Espíritu santu ajuda atu “hatene momoos” Maromak nia Liafuan
“Maromak hatudu buat hirak-neʼe hotu mai ita husi espíritu. Basá espíritu koko buat hotu-hotu, toʼo hatene momoos Maromak.”—1 KOR 2:10.
1. Tuir 1 Korinto 2:10, buat importante saida mak espíritu santu halo? Ida-neʼe hamosu pergunta saida deʼit?
ITA hafolin duni dalan neʼebé Maromak Jeová uza ninia espíritu santu! Eskritura sira hatudu katak Maromak uza espíritu santu atu ajuda, atu fó sasin, atu harohan ba ita, no nuʼudar prezente kmanek ida. (Joao 14:16; Apos 2:38; Rom 8:16, 26, 27) Apóstolu Paulo hatudu katak espíritu santu halo buat seluk tan neʼebé importante, nia hatete: “Maromak hatudu buat hirak-neʼe hotu mai ita husi espíritu. Basá espíritu koko buat hotu-hotu, toʼo hatene momoos Maromak.” (1 Kor 2:10) Loos duni, Maromak Jeová uza ninia espíritu santu atu fó sai momoos lia-loos neʼebé kleʼan husi ninia Liafuan. Se karik espíritu santu la ajuda ita, ita la bele komprende kona-ba Maromak Jeová nia hakarak. (Lee 1 Korinto 2:9-12.) Maibé, ida-neʼe hamosu pergunta balu: Oinsá mak espíritu santu ajuda ita atu “hatene momoos” lia-loos neʼebé kleʼan husi Maromak nia Liafuan? Liuhusi sé mak Maromak Jeová fó sai buat hirak-neʼe iha apóstolu sira-nia tempu? Ohin loron, liuhusi sé mak espíritu santu ajuda ita atu hatene ho klaru lia-loos neʼebé kleʼan husi Maromak nia Liafuan, no oinsá?
2. Iha dalan rua saida mak Maromak uza ninia espíritu santu?
2 Jesus fó-hatene nanis kona-ba dalan rua neʼebé Maromak sei uza ninia espíritu santu. Antes Jesus mate, nia hatete ba ninia apóstolu sira: “Ksolok-naʼin, katak espíritu santu, neʼebé Aman sei haruka hodi haʼu-nia naran, sei hanorin imi buat hotu-hotu, hodi halo imi hanoin fali buat tomak neʼebé haʼu hateten ona ba imi.” (Joao 14:26) Neʼe katak espíritu santu hanorin ema kristaun hodi ajuda sira atu komprende buat neʼebé uluk sira ladún komprende. No mós, espíritu santu sei ajuda ema kristaun atu hanoin-hetan no atu halo tuir ho didiʼak buat neʼebé sira aprende ona.
Iha apóstolu sira-nia tempu
3. Saida mak Jesus hatete neʼebé hatudu katak Maromak sei fó sai neineik-neineik buat neʼebé kleʼan husi Ninia Liafuan?
3 Jesus hanorin ninia dixípulu buat barak kona-ba lia-loos neʼebé sei foun ba sira. Maski nuneʼe, sira sei iha buat barak tan atu aprende. Jesus hatete ba nia apóstolu sira: “Haʼu sei iha tan buat barak atu hateten ba imi, maibé oras neʼe imi la bele simu hotu. Wainhira espíritu lia-loos nian mai, nia sei hanorin lia-loos tomak ba imi.” (Joao 16:12, 13) Nuneʼe, Jesus hatudu katak liuhusi espíritu santu, Maromak sei fó sai neineik-neineik buat neʼebé kleʼan husi Ninia Liafuan.
4. Iha loron Pentekostes iha tinan 33, oinsá mak espíritu santu ajuda atu hanorin no atu hanoin-hetan?
4 Iha loron Pentekostes iha tinan 33, Maromak haraik “espíritu lia-loos nian” ba ema kristaun maizumenus naʼin-120 neʼebé halibur hamutuk iha Jeruzalein. Iha tempu neʼe ema haree no rona oinsá Maromak haraik ninia espíritu. (Apos 1:4, 5, 15; 2:1-4) Dixípulu sira koʼalia ho lia oioin atu fó sai kona-ba “Maromak nia hahalok waʼin”. (Apos 2:5-11) Neʼe mak tempu atu hatudu sai buat neʼebé foun. Profeta Joel fó-hatene nanis kona-ba tempu neʼebé Maromak sei haraik ninia espíritu santu. (Joel 2:28-32) Ema iha tempu neʼebá hakfodak atu haree dalan neʼebé Joel nia liafuan sai loos, no apóstolu Pedro hahú atu esplika kona-ba buat foun neʼe. (Lee Apostolu 2:14-18.) Nuneʼe, espíritu santu hanorin hodi ajuda Pedro atu hatene ho klaru katak buat neʼebé foin akontese mak kumpre buat neʼebé Joel fó-hatene nanis. Espíritu mós ajuda Pedro atu hanoin-hetan hanorin seluk husi Maromak nia Liafuan tanba nia mós temi liafuan husi salmu rua neʼebé David hakerek. (Sal 16:8-11; 110:1; Apos 2:25-28, 34, 35) Buat neʼebé ema haree no rona iha tempu neʼebá mak buat neʼebé kleʼan duni husi Maromak.
5, 6. (a) Depois Pentekostes 33, pergunta saida deʼit mak mosu kona-ba aliansa foun? (b) Liuhusi sé mak bele rezolve problema neʼebé mosu kona-ba aliansa foun? Oinsá mak irmaun sira halo desizaun kona-ba neʼe?
5 Iha apóstolu sira-nia tempu sei iha buat barak tan neʼebé presiza atu halo klaru. Porezemplu, iha pergunta sira kona-ba aliansa foun neʼebé komesa ona atu halaʼo iha loron Pentekostes. Aliansa foun neʼe ba deʼit ema judeu no ba ema husi rai seluk neʼebé muda ona ba relijiaun ema judeu sira-nian ka lae? Ema jentiu mós bele sai parte ba aliansa foun neʼe no hetan kose-mina ho espíritu santu ka lae? (Apos 10:45) Ema jentiu sira presiza hetan sirkunsizaun no halo tuir Moisés nia Ukun-Fuan ka lae? (Apos 15:1, 5) Pergunta sira-neʼe mak importante duni. Tan neʼe, presiza duni Maromak Jeová nia espíritu santu nia ajuda atu hatene momoos buat kleʼan husi Maromak nia Liafuan. Maibé, espíritu santu fó ajuda liuhusi sé?
6 Irmaun sira neʼebé iha responsabilidade iha tempu neʼebá hatene kona-ba pergunta sira-neʼebé mosu. Pedro, Paulo, no Barnabé tuir reuniaun grupu administradór nian no sira konta kona-ba oinsá mak Maromak Jeová mós simu ema jentiu sira. (Apos 15:7-12) Depois grupu administradór hanoin tiha kona-ba buat sira-neʼe no kompara ho buat neʼebé hakerek iha Eskritura Lia-Ebraiku, no mós ho espíritu santu nia ajuda, grupu administradór halo desizaun kona-ba neʼe. Tuirmai liuhusi karta, sira fó-hatene ba kongregasaun sira kona-ba desizaun neʼebé sira halo.—Lee Apostolu 15:25-30; 16:4, 5; Ef 3:5, 6.
7. Iha apóstolu nia tempu, oinsá mak Maromak fó sai lia-loos neʼebé kleʼan?
7 Espíritu santu mós book João, Pedro, Tiago, no Paulo atu hakerek karta sira hodi fó resposta kona-ba problema no pergunta ruma neʼebé mosu. Maibé kuandu Eskritura Lia-Gregu kompletu ona, kmanek kona-ba halo profesia sira no mós kona-ba fó sai matenek la iha tan. (1 Kor 13:8) Se nuneʼe, espíritu santu sei nafatin hanorin ita no ajuda ita atu hanoin-hetan ka lae? Espíritu santu sei kontinua atu ajuda ema kristaun atu buka hatene momoos buat kleʼan husi Maromak nia Liafuan ka lae? Liafuan sira husi Bíblia hatudu duni katak espíritu santu sei ajuda.
Durante loron ikus
8, 9. Sé mak sei “nabilan” ho matenek kona-ba lia-loos durante loron ikus sira?
8 Anju ida hatete nanis kona-ba loron ikus hodi dehan: “Sira neʼebé iha matenek sei nabilan hanesan naroman husi lalehan; no sira neʼebé lori ema barak atu sai ema loos, sira sei nabilan hanesan fitun ba tempu neʼebé la bele sura, no ba nafatin. . . . No koñesimentu loos sei sai barak.” (Dan 12:3, 4) Sé mak sira neʼebé iha koñesimentu ka matenek, no sé mak sira neʼebé sei nabilan? Jesus ajuda ita atu hatene kona-ba neʼe iha ninia ai-knanoik kona-ba trigu no duʼut aat. Hodi koʼalia kona-ba “loron ikus mundu neʼe nian”, Jesus hatete: “Ema diʼak sira sei nabilan hanesan loron iha sira Aman nia reinu.” (Mt 13:39, 43) Kuandu Jesus esplika ai-knanoik neʼe, nia hatete katak “ema diʼak sira” mak “reinu nia oan sira”, katak ema kristaun kose-mina.—Mt 13:38.
9 Ema kristaun kose-mina hotu sei “nabilan” ka lae? Sin, tanba ema kristaun hotu mak hola parte iha serbisu haklaken no hanorin, no hametin malu iha reuniaun sira. Ema kose-mina sira hatudu ezemplu diʼak kona-ba neʼe. (Zac 8:23) Liután neʼe, buat kleʼan husi Maromak nia Liafuan sei sai moos durante loron ikus sira. Liafuan neʼebé Daniel hakerek sei “taka hela”, ka ema sei la komprende, toʼo tempu neʼe. (Dan 12:9) Liuhusi sé mak espíritu santu sei fó sai buat kleʼan husi Maromak nia Liafuan, no oinsá?
10. (a) Liuhusi sé mak espíritu santu sei fó sai buat kleʼan husi Maromak nia Liafuan durante loron ikus sira? (b) Esplika toʼok oinsá mak lia-loos kona-ba Maromak Jeová nia templu espirituál sai klaru liután.
10 Ohin loron, bainhira iha buat ruma husi Bíblia neʼebé presiza atu halo klaru liu, espíritu santu ajuda irmaun sira neʼebé reprezenta atan “laran-metin no matenek” iha sede-jerál atu komprende lia-loos neʼebé kleʼan, neʼebé uluk seidauk komprende. (Mt 24:45; 1 Kor 2:13) Irmaun sira hotu iha Grupu Administradór hanoin didiʼak kona-ba informasaun foun neʼe. (Apos 15:6) Ikusmai, buat neʼebé sira hetan, sira fó sai iha livru sira atu ajuda ema kristaun hotu. (Mt 10:27) Nuʼudar tempu liu daudauk, karik presiza halo klaru liután hanorin ruma husi Bíblia, no ida-neʼe mós sei esplika ho momoos.—Haree kaixa “Espíritu santu ajuda atu komprende kona-ba templu espirituál”.
Oinsá espíritu santu ajuda ita ohin loron
11. Oinsá mak espíritu santu ajuda ema kristaun hotu atu hatene momoos kona-ba Maromak nia Liafuan?
11 Espíritu santu ajuda ema kristaun hotu atu hatene momoos kona-ba Maromak nia Liafuan. Hanesan ema kristaun iha tempu uluk, ohin loron kuandu ita estuda, espíritu santu ajuda ita atu komprende no hanoin-hetan informasaun neʼebé ita estuda no atubele halo tuir. (Lc 12:11, 12) Maski ita la eskola boot, ita bele komprende lia-loos neʼebé kleʼan husi Bíblia neʼebé fó sai iha ita-nia livru sira. (Apos 4:13) Entaun, saida mak ita tenke halo atubele komprende diʼak liután kona-ba buat neʼebé kleʼan husi Maromak nia Liafuan? Hanoin toʼok kona-ba buat balu neʼebé ita bele halo.
12. Bainhira mak ita presiza halo orasaun atu husu espíritu santu?
12 Harohan hodi husu espíritu santu. Kuandu ita atu lee ka estuda informasaun ruma husi Bíblia, primeiru ita presiza halo orasaun atu husu Maromak nia espíritu santu atu ajuda ita. Ita presiza halo ida-neʼe maski ita lee ka estuda informasaun ruma mesak ka ba tempu uitoan deʼit. Kuandu ita husu ho haraik-an, klaru katak ida-neʼe sei halo kontente ita-nia Aman iha lalehan. Hanesan Jesus hatete, Maromak Jeová sei haraik espíritu santu ba sira neʼebé husu ho laran.—Lc 11:13.
13, 14. Tanbasá mak prepara ba reuniaun sira importante?
13 Prepara ba reuniaun sira. Maromak ‘fó han ita iha tempu loloos’ liuhusi grupu atan “laran-metin no matenek”. Atan neʼe halaʼo ninia knaar hodi fó hanorin husi Bíblia no hodi prepara programa ba estudu no ba reuniaun sira. Informasaun neʼebé prepara ho didiʼak bele ajuda duni irmaun-irmán sira iha mundu tomak. (1 Ped 2:17; Kol 4:16; Jud 3) Kuandu ita hakaʼas an atu halo tuir matadalan husi atan neʼe, ita hatudu katak ita hakarak duni atu simu espíritu santu.—Apok 2:29.
14 Kuandu ita prepara ba reuniaun sira, diʼak atu ita lee eskritura hotu no hanoin oinsá mak eskritura sira kona informasaun neʼebé ita estuda. Halo ida-neʼe sei ajuda ita atu komprende Bíblia diʼak liután. (Apos 17:11, 12) No mós, hodi lee eskritura kuandu estuda, ita bele hatama liafuan husi Bíblia ba ita-nia neon no espíritu santu bele ajuda ita atu hanoin-hetan liafuan sira-neʼe. Liután neʼe, kuandu ita haree rasik eskritura iha Bíblia, ida-neʼe sei ajuda ita atu hanoin-hetan eskritura neʼe nia fatin iha pájina, no ida-neʼe sei ajuda ita atu buka hetan eskritura neʼe bainhira ita presiza.
15. Tanbasá mak importante atu lee livru foun hotu? Oinsá mak ita bele halo ida-neʼe?
15 Lee livru foun hotu. Livru balu ita la estuda iha reuniaun sira, maski nuneʼe livru sira-neʼe hotu prepara ba ita-nia diʼak. No mós, livru fulan-fulan nian neʼebé prepara ba ema públiku, livru sira-neʼe mós prepara ba ita-nia diʼak. Iha ita-nia moris loron-loron nian, dala barak ita tenke hein ema ruma ka buat ruma. Nuneʼe, kuandu ita bá fatin ruma diʼak atu lori livru ida neʼebé ita seidauk lee, atu ita bele aproveita oportunidade ruma atu lee uitoan. Iha livru balu neʼebé grava ona, no ema balu rona ba ida-neʼe kuandu sira laʼo ka saʼe karreta. Atan “laran-metin no matenek” buka informasaun didiʼak hodi bele hakerek livru sira neʼebé fasil atu lee, no neʼebé ajuda ema atu hakbesik ba Maromak.—Hab 2:2.
16. Tanbasá mak diʼak atu hakerek no buka informasaun liután kona-ba pergunta neʼebé mosu?
16 Hanoin kleʼan. Kuandu lee Bíblia ka livru sira-neʼebé koʼalia kona-ba Bíblia, diʼak atu uza tempu atu hanoin kleʼan kona-ba buat neʼebé ita lee. Nuʼudar ita buka atu komprende informasaun neʼebé ita lee, karik pergunta bele mosu. Ita bele hakerek pergunta sira-neʼe no buka informasaun liután kona-ba neʼe iha tempu seluk. Dala barak, kuandu ita buka-hatene klaru liután informasaun neʼebé ita rasik interese, ida-neʼe book ita atu keʼe kleʼan liután lia-loos husi Bíblia. Kuandu ita komprende diʼak liután informasaun neʼe husi Bíblia, ida-neʼe sai hanesan ita rasik nia rikusoin neʼebé ita bele uza kuandu ita presiza.—Mt 13:52.
17. Ita rasik halo programa saida atu estuda nuʼudar família ka estuda mesak?
17 Halo programa ba adorasaun família nian. Grupu Administradór fó laran-manas mai ita hotu atu hili kalan ida ka tempu ida kada semana atu estuda mesak ka estuda nuʼudar família. Tanba agora ita-nia reuniaun halaʼo dala rua deʼit iha semana ida nia laran, neʼe fó oportunidade ba ita atu halo tuir matadalan neʼe. Saida mak ita bele estuda iha Adorasaun Família nian? Família balu lee Bíblia, no kuandu iha versíkulu ruma neʼebé sira ladún komprende, sira buka informasaun no hakerek nota badak iha versíkulu neʼe nia sorin. Família barak uza tempu atu hanoin kona-ba oinsá mak sira bele halo tuir informasaun neʼebé sira estuda. Família balu nia ulun hili informasaun neʼebé nia sente katak família presiza hatene, ka informasaun neʼebé família hakarak atu hatene. Karik Ita sei hanoin informasaun seluk tan neʼebé diʼak atu estuda hamutuk ho Ita-nia família.a
18. Tanbasá mak ita labele dada an atu estuda lia-loos neʼebé kleʼan husi Maromak nia Liafuan?
18 Jesus hatete katak espíritu santu sei ajuda ita. Tan neʼe, ita labele dada an atu estuda lia-loos neʼebé kleʼan husi Maromak nia Liafuan. Lia-loos sira-neʼe mak “matenek husi Maromak”, no Maromak konvida ita atu buka hatene. (Lee Provérbios 2:1-5.b) Lia-loos sira-neʼe hatudu buat barak kona-ba “buat neʼebé Maromak hadiʼa tiha ba sira neʼebé hadomi Nia”. Nuʼudar ita hakaʼas an atu aprende liután kona-ba Maromak Jeová nia Liafuan, espíritu santu sei ajuda ita atu “hatene momoos” lia-loos neʼebé kleʼan.—1 Kor 2:9, 10.
[Nota–rodapé]
b Provérbios 2:1-5: “Haʼu-nia oan, se ó simu haʼu-nia liafuan sira no rai haʼu-nia lei sira ba ó-nia an, hodi rona didiʼak ba matenek ho ó-nia tilun, no hodi fó ó-nia laran ba matenek; liután neʼe, se ó husu atu hatene no husu atu hetan matenek; se ó kontinua buka ida-neʼe hanesan buka osan-mutin, no kontinua buka ida-neʼe hanesan rikusoin neʼebé subar hela, se nuneʼe ó sei hatene taʼuk ba Jeová, no ó sei hetan matenek husi Maromak.”
Oinsá ita hatán?
• Iha dalan rua saida mak Maromak uza ninia espíritu santu atu ajuda ita “hatene momoos” Maromak nia Liafuan?
• Liuhusi sé mak Maromak Jeová fó sai lia-loos neʼebé kleʼan iha apóstolu sira-nia tempu?
• Liuhusi sé mak espíritu santu fó sai buat kleʼan husi Maromak nia Liafuan ohin loron?
• Saida deʼit mak ita presiza halo atu espíritu santu ajuda ita?
[Kaixa iha pájina 22]
Espíritu santu ajuda atu komprende kona-ba templu espirituál
Buat ida neʼebé kleʼan husi Maromak nia Liafuan neʼebé sai klaru liu iha apóstolu sira-nia tempu mak kona-ba tabernákulu no kona-ba templu. Buat sira-neʼe reprezenta buat ida neʼebé importante liu. Paulo bolu buat importante neʼe nuʼudar “tenda [ka, tabernákulu] halibur malu loloos nian neʼebé Naʼi rasik, laʼós ema deʼit, mak harii”. (Ebr 8:2) “Tenda” neʼe mak templu espirituál, katak Maromak nia arranju atu ita bele hakbesik nia liuhusi Jesus Kristu nia sakrifísiu no ninia serbisu nuʼudar amlulik.
‘Tenda loloos’ neʼe harii iha tinan 29 kuandu Jesus hetan batizmu no Maromak Jeová simu nia nuʼudar ida neʼebé atu sai sakrifísiu neʼebé perfeitu. (Ebr 10:5-10) Depois Jesus mate no nia moris hiʼas fali, nia tama iha Fatin neʼebé Santu Liu Hotu iha templu espirituál no fó ninia sakrifísiu nia folin iha “Maromak futar oin”.—Ebr 9:11, 12, 24.
Apóstolu Paulo mós hakerek kona-ba ema kristaun kose-mina sira nuʼudar uma neʼebé “sai boot daudaun atu sai templu santu ba Maromak Jeová”. (Ef 2:20-22, MF) Templu neʼe hanesan ho ‘tenda loloos’ nian neʼebé Paulo hakerek iha ninia karta ba ema ebreu ka lae? Ba tinan barak, Maromak Jeová nia atan sira hanoin katak buat rua neʼe mak hanesan. Sira hanoin katak Maromak prepara ema kristaun kose-mina sira iha rai atu sai hanesan “fatuk” iha Maromak Jeová nia templu iha lalehan.—1 Ped 2:5.
Maibé, besik tinan 1971, irmaun sira neʼebé iha responsabilidade, neʼebé parte husi grupu atan “laran-metin no matenek”, komesa atu komprende katak templu neʼebé Paulo koʼalia iha livru Efeso la hanesan ho Maromak Jeová nia templu espirituál. Se karik ema kristaun kose-mina sira mak ‘tenda loloos’, neʼe katak tenda neʼe sei harii depois sira moris hiʼas durante tempu neʼebé “Naʼi hiʼit an mai” no ukun. (1 Tes 4:15-17) Maibé kuandu Paulo koʼalia kona-ba tabernákulu, nia hatete katak tenda “mak ilas tempu ohin neʼe nian”.—Ebr 9:9.
Hodi kompara didiʼak eskritura sira-neʼe no eskritura seluk, irmaun sira komprende klaru liután katak templu espirituál la harii daudauk no katak ema kristaun kose-mina sira laʼós “fatuk” neʼebé prepara hela iha rai atu sai parte iha Maromak Jeová nia templu iha lalehan. Tuir loloos, ema kristaun kose-mina sira serbí daudauk iha pátiu laran no iha fatin Santu husi templu espirituál, hodi hasaʼe “sakrifísiu hahiʼi” nian ba Maromak loron-loron.—Ebr 13:15.
[Dezeñu iha pájina 23]
Oinsá mak ita bele komprende diʼak liután kona-ba buat kleʼan husi Maromak nia Liafuan?