katuas naʼin ruanulu-resin-haat hakneʼak hodi taka oin ba rai no adora Ida neʼebé tuur iha kadunan neʼe no Ida neʼebé moris ba nafatin, no sira soe sira-nia koroa iha kadunan neʼe nia oin, no dehan: 11 “Jeová, ami-nia Maromak, Ita-Boot merese simu glória, hahiʼi no kbiit, tanba Ita kria ona buat hotu, no tanba Ita-nia hakarak mak buat hotu iha no kria tiha.”

5 No haʼu haree Ida neʼebé tuur iha kadunan neʼe kaer hela surat-tahan ida iha nia liman-loos no surat-tahan neʼe hakerek iha oin no kotuk, no neʼe kesi metin ho selos* hitu. 2 No haʼu haree anju neʼebé iha kbiit fó avizu ho lian makaʼas dehan: “Sé mak merese atu loke surat-tahan neʼe no hasai ninia selos sira?” 3 Maibé la iha ema ida iha lalehan ka iha rai ka iha rai nia okos neʼebé bele loke surat-tahan neʼe ka haree ba nia laran. 4 No haʼu tanis makaʼas tanba la iha ema ida neʼebé merese atu loke surat-tahan neʼe ka haree ba nia laran. 5 Maibé katuas ida dehan ba haʼu: “Keta tanis tan. Haree! Leaun husi suku Judá nian, abut David nian, nia manán ona hodi bele loke surat-tahan neʼe no hasai ninia selos hitu.”

6 No haʼu haree bibi-malae oan ida hamriik hela iha kadunan no iha anju haat nia oin no iha katuas sira-nia klaran, no bibi-oan neʼe haree hanesan ema oho tiha ona nuʼudar sakrifísiu, no nia iha dikur hitu no matan hitu, no ninia matan katak espíritu hitu husi Maromak neʼebé haruka tiha ona ba mundu tomak. 7 No nia hakbesik ba ida neʼebé tuur iha kadunan neʼe no foti kedas surat-tahan neʼe husi ninia liman-loos. 8 No kuandu nia foti surat-tahan neʼe, anju naʼin-haat no katuas naʼin ruanulu-resin-haat hakneʼak ho oin ba rai iha Bibi-Oan nia oin, no sira ida-idak iha arpa no bikan osan-mean neʼebé nakonu ho insensu. Insensu* katak santu sira-nia orasaun. 9 No sira kanta knananuk foun ida, dehan: “Ita-Boot merese simu surat-tahan neʼe no loke ninia selos sira, tanba Ita sai tiha ona nuʼudar sakrifísiu no ho Ita-nia raan Ita sosa fali ema husi suku no lian no povu no nasaun hotu ba Maromak, 10 no Ita halo sira sai nuʼudar liurai no amlulik ba Maromak, no sira sei ukun nuʼudar liurai ba mundu.”

11 No haʼu haree, no rona lian husi anju barak neʼebé haleʼu kadunan neʼe no anju haat no katuas sira no sira hamutuk rihun ba rihun, 12 no sira koʼalia ho lian makaʼas dehan: “Bibi-Oan neʼebé sai tiha nuʼudar sakrifísiu merese atu simu kbiit, riku, matenek, forsa, hahiʼi, glória no bensaun.”

13 No kriatura hotu iha lalehan no iha rai no iha rai nia okos no iha tasi, no buat hotu neʼebé iha sira dehan: “Kriatura hotu tenke fó glória, hahiʼi no respeitu ba Ida neʼebé tuur iha kadunan neʼe no ba Bibi-Oan neʼebé iha kbiit ba nafatin.” 14 No anju haat neʼe dehan: “Amen!” no katuas sira-neʼe hakneʼak ho oin ba rai no adora Maromak.

6 No haʼu haree Bibi-Oan loke selos hitu sira-neʼe ida, no haʼu rona anju haat sira-neʼe ida koʼalia ho lian neʼebé hanesan rai-tarutu, hodi dehan: “Mai!” 2 No haʼu haree kuda mutin ida; no ida neʼebé tuur iha leten kaer hela rama ida; no Maromak fó ba nia koroa ida no nia bá hodi manán ninia inimigu sira hotu.

3 No kuandu nia loke selos segundu, haʼu rona anju segundu dehan: “Mai!” 4 No kuda ida seluk sai mai, kuda neʼe kór mean lakan; no ida neʼebé tuur iha kuda neʼe nia leten simu kbiit atu hasai tiha dame husi rai atu nuneʼe ema sei oho malu; no nia simu surik boot ida.

5 No kuandu nia loke selos terseiru, haʼu rona anju terseiru dehan: “Mai!” No haʼu haree kuda metan ida; no ida neʼebé tuur iha kuda neʼe nia leten kaer hela dasin iha nia liman. 6 No haʼu rona lian ida husi anju haat nia klaran, dehan: “Trigu kilograma ida iha folin denáriu* ida no sevada kilograma tolu iha folin denáriu ida; no keta estraga mina oliveira nian no tua-uvas.”

7 No kuandu nia loke selos ba dala haat, haʼu rona anju haat dehan: “Mai!” 8 No haʼu haree kuda ida neʼebé kamutis; no ida neʼebé tuur iha leten naran Mate. No Rate* laʼo tuir nia. No sira simu kbiit ba rai baluk ida,* hodi oho ho surik naruk, ho rai-hamlaha, ho moras neʼebé halo mate, no ho animál fuik iha rai.

9 No kuandu nia loke selos ba dala lima, haʼu haree iha altár nia okos raan husi sira neʼebé ema oho tiha tanba Maromak nia liafuan no tanba sasin neʼebé sira fó sai ona. 10 No sira hakilar ho lian makaʼas dehan: “Naʼi Ukun-Naʼin Boot Liu neʼebé santu no loos, toʼo bainhira mak Ita sei hein atu tesi lia no selu fali ami-nia raan ba ema sira neʼebé hela iha rai?” 11 No sira ida-idak simu unuk mutin; no Naʼi dehan ba sira atu hein tan tempu uitoan, toʼo númeru ba sira-nia maluk atan no maun-alin sira sai kompletu ona, sira neʼebé ema sei oho hanesan sira.

12 No kuandu nia loke selos ba dala neen, haʼu haree rai-nakdoko boot mosu; no loro-matan sai metan hanesan hena karón nian* neʼebé metan, no fulan sai mean hanesan raan, 13 no fitun sira iha lalehan monu ba rai, hanesan ai-figeira nia fuan matak neʼebé monu kuandu anin-boot doko ai neʼe. 14 No lalehan lulun tiha hanesan surat-tahan no lakon, no foho hotu no rai kiʼik hotu hasai tiha husi sira-nia fatin. 15 No liurai sira iha rai neʼe no ema-boot no komandante tropa nian no ema riku no ema neʼebé iha kbiit no atan hotu no ema livre hotu, sira subar an iha fatuk-kuak no iha fatuk-boot nia leet iha foho. 16 No sira kontinua dehan ba foho aas sira no ba fatuk-boot sira: “Monu ba ami-nia leten no subar ami husi Ida neʼebé tuur iha kadunan no husi Bibi-Oan nia hirus, 17 tanba loron boot ba sira-nia hirus mai ona, no sé mak bele tahan?”

7 Depois neʼe haʼu haree anju haat hamriik iha rai nia sikun haat hodi kaer metin hela anin haat husi rai neʼe, atu nuneʼe la iha anin ida neʼebé huu ba rai ka ba tasi ka ba ai-hun sira. 2 No haʼu haree anju ida seluk mosu husi lorosaʼe, no nia kaer hela buat neʼebé nia simu husi Maromak atu tau marka ba ema; no nia bolu ho lian makaʼas ba anju haat neʼebé simu ona kbiit atu halo aat ba rai no tasi, 3 no dehan: “Keta halo aat ba rai ka tasi ka ba ai-hun sira toʼo ami tau tiha marka ba ita-nia Maromak nia atan sira-nia reen-toos.”

4 No haʼu rona númeru husi sira neʼebé hetan marka, neʼe mak ema naʼin-144.000, no sira mai husi suku hotu husi Izraél nia oan sira:

9 No depois buat sira-neʼe, haʼu haree ema-lubun boot neʼebé la bele sura, neʼebé mai husi nasaun, suku, povu no lian hotu, sira hamriik iha kadunan nia oin no iha Bibi-Oan nia oin, sira hatais unuk mutin; no sira kaer ai-palmeira sanak iha sira-nia liman. 10 No sira kontinua haklalak ho lian makaʼas dehan: “Salvasaun mai husi ita-nia Maromak neʼebé tuur iha kadunan, no husi Bibi-Oan.”

11 No anju hotu hamriik haleʼu kadunan no haleʼu katuas sira no mós haleʼu anju haat, no sira hakneʼak ho oin ba rai iha kadunan nia oin hodi adora Maromak. 12 No sira dehan: “Amen! Ita-nia Maromak neʼebé iha matenek no kbiit tenke simu hahiʼi no glória, no kriatura hotu tenke fó hahiʼi ba nia no hatudu agradese nafatin ba nia. Amen.”

13 No katuas sira-neʼe ida husu haʼu dehan: “Ó hatene sé mak sira neʼebé hatais unuk mutin neʼe? Sira mai husi neʼebé?” 14 Haʼu hatán kedas ba nia: “Haʼu-nia naʼi, Ita mak hatene ida-neʼe.” No nia dehan ba haʼu: “Sira mak ema neʼebé liu terus boot, no sira fase tiha ona sira-nia unuk no halo mutin ona ho Bibi-Oan nia raan. 15 Tan neʼe mak sira hamriik iha Maromak nia kadunan nia oin; no sira halo serbisu santu ba nia loron no kalan iha ninia templu; no Ida neʼebé tuur iha kadunan sei prepara tenda ida ba sira atu proteje sira. 16 No sira sei la hamlaha no la hamrook tan, no loro-matan sei la sai manas liu ba sira, 17 tanba Bibi-Oan neʼebé iha kadunan neʼe nia sorin sei tau matan sira hanesan bibi-atan no sei dirije sira ba bee-matan moris nian. No Maromak sei hamaran matan-been hotu husi sira-nia matan.”

8 No kuandu nia loke selos ba dala hitu, lalehan nonook maizumenus minutu tolunulu. 2 No haʼu haree anju hitu neʼebé hamriik iha Maromak nia oin, no Maromak fó trombeta hitu ba sira.

3 No anju seluk toʼo mai no hamriik besik altár, no nia kaer fatin insensu nian neʼebé husi osan-mean; no Maromak fó ba nia insensu barak atu hasaʼe hamutuk ho orasaun santu sira-nian iha altár osan-mean nia leten neʼebé iha kadunan nia oin. 4 No insensu neʼe nia suar saʼe ba Maromak nia oin husi anju neʼe nia liman hamutuk ho orasaun santu sira-nian. 5 Maibé, anju neʼe foti kedas fatin insensu nian, no halo nakonu ida-neʼe ho ahi husi altár no soe ba rai. No mosu rai-tarutu, lian oioin, rai-lakan nabilan no rai-nakdoko. 6 No kona-ba anju hitu neʼebé kaer hela trombeta hitu, sira prepara ona atu huu.

7 Anju ida uluk huu ninia trombeta. No mosu udan jelu-fatuk nian no ahi kahur ho raan, no neʼe tun ba rai; no ahi han rai nia sorin balun,* no ahi mós han ai-hun balun husi ai-hun hotu, no ahi han duʼut matak hotu.

8 Anju segundu huu ninia trombeta. No buat ruma hanesan foho boot neʼebé lakan ho ahi soe tiha ba tasi. No tasi nia sorin balun sai raan; 9 no animál balun husi buat hotu neʼebé moris* iha tasi mate, no ró balun husi ró hotu rahun.

10 Anju terseiru huu nia trombeta. No fitun neʼebé lakan boot hanesan ahi-oan monu husi lalehan, no ida-neʼe monu ba mota balun husi mota hotu no mós monu ba bee-matan sira. 11 No fitun neʼe nia naran mak Ai-hun Moruk. Nuneʼe bee balun sai moruk, no ema barak mate tanba bee neʼe, basá bee sira-neʼe sai moruk ona.

12 No ba dala haat, anju ida tan huu ninia trombeta. No loro-matan nia sorin balun, fulan nia sorin balun no fitun nia sorin balun sai nakukun; tan neʼe sorin balun iha tempu loron, no mós sorin balun iha tempu kalan la hetan naroman.

13 No haʼu haree manu-makikit ida semo iha lalehan no haʼu rona nia dehan ho lian makaʼas: “Susar, susar, susar ba sira neʼebé hela iha rai tanba anju tolu seluk besik ona atu huu sira-nia trombeta!”

9 No ba dala lima, anju ida tan huu ninia trombeta. No haʼu haree fitun ida monu husi lalehan ba rai, no Maromak fó ba nia xave ba rai-kuak neʼebé kleʼan. 2 No nia loke rai-kuak kleʼan neʼe, no suar sai husi rai-kuak hanesan suar husi fornu boot, no tanba suar husi rai-kuak neʼe, loro-matan sai nakukun, nuneʼe mós ho anin. 3 No gafañotu sai husi suar neʼe hodi tun ba rai; no Maromak fó sira kbiit, no sira iha kbiit hanesan sakunar sira iha rai neʼe. 4 No nia haruka sira atu la halo aat ba ai-horis iha rai ka ba duʼut matak ka ba ai-hun sira, maibé halo aat deʼit ba ema sira neʼebé la iha marka husi Maromak iha sira-nia reen-toos.

5 No Maromak fó kbiit ba gafañotu atu fó-terus ba sira toʼo fulan lima maibé labele oho sira, no sira-nia terus hanesan ema neʼebé sakunar tata. 6 Iha loron sira neʼebá ema sei buka atu mate maibé sei la hetan, no sira sei hakarak tebes atu mate, maibé mate sei halai dook husi sira.

7 No gafañotu sira haree hanesan kuda neʼebé prepara ona atu bá funu; no iha sira-nia ulun iha buat neʼebé haree hanesan koroa osan-mean, no sira-nia oin hanesan ema nia oin, 8 maibé sira-nia fuuk hanesan feto nia fuuk. No sira-nia nehan hanesan leaun nia nehan; 9 no sira taka sira-nia hirus-matan ho buat neʼebé hanesan besi funu nian. No sira-nia liras nia lian hanesan kuda-karreta sira neʼebé halai ba funu. 10 No sira iha ikun no tata ema hanesan sakunar; no sira-nia ikun mak kbiit neʼebé sira uza atu fó-terus ema ba fulan lima. 11 Sira-nia liurai mak anju neʼebé tau matan ba rai-kuak kleʼan. Iha lia-ebraiku anju neʼe naran Abaddon,* no iha lia-gregu Apolion.*

12 Susar ida liu tiha ona. Maibé sei iha susar rua tan neʼebé sei mosu depois neʼe.

13 No ba dala neen, anju ida tan huu ninia trombeta. No haʼu rona lian ida husi dikur sira iha altár osan-mean nian neʼebé iha Maromak nia oin 14 hodi dehan ba anju neʼe neʼebé kaer hela trombeta: “Kore tiha anju haat neʼebé kesi hela iha mota boot Eufrates.” 15 No nia kore anju haat neʼe, neʼebé hein daudaun ba oras, loron, fulan, no tinan, atu oho sorin balun* husi ema hotu.

16 Haʼu rona númeru husi soldadu neʼebé saʼe kuda, sira hamutuk 200.000.000. 17 No iha haʼu-nia vizaun haʼu haree kuda sira no mós haree sira neʼebé tuur iha leten. Sira taka sira-nia hirus-matan ho besi funu nian neʼebé iha kór mean lakan, azúl, no kinur; no kuda nia ulun hanesan leaun nia ulun, no ahi, no ahi-suar, no gás neʼebé halo mate sai husi sira-nia ibun. 18 No parte balun* husi ema hotu mate tanba buat tolu neʼe, katak liuhusi ahi, liuhusi suar, no liuhusi gás neʼebé halo mate neʼebé sai husi sira-nia ibun. 19 Kuda sira-neʼe nia kbiit mak iha sira-nia ibun no sira-nia ikun; basá sira-nia ikun hanesan samea no iha ulun, no ho ida-neʼe mak sira fó susar ba ema.

20 Maibé ema seluk neʼebé la mate tanba buat sira-neʼe, sira la arrepende an husi sira-nia hahalok; sira la para atu adora anju aat sira, no atu adora estátua husi osan-mean, osan-mutin, riti, fatuk, no ai, neʼebé la bele haree, la bele rona no la bele laʼo. 21 No sira la hakribi sira-nia sala, katak oho ema, envolve an ho anju aat, halo sala-foʼer no naʼok.

10 No haʼu haree anju kbiit boot ida seluk tun husi lalehan, no ninia hatais mak kalohan, no arkiris iha ninia ulun leten, no ninia oin hanesan loro-matan, no ninia ain hanesan koluna ahi nian, 2 no iha nia liman nia kaer hela surat-tahan neʼebé loke ona. No nia tau nia ain loos iha tasi leten, no ninia ain karuk iha rai leten, 3 no nia hakilar ho lian makaʼas hanesan leaun nia lian. No bainhira nia hakilar, haʼu rona lian husi rai-tarutu hitu.

4 No bainhira rai-tarutu hitu hasai lian, haʼu prontu ona atu hakerek; maibé haʼu rona lian ida husi lalehan dehan: “Buat neʼebé rai-tarutu hitu koʼalia sai, rai ida-neʼe bá nuʼudar segredu,* no keta hakerek buat sira-neʼe.” 5 No anju neʼebé haʼu haree hamriik iha tasi no iha rai foti nia liman-loos ba lalehan, 6 no nia jura hodi Ida neʼebé moris ba nafatin, katak ida neʼebé kria lalehan no buat neʼebé iha nia, no ida neʼebé kria rai no buat neʼebé iha nia, no ida neʼebé kria tasi no buat neʼebé iha nia, hodi dehan: “Nia sei la demora tan; 7 no iha tempu neʼebé anju númeru hitu besik ona atu huu ninia trombeta, Maromak nia segredu santu neʼebé nia fó sai nuʼudar liafuan diʼak ba ninia atan profeta sira sei kumpre hotu.”

8 No haʼu rona lian ida sai husi lalehan hodi koʼalia tan mai haʼu dehan: “Bá, no foti surat-tahan neʼebé loke hela iha anju nia liman, ida neʼebé hamriik iha tasi leten no iha rai leten.” 9 No haʼu laʼo ba anju neʼe no haʼu dehan ba nia atu fó surat-tahan kiʼik neʼe ba haʼu. No nia hatete ba haʼu: “Foti neʼe no han hotu, no ida-neʼe sei sai moruk iha ó-nia kabun, maibé iha ó-nia ibun sei sai midar hanesan bani-been.” 10 No haʼu foti surat-tahan kiʼik neʼe husi anju nia liman no han, no iha haʼu-nia ibun ida-neʼe midar hanesan bani-been; maibé kuandu haʼu han hotu tiha, haʼu-nia kabun sai moruk. 11 No sira dehan ba haʼu: “Ó tenke fó sai fali liafuan husi Maromak kona-ba buat neʼebé sei mosu ba povu sira, nasaun sira, ema husi lian oioin no kona-ba liurai barak.”

11 No haʼu simu duʼut-kain ida neʼebé naruk hanesan ai-tonka, no lian ida dehan ba haʼu: “Hamriik no sukat Maromak nia templu no sukat altár no mós sukat sira neʼebé adora iha laran. 2 Maibé kona-ba templu nia pátiu neʼebé iha liʼur, husik deʼit ida-neʼe* no keta sukat, tanba ida-neʼe fó tiha ona ba nasaun sira, no sira sei sama sidade santu ba fulan haatnulu-resin-rua. 3 No haʼu sei haruka haʼu-nia sasin naʼin-rua atu koʼalia nuʼudar profeta durante loron 1.260 hodi hatais hena karón.”* 4 Sira naʼin-rua mak ai-oliveira rua no ahi-oan fatin rua neʼebé hamriik iha Naʼi raiklaran nian nia oin.

5 No se ema hakarak atu estraga sira, ahi sai husi sira-nia ibun no han hotu sira-nia inimigu. Se ema ruma hakarak atu estraga sira, ema neʼe sei mate iha dalan hanesan neʼe. 6 Sira iha kbiit atu taka lalehan hodi udan labele tun durante loron hotu neʼebé sira fó sai Maromak nia liafuan, no sira iha kbiit hodi halo bee sai raan no atu halo aat ba rai ho moras oioin iha tempu naran deʼit neʼebé sira hakarak.

7 No kuandu sira haklaken hotu ona, animál fuik neʼebé sai husi rai-kuak kleʼan sei halo funu ho sira no manán sira no oho sira. 8 No sira-nia mate-isin sei latan deʼit iha dalan luan iha sidade boot neʼebé ema mós hedi sira-nia Naʼi, no Sodoma no Ejitu mak reprezenta sidade neʼe. 9 No povu sira no ema husi suku oioin, lian oioin no nasaun oioin sei hateke ba sira-nia mate-isin ba loron tolu ho balu, no ema sei la husik mate-isin sira-neʼe atu hakoi iha rate. 10 No ema sira neʼebé hela iha rai haksolok no festa tanba profeta rua neʼe nia mate, no sira sei haruka prezente ba malu basá uluk sira hetan terus liuhusi profeta rua neʼe.

11 No depois loron tolu ho balu neʼe liu tiha, Maromak tau fali iis moris nian ba sira, no sira hamriik, no ema neʼebé haree sira sai taʼuk loos. 12 No sira rona lian makaʼas ida husi lalehan dehan ba sira: “Saʼe mai iha neʼe.” No sira saʼe ba lalehan iha kalohan laran no sira-nia inimigu haree sira. 13 No iha oras neʼebá duni mak rai-nakdoko boot mosu, no sidade nia sorin balun* monu; no ema naʼin-7.000 mate tanba rai-nakdoko, no sira seluk sai taʼuk no fó glória ba Maromak iha lalehan.

14 Susar segundu liu tiha ona. Maibé, susar terseiru sei mai lalais.

15 No ba dala hitu, anju ida tan huu ninia trombeta. No iha lian sira neʼebé makaʼas iha lalehan dehan: “Agora ita-nia Maromak no ninia Kristu mak ukun mundu tomak, no nia sei ukun nuʼudar liurai ba nafatin.”

16 No katuas naʼin ruanulu-resin-haat neʼebé tuur iha sira-nia kadunan iha Maromak nia oin, sira hakneʼak ho oin ba rai no adora Maromak 17 hodi dehan: “Ami fó obrigadu ba Ita, Maromak Jeová, Ida neʼebé iha Kbiit Boot Liu Hotu, Ida neʼebé iha ohin no neʼebé iha uluk, tanba Ita hatudu ona kbiit boot no hahú ukun nuʼudar liurai. 18 Maibé nasaun sira sai hirus, no Ita rasik nia hirus toʼo mai, no toʼo ona ba tempu neʼebé hili tiha atu tesi lia ba ema mate sira, no atu fó kolen ba Ita-nia atan profeta sira, nuneʼe mós ba santu sira no sira neʼebé hamtaʼuk Ita-nia naran, ema kiʼik no boot, no atu halakon sira neʼebé estraga rai.”

19 No Maromak nia templu neʼebé iha lalehan loke tiha, no haʼu haree arka husi ninia aliansa iha ninia templu. No iha neʼebá iha rai-lakan nabilan, lian oioin, rai-tarutu, rai-nakdoko, no udan jelu-fatuk nian neʼebé boot.

12 No sinál boot ida mosu iha lalehan: Feto ida hatais loro-matan, no fulan iha ninia ain okos, no iha ninia ulun leten iha fitun sanulu-resin-rua neʼebé nuʼudar ninia koroa. 2 Nia isin-rua hela, no nia hakilar tanba terus no moras tuur-ahi nian.

3 No sinál ida seluk mosu iha lalehan. No haree! Iha samea boot neʼebé mean lakan, neʼebé iha ulun hitu no dikur sanulu no iha koroa iha ninia ulun ida-idak; 4 no ninia ikun dada fitun sorin balun* iha lalehan no soe tun sira ba rai. No samea boot neʼe kontinua hamriik iha feto nia oin, ida neʼebé besik ona atu tuur ahi, atu nuneʼe, kuandu nia tuur ahi, samea boot neʼe sei tolan ninia oan.

5 Feto neʼe tuur ahi oan-mane ida, no nia sei sai hanesan bibi-atan no sei ukun nasaun hotu ho ai-tonka besi. No kuandu oan neʼe moris, sira lori kedas nia ba Maromak no ba ninia kadunan. 6 No feto neʼe halai ba rai-fuik, iha neʼebá Maromak prepara ona fatin ba nia, no sira sei fó-han nia ba loron 1.260.

7 No funu mosu iha lalehan: Miguel no ninia anju sira halo funu ho samea boot, no samea boot neʼe no ninia anju sira halo funu ho sira 8 maibé nia la manán, no la iha ona fatin ba sira iha lalehan. 9 Entaun, samea boot neʼe soe tun tiha ba rai; nia mak samea uluk nian, ida neʼebé bolu nuʼudar Diabu no Satanás, neʼebé lohi mundu tomak; nia soe tun tiha ba rai hamutuk ho ninia anju sira. 10 No haʼu rona lian makaʼas ida iha lalehan dehan:

“Ita-nia Maromak salva ona ema no nia hatudu sai ona ninia kbiit. Ninia Ukun hahú ona no ninia Kristu hahú ona uza nia kbiit, tanba sira soe tun tiha ona ida neʼebé koʼalia aat ita-nia maun-alin sira loron no kalan iha Maromak nia oin. 11 No maun-alin sira-neʼe manán nia tanba Bibi-Oan nia raan no tanba liafuan neʼebé sira haklaken, no sira la taʼuk atu lakon sira-nia moris.* 12 Tan neʼe, lalehan no imi neʼebé hela iha nia haksolok bá! Maibé, susar ba rai no tasi, basá Diabu tun tiha ona ba imi, no nia hirus makaʼas, tanba nia hatene katak nia tempu hela uitoan deʼit.”

13 No kuandu samea boot neʼe hatene katak nia soe tun tiha ona ba rai, nia fó-terus ba feto neʼebé tuur ahi oan-mane neʼe. 14 Maibé, feto neʼe simu liras rua manu-makikit boot nian, atu nuneʼe nia bele semo ba ninia fatin iha rai-fuik, no iha neʼebá mak nia hetan ai-han ba tinan ida no tinan rua no tinan sorin balun hodi dook husi samea neʼe.

15 No samea neʼe muta sai bee hanesan mota husi ninia ibun hodi suli tuir feto neʼe, atu halo nia mout iha mota. 16 Maibé rai ajuda feto neʼe, no rai loke nia ibun no tolan bee neʼebé samea boot neʼe muta sai husi ninia ibun. 17 No samea boot neʼe sai hirus tebes ba feto neʼe, no bá hodi halo funu hasoru feto nia oan sira seluk, sira neʼebé halo tuir Maromak nia ukun-fuan sira no neʼebé halo serbisu atu fó sasin kona-ba Jesus.

13 No samea boot neʼe hamriik hela iha rai-henek leten iha tasi-ibun.

No haʼu haree animál fuik ida sai husi tasi laran, no nia iha dikur sanulu no ulun hitu, no iha dikur ida-idak nia leten iha koroa ida, maibé iha ninia ulun iha naran sira neʼebé koʼalia aat Maromak. 2 No animál fuik neʼebé haʼu haree mak hanesan busa fuik ida, maibé ninia ain hanesan ursu, no ninia ibun hanesan leaun. No samea boot neʼe fó ninia forsa no kadunan no kbiit boot ba animál fuik neʼe.

3 No haʼu haree katak ninia ulun ida iha kanek boot. No maski kanek neʼe bele halo mate, maibé sai diʼak fali ona, no ema hotu iha rai laʼo tuir animál fuik neʼe hodi gaba nia. 4 No sira adora samea boot neʼe tanba nia fó kbiit ba animál fuik neʼe, no sira adora animál fuik hodi dehan: “Sé mak hanesan animál fuik neʼe? No sé mak bele halo funu hasoru nia?” 5 No samea boot fó ibun ba animál fuik neʼe hodi koʼalia ho foti-an no kontra buat santu, no fó ba nia kbiit atu halo buat neʼebé nia hakarak ba fulan haatnulu-resin-rua. 6 No nia loke nia ibun hodi koʼalia kontra Maromak, kontra Maromak nia naran no ninia hela-fatin, no mós kontra sira neʼebé hela iha lalehan. 7 No nia simu lisensa atu halo funu hasoru santu sira no manán sira, no nia simu kbiit atu ukun ema husi suku hotu, povu hotu, lian hotu, no nasaun hotu. 8 No sira hotu neʼebé hela iha rai sei adora animál fuik neʼe. No husi tempu neʼebé mundu hahú,* ema sira-neʼe nia naran la hakerek iha livru moris nian husi Bibi-Oan, ida neʼebé hasaʼe tiha nuʼudar sakrifísiu.

9 Se ema ida iha tilun, rona bá. 10 Se ema ruma tenke tama dadur, nia sei bá hodi tama iha dadur laran. Se ema ruma sei oho ho surik, nia tenke mate ho surik. Tan neʼe mak santu sira presiza tahan ho laran-metin no iha fiar.

11 No haʼu haree animál fuik ida seluk sai mai husi rai, no nia iha dikur rua hanesan bibi-malae, maibé nia hahú koʼalia hanesan samea boot ida. 12 No animál fuik neʼe simu kbiit husi animál fuik ida primeiru no hatudu kbiit hanesan animál fuik ida primeiru, no nia halo neʼe iha animál fuik ida primeiru nia oin. No nia halo rai no ema neʼebé hela iha rai adora animál fuik ida primeiru, ida neʼebé iha kanek boot maibé sai diʼak fali ona. 13 No nia hatudu sinál boot sira iha ema nia oin, hodi halo ahi tun husi lalehan ba rai.

14 No nia simu lisensa atu halo sinál sira iha animál fuik nia oin, no liuhusi sinál sira-neʼe mak nia lohi ema neʼebé hela iha rai, no nia dehan ba ema sira neʼebé hela iha rai atu halo estátua ba animál fuik neʼebé hetan kanek boot husi surik maibé sai diʼak fali ona. 15 No nia simu lisensa atu huu iis ba animál fuik nia estátua, atu nuneʼe animál fuik nia estátua bele koʼalia no bele haruka atu oho ema hotu neʼebé la adora estátua ba animál fuik neʼe.

16 No nia obriga ema hotu, kiʼik no boot, riku no kiak, ema livre no atan, katak sira tenke iha marka iha sira-nia liman ka iha reen-toos, 17 no katak ema ida labele sosa ka faʼan só deʼit sira neʼebé iha marka, katak animál fuik nia naran ka númeru ba ninia naran. 18 Ema presiza matenek atu hatene ida-neʼe: Ema neʼebé iha matenek tenke sura númeru husi animál fuik neʼe, basá neʼe mak númeru ema nian; no ninia númeru mak 666.

14 No haʼu haree Bibi-Oan hamriik iha Foho Siaun nia leten hamutuk ho ema naʼin-144.000, no iha sira-nia reen-toos hakerek tiha Bibi-Oan nia naran no ninia Aman nia naran. 2 No haʼu rona lian ida sai husi lalehan hanesan lian husi bee barak no mós hanesan rai-tarutu makaʼas; no lian neʼebé haʼu rona mak hanesan lian husi kantadór sira nuʼudar sira toka sira-nia arpa. 3 No sira kanta knananuk neʼebé haree hanesan knananuk foun ida, no sira hamriik iha kadunan nia oin no iha anju haat no katuas sira-nia oin; no la iha ema ida bele hatene knananuk neʼe só deʼit sira naʼin-144.000 neʼebé sosa tiha ona husi rai. 4 Sira mak ema neʼebé la hafoʼer sira-nia an ho feto sira; tuir loloos, sira seidauk toba ho feto ida.* Sira mak ema neʼebé kontinua laʼo tuir Bibi-Oan ba fatin naran deʼit neʼebé nia bá. Sira mak ema neʼebé sosa ona husi ema seluk nia leet nuʼudar ai-fuan primeiru ba Maromak no ba Bibi-Oan, 5 no la iha lia-bosok sai husi sira-nia ibun; sira la iha sala ida.

6 No haʼu haree anju ida seluk semo iha lalehan, no nia iha liafuan diʼak atu fó sai ba sira neʼebé hela iha rai, ba nasaun hotu, suku hotu, lian hotu no povu hotu, 7 hodi koʼalia ho lian makaʼas dehan: “Hamtaʼuk Maromak no fó glória ba nia, tanba tempu ba ninia tesi-lia toʼo mai ona; tan neʼe adora bá Ida neʼebé halo lalehan no rai, tasi no bee-matan.”

8 No anju segundu tuir nia no dehan: “Sidade neʼe monu tiha ona! Babilónia Boot monu tiha ona; nia mak ida neʼebé halo nasaun hotu hemu ninia tua-uvas, katak ninia hakarak makaʼas atu halo sala-foʼer!”

9 No anju terseiru mai tuir sira no dehan ho lian makaʼas: “Se ema ruma adora animál fuik neʼe no ninia estátua, no simu marka iha sira-nia reen-toos ka liman, 10 sira mós sei hemu Maromak nia tua-uvas, katak ninia hirus. Tua-uvas neʼe makaʼas loos no Maromak fui sai ona ba ninia kopu hirus nian, no ema sira-neʼe sei hetan kastigu ho ahi neʼebé lakan makaʼas iha anju santu sira-nia oin no iha Bibi-Oan nia oin. 11 No suar husi ahi neʼebé haterus sira kontinua nafatin, no sira-nia kastigu la para loron no kalan, sira mak ema neʼebé adora animál fuik no ninia estátua, no neʼebé simu marka ho ninia naran. 12 Tan neʼe mak santu sira presiza atu tahan ho laran-metin, katak sira neʼebé halo tuir Maromak nia ukun-fuan sira no kaer metin ba fiar kona-ba Jesus.”

13 No haʼu rona lian ida husi lalehan dehan: “Hakerek liafuan sira-neʼe: Hahú husi tempu neʼe ba oin, ksolok ba sira neʼebé mate iha Naʼi!* Sin, espíritu dehan, sira tenke deskansa husi sira-nia serbisu, tanba buat diʼak neʼebé sira halo sei laʼo hamutuk sira.”

14 No haʼu haree kalohan mutin ida, no ida neʼebé tuur iha kalohan nia leten haree hanesan oan-mane husi ema, no iha koroa osan-mean iha nia ulun no iha nia liman nia kaer hela tudik koʼa nian neʼebé kroʼat.

15 No anju ida seluk sai husi templu, no koʼalia ho lian makaʼas ba ida neʼebé tuur iha kalohan leten hodi dehan: “Lolo ó-nia tudik no koʼa bá, tanba tempu koʼa nian toʼo ona, basá toʼos raiklaran nian tasak ona.” 16 No ida neʼebé tuur iha kalohan leten lolo ninia tudik ba rai, no nia koʼa buat neʼebé iha rai.

17 No anju ida tan sai husi templu neʼebé iha lalehan; anju neʼe mós kaer hela tudik koʼa nian neʼebé kroʼat.

18 No anju ida tan sai husi altár no nia ukun ahi. No nia bolu ho lian makaʼas ba ida neʼebé kaer hela tudik kroʼat hodi dehan: “Lolo ó-nia tudik no halibur uvas-fuan iha rai, tanba uvas-fuan sira-neʼe sai tasak ona.” 19 No anju neʼe lolo ninia tudik ba rai no tesi uvas-hun iha rai, no nia soe neʼe ba fatin atu sama uvas nian, katak Maromak nia hirus. 20 Kuda sira sama uvas-fuan iha sidade nia liʼur, no raan neʼebé sai husi fatin neʼe aas toʼo kuda sira-neʼe nia ulun no suli toʼo besik kilómetru 300.*

15 No haʼu haree sinál ida tan iha lalehan, sinál neʼebé boot no furak, neʼe mak kona-ba anju hitu neʼebé kaer hela susar hitu. Susar sira-neʼe mak susar ikusliu, basá kuandu susar sira-neʼe ramata ona, Maromak nia hirus mós hotu ona.

2 No haʼu haree buat neʼebé hanesan bee-lihun vidru nian neʼebé kahur ho ahi, no haʼu mós haree ema sira neʼebé manán ona animál fuik no ninia estátua no númeru husi ninia naran; ema sira-neʼe hamriik iha bee-lihun vidru nia leten hodi kaer hela arpa husi Maromak. 3 No sira kanta knananuk husi Maromak nia atan Moisés, no knananuk Bibi-Oan nian, hodi dehan:

“Maromak Jeová, neʼebé iha Kbiit Boot Liu Hotu, Ita-nia hahalok sira mak boot no furak. Liurai neʼebé la iha rohan, Ita-nia dalan sira mak diʼak no loos. 4 Jeová, sé mak sei la taʼuk Ita no fó hahiʼi ba Ita-nia naran? Basá Ita deʼit mak ida neʼebé laran-metin! No nasaun hotu sei mai hodi adora iha Ita-nia oin, tanba Ita hatudu sai ona katak Ita tesi lia ho loos.”

5 No depois buat sira-neʼe, haʼu haree fatin santu husi tenda sasin nian loke tiha iha lalehan, 6 no anju hitu neʼebé kaer hela susar hitu sai husi fatin santu neʼe, no sira-nia hatais mak moos no nabilan, no iha hena osan-mean neʼebé kesi haleʼu sira-nia hirus-matan. 7 No anju haat neʼe ida fó manko osan-mean hitu ba anju hitu neʼe, manko sira-neʼe nakonu ho Maromak nia hirus; Maromak mak ida neʼebé moris ba nafatin. 8 No fatin santu neʼe sai nakonu ho suar tanba Maromak nia glória no tanba ninia kbiit, no la iha ema ida bele tama ba fatin santu neʼe toʼo susar hitu husi anju hitu neʼe liu tiha ona.

16 No haʼu rona lian makaʼas ida sai husi fatin santu neʼe hodi dehan ba anju hitu: “Bá no fakar ba rai Maromak nia hirus neʼebé iha manko hitu neʼe nia laran.”

2 No anju ida primeiru bá no fakar buat neʼebé iha ninia manko laran ba rai. No ema sira neʼebé iha marka animál fuik nian no adora ninia estátua, sira hetan fisur neʼebé moras loos no aat tebes.

3 No anju ida segundu fakar buat neʼebé iha ninia manko laran ba tasi. No tasi sai hanesan raan husi ema mate, no buat moris* hotu mate, sin, buat hotu neʼebé iha tasi laran.

4 No anju ida terseiru fakar buat neʼebé iha ninia manko laran ba mota no bee-matan. No buat sira-neʼe sai raan. 5 No haʼu rona anju neʼebé ukun bee dehan: “Ita-Boot, Ida neʼebé iha ohin no neʼebé iha uluk, Ida neʼebé laran-metin, Ita iha hahalok loos, tanba Ita hatudu sai ona Ita-nia tesi-lia sira-neʼe; 6 sira fakar sai ona raan husi santu sira no profeta sira, no Ita fó ona raan ba sira atu hemu, no sira merese ida-neʼe.” 7 No haʼu rona altár dehan: “Sin, Maromak Jeová, Ida neʼebé Kbiit Boot Liu Hotu, Ita-nia tesi-lia mak loos no bele tau fiar.”

8 No ba dala haat, anju ida tan fakar buat neʼebé iha ninia manko laran ba loro-matan; no loro-matan hetan kbiit atu sunu ema ho ahi. 9 No ahi nia manas neʼebé makaʼas sunu ema, maibé sira koʼalia kontra Maromak nia naran, ida neʼebé iha kbiit atu kontrola susar sira-neʼe, no sira la hakribi sala hodi fó glória ba nia.

10 No ba dala lima, anju ida tan fakar buat neʼebé iha ninia manko laran ba animál fuik nia kadunan. No animál fuik neʼe nia ukun sai nakukun, no tanba moras neʼebé ema sente, sira hahú tata sira-nia nanál, 11 maibé sira koʼalia kontra Maromak iha lalehan tanba sira-nia moras no sira-nia fisur, no sira la arrepende an husi sira-nia hahalok.

12 No ba dala neen, anju ida tan fakar sai buat neʼebé iha ninia manko laran ba mota boot Eufrates, no bee iha mota neʼe sai maran, atu nuneʼe bele loke dalan ba liurai sira neʼebé mai husi lorosaʼe.

13 No haʼu haree samea boot, animál fuik no profeta falsu, no husi sira-nia ibun sira ida-idak hasai liafuan foʼer.* No liafuan sira-neʼe haree hanesan manduku. 14 Tuir loloos, liafuan sira-neʼe mai husi anju aat no hamosu sinál sira, no sira bá hasoru liurai sira iha rai tomak, no halibur sira ba funu neʼebé mosu iha Maromak Kbiit Boot Liu Hotu nia loron boot.

15 “Haree! Haʼu mai hanesan naʼok-teen ida. Ksolok ba ema neʼebé hadeer hela no hatais hela ninia unuk, atu nuneʼe ema sei la haree katak nia laʼo ho isin-tanan no nia sai moe.”

16 No sira halibur liurai sira hamutuk iha fatin ida neʼebé iha lia-ebraiku bolu nuʼudar Armajedón.

17 No ba dala hitu, anju ida tan fakar buat neʼebé iha ninia manko laran ba anin. Ho ida-neʼe, lian makaʼas ida sai husi kadunan iha fatin santu, hodi dehan: “Neʼe hotu ona.” 18 No mosu rai-lakan no lian oioin no rai-tarutu, no iha mós rai-nakdoko makaʼas, no ida-neʼe la hanesan rai-nakdoko sira neʼebé mosu ona husi tempu neʼebé ema hela iha rai, sin, rai-nakdoko neʼe makaʼas loos. 19 No sidade boot neʼe fahe ba parte tolu, no sidade nasaun sira-nian monu tiha; no Maromak hanoin-hetan Babilónia Boot, no fó ba nia kopu tua-uvas nian husi Maromak nia laran-nakali. 20 No rai kiʼik hotu halai tiha, no foho sira lakon ona. 21 No iha jelu-fatuk sira neʼebé boot, no sira ida-idak todan kilograma ruanulu,* no jelu sira-neʼe monu tun husi lalehan ba ema, no ema koʼalia aat Maromak tanba susar husi jelu-fatuk neʼe, basá susar neʼe boot tebetebes.

17 No anju ida husi anju hitu neʼebé kaer manko hitu mai no dehan ba haʼu: “Mai, haʼu sei hatudu ba ó tesi-lia neʼebé sei fó ba feto-aat boot neʼebé tuur iha bee barak nia leten, 2 ida neʼebé halo sala-foʼer ho liurai sira iha rai, no ema sira iha rai sai lanu ho tua-uvas husi ninia sala-foʼer.”

3 No nia lori haʼu ho kbiit husi espíritu hodi bá rai-fuik. No haʼu haree feto ida tuur hela iha animál fuik nia leten, no animál fuik neʼe kór mean no nakonu ho naran sira neʼebé koʼalia aat Maromak no animál neʼe iha ulun hitu no dikur sanulu. 4 No feto neʼe hatais hena kór-uvas no mean, no nia hafurak nia an ho osan-mean, fatuk-murak neʼebé folin-boot no ho pérola, no iha nia liman nia kaer hela kopu osan-mean neʼebé nakonu ho buat sira neʼebé ema hakribi no mós ho buat foʼer oioin husi ninia hahalok sala-foʼer. 5 No iha ninia reen-toos hakerek tiha naran ida, naran neʼe mak segredu ida: “Babilónia Boot, inan ba feto-aat sira no ba buat foʼer hotu iha rai neʼe.” 6 No haʼu haree katak feto neʼe sai lanu ho santu sira-nia raan no ho raan husi Jesus nia sasin sira.

No kuandu haʼu haree nia, haʼu hakfodak tebetebes. 7 No anju neʼe dehan ba haʼu: “Tansá mak ó hakfodak? Haʼu sei fó-hatene ba ó segredu kona-ba feto neʼe no kona-ba animál fuik neʼebé iha ulun hitu no dikur sanulu no neʼebé lori feto neʼe: 8 No animál fuik neʼebé ó haree mosu uluk, maibé agora la iha, nia besik ona atu sai husi rai-kuak neʼebé kleʼan, no tuirmai nia sei lakon mohu tiha. No ema hotu iha rai, katak sira neʼebé naran la hakerek iha livru moris nian husi tempu neʼebé mundu hahú,* sira sei hakfodak bainhira sira haree animál fuik neʼebé mosu uluk, maibé agora la iha, no neʼebé sei mosu fali.

9 “Kona-ba ida-neʼe mak ema presiza uza matenek no kbiit atu hatene: Ulun hitu katak foho hitu, iha neʼebé feto neʼe tuur iha leten. 10 No sira iha arti katak liurai hitu: lima monu tiha ona, ida agora ukun daudaun, ida seluk seidauk mosu, maibé kuandu nia mosu mai nia tenke ukun ba tempu uitoan deʼit. 11 No kona-ba animál fuik neʼebé mosu uluk, maibé agora la iha ona, nia mak sai nuʼudar liurai númeru ualu, maski nuneʼe nia mosu husi liurai hitu sira-neʼe, no nia sei halakon tiha.

12 “No kona-ba dikur sanulu neʼebé ó haree, neʼe katak liurai sanulu, no sira seidauk simu sira-nia ukun, maibé sira simu kbiit nuʼudar liurai ba oras ida hamutuk ho animál fuik neʼe. 13 Sira iha hanoin ida deʼit, no tan neʼe sira fó sira-nia kbiit no ukun ba animál fuik neʼe. 14 Sira sei halo funu ho Bibi-Oan, maibé tanba nia mak Naʼi naʼi sira-nian no Liurai liurai sira-nian, Bibi-Oan sei manán sira. No ema sira neʼebé Maromak bolu ona no hili ona no laran-metin ona, sira mós sei manán.”

15 No nia dehan ba haʼu: “Kona-ba bee neʼebé ó haree, iha neʼebé feto-aat tuur iha leten, neʼe katak povu sira, ema-lubun sira, nasaun sira no ema husi lian oioin. 16 No kona-ba animál fuik ho dikur sanulu neʼebé ó haree, sira sei odi feto-aat neʼe no sei halakon nia no halo nia isin-tanan, no sei han nia isin no sei sunu hotu nia iha ahi. 17 Tanba Maromak tau ninia hanoin iha sira-nia laran atu sira halaʼo Maromak nia hakarak, hodi nuneʼe sira hotu iha hanoin ida deʼit, katak fó sira-nia ukun ba animál fuik neʼe toʼo Maromak nia liafuan kumpre ona. 18 No feto neʼebé ó haree reprezenta sidade boot neʼebé ukun liurai sira hotu iha rai.”

18 Depois neʼe, haʼu haree anju seluk tun husi lalehan ho kbiit boot; no rai sai nabilan tanba ninia glória. 2 No nia hakilar ho lian makaʼas dehan: “Sidade neʼe monu tiha ona! Babilónia Boot monu tiha ona, no nia sai tiha nuʼudar hela-fatin ba anju aat sira no ba espíritu foʼer sira no ba manu hotu neʼebé la moos no ema odi! 3 Tanba nasaun sira hotu sai ona nuʼudar vítima ba ninia tua-uvas, katak ninia hakarak makaʼas atu halo sala-foʼer, no liurai sira iha rai halo sala-foʼer ho nia, no kontratu-naʼin sira iha rai neʼe sai riku tanba ninia rikusoin neʼebé nia la moe atu halibur.”

4 No haʼu rona lian ida seluk husi lalehan dehan: “Sai husi nia, haʼu-nia povu, atu imi la sai parte iha ninia sala sira, no la sai parte iha ninia kastigu sira. 5 Tanba ninia sala sira sai barak tebes no Maromak sei tesi lia ba nia tanba hahalok aat neʼebé nia halo ona. 6 Selu fali ba nia tuir dalan neʼebé nia halo ba ema seluk, no selu ba nia dala rua liu fali buat neʼebé nia halo ona; iha kopu neʼebé nia uza atu prepara hemu ba ema seluk, prepara hemu ba nia dala rua liu fali ninian. 7 Nia fó glória ba nia an rasik no halibur rikusoin hodi la moe, tan neʼe fó ba nia terus makaʼas no triste. Basá nia dehan beibeik iha nia laran: ‘Haʼu tuur iha kadunan nuʼudar liurai-feto ida, no haʼu laʼós feto-faluk, no haʼu sei nunka tanis.’ 8 Tan neʼe mak ninia susar sira sei mai iha loron ida deʼit, katak mate no tanis no hamlaha, no ahi sei han hotu nia, basá Maromak Jeová, ida neʼebé tesi lia ba nia, mak iha forsa.

9 “No liurai sira iha rai neʼebé halo sala-foʼer ho nia no hela hamutuk ho nia iha ninia rikusoin neʼebé nia halibur la ho moe, sira sei tanis no baku sira-nia an ho triste kona-ba nia kuandu sira haree suar husi ahi neʼebé sunu nia. 10 Sira sei hamriik deʼit iha dook tanba taʼuk kona-ba ninia kastigu no dehan: ‘Kasian, kasian ba ó, Babilónia, sidade boot no forsa, tanba iha oras ida deʼit Maromak nia tesi-lia tun ba ó!’

11 “No mós kontratu-naʼin sira iha rai sai triste no tanis tanba nia, basá la iha ona ema atu sosa sira-nia sasán sira; 12 sira-nia osan-mean, osan-mutin, fatuk-murak, pérola, hena diʼak, hena kór-uvas no mean no hena-seda; no buat hotu neʼebé halo husi ai-morin, marfín, ai folin-boot, riti, besi no fatuk-mutin; 13 no mós ai-kanela, temperus husi Índia, insensu, mina-morin, insensu mutin, tua-uvas, mina oliveira, trigu diʼak no fini trigu nian, karau, bibi, kuda, kuda-karreta, atan, no ema. 14 Sin, ai-fuan tasak neʼebé ó hakarak la iha ona, no hahán furak hotu no buat furak oioin lakon ona husi ó, no ó sei nunka hetan fali.

15 “No kontratu-naʼin sira neʼebé faʼan buat sira-neʼe, no neʼebé sai riku tanba nia, sira sei hamriik deʼit iha dook tanba taʼuk kona-ba ninia kastigu, no sira sei triste no tanis, 16 hodi dehan: ‘Kasian, kasian ba ó, sidade boot neʼe, ida neʼebé hatais hena folin-boot no kór-uvas no mean, no hafurak nia an ho osan-mean no fatuk-murak no pérola, 17 tanba iha oras ida deʼit rikusoin boot sira-neʼe lakon hotu!’

“No kapitaun ró nian hotu no ema hotu neʼebé serbisu iha ró, ema neʼebé laʼo ho ró no sira hotu neʼebé buka moris iha tasi, sira hamriik deʼit iha dook 18 no nuʼudar sira hateke ba ahi-suar husi sidade neʼe, sira hakilar hodi dehan: ‘Sidade ida neʼebé mak hanesan sidade boot neʼe?’ 19 No sira soe rai-rahun ba sira-nia ulun no hakilar, halerik no tanis, no dehan: ‘Kasian, kasian ba ó, sidade boot neʼe, ida neʼebé halo ema sira neʼebé iha ró iha tasi sai riku tanba ninia rikusoin, basá iha oras ida deʼit nia lakon hotu!’

20 “Haksolok bá tanba nia, oh lalehan, no mós imi santu sira no apóstolu sira no profeta sira, basá Maromak tesi lia ona ba nia tanba buat neʼebé nia halo ba imi!”

21 No anju forsa ida foti fatuk boot* ida no soe neʼe ba tasi hodi dehan: “Nuneʼe mak sidade boot Babilónia sei soe tun tiha ho lalais, no nia sei nunka hetan fali. 22 No ema sei la rona tan sira neʼebé kanta hodi toka arpa, ka la rona tan lian husi sira neʼebé toka múzika, ka huu flauta no trombeta iha ó, Babilónia. No la iha tan badain ida sei serbisu fali iha ó no la iha tan ema neʼebé fai trigu. 23 No sei la iha tan nabilan husi ahi-oan hodi fó naroman iha ó, no sei la rona tan lian husi noivu no noiva iha ó. Tanba ó-nia kontratu-naʼin sira mak ema-boot iha rai neʼe, no ó lohi nasaun hotu liuhusi ó-nia hahalok neʼebé envolve an ho anju aat sira. 24 Sin, iha sidade neʼe mak hetan profeta sira-nia raan, santu sira-nia raan no raan husi sira hotu neʼebé ema oho tiha iha rai.”

19 Depois neʼe, haʼu rona lian makaʼas ida hanesan husi ema-lubun boot iha lalehan, hodi dehan: “Hahiʼi Jah,* imi hotu! Ita-nia Maromak mak fó salvasaun ba ema no nia iha glória no kbiit, 2 tanba ninia tesi-lia mak loos no bele tau fiar. Basá nia tesi lia ona hasoru feto-aat boot, ida neʼebé hafoʼer raiklaran ho ninia hahalok sala-foʼer, no nia selu fali ona raan husi ninia atan sira husi feto neʼe nia liman.” 3 No tuirmai kedas sira dehan tan ba dala segundu: “Hahiʼi Jah, imi hotu! No suar husi sidade neʼe kontinua saʼe nafatin ba leten.”

4 No katuas naʼin ruanulu-resin-haat no anju haat hakneʼak ho oin ba rai no adora Maromak neʼebé tuur iha kadunan no dehan: “Amen! Hahiʼi Jah, imi povu sira!”

5 No mós, lian ida sai husi kadunan no dehan: “Imi hotu neʼebé nuʼudar Maromak nia atan, kiʼik no boot, neʼebé hamtaʼuk nia: Hahiʼi ita-nia Maromak bá!”

6 No haʼu rona lian ida hanesan husi ema-lubun boot no hanesan lian husi bee barak no husi rai-tarutu makaʼas, hodi dehan: “Hahiʼi Jah, imi hotu, tanba Jeová ita-nia Maromak, Ida neʼebé Kbiit Boot Liu Hotu, hahú ona atu ukun nuʼudar liurai. 7 Mai ita haksolok no kontente bá no fó glória ba nia, tanba tempu ba Bibi-Oan nia kazamentu toʼo ona no ninia noiva prepara ona nia an ba kazamentu neʼe. 8 Sin, noiva neʼe hetan ona lisensa hodi hatais hena neʼebé nabilan, moos no diʼak. No hena diʼak neʼe reprezenta santu sira-nia hahalok loos.”

9 No nia fó-hatene ba haʼu: “Hakerek ida-neʼe bá: Ksolok ba sira neʼebé hetan konvite ba festa kaben nian husi Bibi-Oan.” No mós, nia dehan ba haʼu: “Liafuan sira-neʼe mak liafuan loos husi Maromak.” 10 Ho ida-neʼe, haʼu hakneʼak iha ninia oin hodi adora nia. Maibé nia dehan ba haʼu: “Keta halo ida-neʼe! Haʼu mós atan ida hanesan ó no ó-nia maun-alin sira neʼebé halaʼo serbisu atu fó sasin kona-ba Jesus. Ó tenke adora Maromak bá; basá, liafuan hotu neʼebé Maromak fó sai liuhusi profeta sira fó sasin kona-ba Jesus.”

11 No haʼu haree lalehan nakloke, no kuda mutin ida mosu mai. No ida neʼebé tuur iha leten iha naran Laran-Metin no Lia-Loos, no nia tesi lia no halo funu tuir lia-loos. 12 Ninia matan hanesan ahi-lakan, no iha ninia ulun iha koroa barak. No hakerek tiha naran ida iha nia, no ema ida la hatene naran neʼe só deʼit nia, 13 no nia hatais hena neʼebé hisik tiha ho raan, no ninia naran mak Liafuan Maromak nian. 14 No mós, tropa lalehan nian tuir nia ho kuda mutin, no sira hatais hena neʼebé mutin, moos no diʼak. 15 No surik kroʼat naruk ida sai husi nia ibun, atu nuneʼe nia bele oho nasaun sira ho surik neʼe, no nuʼudar bibi-atan nia sei ukun sira ho ai-tonka besi nian. Nia mós sei sama uvas-fuan iha fatin atu sama uvas nian, katak Maromak Kbiit Boot Liu Hotu nia laran-nakali no hirus. 16 No iha ninia unuk liʼur, sin, iha ninia kelen, hakerek tiha naran ida, Liurai liurai sira-nian no Naʼi naʼi sira-nian.

17 Haʼu mós haree anju ida hamriik iha loro-matan, no nia hakilar ho lian makaʼas no dehan ba manu sira hotu neʼebé semo iha lalehan: “Mai iha neʼe, halibur hamutuk bá iha Maromak nia festa boot, 18 atu nuneʼe imi bele han liurai sira-nia isin, komandante tropa sira-nia isin, no ema kbiit boot nia isin, kuda sira-nia isin no mós ema sira neʼebé saʼe kuda, ema hotu nia isin, ema livre ka ema neʼebé atan, ema kiʼik ka ema boot.”

19 No haʼu haree animál fuik no liurai sira rai neʼe nian no mós sira-nia tropa halibur hamutuk atu halo funu hasoru ida neʼebé tuur iha kuda neʼe nia leten no hasoru ninia tropa sira. 20 No ida neʼebé tuur iha kuda neʼe nia leten kaer tiha animál fuik no profeta falsu neʼebé halo sinál iha animál fuik nia oin; no liuhusi sinál sira-neʼe mak profeta falsu lohi ema sira neʼebé simu marka animál fuik nian no sira neʼebé adora ninia estátua. No ida neʼebé tuur iha kuda leten soe moris deʼit animál fuik no profeta falsu ba tasi ahi nian neʼebé lakan makaʼas loos. 21 Maibé, ida neʼebé tuur iha kuda neʼe nia leten oho sira seluk ho surik naruk neʼebé sai husi nia ibun. No manu sira hotu sai bosu ho sira-nia isin.

20 No haʼu haree anju ida tun husi lalehan hodi kaer hela xave ba rai-kuak neʼebé kleʼan no iha ninia liman nia kaer hela korrente boot ida. 2 No nia kaer samea boot neʼe, samea uluk nian, neʼebé nuʼudar Diabu no Satanás, no nia kesi samea neʼe ba tinan 1.000. 3 No nia soe samea neʼe ba rai-kuak neʼebé kleʼan no taka tiha no tau selos iha leten, atu nuneʼe samea neʼe labele lohi tan nasaun sira toʼo tinan 1.000 ramata. Depois neʼe sei husik nia livre ba tempu uitoan.

4 No haʼu haree kadunan sira no mós sira neʼebé tuur iha leten, no Maromak fó kbiit ba sira atu tesi lia. Sin, haʼu haree sira neʼebé ema oho tanba sira fó sasin kona-ba Jesus no tanba koʼalia kona-ba Maromak. Sira la adora animál fuik ka ninia estátua no sira la simu marka iha sira-nia reen-toos no liman. No sira moris fali no ukun nuʼudar liurai hamutuk ho Kristu ba tinan 1.000. 5 Neʼe mak moris-hiʼas uluk nian. No ema mate sira seluk la moris fali toʼo tinan 1.000 ramata. 6 Kontente no santu ba sira neʼebé simu moris-hiʼas uluk nian; basá mate segundu nian la iha kbiit atu ukun sira, no sira sei sai nuʼudar amlulik ba Maromak no Kristu, no sei ukun nuʼudar liurai hamutuk nia ba tinan 1.000.

7 Depois tinan 1.000 foin ramata, Satanás sei sai livre fali husi ninia dadur fatin, 8 no nia sei bá hodi lohi nasaun sira iha rai nia sikun haat, katak Gog no Magog, atu halibur sira hamutuk ba funu ida. Sira sai barak hanesan rai-henek iha tasi-ibun. 9 No sira sai belar ba rai tomak no haleʼu tenda santu sira-nian no haleʼu sidade neʼebé Maromak hadomi. Maibé, ahi tun husi lalehan no han sira. 10 No kona-ba Diabu neʼebé lohi ema sira-neʼe, anju sei soe tiha nia ba tasi ahi nian neʼebé lakan makaʼas, no iha fatin neʼe iha ona animál fuik no profeta falsu; no loron-kalan sira sei hetan terus ba nafatin.

11 No haʼu haree kadunan boot ida neʼebé mutin no haree ida neʼebé tuur iha nia leten. No rai no lalehan halai tiha husi nia oin, no la iha ona fatin ba sira. 12 No haʼu haree ema sira neʼebé mate ona, kiʼik no boot, sira hamriik iha kadunan nia oin, no livru sira loke tiha. Maibé, iha mós livru seluk neʼebé loke; neʼe mak livru moris nian. No ema mate sira simu tesi-lia tuir buat neʼebé hakerek iha livru sira-neʼe nia laran hodi tuir sira-nia hahalok. 13 No tasi entrega sira neʼebé mate iha nia, no mate no rate* entrega sira neʼebé mate iha nia, no sira ida-idak hetan tesi-lia tuir sira-nia hahalok. 14 Mate no rate* soe tiha ba tasi ahi nian. No tasi ahi nian iha arti katak mate segundu nian. 15 Liután neʼe, ema sira neʼebé naran la hakerek iha livru moris nian sei soe tiha ba tasi ahi nian.

21 No haʼu haree lalehan foun no rai foun; tanba lalehan uluk nian no rai uluk nian lakon tiha ona, no tasi la iha tan. 2 No haʼu haree sidade santu, katak Jeruzalein foun, tun mai husi lalehan, husi Maromak, no sidade neʼe hanesan noiva neʼebé hatais prontu ona hodi simu nia laʼen. 3 Ho ida-neʼe, haʼu rona lian makaʼas ida husi kadunan dehan: “Haree! Maromak nia tenda hamutuk ho ema, no nia sei hela ho sira, no sira sei sai ninia povu. No Maromak rasik sei hamutuk ho sira. 4 No nia sei hamaran sira-nia matan-been hotu husi sira-nia matan, no mate sei la iha tan, no ema sei la tanis tan ka laran-susar ka laran-triste; basá buat neʼebé uluk nian lakon tiha ona.”

5 No Ida neʼebé tuur iha kadunan dehan: “Haree! Haʼu halo buat hotu sai foun.” No nia mós dehan: “Hakerek ida-neʼe bá, basá liafuan sira-neʼe mak loos duni no ema bele tau fiar.” 6 No nia dehan ba haʼu: “Buat sira-neʼe sai loos ona! Haʼu mak Alfa no Ómega, ida neʼebé uluk no neʼebé ikus. Ba ema neʼebé hamrook haʼu sei fó ba nia bee moris nian hodi la selu. 7 Ema neʼebé manán sei simu buat sira-neʼe nuʼudar liman-rohan, no haʼu sei sai sira-nia Maromak no sira sei sai haʼu-nia oan. 8 Maibé kona-ba ema taʼuk-teen, sira neʼebé la iha fiar, sira neʼebé la moos no iha toman atu halo hahalok foʼer, ohodór, halo sala-foʼer, envolve an ho anju aat sira, adora estátua, no bosok-teen hotu, sira-nia kolen mak tama iha ahi neʼebé lakan makaʼas loos. Neʼe katak mate segundu nian.”

9 No anju ida husi anju hitu neʼebé kaer hela manko hitu neʼebé nakonu ho susar hitu ikus nian, mai no dehan ba haʼu: “Mai, no haʼu sei hatudu ba ó noiva neʼebé sei sai Bibi-Oan nia feen.” 10 No ho kbiit espíritu santu nian nia lori haʼu ba foho boot no aas loos, no nia hatudu ba haʼu sidade santu Jeruzalein tun mai husi lalehan, husi Maromak 11 no ho glória husi Maromak. No sidade neʼe nia nabilan hanesan fatuk folin-boot, no hanesan fatuk-jaspe neʼebé nabilan loos. 12 No sidade neʼe iha moru neʼebé boot no aas loos no iha mós odamatan sanulu-resin-rua, no iha odamatan ida-idak iha anju ida, no iha odamatan nia leten hakerek tiha naran husi Izraél nia oan sira-nia suku sanulu-resin-rua. 13 No odamatan tolu iha parte leste, no odamatan tolu iha parte norte, no odamatan tolu iha parte súl, no odamatan tolu tan iha parte oeste. 14 No sidade neʼe nia moru harii tiha iha fatuk boot sanulu-resin-rua nia leten, no iha fatuk sira-neʼe hakerek tiha apóstolu naʼin sanulu-resin-rua nia naran, no sira mak Bibi-Oan nia apóstolu sira.

15 No ida neʼebé koʼalia ho haʼu, nia kaer hela ai-loos* osan-mean nian ida hodi sukat, atu nuneʼe nia bele sukat sidade neʼe no ninia odamatan sira no moru. 16 No sidade neʼe mak kuadradu, no ninia luan hanesan ho ninia naruk. No nia sukat sidade ho ai-loos neʼe, no sidade neʼe nia naruk no luan no aas mak kilómetru 2.200;* basá sira hotu mak hanesan deʼit. 17 No mós, nia sukat sidade neʼe nia moru, no hetan katak moru neʼe nia naruk mak cóvados 144,* hodi tuir sukat ema nian, no mós anju nian. 18 No sidade neʼe nia moru harii ho fatuk-jaspe, no sidade neʼe rasik halo husi osan-mean neʼebé diʼak liu no nabilan hanesan vidru. 19 No Maromak hafurak sidade neʼe nia moru hun ho fatuk folin-boot oioin: ida primeiru fatuk-jaspe, segundu fatuk-safira, no terseiru fatuk-kalsedónia, no haat fatuk-ezmeralda, 20 lima fatuk-sardónika, neen fatuk-sárdio, hitu fatuk-krisólitu, ualu fatuk-berilu, sia fatuk-topásiu, sanulu fatuk-krisóprasu, sanulu-resin-ida fatuk-jasintu, sanulu-resin-rua fatuk-ametista. 21 No mós, odamatan sanulu-resin-rua halo husi pérola sanulu-resin-rua; odamatan ida-idak halo husi pérola ida. No sidade neʼe nia dalan boot halo husi osan-mean neʼebé diʼak liu, hanesan vidru neʼebé moos.

22 No haʼu la haree templu ida iha sidade neʼe nia laran, basá Maromak Jeová, Ida neʼebé Kbiit Boot Liu Hotu, no mós Bibi-Oan mak sidade neʼe nia templu. 23 No sidade neʼe la presiza loro-matan no fulan atu fó naroman ba nia, tanba Maromak nia glória mak fó naroman ba nia, no sidade neʼe nia ahi-oan mak Bibi-Oan. 24 No nasaun sira sei laʼo iha ninia naroman, no liurai sira iha rai sei lori sira-nia glória ba sidade neʼe. 25 No sidade neʼe nia odamatan sei la taka iha loron, no iha neʼebá sei la iha kalan. 26 No sira sei lori nasaun sira-nia glória no respeitu ba sidade neʼe. 27 Maibé buat neʼebé foʼer no ema neʼebé halo hahalok la moos no koʼalia bosok sei la tama ba sidade neʼe; só deʼit sira neʼebé naran hakerek ona iha Bibi-Oan nia livru moris nian mak sei tama.

22 No nia hatudu ba haʼu mota bee moris nian neʼebé nabilan no moos loos, no mota neʼe suli sai husi Maromak nia kadunan no Bibi-Oan nia kadunan 2 hodi suli liuhusi sidade neʼe nia dalan boot nia klaran. No iha mota neʼe nia sorin-sorin iha ai-hun moris nian neʼebé fó fuan dala sanulu-resin-rua tinan-tinan, katak fó fuan dala ida iha fulan ida nia laran. No ninia tahan sira mak ai-moruk hodi kura nasaun sira.

3 No Maromak sei la fó-malisan ba sidade neʼe. Basá Maromak nia kadunan no Bibi-Oan nia kadunan sei hela iha sidade neʼe, no ninia atan sira sei halo serbisu santu ba nia; 4 no sira sei haree ninia oin, no ninia naran sei hakerek iha sira-nia reen-toos. 5 No mós, kalan sei la iha tan, no sira la presiza tan ahi-oan ka loro-matan nia naroman, tanba Maromak Jeová sei fó naroman ba sira, no sira sei ukun nuʼudar liurai ba nafatin.

6 No nia dehan ba haʼu: “Liafuan sira-neʼe mak loos no ema bele tau fiar; sin, Maromak Jeová, ida neʼebé koʼalia liuhusi ninia profeta sira, haruka ninia anju atu hatudu ba ninia atan sira kona-ba buat sira neʼebé tenke mosu lakleur tan. 7 No haree! Haʼu sei mai lalais. Ksolok ba ema sira neʼebé halo tuir liafuan profeta nian iha livru neʼe.”

8 No haʼu, João, mak ida neʼebé rona no haree buat sira-neʼe. No kuandu haʼu rona no haree, haʼu hakneʼak ho oin ba rai hodi adora anju neʼebé hatudu buat sira-neʼe ba haʼu. 9 Maibé nia dehan ba haʼu: “Keta halo ida-neʼe! Haʼu mós atan ida hanesan ó no ó-nia maun-alin sira neʼebé nuʼudar profeta no mós hanesan sira neʼebé halo tuir liafuan iha livru neʼe. Ó tenke adora Maromak bá.”

10 Nia mós dehan ba haʼu: “Keta rai subar liafuan profeta nian neʼebé hakerek iha livru neʼe, tanba tempu neʼebé hili tiha besik ona. 11 Ema neʼebé iha hahalok la loos kontinua halo hahalok la loos bá; no ema neʼebé iha hahalok foʼer kontinua halo hahalok foʼer bá; maibé ema neʼebé iha hahalok loos kontinua halo hahalok loos bá, no ema neʼebé santu kontinua sai santu bá.

12 “‘Haree! Haʼu sei mai lalais, no haʼu sei selu fali ema ida-idak tuir sira-nia hahalok. 13 Haʼu mak Alfa no Ómega, ida neʼebé uluk no neʼebé ikus, ida neʼebé hun no neʼebé rohan. 14 Ksolok ba sira neʼebé fase moos ona sira-nia hatais, atu nuneʼe sira bele iha direitu atu han husi ai-hun moris nian no atu bele tama ba sidade neʼe liuhusi ninia odamatan sira. 15 Iha sidade neʼe nia liʼur iha asu* sira no sira neʼebé envolve an ho anju aat no sira neʼebé halo sala-foʼer no ohodór no sira neʼebé adora estátua no mós ema hotu neʼebé hadomi lia-bosok no iha toman atu lohi.’

16 “‘Haʼu, Jesus, haʼu haruka haʼu-nia anju atu fó sasin ba imi kona-ba buat sira-neʼe ba kongregasaun sira. Haʼu mak abut no bei-oan husi David, no haʼu mak fitun dadeer nian neʼebé nabilan.’”

17 No espíritu no noiva kontinua dehan: “Mai!” No ema naran deʼit neʼebé rona tenke dehan: “Mai!” No ema naran deʼit neʼebé hamrook tenke mai; no ema naran deʼit neʼebé hakarak bele foti bee moris nian hodi la selu.

18 “Haʼu fó avizu ba ema hotu neʼebé rona liafuan profeta nian iha livru neʼe: Se ema ida aumenta tan liafuan ruma ba buat sira-neʼe, Maromak mós sei aumenta ba nia susar sira neʼebé hakerek ona iha livru neʼe; 19 no se ema ida hasai liafuan profeta nian ida iha livru neʼe, Maromak mós sei la husik nia atu simu buat diʼak neʼebé hakerek ona iha livru neʼe. Neʼe katak Maromak sei la husik nia atu han husi ai-hun moris nian no la husik nia atu tama ba sidade santu.

20 “Ida neʼebé fó sasin kona-ba buat sira-neʼe dehan: ‘Sin, haʼu sei mai lalais.’”

“Amen! Mai, Naʼi Jesus.”

21 Haʼu harohan ba Maromak katak Naʼi Jesus Kristu sei hatudu laran-diʼak boot ba santu sira.

[Nota–rodapé]