Hanoin kona-ba imi-nia hahalok

1, 2. Atu Jeová simu ita, ita presiza sai ema hanesan saida?

DALA barak, ita hakarak hatene ema seluk nia hanoin kona-ba ita-nia an rasik. Se hanesan neʼe, importante liu ba ita ema kristaun atu buka-hatene Jeová nia hanoin kona-ba ita, loos ka lae? Sin, Jeová mak Maromak neʼebé boot liu hotu iha lalehan no rai, no nia mak ita-nia moris nia hun.—Sal 36:9.

² Apóstolu Pedro hatete katak ita presiza hatudu “hahalok santu no hahalok laran-metin no taʼuk ba Maromak”. (Lee 2 Pedro 3:11, MF.a) Atu Jeová bele simu ita, ita tenke hatudu hahalok neʼebé “santu”, ka moos, iha dalan hotu. Ida-neʼe inklui ita-nia hanoin, buat neʼebé ita halo, no ita-nia adorasaun ba Maromak. Ita mós presiza hatudu “hahalok laran-metin no taʼuk ba Maromak” hamutuk ho domin no respeitu ba nia. Jeová la haree deʼit ita-nia hahalok, maibé importante mak ita-nia laran. Jeová buka-hatene ema ida-idak nia laran, tan neʼe Nia hatene duni se ita-nia hahalok mak moos no se ita adora Nia ho laran tomak.—1 Crôn 29:17.

3. Ita husu pergunta saida deʼit ba ita-nia an?

³ Diabu Satanás lakohi ita atu halo Maromak kontente. Nia buka dalan oioin atu estraga ita-nia relasaun diʼak ho Jeová. Satanás sempre uza lia-bosok atu lohi ita hodi hadook ita husi Jeová. (Joao 8:44; 2 Kor 11:13-15) Tan neʼe, ita presiza husu ba ita-nia an: ‘Iha dalan saida deʼit mak Satanás lohi ema? Haʼu bele halo saida atu Satanás labele estraga haʼu-nia relasaun ho Jeová?’

IHA DALAN SAIDA DEʼIT MAK SATANÁS LOHI EMA?

4. Satanás buka atu halo saida hodi bele estraga ita-nia relasaun ho Maromak?

⁴ Dixípulu Tiago hatete: “Ema hetan tentasaun wainhira nia hakarak aat rasik mak koko nia. Hakarak aat neʼe fó fuan, no lori ba sala; wainhira sala sai boot ona, sala lori mate mai.” (Tgo 1:14, 15) Sin, atu estraga ita-nia relasaun ho Jeová, Satanás buka atu domina ita-nia laran, tanba ita-nia laran mak book ita-nia hakarak.

5, 6. (a) Oinsá mak Satanás buka atu domina ita-nia laran? (b) Satanás uza buat tolu saida hodi book ita atu haburas hakarak aat?

⁵ Oinsá mak Satanás buka atu domina ita-nia laran? Bíblia hatete: “Mundu tomak sei iha aat-naʼin nia ukun.” (1 Joao 5:19) Tan neʼe, Satanás uza ‘buat mundu neʼe nian’. (Lee 1 Joao 2:15, 16.) Ba tinan rihun ba rihun, Diabu uza ninia mundu atu lohi ema. Tanba ita moris iha mundu aat neʼe, ita presiza proteje ita-nia an atu labele monu ba ninia lasu sira.—Joao 17:15.

⁶ Satanás koko atu haburas hakarak aat oioin iha ita-nia laran. Tuir apóstolu João, nia uza buat tolu iha mundu neʼe, (1) ‘hakarak isin nian’, (2) ‘hakarak matan nian’, no (3) “loko-an moris nian”. Satanás uza buat hotu neʼe hodi intenta Jesus. Tuir loloos, Satanás uza buat sira-neʼe kleur ona, tan neʼe nia sai matenek atu lohi ema hodi tuir ida-idak nia hahalok no fraku. Entaun, antes ita aprende oinsá atu proteje ita-nia an, mai ita buka-hatene tanbasá mak Diabu konsege lohi Eva maibé la konsege lohi Maromak nia Oan.

‘HAKARAK ISIN NIAN’

7. Oinsá mak Satanás uza ‘hakarak isin nian’ atu intenta Eva?

⁷ Ema hotu presiza iha ai-han. Jeová kria mundu neʼe atu ita bele hetan ai-han barak. Maibé Satanás koko atu uza ita-nia hakarak ba ai-han hodi intenta ita atu la halo tuir Maromak. Mai ita haree oinsá mak nia halo ida-neʼe ba Eva. (Lee Gênesis 3:1-6.b) Satanás hatete ba Eva katak nia sei la mate maski nia han ai-fuan husi “ai-hun koñesimentu nian kona-ba diʼak no aat”. Nia hatete katak hodi han ai-fuan neʼe, Eva bele sai hanesan Maromak. (Gên 2:9) Ida-neʼe hanesan Diabu dehan katak Eva la presiza halo tuir Maromak atu bele moris ba nafatin. Neʼe mak lia-bosok duni! Bainhira Diabu bosok Eva, Eva halo desizaun saida? Nia halakon kedas Satanás nia liafuan husi ninia neon? Ka husik liafuan neʼe intenta nia hodi kaan ai-fuan neʼe? Maski iha jardín laran iha ai-hun barak, maibé nia sei nafatin hanoin kona-ba ai-hun neʼebé Maromak bandu. Ikusmai, Eva ‘kuʼu ai-fuan neʼe no han’. Satanás hamosu hakarak aat iha Eva nia laran hodi kaan buat neʼebé ninia Kriadór mak bandu.

8. Oinsá mak Satanás uza ‘hakarak isin nian’ atu intenta Jesus? Tanbasá mak Satanás la konsege intenta nia?

⁸ Satanás mós uza ‘hakarak isin nian’ atu intenta Jesus. Bainhira Jesus halo jejún iha rai-fuik maran ba loron 40 no kalan 40, Satanás hatete ba nia: “Ó Maromak nia Oan duni karik, dehan toʼok ba fatuk sira-neʼe atu nakfila ba paun.” (Lc 4:1-3) Jesus halo desizaun saida? Nia uza ninia kbiit atu halo milagre hodi tau uluk ninia hakarak isin nian? Ka la simu Satanás nia liafuan? Jesus hatene katak nia labele uza ninia kbiit atu buka nia rasik nia diʼak. Tan neʼe, maski Jesus sei hamlaha, nia hanoin uluk kona-ba ninia relasaun ho Jeová. Tan neʼe, nia hatete: “Hakerek tiha ona: ‘Ema sei la moris deʼit ho ai-han, maibé ho liafuan sira neʼebé sai husi Maromak futar ibun.’”—Mt 4:4.

‘HAKARAK MATAN NIAN’

9. ‘Hakarak matan nian’ katak sá? Oinsá mak Satanás uza ida-neʼe atu intenta Eva?

⁹ João mós koʼalia kona-ba ‘hakarak matan nian’. Neʼe katak ema bele haburas ninia hakarak liuhusi ninia matan. Satanás hatete ba Eva: “Imi-nia matan sei nakloke.” No tanba Eva hateke kleur ba ai-fuan neʼe, ninia hakarak mós sai buras ba beibeik. Rezultadu mak ai-hun neʼe sai “buat neʼebé matan kaan”.

10. Oinsá mak Satanás uza ‘hakarak matan nian’ atu intenta Jesus? Jesus halo saida?

¹⁰ Oinsá mak Satanás uza ‘hakarak matan nian’ atu intenta Jesus? Satanás “hatudu ba nia . . . reinu hotu-hotu raiklaran nian, hodi dehan ba nia: ‘Haʼu sei fó ba ó kbiit no sira-neʼe nia glória tomak neʼebé saran hotu tiha ona mai haʼu atu fó ba ida neʼebé haʼu hakarak.’” (Lc 4:5, 6) Jesus la haree deʼit mundu neʼe nia reinu sira, maibé vizaun neʼe mós hatudu reinu sira-neʼe nia kmanek. Karik Satanás hanoin katak buat neʼebé Jesus haree ho matan bele book nia atu monu ba tentasaun. Nia hatete ba Jesus: “Ó adora haʼu karik, buat sira-neʼe hotu ó-nian.” (Lc 4:7) Maibé, Jesus lakohi halo tuir Satanás nia hakarak. Jesus hatete kedas: “Hakerek nanis ona: ‘Ó sei adora Naʼi, ó-nia Maromak; Nia mesak deʼit mak ó sei serbí!’”—Lc 4:8.

“LOKO-AN MORIS NIAN”

11. Oinsá mak Satanás konsege lohi Eva?

¹¹ Ikusliu João mós temi kona-ba “loko-an moris nian”. Bainhira Adão ho Eva deʼit mak iha mundu neʼe, sira la iha ema seluk atu loko an. Maski nuneʼe, sira hatudu duni hahalok foti-an. Satanás intenta Eva atu fiar katak Jeová lakohi fó buat diʼak neʼebé nia tenke simu. Diabu hatete se Eva han ai-fuan husi “ai-hun koñesimentu nian”, nia “sei sai hanesan Maromak hodi hatene diʼak no aat”. (Gên 2:17; 3:5) Ho liafuan neʼe, Satanás hakarak Eva atu hanoin katak nia la presiza Jeová atu ukun nia. Sin, ita bele fiar katak hahalok foti-an mak book Eva atu monu ba Satanás nia lia-bosok. Ikusmai, Eva han ai-fuan neʼebé Maromak bandu hodi hanoin katak nia sei la mate. Ninia hanoin neʼe sala duni!

12. Iha dalan saida mak Satanás intenta Jesus? Jesus hatán saida?

¹² La hanesan ho Eva, Jesus fó ezemplu diʼak kona-ba hahalok haraik-an. Satanás hakarak Jesus atu hatudu sai ninia kbiit espesiál no koko Maromak. Maibé Jesus la simu tanba ida-neʼe mak hahalok foti-an. Tan neʼe, Jesus hatán kedas: “Hateten tiha ona mós katak: ‘Ó sei la babeur [“koko”, MF] Naʼi, ó-nia Maromak!’”—Lee Lucas 4:9-12.

OINSÁ MAK ITA BELE PROTEJE ITA-NIA RELASAUN HO JEOVÁ?

13, 14. Ohin loron, Satanás uza saida atu lohi ita?

¹³ Lasu sira neʼebé Satanás uza hodi intenta Eva no Jesus, ohin loron mós nia nafatin uza atu intenta ita. Nia book ita liuhusi ‘hakarak isin nian’ hodi halo hahalok neʼebé la morál ka han-hemu demais. Nia mós uza ‘hakarak matan nian’ atu dada ita haree pornografia, liuliu iha internét. Liután neʼe, nia mós intenta ita ho “loko-an moris nian”, ka foti-an, hodi buka naran-boot no aumenta rikusoin.

¹⁴ ‘Buat mundu neʼe nian’ mak hanesan iska neʼebé peskadór uza hodi kail ikan. Nia uza iska neʼebé ikan gosta atu han, maibé kuandu ikan nia ibun kaʼit ona, ikan labele halo buat ida. Nuneʼe mós ho Satanás neʼebé uza ita-nia presiza baibain nian nuʼudar iska hodi dada ita atu kontra hasoru Maromak nia ukun-fuan. Satanás hakarak ita atu hanoin katak hodi buka ita-nia presiza loroloron nian no ita-nia haksolok rasik mak importante liu fali halo tuir Maromak nia hakarak. Ita sei husik Satanás atu lohi ita hanesan neʼe ka lae?

15. Hodi halo saida deʼit mak ita bele banati-tuir Jesus atu hasoru Satanás nia tentasaun?

¹⁵ Eva monu ba Satanás nia tentasaun, maibé Jesus lae. Bainhira Satanás koko Jesus, kada vés Jesus hatán husi Eskritura hodi dehan “Hakerek nanis ona”, ka “Hateten tiha ona”. Se ita badinas atu estuda Bíblia, ita mós sei hanoin-hetan eskritura sira neʼebé ajuda ita atu tahan hasoru tentasaun. (Sal 1:1, 2) Hakaʼas an mós atu hanoin filafali oinsá mak Maromak nia atan sira iha tempu uluk hatudu laran-metin nafatin. (Rom 15:4) Hodi hamtaʼuk Jeová no hadomi buat neʼebé nia hadomi no odi buat neʼebé nia odi, ita bele proteje ita-nia an husi Satanás.—Sal 97:10.

16, 17. Ita-nia hanoin bele book ita-nia hahalok oinsá?

¹⁶ Apóstolu Paulo fó laran-manas mai ita atu uza ‘ita-nia hanoin’ hodi tuir Jeová nia hakarak duké mundu nia hakarak. (Rom 12:1, 2) Paulo hatete katak ita presiza kontrola ita rasik nia hanoin, hodi dehan: “Halakon liafuan no hanorin hotu-hotu neʼebé foti an hasoru Maromak nia matenek, no halo hanoin hotu-hotu halo tuir Kristu.” (2 Kor 10:4, 5) Tanba ita-nia hanoin mak book ita-nia hahalok, ita presiza “hanoin nafatin” kona-ba buat neʼebé monu loos ba Maromak.—Flp 4:8.

¹⁷ Se ita hakarak moos nafatin iha Jeová nia oin, ita tenke hadook an husi hanoin no hakarak neʼebé foʼer. Ita presiza hadomi Jeová ho neon no laran neʼebé moos. (1 Tim 1:5) Maibé tanba ita-nia laran bele lohi ita, dala ruma ita sei la hatene kuandu ‘buat mundu neʼe nian’ kona ita. (Jer 17:9) Tan neʼe, importante ba ita atu ‘haree ita moris iha fiar ka lae’. Kuandu ita estuda Bíblia, husu ba ita-nia an: ‘Haʼu-nia hanoin monu loos ba Maromak ka lae?’—2 Kor 13:5.

18, 19. Tanbasá mak ita presiza hakaʼas an atu sai ema neʼebé monu loos ba Jeová nia laran?

¹⁸ Buat ida tan neʼebé ajuda ita atu la simu ‘buat mundu neʼe nian’ mak hodi hanoin-hetan João nia liafuan neʼebé dehan: “Mundu neʼe no domin ba nia sei liu daudaun; maibé ema neʼebé halo tuir Maromak nia hakarak sei moris ba nafatin.” (1 Joao 2:17) Satanás nia mundu neʼe haree hanesan buat neʼebé metin no tahan ba nafatin. Maibé loron ida mundu aat neʼe sei lakon mohu. Hodi hatene ida-neʼe sei ajuda ita atu la monu ba Satanás nia lasu.

¹⁹ Apóstolu Pedro dehan katak iha “Maromak nia loron”, ‘ahi sei han lakon tiha lalehan, no ahi han tiha fitun fulan sira no sei nabeen’. Nuʼudar ita hein daudauk tempu neʼe, ita presiza sai ema neʼebé Maromak sei simu. (2 Ped 3:12) Lakleur deʼit, Jeová nia loron sei mai, no nia sei halakon buat hotu iha Satanás nia mundu aat neʼe. Toʼo tempu neʼebá, Satanás sei kontinua uza ‘buat mundu neʼe nian’ atu intenta ita, hanesan nia uluk halo ba Eva no Jesus. Ita labele sai hanesan Eva neʼebé buka nia hakarak rasik, tanba hahalok ida-neʼe katak ita simu Satanás nuʼudar ita-nia maromak. Ita hakarak halo tuir Jesus hodi tahan hasoru Satanás nia tentasaun oioin. Entaun, mai ita hakaʼas an atu sai ema neʼebé monu loos ba Jeová nia laran.