4 “Sala-foʼer”—relasaun seksuál hotu neʼebé Maromak nia ukun-fuan bandu

Liafuan gregu porneia iha arti barak. Disionáriu ida esplika katak liafuan neʼe nia arti mak “prostituisaun, hahalok la moos, sala-foʼer, neʼe inklui relasaun seksuál hotu neʼebé Maromak nia ukun-fuan bandu”. (A Greek-English Lexicon of the New Testament and Other Early Christian Literature, neʼebé W. Bauer mak hakerek, no edisaun segundu iha lia-inglés neʼebé F. W. Gingrich no F. W. Danker mak hakerek, iha Chicago no Londres iha tinan 1979, pájina 693.)

Livru Theological Dictionary of the New Testament, Vol. VI, pájina 592, esplika kona-ba Jesus nia liafuan iha Mateus 5:32 no 19:9 hodi dehan katak “πορνεία [porneia] mak relasaun seksuál ho ema neʼebé laʼós sira-nia kaben”. Tan neʼe, eskritura uza liafuan porneia hodi koʼalia kona-ba kaben-naʼin neʼebé halo sala-foʼer. Iha pájina 594, disionáriu neʼe mós esplika kona-ba eskritura iha Éfeso 5:3, 5 hodi dehan katak Paulo “komprende katak laʼós ema hotu iha kbiit atu kontrola an, 1 Kor 7:7. Entaun atu proteje an husi sala-foʼer, klosan sira neʼebé la bele kontrola an tenke kaben tuir Maromak nia ukun-fuan, 1 Kor 7:2”. Ida-neʼe hatudu katak eskritura mós uza liafuan porneia kuandu koʼalia kona-ba ema neʼebé la kaben neʼebé halo relasaun seksuál.—Haree 1 Korinto 6:9.

B. F. Westcott neʼebé nuʼudar editora ida ba The New Testament in the Original Greek, iha ninia livru Saint Paul’s Epistle to the Ephesians, neʼebé halo iha Londres no Novaiorke, 1906, iha pájina 76, kuandu nia koʼalia kona-ba Éfeso 5:3, nia esplika arti oioin husi liafuan porneia iha Eskritura no dehan: “Neʼe mak liafuan neʼebé jerál atu koʼalia kona-ba relasaun seksuál hotu neʼebé Maromak nia ukun-fuan bandu, (1) kaben-naʼin neʼebé halo sala-foʼer: Os 2:2, 4 (Septuajinta); Mat 5:32; 19:9; (2) kaben neʼebé la tuir ukun-fuan, 1 Kor 5:1; (3) sala-foʼer entre ema neʼebé la kaben.”

Liután neʼe, liafuan porneia iha Eskritura Lia-Gregu iha mós arti neʼebé hanesan símbolu deʼit. Kona-ba ida-neʼe, F. Zorell esplika iha livru ida dehan: “Ema neʼebé nega fiar neʼebé loos, envolve an uitoan ka envolve an tomak ho maromak rai seluk nian hodi hadook an husi Maromak loos ida deʼit Jahve [2 Reis 9:22; Jer 3:2, 9; Os 6:10 no seluk tan; tanba relasaun entre Maromak no ninia povu mak haree hanesan relasaun kaben nian]: Apok 14:8; 17:2, 4; 18:3; 19:2.” (Lexicon Graecum Novi Testamenti, husi F. Zorell, edisaun terseiru, 1961, coluna 1106).

Liafuan porneia mosu iha Eskritura lia-gregu hamutuk 25 hanesan tuirmai neʼe: Mateus 5:32; 15:19; 19:9; Marcos 7:21; João 8:41; Apóstolu 15:20, 29; 21:25; 1 Korinto 5:1, 1; 6:13, 18; 7:2; 2 Korinto 12:21; Galásia 5:19; Éfeso 5:3; Koloso 3:5; 1 Tesalónika 4:3; Apokalipse 2:21; 9:21; 14:8; 17:2, 4; 18:3; 19:2.

Kona-ba liafuan gregu nian porneuo, Bíblia Tradusaun Mundu Foun tradús neʼe nuʼudar “halo sala-foʼer”, ida-neʼe mosu dala ualu iha eskritura sira tuirmai neʼe: 1 Korinto 6:18; 10:8, 8; Apokalipse 2:14, 20; 17:2; 18:3, 9.

Kona-ba liafuan gregu nian ekporneuo, Bíblia Tradusaun Mundu Foun tradús neʼe nuʼudar ‘saran an ba sala-foʼer’, ida-neʼe mosu dala ida deʼit iha Judas 7.

Kona-ba liafuan gregu nian porne, Bíblia Tradusaun Mundu Foun tradús neʼe nuʼudar “feto-aat”, ida-neʼe mosu dala 12 iha eskritura sira tuirmai neʼe: Mateus 21:31, 32; Lucas 15:30; 1 Korinto 6:15, 16; Ebreu 11:31; Tiago 2:25; Apokalipse 17:1, 5, 15, 16; 19:2.

Kona-ba liafuan gregu nian pornos, Bíblia Tradusaun Mundu Foun tradús neʼe nuʼudar ‘ema neʼebé halo sala-foʼer’, ida-neʼe mosu dala sanulu iha eskritura sira tuirmai neʼe: 1 Korinto 5:9, 10, 11; 6:9; Éfeso 5:5; 1 Timóteo 1:10; Ebreu 12:16; 13:4; Apokalipse 21:8; 22:15. Livru A Greek-English Lexicon, husi H. Liddell no R. Scott, 1968, pájina 1450, esplika liafuan neʼe hodi dehan katak “labarik-mane neʼebé sai nuʼudar omoseksuál, ema neʼebé halo relasaun entre mane ho mane, ema neʼebé halo sala-foʼer, no ema neʼebé adora estátua”.