Aprende husi manu sira neʼebé semo iha lalehan

TINAN 3.000 liubá, fiar-naʼin ida naran Job rekoñese katak ita ema bele aprende buat barak liuhusi manu sira neʼebé semo iha lalehan. Dala barak, Bíblia temi manu sira atu hanorin ita kona-ba moris no ita-nia relasaun ho Maromak. Mai ita haree ezemplu balu.

FATIN BA MANU-ANDORIÑA NIA KNUUK

Ema iha sidade Jeruzalein toman atu haree manu-andoriña neʼebé halo sira-nia knuuk iha uma-kakuluk okos, inklui mós iha Salomão nia templu. Tinan-tinan, manu-andoriña balu bá templu iha Jeruzalein hodi haboot sira-nia oan iha fatin neʼe, neʼebé seguru tebes.

Ema neʼebé hakerek Salmo (Mazmur) 84 mak Kora nia oan-mane ida neʼebé hetan knaar atu serbí iha templu durante semana ida kada fulan neen. Nia hetan manu-andoriña nia knuuk iha templu, no neʼe halo nia sente laran-moras no hakarak atu hela iha Maromak Jeová nia templu hanesan ho manu-andoriña. Nia dehan: “Oh Jeová, . . . Ita-nia tenda santu neʼebé kmanek mak furak tebes! Haʼu hakarak tebes, sin, haʼu . . . hakarak tebes atu bá iha Jeová nia pátiu sira. . . . Manu sira mós hetan ona hela-fatin iha Ita-nia uma no manu-andoriña halo knuuk ba nia an, hodi tau matan ba ninia oan sira besik Ita-nia altár kmanek, oh Jeová!” (Salmo [Mazmur] 84:1-3) Oinsá ho ita? Ita ho ita-nia oan sira hafolin tebes fatin neʼebé ita adora Maromak no kontente atu halibur hamutuk beibeik hodi halaʼo ita-nia adorasaun ka lae?—Salmo (Mazmur) 26:8, 12.

MANU-SEGOÑA HATENE NINIA TEMPU

Profeta Jeremias dehan: “Manu-segoña iha lalehan deʼit mós hatene ho loloos ninia tempu.” Manu-segoña mak manu neʼebé halo viajen dook. Bainhira tempu malirin iha Europa ramata ona, manu-segoña mutin hamutuk 300.000 liu mak husik Áfrika, no liu mota Jordaun iha rai-Izraél atu bele toʼo Europa Norte. Manu sira-neʼe hatene tempu neʼebé loos atu fila fali ba fatin neʼebé hanesan iha rai Europa hodi bele iha oan durante tempu manas. Loos duni, sira “hatene ho didiʼak oras neʼebé sira fila fali ba sira-nia knuuk”.—Jeremias (Yeremia) 8:7.

Livru ida (Collins Atlas of Bird Migration) dehan: “Buat ida neʼebé halo ita hakfodak mak manu sira-neʼe moris mai hatene ona oinsá atu halo viajen.” Maromak Jeová kria manu balu atu iha kapasidade hanesan neʼe, maibé Nia kria ema ho matenek atu buka-hatene kona-ba tempu no oras. (Lucas 12:54-56) La hanesan ho manu-segoña sira, liuhusi Bíblia, ita ema bele hatene kona-ba buat oioin neʼebé akontese daudaun neʼebé hatudu sai ita moris iha tempu hanesan saida. Maibé ema Izraél sira iha Jeremias nia tempu la tau atensaun ba ida-neʼe. Kona-ba sira, Maromak dehan: “Sira la simu ona Jeová nia liafuan, entaun, sira iha matenek saida?”—Jeremias (Yeremia) 8:9.

Ohin loron, ita haree evidénsia barak neʼebé hatudu ho klaru katak ita moris iha tempu neʼebé Bíblia bolu nuʼudar “loron ikus sira”. (2 Timóteo 3:1-5) Hanesan ho manu-segoña, Ita mós hatene ho didiʼak “tempu” ka lae?

MANU-MAKIKIT BELE HAREE BA DOOK

Bíblia mós temi dala barak kona-ba manu-makikit tanba iha rai-Izraél iha manu-makikit barak. Sira halo sira-nia knuuk iha fatin aas iha rai-lolon, no tuir Bíblia, husi fatin aas neʼe sira ‘buka hahán; sira-nia matan haree ba fatin dook’. (Jó [Ayub] 39:27-29) Manu sira-neʼe iha matan neʼebé kroʼat tebes toʼo bele haree-hetan koellu neʼebé dook kilómetru ida.

Hanesan ho manu-makikit neʼebé bele “haree ba fatin dook”, Maromak Jeová mós bele haree dook ba ita-nia futuru. Nia dehan: “Husi uluk kedas haʼu fó-hatene nanis buat neʼebé sei mosu, no husi tempu uluk haʼu fó sai buat sira neʼebé seidauk akontese.” (Isaías [Yesaya] 46:10) Tan neʼe, kuandu ita halo tuir Jeová nia konsellu, ita bele hetan benefísiu boot husi Ninia matenek.—Isaías (Yesaya) 48:17, 18.

Bíblia mós kompara manu-makikit ho ema neʼebé tau fiar ba Maromak, hodi dehan: “Sira neʼebé tau esperansa ba Jeová sei hetan fali kbiit. Sira sei semo aas hanesan manu-makikit.” (Isaías [Yesaya] 40:31) Bainhira manu-makikit sira semo aas, sira loke luan sira-nia liras hodi aproveita anin neʼebé saʼe daudaun ba leten. Sira la presiza uza sira-nia forsa rasik atu semo toʼo fatin dook. Hanesan neʼe mós, ema neʼebé tau fiar ba Jeová bele sadere ba Ninia kbiit, tanba Nia promete ona ba sira atu fó “kbiit neʼebé la hanesan baibain”.—2 Korinto 4:7, 8.

“MANU-INAN HALIBUR NIA OAN”

Loron balu antes Jesus mate, nia haree ba sidade Jeruzalein no dehan ho laran-triste: “Jeruzalein, Jeruzalein, ó neʼebé oho profeta sira no tuda ema neʼebé Maromak haruka ba ó! Dala hira ona mak haʼu hakarak atu halibur ó-nia oan sira hanesan manu-inan halibur nia oan iha nia liras okos, maibé imi lakohi!”—Mateus 23:37.

Manu-inan sira hakaʼas an duni atu proteje sira-nia oan. Liuliu manu sira neʼebé baibain halo sira-nia knuuk iha rai, sira tenkesér matan-moris ba perigu oioin. Porezemplu, kuandu manu-makikit ida semo iha sira-nia leten, manu-inan sira sei hasai lian hodi bolu sira-nia oan, no oan sira sei halai tama ba manu-inan nia liras okos. Nuneʼe mós bainhira rai manas demais ka udan tun makaʼas. Hanesan ho manu-inan, Jesus mós hakarak duni atu proteje ema iha Jeruzalein husi adorasaun neʼebé laloos. Ohin loron mós, Jesus konvida ita atu hakbesik ba nia no simu kmaan no protesaun husi susar oioin neʼebé hatodan ita-nia moris.—Mateus 11:28, 29.

Loos duni, ita bele aprende buat barak husi manu sira. Bainhira ita haree manu sira, koko toʼok atu hanoin-hetan eskritura sira neʼebé temi ona. Manu-andoriña bele ajuda ita atu hafolin fatin neʼebé ita adora Maromak Jeová. Mai ita sadere ba Maromak atu simu kbiit hanesan manu-makikit neʼebé semo aas. Mai ita hakbesik ba Jesus atu buka protesaun hanesan manu-oan sira neʼebé tama ba manu-inan nia liras okos. No hanesan ho manu-segoña, mai ita matan-moris nafatin ba buat neʼebé akontese daudauk iha ita-nia tempu.