Komunikasaun mak hanesan ponte neʼebé ajuda Ita atu hakbesik ba Ita-nia oan
BA INAN-AMAN
5 Komunikasaun
NEʼE KATAK SÁ
Komunikasaun katak Ita no Ita-nia oan koʼalia nakloke ba malu hodi troka hanoin no sentimentu.
TANBASÁ IMPORTANTE
Dala ruma susar duni atu iha komunikasaun neʼebé diʼak ho Ita-nia oan joven. Bainhira sira sei kiʼik, sira lalais atu koʼalia nakloke ba Ita. Maibé kuandu sira joven ona, Ita la hatene sira-nia sentimentu no hanoin. Neʼe hanesan Ita hamriik iha mota nia sorin ida no Ita-nia oan iha sorin seluk. Bainhira oan sira hatudu katak sira lakohi koʼalia ho inan-aman, neʼe mak tempu neʼebé sira presiza duni komunikasaun ho inan-aman.
SAIDA MAK ITA BELE HALO
Sai prontu atu koʼalia iha tempu naran deʼit. Sempre prontu, maski Ita-nia oan hakarak atu koʼalia ho Ita iha kalan-boot.
“Karik Ita hakarak hatete: ‘Tanbasá ó koʼalia agora? Tanbasá ó la koʼalia ohin kedas!’ Maibé ita tenke kontente tanba sira hakarak koʼalia nakloke. Ita hotu hakarak atu oan sira fó sai sira-nia hanoin, loos ka lae?”—Lisa.
“Haʼu toman toba sedu, maibé dala ruma, haʼu-nia oan joven sira kontente liu atu koʼalia nakloke bainhira kalan-boot.”—Herbert.
BÍBLIA NIA PRINSÍPIU: “Ema ida-idak tenke kontinua buka uluk ema seluk nia diʼak, laʼós buka diʼak deʼit ba ninia an.”—1 Korinto 10:24.
Rona didiʼak. Aman ida hatete: “Bainhira haʼu-nia oan koʼalia mai haʼu, dala ruma haʼu ladún rona didiʼak tanba hanoin hela kona-ba buat seluk. No sira hatene katak haʼu la rona didiʼak.”
Se Ita mós hanesan aman neʼe, diʼak atu taka televizaun no tau dook telefone. Maski Ita hanoin katak buat neʼebé Ita-nia oan koʼalia mak ladún importante, maibé rona didiʼak hodi hatudu katak Ita hafolin ninia hanoin.
“Hatudu katak ita hafolin ita-nia oan nia sentimentu. Se sira hanoin katak ita la interese ba sira, sira sei la fó sai sira-nia sentimentu, ka fó sai fali ba ema seluk.”—Maranda.
“Se Ita-nia oan fó sai hanoin ruma neʼebé la loos, keta lalais atu hirus.”—Anthony.
BÍBLIA NIA PRINSÍPIU: “Haree didiʼak oinsá imi rona.”—Lucas 8:18.
Sai prontu iha situasaun naran deʼit. Oan balu sente susar atu koʼalia nakloke kuandu sira tuur no hateke malu ho sira-nia inan-aman.
“Ami aproveita ami-nia tempu iha karreta laran tanba fasil liu ba ami atu koʼalia nakloke ba malu iha situasaun hanesan neʼe.”—Nicole.
Tempu han mak oportunidade ida tan neʼebé diʼak atu koʼalia ba malu.
“Bainhira han-kalan, ami ida-idak konta kona-ba buat diʼak no aat neʼebé akontese iha loron neʼe. Neʼe ajuda ami atu hakbesik ba malu no prontu atu ajuda malu.”—Robin.
BÍBLIA NIA PRINSÍPIU: “Lalais atu rona [no] la ansi atu koʼalia.”—Tiago 1:19.